मन की बात
प्रधानमंत्री नरेंद्र मोदी इही महिना के तीस तारीख के आकाशवाणी म ‘‘मन की बात‘‘ कारीकरम म देस-विदेस के लोगन संग अपन बिचार साझा करहीं। ए मासिक रेडियो कारीकरम के एक सौ ग्यारहवां कड़ी होही। श्री मोदी के सरलग तिसरइया घांव प्रधानमंत्री बने के बाद एहा पहिली मन की बात कारीकरम होही। ए कारीकरम बर श्रोता मन टोल फ्री नंबर- एक आठ सून्य-सून्य एक एक सात आठ सून्य-सून्य के माध्यम ले अपन बिचार अउ सुझाव दे सकत हें। आप अपन बिचार नरेंद्र मोदी ऐप या माय जीओवी ओपन फोरम के माध्यम ले ऑनलाइन घलो साझा कर सकत हव। 28 जून तक भेजे गे सुझाव अउ बिचार ल ए कारीकरम म सामिल करे जाही।
मुख्यमंत्री-समीक्षा
मुख्यमंत्री विष्णुदेव साय ह आज रइपुर स्थित अपन निवास कार्यालय म गृह अउ जेल विभाग के कारज के समीक्षा करिन। जुलाई महिना म लागू होवइया नवा कानून उपर मुख्यमंत्री ह बेरा रहत सबो जरूरी तियारी ल पूरा करे के निरदेस देइन हें। श्री साय ह किहीन कि माओवाद ल खतम करना हमर सरकार के प्राथमिकता म हे, अउ माओवाद के खिलाफ अभियान सरलग जारी रइही। नियद नेल्लानार योजना के तहत पुलिस कैम्प ले पांच किलोमीटर के इलाका म अवइया गांव मनके विकास बर पइसा के कमी नइ होही।
ओमन किहीन कि प्रदेस म कोनो हाल म कानून बेवस्था नइ बिगड़े, जदि अइसे होही त जिम्मेदार उपर कड़ा कारवाही करे जाही। ओमन किहीन कि जनता के जतेक बिस्वास पुलिस उपर रइही ओतकेच बढ़िया होही। प्रदेस म नसाखोरी, अउ जुआ सट्टा के अलावा अवैध सराब ले जुरे सिकाइत मन उपर सख्त कारवाही अउ निवेश के नांव म पइसा वसूलइया चिटफंट कंपनी के खिलाफ घलो कारवाही करके निवेसक मन ल उंखर पइसा लहूटाय के निरदेस देइन। मुख्यमंत्री ह किहीन कि प्रदेस के नवा जिला मन म आदिम जाति कल्याण थाना खोले जाहीं। उहें, पुलिस विभाग के खाली पद बर भर्ती अउ पदोन्नति घलो जल्द करे जाहीं।
बइठका म उपमुख्यमंत्री अउ गृहमंत्री विजय शर्मा ह किहीन कि लॉ एंड ऑर्डर के स्थिति ले निपटे बर एस.ओ.पी. बनाय के जरूरत हे।
शहीद जवान-पुष्पचक्र अर्पित
मुख्यमंत्री विष्णुदेव साय अउ उप मुख्यमंत्री विजय शर्मा ह आज चौथी बटालियन माना म सहीद जवान ल श्रध्दांजलि देइन। बतादन कि काली नारायणपुर जिला म होय माओवादी मुठभेड़ म जवान नितेश एक्का सहीद होगिस। जेला रइपुर लाने गे रिहीस। एखर बाद आज मुख्यमंत्री अउ उपमुख्यमंत्री ह सहीद जवान के पार्थिव सरीर ल कांधा देके जवान के गृहग्राम जशपुर जिला के चिरईडांड बर रवाना करिन। श्री साय ह ए बेरा सहीद जवान के परिजन मन ले भेंट करके सोक जताइन।
ए मउका म मुख्यमंत्री ह किहीन कि जवान के सहादत बेकार नइ जाही अउ हमन वो इलाका म सांति बनाय राखे बर संकल्पित हन। ओमन किहीन कि राज्य म बीजेपी के सरकार बनतेच हमन माओवादी मन के खिलाफ लड़ई तेज कर दे हावन अउ हमन निर्णायक लड़ई लड़त हन।
घायल जवान-मुलाकात
मुख्यमंत्री विष्णुदेव साय अउ उपमुख्यमंत्री विजय शर्मा ह आज रइपुर के एक निजी अस्पताल पहुंचके काली नारायणपुर माओवादी मुठभेड़ म घायल जवान ले भेंट करिन। उहें, मुख्यमंत्री ह बीते दिन बीजापुर माओवादी हमला म घायल एक झन आने जवान ले घलो भेंट करके उंखर हालचाल जानिन।
ए मउका म मुख्यमंत्री ह जवान मनके हौसला बढ़ावत झटकुन स्वस्थ होय के कामना करिन। संगे ओमन डॉक्टर मन ल घलो जवान मनके बढ़िया इलाज के निरदेस देइन। ए बेरा विधायक मोतीलाल साहू अउ पुलिस महानिदेसक अशोक जुनेजा घलो रिहिन।
एग्री स्टैक पोर्टल
छत्तीसगढ़ म अब फसल अच्छादन के डिजिटल सर्वे होही। एखर आधार म किसान मनके फसल के सबो जानकारी एग्री स्टैक पोर्टल म दर्ज करे जाही। दिल्ली ले आय कृषि अधिकारी मन आज नवा रइपुर म राजस्व विभाग के मास्टर ट्रेनर मन ल डिजिटल क्रॉप सर्वे के प्रसिक्षण देवत बतइन कि जिओ रेफ्रेंसिंग तकनीक ले एसो डिजिटल क्रॉप सर्वे करे जाना हे। जेखर जानकारी एग्री स्टैक पोर्टल म ऑनलाइन उपलब्ध रइही।
ओमन बतइन कि ए पोर्टल म किसान मनके पंजीयन होय के बाद ओमन ल फार्मर आईडी दे जाही। ए पोर्टल म किसान मन के लगाय फसल के संगेसंग ओमन ल खाद अउ पानी के मात्रा के घलो जानकारी मिलही। पोर्टल के माध्यम ले राज्य के किसान मन ल अब न सिरिफ जमीन भलूक अउ उत्पादन बर बाजार उपलब्ध कराय म घलो मदद मिलही।
केंद्रीय राज्यमंत्री-बिलासपुर
बिलासपुर लोकसभा सदस्य तोखन साहू केंद्रीय सहरी विकास अउ आवास राज्यमंत्री बने के बाद पहिली घांव काली बिलासपुर पहुंचहीं अउ आभार रैली म सामिल होहीं। आभार रैली के बेरा रेलवे स्टेसन ले नेहरू चौक समेत कतकोन जघा केंद्रीय राज्यमंत्री के सुवागत करे जाही। श्री साहू श्रीराम मंदिर तिलक नगर के अभिनंदन समारोह म घलो सामिल होहीं। जिहां भाजपा अउ आने सामाजिक संगठन के डाहर ले उंखर सम्मान करे जाही।
भाजपा विधायक/संसदीय-बैठक
आज प्रदेस भाजपा कार्यालय कुशाभाऊ ठाकरे परिसर म भारतीय जनता पार्टी के विधायक दल के बइठका राखे गिस। जेमा केंद्रीय सहरी अउ आवास राज्य मंत्री तोखन साहू, मुख्यमंत्री विष्णुदेव साय, प्रदेस चुनई प्रभारी नितिन नबीन, प्रदेस अध्यक्ष किरण सिंह देव समेत कैबिनेट मंत्री अउ सबो विधायक सामिल होइन।
उहें, आज कुशाभाऊ ठाकरे परिसर म ही विधायक दल के बइठका के बाद भाजपा संसदीय दल के घलो बइठका होइस।
ईद-उल-अजहा
काली ईद-उल-अजहा के परब छत्तीसगढ़ समेत देसभर म उछाह के संग मनाय जाही। त्याग अउ बलिदान के तिहार म मुस्लिम समाज ह ईदगाह अउ मस्जिद म नवाज अदा करही। एखर बर प्रदेस के कतकोन ईदगाह अउ मस्जिद मन म बिसेस बेवस्था करे गेहे। ए मउका म राज्यपाल विश्वभूषण हरिचंदन ह प्रदेसवासी मन ल बधई अउ सुभकामना देइन हे।
बलौदाबाजार पुलिस-सुरक्षा व्यवस्था
पाछू दिन बलौदाबाजार के कलेक्ट्रेट अउ पुलिस अधीक्षक कार्यालय म तोड़फोड़ अउ आगजनी के घटना के बाद पुलिस के डाहर ले सांति अउ सुरक्षा बर कड़ा बेवस्था करे गेय हें। एखर तहत पुलिस के पेट्रोलिंग पार्टी चौबीसों घंटा इलाका म गस्त करत हे। संगे बलौदाबाजार के प्रवेस मार्ग म नाकाबंदी करके अवइया-जवइया गाड़ी मनके जांच करे जावत हे।
उहें, कोनो घलो प्रकार के जानकारी अउ सुझाव देय बर बलौदाबाजार-भाटापारा पुलिस ह कंट्रोल रूम के नंबर- नौ चार सात नौ एक -नौ सून्य छै दू नौ घलो जारी करे हे। पुलिस ह लोगन ले यहू अपील करे हे कि सोसल मीडिया के भड़काऊ पोस्ट या फेर काखरो बहकावा म झन आंय अउ कानून के पालन करत सांति बनाय राखंय।
दुर्ग-ठगी
दुरूग जिला के नेवई थाना के क्षेत्र म नौकरी देवाय के नांव म 20 लाख रूपिया के ठगी के मामला आगू आय हे। पुलिस के अनुसार एक मनखे ह अपन आप ल छत्तीसगढ़ सशस्त्र बल के अधिकारी बताके परोसी ल खाद्य विभाग म नौकरी देवाय के नांव म 20 लाख रूपिया ठग दिस। पुलिस ह बताइस कि आरोपी अउ उंखर संगवारी ह पीड़ित ल खाद्य विभाग म भर्ती अउ प्रसिक्षण बर फर्जी पत्र बनाके व्हाट्सऐप करे रिहीस। एखर बाद पीड़ित ह भर्ती के बारे म पतासार्जी करिस त वोहा फर्जी निकलगे, जेखर बाद पुलिस म रिपोर्ट दरज कराइस। फेरहाल मामला दरज करके पुलिस ह आरोपी मनके तलास करत हे।