छत्तीसगढ़ विधानसभा के मानूसन सत्र ल बाईस जुलाई ले सुरू करे जाही। छब्बीस जुलाई तक चलइया ए सत्र के दउरान कुल पांच ठिन बइठका राखे जाही। ए सत्र म वित्तीय कार्य के संगेसंग अउ दिगर सरकारी काम मन ल घलो संपादित करे जाही। ए संबंध म आज छत्तीसगढ़ विधानसभा के सचिव दिनेश शर्मा ह अधिसूचना जारी कर देहे।
मुख्यमंत्री-प्रधानमंत्री मुलाकात
मुख्यमंत्री विष्णुदेव साय ह आज प्रधानमंत्री नरेन्द्र मोदी ले संसद भवन म भेंट करीन। ए दउरान श्री साय ह श्री मोदी ल तीसरइया घांव प्रधानमंत्री बने म बधाई दीन। ओमन प्रधानमंत्री ल अमृत काल छत्तीसगढ़ विजन दू हजार सैंतालीस ‘विजन डॉक्यूमेंट‘ के बारे म जानकारी देवत बतईन कि एखर बनाय के काम ल राज्य नीति आयोग डहार ले करे जात हे, जउन ल एक नवंबर के दिन राज्योत्सव के मउका म प्रदेस के जनता मन ल भेंट करे जाही। मुख्यमंत्री ह पाछु छह महीना के भीतर होय माओवादी मनके खिलाफ कार्रवाई के जानकारी घलो दीन। ओमन बतईन कि नियद नेल्लानार योजना के तहत अभी वर्तमान समय म तेईस ठन कैम्प खोले गेहे, जेमा नब्बे ठन गांव ल सामिल करे गेहे अउ अवइया समय म उनतीस ठन कैम्प अउ खोले जाही।
प्रधानमंत्री-आपातकाल
प्रधानमंत्री नरेन्द्र मोदी ह बछर उन्नीस सौ पचहत्तर म आपातकाल के विरोध करइया जम्मों झन लोगन मन ल श्रद्धांजलि दीन। एक ठन सोसल मीडिया म पोस्ट करके श्री मोदी ह किहीन कि ए दिन ह सुरता देवाथे कि कइसे कांग्रेस पार्टी ह बुनियादी स्वतंत्रता ल खतम कर दीन अउ देस के संविधान ल मिटा दीन। ओमन किहीन कि तत्कालीन कांग्रेस सरकार ह जम्मों लोकतांत्रित सिद्धांत मनके अवहेलना करीन हे अउ देस ल जेल बना दे रिहीन।
ऐति, भारतीय जनता पार्टी डहार ले छत्तीसगढ़ म घलो आज आपातकाल काला दिवस मनाय गीस। ए मउका म जिला मुख्यालय मन म कार्यक्रम राखे गीस अउ मीसाबंदी मनके सम्मान करे गीस।
जांजगीर म राखे गे एक ठन कार्यक्रम म विधानसभा के पूर्व नेता प्रतिपक्ष धरमलाल कौशिक ह सामिल होइन अउ सत्रह झिन मीसाबंदी मनके सम्मान करीन। ए दउरान श्री कौशिक ह किहीन कि प्रदेस म एक घांव फेर भाजपा के सरकार बने म मीसाबंदी मनके पेंसन ल सुरू करे गेहे।
प्रशिक्षण सत्र
छत्तीसगढ़ राज्य विधिक सेवा प्राधिकरण बिलासपुर डहार ले प्रदेस के तेईस ठन जिला मन म बनाय गे लीगल एड डिफेंस काउंसिल सिस्टम म नियुक्त चीफ, डिप्टी चीफ अउ असिस्टेंट लीगल एड डिफेंस काउंसिल बर तीन दिन के प्रसिक्षण कारीकरम राखे गीस। ए कारीकरम के आखिरी दिन आज छत्तीसगढ़ उच्च न्यायालय के मुख्य न्यायाधीश न्यायमूर्ति रमेश सिन्हा ह प्रसिक्षण के जघा के निरीक्षण करीन। ए मउका म जम्मां झन प्रतिभागी मन ल संबोधित करत ओमन किहीन कि प्रसिक्षण के फायदा उठावत अपन विधिक कौसल ल अउ जादा विकसित करय। संगेसंग ओमन यहू किहीन कि अभी अवइया तीन ठन नवा आपराधिक कानून के संबंध म जम्मों जानकारी घलो राखय।
खबर के मुताबिक ए प्रसिक्षण कारीकरम ल तेईस ले पच्चीस जून तक राखे गे रिहीस।
माओवादी मुठभेड़
धमतरी जिला म पुलिस के टीम अउ माओवादी मनके बीच होय मुठभेड़ म एक झन माओवादी मारे गीस। ए माओवादी उपर पांच लाख रूपिया के इनाम राखे गे रिहीस।
पुलिस के मुताबिक नगरी ब्लॉक के डीआरजी के जवान तलाशी अभियान म निकले रिहीन। उही समय मुहकोट अउ आमझर के जंगल म माओवादी मन डहार ले पुलिस टीम उपर फायरिंग सुरू कर दीन। जवाबी कार्रवाई म एक झन पांच लाख के इनामी माओवादी मारे गीस। पुलिस के टीम ह घटना के जघा ले माओवादी के लास के संगेसंग रायफल अउ माओवादी सामग्री बरामद करे हे।
खनिज नीलामी
केन्द्रीय कोयला अउ खान मंत्री जी. किशन रेड्डी अउ कोयला अउ खान राज्यमंत्री सतीश चन्द्र दुबे ह काली नई दिल्ली म राखे गे एक ठिन कारीकरम म खनिज मनके नीलामी के चौथा दउर के सुरूवात करीन। ए नीलामी म खनिज मनके इक्कईस ठन ब्लॉक ल सामिल करे गेहे। एमा ग्यारह ठन नवा ब्लॉक हवय, जेमा छत्तीसगढ़ के संगेसंग छह ठन राज्य ल सामिल करे गेहे। कोरबा जिला म स्थित देस के पहिली लीथियम खदान के नीलामी करइया छत्तीसगढ़ ह देस के पहिली राज्य बन गेहे।
खबर के मुताबिक जियोलॉजिकल सर्वें ऑफ इंडिया-जीएसआई ह सुरूवाती सर्वें म पाय गेहे कि कटघोरा इलाका के घुचापुर गांव के तीर ढाई सौ हेक्टेयर क्षेत्र म दुर्लभ धातु लीथियम ल बड़ मात्रा म मौजूद पाय गेहे।
जनदर्शन कार्यक्रम
मुख्यमंत्री विष्णुदेव साय ह सत्ताईस जून ले जनदर्शन कार्यक्रम सुरू करही। ए जनदर्सन कारीकरम म ओमन ह लोगन मन ले भेंट करके ओखर मनके समस्या सुनही अउ समस्या के समाधान के उपाय बताही। संगेसंग ओमन ह लोगन मन ले सुझाव घलो मांगही। ए कारीकरम ल हफ्ता म एक घांव हरेक बिरस्पत के दिन मुख्यमंत्री निवास कार्यालय म बिहनिया ग्यारह बजे ले मंझनिया एक बजे तक राखे जाही।
नये कानून-कार्यशाला
देशभर म एक जुलाई ले लागू होवइया तीन ठन नवा आपराधिक कानून – भारतीय न्याय संहिता, भारतीय नागरिक सुरक्षा संहिता अउ भारतीय साक्ष्य अधिनियम के संबंध म आज रायगढ़ म एक ठन कार्यक्रम राखे गीस। ए कारीकरम म राज्यसभा सांसद देवेन्द्र प्रताप सिंह ल माईपहुना बनाय गे रिहीस। ए दउरान ओमन किहीन कि नवा कानून के बने ले लोगन मन ल झटकुन न्याय मिलही। ओमन यहू किहीन कि अपराधी मन बर नवा कानून म गंभीर सजा अउ समाज ल अपराध मुक्त बनाय बर बड़का प्रावधान करे गेहे। ए कारीकरम म कलेक्टर कार्तिकेया गोयल अउ पुलिस अधीक्षक दिव्यांग पटेल ह घलो मौजूद रिहीन।
पहाड़ी कोरवा/बिरहोर-नियुक्ति पत्र
कोरबा जिला के विशेष पिछड़ी जनजाति समुदाय पहाड़ी कोरवा अउ बिरहोन जनजाति के एक सौ आठ झन युवा मन ल श्रम मंत्री लखनलाल देवांगन ह अतिथि सिक्षक अउ चपरासी के पद म नियुक्ति प्रमाण पत्र सौंपीन। एमा उनतीस झन युवक मन ल अतिथि सिक्षक अउ उनयासी झन युवक मन ल चपरासी के रूप म रोजगार देवाय गेहे।
दुर्घटना
बलरामपुर जिला म दू ठन अलग-अलग जघा म होय सड़क हादसा म चार झन मनखे के मउत होगे अउ एक झन मनखे ह घायल होगे। खबर के मुताबिक पहिली घटना राजपुर-बलरामपुर राष्ट्रीय राजमार्ग म भेड़ाघाट मोड़ म होइस। ट्रक अउ फटफटी के आपस म टकराय ले एक झिन माईलोगिन समेत तीन झन मनखे के मउत होगे। उहें, ट्रक के कंडेक्टर ह गंभीर रूप ले घायल होगे, जउन ल इलाज खातिर मेडिकल कॉलेज म भर्ती कराय गेहे।
एक ठन अउ दिगर घटना म एक झन मनखे ह रद्दा म रेंगत जात रिहीस हे, उही समय एक ठन चरचकिया गाड़ी ह पाछु ले टक्कर मार दीस। ए दउरान ओ मनखे ह गंभीर रूप ले घायल होगे। जउन ल तीर के स्वास्थ्य केन्द्र म भर्ती कराय गीस, जिहां डॉक्टर मन ह ओ मनखे ल मृत घोसित कर दीन।
ओति, कोरबा-चांपा रद्दा म मड़वारानी गांव के तीर आज बिहनिया एक ठन ट्रक गाड़ी अउ ट्रेलर गाड़ी के आपस म टकरा गे। ए हादसा म ट्रेलर गाड़ी चलइया ह केबिन म फंस गे, जउन ल बड़ा मुश्किल म निकाले गीस, जउन ल अस्पताल म भर्ती कराय गेहे।
अजय सिंह-पदभार
छत्तीसगढ़ राज्य निर्वाचन आयोग के पांचवां निर्वाचन आयुक्त के रूप म आज अजय सिंह ह कार्यभार संभालीन। बछर उन्नीस सौ तिरासी बैच के आईएएस अधिकारी श्री सिंह ह फरवरी दू हजार बीस म सरकारी सेवा ले रिटायरमेंट होय रिहीन।
खबर के मुताबिक राज्य निर्वाचन आयुक्त के पद म नियुक्ति होय के पहिली ओमन राज्य योजना आयोग म उपाध्यक्ष के पद म काम करत रिहीन।