प्रधानमंत्री नरेन्द्र मोदी ह आज वाराणसी ले पीएम किसान सम्मान निधि योजन के सत्रहवां किस्त जारी करीन। ए योजना के तहत नौ करोड़ छब्बीस लाख ले जादा किसान मन ल बीस हजार करोड़ रूपिया ले जादा के लाभ मिलही। ए मउका म प्रधानमंत्री ह किहीन कि इक्कीसवीं सदी के भारत ल दुनिया के तीसरा बड़े आर्थिक ताकत बनाय म पूरा कृषि व्यवस्था के बड़े भूमिका हे। प्रधानमंत्री ह किहीन कि किसान भाई-बहिनी मनके जीवन आसान बनाय बर हमर सरकार प्रतिबद्ध हे।
प्रधानमंत्री-ग्राम प्रमुख आग्रह
प्रधानमंत्री नरेन्द्र मोदी ह ग्राम पंचायत प्रमुख मन ल पत्र लिखके योग अउ मोटा अनाज के बारे म जागरूकता लाय के आग्रह करे हे। ओमन ग्राम प्रधान मन ले केहे हे कि पंचायत परिसर, विद्यालय, आंगनबाड़ी अउ सामुदायिक स्वास्थ्य केन्द्र मन म योग आधारित कार्यक्रम मनके आयोजन करय अउ लोगन मन ल तनावमुक्त जीवनशैली अपनाय बर प्रेरित करय।
अवइया अंतर्राष्ट्रीय योग दिवस बर ग्राम पंचायत के सबो निवासी मन ल सुभकामना देवत हुए श्री मोदी ह ए आयोजन ल योग के वैश्विक प्रभाव अउ लोगन मनके जीवन म एखर सकारात्मक असर के प्रमाण बतईन। ओमन किहीन कि ए बछर अंतर्राष्ट्रीय योग दिवस के बिसय आय- ‘‘स्वयं और समाज के लिए योग। एखर ले एक स्वस्थ राष्ट्र के निर्माण के दिसा म सरकार के प्रयास ल अउ बढ़ावा मिलही।
मुख्यमंत्री-निर्देश
मुख्यमंत्री विष्णुदेव साय ह सुकमा, बीजापुर अउ नारायणपुर जिला म बैंक साखा मनके दूर होय के सेती तेंदूपत्ता संग्राहक मन ल पारिश्रमिक रासि के भुगतान नगद करे के निरदेस देहे। प्रधान मुख्य वन संरक्षक व्ही, श्रीनिवास राव ह बतईन कि वन अउ जलवायु परिवर्तन विभाग डहार ले जारी निरदेस म केहे गेहे कि सबो नगद भुगतान जिला कलेक्टर के निगरानी म करे जाय। नगद भुगतान बर कोन से संग्राहक पात्र होही, एखर निर्धारण कलेक्टर डहार ले करे जाही। हाट-बाजार या अलग-अलग जघा म सिविर के आयोजन करके संबंधित संग्राहक मनके तेंदूपत्ता संग्रहण कार्ड म दर्ज कर नगद भुगतान करे जाय। नगद भुगतान के पहिली पर्याप्त प्रचार-प्रसार करे जाय अउ एखर ले संबंधित सबो काम मनके वीडियोग्राफी कराय जाय।
केन्द्रीय राज्यमंत्री-बिलासपुर
केन्द्रीय राज्यमंत्री बने के बाद तोखन साहू इंटरसिटी एक्सप्रेस ले बिलासपुर पहुंचीन। रेलवे स्टेसन म भाजपा कार्यकर्ता मन ह उंखर स्वागत करीन। ए दउरान मीडिया से चर्चा करत हुए श्री साहू ह लोकसभा चुनाव म अपन जीत बर बिलासपुर अउ छत्तीसगढ़ के जनता के आभार जतईन। ओमन किहीन कि प्रधानमंत्री नरेन्द्र मोदी के मंत्रिमंडल म सामिल होना गर्व के बात आय। श्री साहू ह किहीन क डबल इंजन के सरकार ले विकास कार्य म तेजी आही।
वित्त मंत्री-पत्रकारवार्ता
वित्त मंत्री ओ.पी. चौधरी ह जमीन के रजिस्ट्री के सिस्टम म बड़े बदलाव के संकेत देहे। राजधानी म पत्रकार मन ले चर्चा के दउरान एक सवाल के जवाब म श्री चौधरी ह किहीन कि अभी रजिस्ट्री के सिस्टम म छोटे-छोटे बदलाव करे गेहे। ईवीएम ल लेके जारी चर्चा के बीच कांग्रेस के आरोप मन उपर वित्त मंत्री ह किहीन कि कांग्रेस मानसिक हताशा-निराशा के सिकार होगे हे।
लोकसभा के मानसून सत्र म पेस होवइया बजट के संबंध म पूछे गे सवाल उपर श्री चौधरी ह किहीन कि अवइया बजट ह विकसित भारत दू हजार सैंतालीस के नींव के काम करही। छत्तीसगढ़ म घलो उही दिसा म अधोसंरचना, नेशनल हाईवे अउ रेलवे बर बड़े सौगात मिलही।
बलौदाबाजार कलेक्टर-समीक्षा
बलौदाबाजार कलेक्टर दीपक सोनी ह आज स्वास्थ्य विभाग के काम मनके समीक्षा करीन। ओमन स्वास्थ्य विभाग के अधिकारी मन ले किहीन कि आयुष्मान कार्ड धारी मरीज मन बर अनुबंधित तेरह ठन निजी अस्पताल मन म इलाज के दउरान उनला कोनों प्रकार के समस्या झन होवय। ओमन पाछु दिन जिला मुख्यालय म होय तोड़फोड़ के घटना म पीड़ित मनके निःशुल्क इलाज के व्यवस्था अउ दस्तावेज मनके देखरेख के निरदेस घलो दीन। कलेक्टर दीपक सोनी ह बरसात के मौसम म होवइया मौसमी बीमारी मनके रोकथाम बर सहरी अउ मैदानी क्षेत्र मन म बेहतर तैयारी करे बर किहीन।
बलौदाबाजार-अपील
बलौदाबाजार-भाटापारा जिला प्रसासन ह सबो नागरिक मन ले अवैधानिक, गैर-कानूनी या लोक शांति भंग करइया मनके जानकारी कंट्रोल रूम म देके अपील करे हे। एमा केहे गेहे कि ग्राम पंचायत, नगर पंचायत या नगर पालिका क्षेत्र म कोनों भी समूह या संगठन शांति भंग करे के दृष्टि ले रणनीति बनावत होही या बइठका करत होही, त ओखर जानकारी जिला कंट्रोल रूम नंबर – नौ चार सात नौ एक – नौ शून्य छह दो नौ म देवय। जानकारी देवइया मनखे के पहिचान गोपनीय रखे जाही।
बतादन कि बलौदाबाजार म पाछु दिन कलेक्टर अउ पुलिस अधीक्षक कार्यालय म होय आगजनी अउ तोड़फोड़ के घटना के सेती जिला म बीस जून तक धारा-एक सौ चवालीस लागू करे गेहे।
नये आपराधिक कानून-कार्यशाला
एक जुलाई ले देसभर म लागू होवइया तीन ठन आपराधिक कानून ल लेके राजनांदगांव के पुलिस प्रशिक्षण केन्द्र म दू दिवसीय कार्यशाला के आयोजन करे गीस। ए कार्यशाला म पुलिस अधीक्षक मोहित गर्ग ह जिला के पुलिस अधिकारी अउ कर्मचारी मन ल नवा कानून के बारीकी मनके जानकारी दीन। संगेसंग एफआईआर ल लेके ऑनलाइन सिकायत, जांच अउ गिरफ्तारी समेत दूसर प्रक्रिया मन ल घलो समझाय गीस। कार्यसाला म भारतीय साक्ष्य अधिनियम म इलेक्ट्रॉनिक दस्तावेज, उपकरण अउ इलेक्ट्रॉनिक साक्ष्य मन उपर ज्यादा बल देबर न्याय के प्रक्रिया ल प्रमुखता ले सुनिश्चित करइया पहल बताय गीस। उहें, पुलिसकर्मी मन ल अलग-अलग उदाहरण अउ पीपीटी के जरिया नवा आपराधिक कानून मनके धारा अउ सजा ले अवगत कराय गीस।
अउ अब मौसम के हाल…
मौसम विभाग के मुताबिक मानसून के आगू बाढ़े बर अनुकूल परिस्थिति बनत हुए हे। अवइया दू-तीन दिन म दक्षिण-पश्चिम मानसून के प्रदेस के कुछ अउ हिस्सा म पहुंचे के आसार हे। बस्तर संभाग म काली ले हल्का ले मध्यम बरसा होय के संभावना के बीच मानसून उत्तर छत्तीसगढ़ डहार बढ़ सकत हे। एखरे संग अरब सागर ले अवइया पश्चिमी हवा के सेती प्रदेस म बरसा के गतिविध म तेजी आ सकत हे।
मौसम विभाग ह काली प्रदेस म कई ठन जघा म हल्का ले मध्यम बरसा होय के या गरज-चमक के संग छींटा पड़े के संभावना व्यक्त करे हे। उहें, एक-दू जघा म अंधड़ चले अउ आकाशीय बिजली गिरे के संभावना हे।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म काली मंत्रालय म कैबिनेट के बइठका आयोजित करे जाही। ए बइठका म कई महत्वपूर्ण फैसला ले जा सकत हे।
– रायपुर स्थित औद्योगिक प्रशिक्षण संस्था-आईटीआई म काली बिहनिया दस बजे रोजगार मेला के आयोजन करे जाही।
– रायपुर के जोरा स्थित लाईवलीहुड कालेज म एक ठन निजी कंपनी डहार ले ट्रैक्टर मेकनिक कोर्स म प्रसिक्षण बर लैब स्थापित करे गेहे, जिहां प्रधानमंत्री कौशल विकास योजना अउ मुख्यमंत्री कौशल विकास विकास योजना के अंतर्गत ट्रैक्टर मेकनिक कोर्स म कौशल प्रशिक्षण प्रारंभ करे जात हे।
अउ
– रायपुर जिला के मंदिर हसौद म राजस्व, खनिज विभाग अउ पुलिस के संयुक्त टीम ह लगभग एक सौ बीस हाईवा, अवैध रेत भंडारण उपर जब्ती के कार्रवाई करे हे।