आज विश्व सिकलसेल दिवस आय। ए मउका म प्रधानमंत्री नरेंद्र मोदी ह सिकलसेल बीमारी उपर काबू पाय बर सरकार के प्रतिबद्धता दोहराय हे। ओमन किहीन कि केंद्र सरकार, सिकलसेल रोग ले जुड़े चुनौती ले निपटे बर प्रौद्योगिकी के जादा ले जादा इस्तेमाल करत हे। एक सोशल मीडिया पोस्ट म श्री मोदी ह किहीन कि पाछु बछर सरकार ह राष्ट्रीय सिकलसेल एनीमिया उन्मूलन मिसन सुरू करे रिहीन अउ ओह ए संबंध म जागरूकता पैदा करे, व्यापक जांच, रोग के जल्द पता लगाय अउ उचित देखभाल समेत कई ठन पहलू उपर काम करत हे।
स्वास्थ्य मंत्री जगत प्रकाश नड्डा ह किहीन कि सरकार शीघ्र निदान ल बढ़ावा दे, उपचार तक पहुंच सुनिश्चित करे अउ रोगी मनके देखभाल बढ़ाय उपर ध्यान देवत हे।
सिकलसेल-मुख्यमंत्री
रायपुर के मेडिकल कॉलेज स्थित अटल बिहारी वाजपेयी ऑडिटोरियम म आज मुख्यमंत्री विष्णुदेव साय ह विश्व सिकलसेल दिवस उपर आयोजित कार्यक्रम म सिकलसेल पीड़ित मन ल जेनेटिक कार्ड के वितरण करीन। ए अवसर म मुख्यमंत्री ह किहीन कि प्रधानमंत्री नरेन्द्र मोदी के अगुवई म देस बछर दू हजार सैंतालीस तक विकसित भारत के रूप ले लीही अउ भारत ले सिकलसेल एनीमिया के बीमारी जम्मों डहार ले सिरा जही।
मुख्यमंत्री ह किहीन कि छत्तीसगढ़ राज्य के आदिवासी समुदाय के ज्यादातर लोग सिकलसेल एनीमिया ले पीड़ित हे। ए मरीज मन बर स्वास्थ्य अउ आदिम जाति विकास विभाग के सहयोग ले जागरूकता सिविर मनके आयोजन करे जात हे। ओमन बतईन कि प्रदेस म सिकलसेल बर राष्ट्रीय स्तर के रिसर्च सेंटर सुरू करे बर केन्द्र सरकार ल प्रस्ताव घलो भेजे गेहे। ए कार्यक्रम म मुख्यमंत्री ह बस्तर के दुरूस्त क्षेत्र मन म जागरूकता फैलाय बर सिकलसेल के जानकारी देवइया हल्बी अउ गोंडी भासा के पुस्तिका के विमोचन घलो करीन। उहें, मुख्यमंत्री ह सिकलसेल ले संबंधित प्रदर्सनी के अवलोकन कर जागरूकता रथ ल रवाना करीन।
विश्व सिकलसेल दिवस के अवसर म आज प्रदेस के अलग-अलग जिला म घलो कई ठन कारीकरम के आयोजन करे गीस।
मुख्यमंत्री-केन्द्रीय राज्यमंत्री मुलाकात
मुख्यमंत्री विष्णुदेव साय ह काली रायपुर म केन्द्रीय जल शक्ति राज्यमंत्री राजभूषण चौधरी ले मुलाकात करीन। ए अवसर म मुख्यमंत्री ह केन्द्रीय राज्यमंत्री ले छत्तीसगढ़ म जल जीवन मिशन के तहत कराय जात काम के संबंध म चर्चा करीन। मुख्यमंत्री ह केन्द्रीय मंत्री ल बतईन कि प्रदेस म जल जीवन मिसन के तहत अब तक उनचालीस लाख सत्रह हजार ले जादा घर म नल कनेक्शन दे जा चुके हे। धमतरी जिला म सबले जादा अंठानवे प्रतिसत घर म नल कनेक्शन दे जा चुके हे। ओमन किहीन कि जल जीवन मिशन के तहत पचास लाख ले जादा घर म नल कनेक्शन दे जाय के लक्ष्य हे। एखर अलावा राज्य के तेरह ठन जिला म जल जीवन मिशन के पचहत्तर प्रतिसत ले जादा काम हो चुके हे।
मुख्यमंत्री-एनसीसी
मुख्यमंत्री विष्णुदेव साय ह किहीन कि एनसीसी अइसे संगठन आय, जउन ह युवा मन ल अनुसासन सिखाथे, चरित्र निर्माण करथे, साहसी बनाथे अउ निःस्वार्थ सेवा बर प्रेरित करथे। मुख्यमंत्री आज अपन निवास परिसर म आयोजित एनसीसी कैडेट अउ प्रसिक्षक मनके सम्मान समारोह ल संबोधित करत रिहीन। ओमन नई दिल्ली म गणतंत्र दिवस म सामिल एनसीसी के अधिकारी अउ कैडेट्स मन ल बधाई अउ सुभकामना घलो दीन। ओमन किहीन कि गणतंत्र दिवस परेड बर राज्य ले कोनों कैडेट के चुने जाना पूरा राज्य बर बड़ उपलब्धि होथे। राष्ट्रीय अउ अंतर्राष्ट्रीय स्तर म एनसीसी के नेतृत्व कर प्रदेस के बालिका मन ह छत्तीसगढ़ के गौरव बढ़ाय हे। ए अवसर म मुख्यमंत्री ह एनसीसी डहार ले आयोजित अलग-अलग राष्ट्रीय प्रतियोगिता मन म उत्कृष्ट प्रदर्सन बर प्रसिक्षु अउ कैडेट मन ल सम्मानित करीन।
माओवादी-मुठभेड़
सुकमा जिला म आज सुरक्षा बल अउ माओवादी मनके बीच मुठभेड़ होय हे। जिला के पुलिस अधीक्षक किरण चव्हाण ह बतईन कि एलमागुंडा थाना क्षेत्र म सीआरपीएफ अउ डीआरजी के जवान मनके संयुक्त टीम सर्चिग म निकले रिहीस। इही दउरान माओवादी मन संग उंखर मुठभेड़ होगे। सुरक्षा बल मन ह ए मुठभेड़ म कई झन माओवादी मनके घायल होय के दावा करे हे। उहें, मउका ले हथियार अउ माओवादी सामान बरामद करे गेहे।
श्रम मंत्री-समीक्षा
श्रम मंत्री लखनलाल देवांगन ह किहीन हे कि प्रदेस के सबो श्रमिक मन ल योजना मनके लाभ दिलाय जाय। अपन विभाग ले संबंधित काम मनके समीक्षा करत हुए श्री देवांगन ह किहीन कि श्रमिक मनके हित ल प्राथमिकता देवत हुए संवेदनशीलता के संग काम करे जाय। ओमन निर्माण श्रमिक मनके लइका मन ल प्रदेस म निःशुल्क कोचिंग सहायता योजना के लाभ देवाय बर किहीन। बइठका म श्रम मंत्री ह अधिकारी मन ल निरदेस दीन कि सबले जादा जोखिम अउ जोखिम श्रेणी के कारखाना मनके निरीक्षण हर बछर दू ले तीन बेर करे जाय।
श्रम मंत्री ह लंबित मामला मनके निराकरण पन्द्रह दिन के भीतर करे के निरदेस दीन। ओमन किहीन कि शासन के जनकल्याणकारी योजना मनके क्रियान्वयन म लापरवाही बर्दाश्त नइ करे जाय।
निलंबित
नगरीय प्रशासन विभाग ह घरघोड़ा नगर पंचायत के तत्कालीन मुख्य नगर पालिका अधिकारी सुमित मेहता, इंजीनियर अजय प्रधान, प्रदीप पटेल निखिल जोशी अउ लेखापाल जयानंद साहू ल निलंबित कर देहे। ए कार्रवाई नगर पंचायत म होय भ्रष्टाचार के सिकायत के बाद करे गेहे। जेखर बर विभागीय जांच समिति बनाय गे रिहीस, जउन ल समिति ह सही पईस अउ अपन रिपोर्ट म निलंबन के अनुसंसा करे रिहीन, जेखर आधार ए सबो झन ल निलंबित करे गेहे।
बृजमोहन अग्रवाल-इस्तीफा
मुख्यमंत्री विष्णुदेव साय के अध्यक्षता म आज मंत्रालय म होय राज्य मंत्रिमंडल के बइठका म सिक्षा मंत्री बृजमोहन अग्रवाल ह मंत्री पद ले इस्तीफा दे देहे। एखर पहिली, रायपुर लोकसभा सांसद बने के बाद श्री अग्रवाल ह सत्रह जून के विधायक पद ले इस्तीफा दे दे रिहीन। मंत्री पद ले इस्तीफा देके बाद कैबिनेट ह बृजमोहन अग्रवाल ल बधाई दीन। श्री अग्रवाल के इस्तीफा के बाद अब राज्य मंत्रिमंडल म दू पद खाली होगे हे।
श्रम मंत्री-समीक्षा
श्रम मंत्री लखनलाल देवांगन ह किहीन हे कि प्रदेस के सबो श्रमिक मन ल योजना मनके लाभ दिलाय जाय। अपन विभाग ले संबंधित काम मनके समीक्षा करत हुए श्री देवांगन ह किहीन कि श्रमिक मनके हित ल प्राथमिकता देवत हुए संवेदनशीलता के संग काम करे जाय। ओमन निर्माण श्रमिक मनके लइका मन ल प्रदेस म निःशुल्क कोचिंग सहायता योजना के लाभ देवाय बर किहीन। बइठका म श्रम मंत्री ह अधिकारी मन ल निरदेस दीन कि सबले जादा जोखिम अउ जोखिम श्रेणी के कारखाना मनके निरीक्षण हर बछर दू ले तीन बेर करे जाय।
श्रम मंत्री ह लंबित मामला मनके निराकरण पन्द्रह दिन के भीतर करे के निरदेस दीन। ओमन किहीन कि शासन के जनकल्याणकारी योजना मनके क्रियान्वयन म लापरवाही बर्दाश्त नइ करे जाय।
दुर्घटना
जांजगीर-चांपा जिला म आज बस के टक्कर ले तीन झन के मउत होगे। जबकि दू झन घायल होगे हे। उहें, बस चालक फरार होगे हे। मिले जानकारी के अनुसार शिवरीनारायण-बिलासपुर मार्ग म मेंहदी गांव करा एक ठन तेज रफ्तार बस ह दू ठन मोटर साइकिल ल ठोकर मार दीस। ए हादसा म पति-पत्नी समेत तीन झन के मउका म ही मउत होगे। उहें, घायल होय दू झन ल अस्पताल म भर्ती कराय गेहे। घटना के बाद नाराज लोगन मन शिवरीनारायण-बिलासपुर मार्ग म चक्काजाम करीन।
एसीबी-छापा
एंटी करप्शन ब्यूरो-एसीबी डहार ले रिश्वत लेवइया अधिकारी-कर्मचारी मनके ठिकाना म आय ले जादा संपत्ति के जांच बर छापामार कार्रवाई करे जाही। एखर सुरूवात कोरबा ले करे गेहे। इहां एसीबी के नौ सदस्यीय टीम ह दर्री जोन कार्यालय म पदस्थ सहायक अभियंता अउ उप अभियंता ल रिश्वत लेवत रंगेहाथ पकड़े हे। एखर बाद एसीबी के टीम ह अदालत ले सर्च वारंट लेके ए अधिकारी मनके ठिकाना म छापा घलो मारीन।
बतादन कि नगर निगम कोरबा म ठेकेदारी करइया एक झन व्यक्ति ले दूनो अधिकारी मन पइसा पास कराय के नाम म रिश्वत मांगे रिहीन।