राष्ट्रीय परीक्षा एजेंसी याने एनटीए के माध्यम ले आने-आने परीक्षा के सुचारू, पारदर्सी अउ निष्पक्ष संचालन ल पक्का करे बर शिक्षा मंत्रालय ह बिसेसज्ञ मनके एक बड़का समिति बनाय हे। ए समिति ह परीक्षा के पूरा प्रक्रिया तंत्र अउ डेटा सुरक्षा प्रोटोकाल म सुधार के संगेसंग एनटीए के संरचना अउ कार्य प्रणाली उपर अपन रिपोर्ट बनाही। सात सदस्यीय ए समिति ह इसरो के पूर्व अध्यक्ष डॉक्टर के.राधाकृष्णन के अध्यक्षता म दू महिना म शिक्षा मंत्रालय ल अपन रिपोर्ट सौंपही।
युजीसी-नेट परीक्षा-स्थगित
ए बछर के संयुक्त सी.एस.आई.आर.-यूजीसी-नेट परीक्षा अपरिहार्य परिस्थिति के सेति स्थगित कर दे गेहे। ए परीक्षा ह मंगलवार ले बृहस्पतिवार के बीच होय रतिस। राष्ट्रीय परीक्षा एजेंसी-एनटीए ह किहीन हे कि एखर आयोजन बर संसोधित कारीकरम आधिकारिक वेबसाइट के माध्यम ले बाद म घोसित करे जाही। एनटीए ह किहीन हे कि कोनो भी प्रश्न या स्पष्टीकरण बर अभ्यर्थी एनटीए हेल्प डेस्क ल ए फोन नंबर म कॉल कर सकत हे। फोन नंबर हवय – सून्य एक एक-चार सून्य सात पांच नौ सून्य सून्य सून्य अउ सून्य एक एक-छै नौ दू दू सात सात सून्य सून्य। एखर अलावा एनटीए ले ई-मेल करके लिखित जानकारी घलो ले जा सकथे।
माशिमं-बोर्ड परीक्षा
राष्ट्रीय शिक्षा नीति के अंतर्गत अब छत्तीसगढ़ माध्यमिक शिक्षा मंडल कोति ले दसवीं अउ बारहवीं बोर्ड के पढ़इया लइका मन ल परीक्षा म दू मउका दे जाही। एमा ओ सब्बो विद्यार्थी मन आवेदन कर सकत हे, जेन मन ह पहिली मुख्य परीक्षा म पंजीकृत हे। उहें, अइसने सबो विद्यार्थी मन जेन मन पूरक, फेल या पास हे ओमन घलो श्रेणी सुधार बर दूसरइया मुख्य परीक्षा म सामिल हो सकही। दूसरा मुख्य परीक्षा बर आवेदन के प्रक्रिया सुरू होगे हे, जउन तीस जून तक चलही। उहें, विलंब सुल्क के संग एक अउ दू जुलाई के आवेदन जमा करे जा सकत हे। नियमित परीक्षार्थी ह अपन स्कूल ले अउ अवसर परीक्षार्थी ह समन्वय संस्थान ले आवेदन कर सकही। परीक्षा ले जुड़े अउ जानकारी बर शिक्षा मंडल के वेबसाइट के अवलोकन करे जा सकथे।
राज्यपाल-मुख्यमंत्री मुलाकात
मुख्यमंत्री विष्णुदेव साय ह राज्यपाल विश्वभूषण हरिचंदन ल राज्य के अभी के स्थिति, किसनहा मन ल खरीफ फसल बर दे जावत खाद-बीज अउ प्रदेस म चलाय जावत आने-आने योजना के जानकारी दीन। मुख्यमंत्री ह आज राजभवन म राज्यपाल ले सौजन्य भेंट करीन, अउ सरकार के आने-आने कामबूता के जानकारी दीन। ए मउका म दूनों के बीच समसामयिक बिसय उपर घलो चर्चा होइस।
बजट पूर्व बैठक-ओपी चौधरी
केंद्रीय वित्त मंत्री निर्मला सीतारमण के अध्यक्षता म नई दिल्ली म राखेगे बजट पूर्व बइठका म छत्तीसगढ़ के वित्त मंत्री ओपी चौधरी ह घलो सामिल होइन। एमा श्री चौधरी ह केंद्र सरकार ले एनसीआर के जइसन स्टेट कैपिटल के रीजन के विकास बर आर्थिक सहायता देहे के आग्रह करीन। ओहा बतइन कि छत्तीसगढ़ के नवा राजधानी नवा रईपुर ल देस के सबले सुनियोजित अउ ग्रीन सिटी के रूप म विकसित करे जावत हे।
न्यायाधीश-तबादला
छत्तीसगढ़ उच्च न्यायालय के रिजस्टार जनरल ह न्यायाधीश मनके तबादला आदेस जारी करे हे। एमा चार जिला के जिला और सत्र न्यायाधीश अउ आठ अपर जिला और सत्र न्यायाधीश मनके ट्रांसफर करे गेहे। संगेसंग हाईकोर्ट स्थापना के जज के घलो स्थानांतरण करे गेहे। ए सूची के अनुसार न्यायाधीश प्रज्ञा पचौरी ल दुरूग, जितेन्द्र कुमार ल रायगढ़, मोहम्मद रिजवान खान ल कोरिया अउ श्यामलाल नवरतन ल बालोद जिला के प्रधान जिला और सत्र न्यायाधीश नियुक्त करे गेहे।
टैक्स चोरी-कार्रवाई
केंद्रीय जीएसटी विंग ह फर्जी इनपुट टेक्स क्रेडिट मामला म कार्रवाई करत हुए रईपुर म ए कंपनी के संचालक ल गिरफ्तार करे हे। संस्थान संचालक उपर फर्जी कंपनी ले पांच करोड़ तिहत्तर लाख रूपिया के इनपुट टेक्स क्रेडिट लेके आरोप हे। आरोपी ल गिरफ्तार करके सीजेएम कोरट म पेस करे गीस, जिहां ले अदालत ह आरोपी के न्यायिक हिरासत ल मंजूरी दे दीस।
एखर ले पहिली भी लगभग सत्तर करोड़ रूपिया ले जादा के फर्जी इनपुट टेक्स क्रेडिट लेहे के आरोप म एक झिन आने आरोपी ह गिरफ्तार हो चुके हे।
मिले जानकारी अनुसार सीजीएसटी रईपुर ह टेक्स चोर मनके खिलाफ कड़ा कार्रवाई करत हे। जीएसटी कानून लागू होय के बाद ले फर्जी बिलिंग के मामला म सीजीएसटी रईपुर ह अब तक अट्ठारा आदमी के खिलाफ कार्रवाई करे हे।
केंद्रीय राज्यमंत्री-बिल्हा
केंद्रीय राज्यमंत्री तोखन साहू ह किहीन हे कि डबल इंजन के सरकार म छत्तीसगढ़ के तेजी ले विकास होही अउ हम सबो झन मिलके काम करबो। केंद्रीय राज्यमंत्री बने के बाद श्री साहू पहिली पईत बिल्हा नगर पंचायत पहुंचे रिहीन, जिहां कार्यकर्ता मन ह उंखर सुवागत करीन। केंद्रीय राज्यमंत्री ह किहीन कि राज्य बने के बाद पहिली बार प्रदेस के कोनो सांसद ल सहरी राज्य विकास मंत्रालय के विभाग मिले हे।
कबीर जयंती
आज कबीर जयंती हे। ए मउका म प्रदेसभर म आने-आने कारीकरम आयोजित करे जावत हे। राजधानी रईपुर समेत आने जघा म घलो कबीर पंथ के लोगन मन रैली निकालिन।
ए मउका म मुख्यमंत्री विष्णुदेव साय ह प्रदेसवासी मन ल बधई अउ सुभकामना दीन हे। ओमन किहीन कि कबीर साहेब बस एक आध्यात्मिक संत नइ रिहीन, बल्कि एक समाज सुधारक अउ युग प्रवर्तक घलो रिहीन। संत कबीर ह अपन दोहा अउ भजन के माध्यम ले समाज ल एकता, प्रेम अउ सदभाव के संदेस दीन हे।
उहें, राज्य सरकार ह कबीर जयंती के मउका म आज ड्राइ-डे घोसित करे हे, जेखर ले आज सबो सरकारी दारू दुकान बंद हे। होटल बार अउ कोनो आने जघा म घलो दारू बेचे अउ परसे के मनाही हे।
बस्तर-गोंचा पर्व
बस्तर म आज ले गोंचा परब सुरू होगे हे। एमा जगदलपुर के जगन्नाथ मंदिर म चंदन जात्रा विधान करे गीस अउ देव प्रतिमा मन ल चंदन ले नौहाय गीस। ए तिहार म रथयात्रा तक आने-आने धार्मिक नेग निभाय जाही।
मुख्यमंत्री विष्णुदेव साय ह गोंचा पर्व के सुरूआत म बस्तर समेत सब्बों प्रदेसवासी मन ल सुभकामना देत हुए कामना करीन कि महाप्रभु जगन्नाथ के आसिस सब्बो झन उपर बने रहय।
एसीबी-छापा
एंटी करप्सन ब्यूरो याने एसीबी के टीम ह अंबिकापुर म एसडीएम समेत चार झन सरकारी करमचारी ल घूस लेत हुए रंगे हाथ पकड़िस हे। सिकायत करइया अनुसार ओखर पुरखौती जमीन के राजस्व रिकार्ड ल दुरूस्त करे बर उदयपुर के एसडीएम ह पचास हजार रूपिया के रिसवत मांगे रिहीस। सिकायत मिले के बाद एसीबी के टीम ह कार्रवाई करके आरोपी ल रंगेहाथ पकड़ लीस।
उहें, रायगढ़ एसडीएम ह सरकारी काम म जमीन मालिक ले गलत तरीका ले पइसा मांगे के मामला पता चले के बाद गोपालपुर के पटवारी ल निलंबित कर दीस हे।
अउ अब मौसम के हाल…
दक्षिण-पश्चिम मानसून सरगुजा संभाग ल छोड़के राज्य के बांकी चार संभाग म पूरा सक्रिय होगे हे। मौसम विभाग अनुसार अवइया तीन-चार दिन म मानसून म आने जघा म घलो सक्रिय हो जही। ए बीच राज्य के अधिकतम तापमान म कोनो बिसेस परिवर्तन होय के आसार नइ हे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
जिले की चिट्ठी
आकाशवाणी रईपुर प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस स्थित आकाशवाणी के जम्मों केंद्र मन एके संघरा रिले करही। ए दारी के अंक म ‘‘जांजगीर-चांपा‘‘ जिला के बारे म जानकारी दे जाही।