आज आपातकाल के उनचासवां वर्षगांठ म रायपुर स्थित मुख्यमंत्री निवास म ‘‘आपातकाल स्मृति दिवस‘‘ कार्यक्रम के आयोजन करे गीस। ए बेरा म मुख्यमंत्री विष्णुदेव साय ह लोकतंत्र सेनानी-मीसाबंदी मन ल शॉल अउ श्रीफल भेंट देके सम्मानित करीन। ए दउरान लोकतंत्र सेनानी संघ ह पांच बछर के बकाया सम्मान निधि दे बर मुख्यमंत्री ल चांदी के मुकुट पहिना के उंखर आभार जतईन।
नये आपराधिक कानून
नवा आपराधिक कानून सोमवार एक जुलाई ले लागू होही, जेखर बाद इंडियन पीनल कोड-आईपीसी के जघा भारतीय न्याय संहिता अउ सीआरपीसी के जघा भारतीय नागरिक सुरक्षा संहिता अउ इंडियन एविडेंस एक्ट के जघा भारतीय साक्ष्य अधिनियम लागू होही। नवा कानून के माध्यम ले ए सुनिश्चित करे जाही कि लोगन मन ल तुरते न्याय मिलय। एखर बर नवा तकनीक ल पूरा प्रक्रिया म सामिल करे गेहे।
शाला प्रवेश उत्सव
प्रदेस म आज ले नवा सिक्षा सत्र के सुरूवात होगे हे। शाला प्रवेश उत्सव के तहत आज स्कूल पहुंचइया लइका मनके तिलक लगाके अउ मिठाई खिलाके स्वागत करे गीस। उहें, नवा प्रवेश ले लइका मन ल स्कूल ड्रेस, पुस्तक अउ साइकिल घलो दे गीस। ए दउरान प्रदेस के सासकीय, छत्तीसगढ़ माध्यमिक सिक्षा मंडल ले जुड़े निजी अउ आत्मानंद स्कूल मन म सांस्कृतिक कार्यक्रम घलो आयोजित करे गीस। ए कार्यक्रम म स्कूल के प्राचार्य, सिक्षक अउ कर्मचारी मनके संग जनप्रतिनिधि मन ह घलो हिस्सा लीन।
मुख्यमंत्री विष्णुदेव साय ह नवा सैक्षणिक सत्र बर लइका मन ल बधाई अउ सुभकामना दीन हे। ओमन सिक्षक मन ले आग्रह करे हे कि ओमन अपन मार्गदर्शन म लइका मन ल अच्छा सिक्षा अउ संस्कार देके ओमन ल अच्छा नागरिक बनाय।
राष्ट्रीय शिक्षा नीति-पत्रकारवार्ता
राष्ट्रीय शिक्षा नीति-दू हजार बीस के सैक्षणिक सत्र दू हजार चौबीस-पच्चीस ले स्नातक स्तर म प्रदेस के सासकीय अउ निजी विश्वविद्यालय म लागू करे जाही। राज्य शासन के उच्च शिक्षा विभाग के सचिव प्रसन्ना आर. ह आज रायपुर म आयोजित एक पत्रकारवार्ता ल संबोधित करत कहिन कि राज्य के केवल दू विश्वविद्यालय खैरागढ़ स्थित इंदिरा कला संगीत विश्वविद्यालय अउ ओपन यूनिवर्सिटी ल छोड़के प्रदेस के सबो सासकीय अउ निजी विश्वविद्यालय मन म राष्ट्रीय शिक्षा नीति के क्रियान्वयन करे जावत हे। इंदिरा कला संगीत विश्वविद्यालय अउ ओपन यूनिवर्सिटी म अवइया बछर ले राष्ट्रीय सिक्षा नीति लागू करे जाही।
बाढ़ नियंत्रण समिति-बैठक
वन विभाग के अपर मुख्य सचिव ऋचा शर्मा के अध्यक्षता म आज मंत्रालय म बाढ़ नियंत्रण समिति के बइठका होइस। बइठका म बरसात के मौसम म राज्य के आने-आने जघा म बाढ़ आय म ओखर ले निपटे के तैयारी के संबंध म विचार-विमर्स करे गीस। उहें, बाढ़ के दउरान राहत शिविर के व्यवस्था के संग आने-आने विभाग डहार ले होवइया कार्यवाही अउ तैयारी के संबंध म घलो चर्चा करे गीस। श्रीमती शर्मा ह पहुंचविहीन क्षेत्र म सबो जरूरी सामान भंडारण करे के निरदेस दीन। ओमन ह जादा बरसा होय म नदी अउ बड़े जलासय के जलस्तर म निगरानी राखे बर कहिन। संगेसंग कंट्रोल रूम बनाय के निरदेस घलो दीन। उहें, बांध के जलस्तर बाढ़े म पानी के निकले बर नीचे हिस्सा के जिला अउ सीमावर्ती राज्य मन ल बारह घंटा पहिली बताय बर किहीन। ओमन ह जर्जर भवन म रहवइया लोगन मन ल आने सुरक्षित जघा म अस्थायी रूप ले बसाय जाय के व्यवस्था करे के घलो निरदेस दीन।
जनदर्शन कार्यक्रम
मुख्यमंत्री विष्णुदेव साय काली सत्ताईस जून ले जनदर्शन कार्यक्रम के तहत लोगन मन ले मिलके उंखर परेसानी ल सुनही। संगेसंग जनता के सुझाव अउ सासकीय योजना के काम के जानकारी घलो लोगन मन ले पाही। ए कार्यक्रम हर गुरूवार के मुख्यमंत्री निवास कार्यालय म बिहनिया ग्यारह बजे ले मंझनिया एक बजे तक आयोजित करे जाही।
अयोध्या आस्था स्पेशल ट्रेन
दुरूग ले आज अयोध्या बर आस्था स्पेशल ट्रेन ल रवाना करे गीस। ए ट्रेन ल उप मुख्यमंत्री अरूण साव, विजय शर्मा अउ कैबिनेट मंत्री केदार कश्यप ह हरी झंडी देखईस। ए दउरान श्री साव ह कहिन कि छत्तीसगढ़ के लोगन मन ल अयोध्या स्थित श्रीराम मंदिर के दर्सन कराय के मोदी के गारंटी ल राज्य सरकार ह पूरा करत हे।
जम्मू-वैष्णोदेवी-हेलीकॉप्टर सेवा
जम्मू-कश्मीर म जम्मू ले वैष्णोदेवी तक हेलीकॉप्टर सेवा काली ले सुरू होगे हे। ए सेवा तीर्थस्थल तक आय-जाय के एक आरामदायक साधन हे। हर दिन चार उड़ान भरे जाही। तीर्थयात्री श्राइन बोर्ड के आधिकारिक वेबसाइट के माध्यम ले हेलीकॉप्टर सेवा बुक कर सकत हे।
एनआईए-कार्रवाई
राष्ट्रीय जांच एजेंसी-एनआईए ह छत्तीसगढ़ के बारह जघा म छापा के कार्रवाई करीन। एमा माओवाद प्रभावित तोयनार, कुशलनार, बेडेनहोद अउ धौड़ी म जांच अभियान चलाय गीस। जांच के दउरान एनआईए ह नौ लाख नब्बे हजार रूपिया ले जादा के नगद राशि बरामद करे हे। उहें, माओवादी घटना म प्रयोग होवइया मोबाइल फोन, टैबलेट घलो जब्त कर ले गेहे। जानबा के मुताबिक ए बछर एनआईए ह भाजपा नेता रतन दुबे के हत्या के मामला म केस दर्ज करे रिहीन। इही संदर्भ म प्रदेसभर म ए कार्रवाई करे गेहे।
एसीबी-कार्रवाई
सूरजपुर जिला म आज एंटी करप्शन ब्यूरो के टीम ह पुलिस के एक सहायक उप निरीक्षक ल रिश्वत लेवत रंगेहाथ गिरफ्तार करे हे। आरोप हे कि रामानुज नगर के सूरता गांव म रहवइया एक मनखे ले सहायक उप निरीक्षक माधव सिंह ह पाछु होय एक अपराध म धारा जोड़े के नाम म तीस हजार रूपिया रिश्वत के मांग रिहीस। एखर बाद संबंधित मनखे ले एसीबी म शिकायत करीन। आज एंटी करप्शन ब्यूरो के टीम ह जाल बिछाके आरोपी सहायक उप निरीक्षक अउ ओखर एक सहयोगी ल दस हजार रूपिया के रिश्वत लेवत रंगेहाथ गिरफ्तार कर लीन।
खेल अलंकरण-आवेदन
खेल अउ युवा कल्याण विभाग डहार ले राज्य खेल अलंकरण बर खिलाड़ी, प्रसिक्षक अउ निर्णायक मन ले तीस जून तक आवेदन मंगाय गेहे। खिलाड़ी मन ल हर बछर बर आने-आने आवेदन करना होही। ए पुरस्कार मन म सहीद राजीव पांडे, सहीद कौशल यादव, वीर हनुमान सिंह, सहीद पंकज विक्रम सम्मान, सहीद विनोद चौबे सम्मान अउ मुख्यमंत्री ट्रॉफी सामिल हे। एखरे संग वित्तीय बछर दू हजार इक्कीस-बाईस अउ बाईस-तेईस बर नगद पइसा, प्रेरणा निधि अउ डाईट मनी बर घलो आवेदन मंगाय गेहे।
अउ अब मौसम के हाल..
छत्तीसगढ़ म मानसून आज ले एक घांव फेर सक्रिय होगे हे। मौसम विभाग ह अवइया पांच दिन तक प्रदेस के कतकोन इलाका मन म बरसा होय के संभावना जताय हे। मौसम विभाग के अनुसार एक द्रोणिका मध्य गुजरात ले पूर्वी विदर्भ तक बने हे। उहें, एक उपरी हवा के चक्रीय चक्रवाती घेरा पश्चिम मध्य बंगाल के खाड़ी अउ ओखर ले लगे उत्तर-पश्चिम बंगाल के खाड़ी के उपर बने हे। एखर असर ले काली प्रदेस म कतकोन जघा म हल्का ले कम बरसा होय या गरज-चमक के संग छींटा पड़े के संभावना हे। उहें, एक-दू जघा म अंधड़ चले, आकाशीय बिजली गिरे अउ ज्यादा पानी गिरे के चेतावनी दे गेहे। ज्यादा बरसा के जघा दक्षिण छत्तीसगढ़ रइही।
ऐति, राजधानी रायपुर के संग कतकोन इलाका म आज मंझनिया के बाद मौसम के बदले अउ गरज-चमक के संग बूंदाबांदी होइस।
दुर्घटना
राजधानी रायपुर के मंदिर हसौद थाना क्षेत्र म आज दू कार के बीच म टक्कर होगीस। ए हादसा म दू युवक के मउका म ही मउत होगीस। फेर, पांच आने युवक गंभीर रूप ले घायल होगे हे। घायल मन ल राजधानी के निजी अस्पताल म भर्ती कराय गेहे। मृतक युवक रिम्स मेडिकल कॉलेज के छात्र बताय जात हे। ए हादसा राष्ट्रीय राजमार्ग क्रमांक-तिरपन म मंदिर हसौद टोल नाका तीर होइस।
मनरेगा-मानव दिवस
महात्मा गांधी राष्ट्रीय ग्रामीण रोजगार गारंटी योजना-मनरेगा म अवइया सबले ज्यादा रोजगार दिलाय के मामला म रायपुर जिला ह प्रदेस म दूसरइया स्थान पाय हे। जिला ह बछर दू हजार चौबीस-पच्चीस म जून महीना तक उन्नीस लाख ले जादा लोगन मन ल रोजगार देके लक्ष्य राखे रिहीस। फेर, लक्ष्य म तीस लाख ले जादा लोगन ल रोजगार दे म सफलता पाय हे, जउन आवंटित लक्ष्य ले एक सौ उनसठ प्रतिसत जादा हे।