बस्तर के पुलिस महानिरीक्षक सुंदरराज पी. ह बतइन कि नारायणपुर, कोंडागांव, कांकेर अउ दंतेवाड़ा के डीआरजी, एसटीएफ, आईटीबीपी अउ बीएसएफ के मिले जुले टीम नारायणपुर जिला के ओरछा थाना क्षेत्र ले तलासी अभियान खातिर निकले रिहीन। इही दौरान फरसबेड़ा अउ धुरबेड़ा के बीच जंगल म पहिली ले घात लगाके बइठे माओवादी मन ह सुरक्षा बल उपर फायरिंग सुरू कर दीन। जवान मन ह घलो जवाबी कार्रवाई करीन। ए दौरान 8 झिन माओवादी मन मारे गीन। उहें, एक जवान सहीद होगिस अउ दू झिन आने जवान मन घायल होगिन हवय। मुठभेड़ के बाद घटना स्थल के तलासी के दौरान एक ठिन इंसास रायफल, 303 रायफल, बीजीएल लांचर समेत भारी मात्रा म हथियार अउ आने माओवादी जिनिस बरामद करे गे हवय। अब तक मुठभेड़ म मारे गे माओवादी मनके पहिचान नइ होय पाय हे। पुलिस ह मुठभेड़ म अउ आने माओवादी मन के मारे जाय या फेर घायल होय के दावा करीन हवय।
इही बीच, मुख्यमंत्री विष्णुदेव साय ह मुठभेड़ म सहीद होय जवान मन ल अपन श्रध्दांजलि दीन। ओमन घायल जवान मनके जल्द ठीक होय के कामन करीन हवय। मुख्यमंत्री ह किहीन हे कि सुरक्षा बल डहार ले माओवादी मनके खिलाफ करे जावत कड़ा कार्रवाई ले माओवादी मन विचलित हवय। राज्य सरकार माओवादी मनके खातमा करे खातिर पूरा तरह ले तत्पर हवय। जब तक लक्ष्य पूरा नइ हो जथे, तब तक सरकार चुप नइ बइठही।
ओति, बीजापुर जिला के नैमेड़ थाना क्षेत्र के गदामली-कडेर के बीच बनत सड़क रद्दा म रोड ओपनिंग के दौरान केंद्रीय रिजर्व पुलिस बल-सीआरपीएफ के टीम ह 3 ठिन आईईडी बरामद करीन हवय। एमा दू ठिन आईईडी 30-30 किलो अउ एक ठिन 10 किलोग्राम के रिहीस, जेला बम निरोधक दस्ता के टीम ह मउका म निष्क्रिय कर दीन।
बिलासपुर सांसद अउ केंद्रीय आवास अउ सहरी कार्य राज्यमंत्री तोखन साहू ह किहीन हे कि डबल इंजन के सरकार म छत्तीसगढ़ के तेजी ले विकास होही। केंद्र अउ राज्य सरकार मिलके छत्तीसगढ़ के विकास खातिर काम करही। केंद्रीय राज्यमंत्री के पद संभाले के बाद आज पहिली बार राजधानी रईपुर पहुंंचिन , श्री साहू ह विमानतल म पत्रकार मनले गोठबात करत किहीन कि दिल्ली म जम्मों मंत्री मनके बइठका होइस, जेमा भाजपा के मूल मंत्र ‘‘सबका साथ-सबका विकास‘‘ के मूलमंत्र के तहत काम करे उपर जोर दे गे हवय।
एखर पहिली, भाजपा कार्यकर्ता मन ह स्वामी विवेकानंद एयरपोर्ट म केंद्रीय राज्यमंत्री के भव्य सुवागत करीन। ए मउका म उप मुख्यमंत्री अरूण साव, स्वास्थ्य मंत्री श्यामबिहारी जायसवाल, बस्तर सांसद महेश कश्यप अउ विधायक मोतीलाल साहू समेत बड़ संख्या म भाजपा नेता अउ कार्यकर्ता मन उपस्थित रिहीन। एखर बाद श्री साहू रईपुर स्थित भाजपा कार्यालय पहुंचिन, जिहां ले आभार कारीकरम म सामिल होइन।
मुख्यमंत्री-समीक्षा बैठक
मुख्यमंत्री विष्णुदेव साय ह किहीन हे कि गरियाबंद जिला के सुपेबेड़ा म किडनी के समस्या ल पूरा तरीका ले दूर करे जाही। एखर बर बीमारी के कारण जाने खातिर जउन भी रिसर्च के जरूरत होही, ओला करे जाही। जेखर ले सुपेबेड़ा के लोगन मन ल भविष्य म किडनी संबंधी समस्या ले पूरा तरीका ले मुक्त करे जा सकय।
मुख्यमंत्री श्री साय ह काली रईपुर म आयोजित स्वास्थ्य विभाग के समीक्षा बइठका ल संबोधित करत रिहीन। ए बइठका म मुख्यमंत्री ह स्वास्थ्य विभाग के अवइया योजना मन उपर गोठबात करीन, संगेसंग राष्ट्रीय अउ राज्य स्तर के कारीकरम के क्रियान्वयन के जानकारी घलो लीन।
मुख्यमंत्री-लोकार्पण/शिलान्यास
मुख्यमंत्री विष्णुदेव साय ह काली मुंगेली जिला के गांव फरहदा म 25 करोड़ रूपिया के लागत ले 19 विकास कार्यो के लोकार्पण अउ सिलान्यास करीन। ए मउका म श्री साय ह किहीन कि अवइया बेरा म मुंगेली जिला रेल नेटवर्क म सामिल हो जाही। ओमन बतइन कि कटघोरा-डोंगरगढ़ बिसेस रेल परियोजना खातिर राज्य शासन डहार ले 300 करोड़ रूपिया रासि के स्वीकृति दे जा चुके हवय। जल्दीच ही भू-अर्जन के कार्रवाई सुरू करे जाही।
आकांक्षी जिला-समीक्षा
प्रदेस के आकांक्षी जिला म होवत कामबूता के काली नीति आयोग डहार ले राज्य नोडल अधिकारी निधि छिब्बर ह समीक्षा करीन। ए मउका म ओमन अधिकारी मन ले आकांक्षी जिला खातिर तय करेगे जम्मो इंडिकेटर म रैंक सुधार खातिर समर्पण के भावना ले काम करे के निरदेस दीन। ओमन किहीन कि आकांक्षी जिला कारीकरम के उद्देस्य विकास के दउर म पाछू होय जिला मन म समोवेशी विकास सुनिश्चित करना हवय। बइठका म श्रीमती छिब्बर ह स्वास्थ्य अउ पोषण, शिक्षा, कृषिसंबंधित सेवाएं, बेसिक अधोसंरचना अउ सामाजिक विकास के जम्मों इंडिकेटर उपर विस्तार ले समीक्षा करीन।
राशन कार्ड-ई-केवाईसी
राज्य सरकार ह सामान्य श्रेणी, एपीएल प्राथमिकता अउ अंत्योदय अन्न योजना के चलत रासनकार्ड धारी मनके ई-केवाईसी अउ नवीनीकरण के कामबूता अवइया 30 जून तक पूरा करे खातिर निरदेस दीन हवय। ई-केवाईसी खातिर बांचे हितग्राही मन ल तीर के शासकीय उचित मूल्य के दुकान म अपन रासनकार्ड के जम्मों सदस्य मनके ई-केवाईसी जरूरी रूप ले करे जाना हवय। उहें, नवीनीकरण रासनकार्डधारी अपन एंड्राएड मोबाइल फोन म लिंक डाउनलोड कर या फेर शासकीय उचित मूल्य के दुकान म जाके कर सकत हवय।
नकली नोट-गिरफ्तार
रईपुर पुलिस ह बेरोजगार मन ल नौकरी दिलाय के नांव म लाखों रूपिया के धोखाधड़ी करइया ओड़िसा के संगठित गिरोह के 8 झिन लोगन मन ल गिरफ्तार करीस हवय। ए जम्मों आरोपी मन ठगी करे के संगेसंग, नकली नोट के छपाई घलो करत रिहीन। उंखर तीर ले गाड़ी, जेवरात, लैपटाप, कलर प्रिंटर, मोबाइल फोन, नोट छापे के मसीन अउ सीट समेत आने जिनिस जब्त करे गे हवय।
मत्स्याखेट-प्रतिबंध
बरसा ऋतु म मछली मन म होय प्रजनन ल धियान म राखत प्रदेसभर म काली 16 जून ले 15 अगस्त तक मछली पकड़े म रोक रइही। ए दउरान जम्मों नदी, नाला, छोटा नदी अउ सहायक नदी मन म जेमा सिंचाई खातिर तालाब, जलाशय बने होय हे, ओमा केज कल्चर के अलावा सबो प्रकार के मछली पकड़े के तरीका म आगू अवइया आदेस तक रोक रइही। ए प्रतिबंध छोटे तालाब अउ आने जल स्त्रोत जेखर संबंध कोनो नदी-नाला ले नइ हे, ओखर अलावा जलासय म करे जात केज कल्चर म लागू नइ होही। ए नियम के उल्लंघन करे म छत्तीसगढ़ राज्य मत्स्य क्षेत्र अधिनियम के चलत एक बछर के सजा अउ 10 हजार रूपिया के जुर्माना या फेर दूनों लगाय जाय के प्रावधान हे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
जिले की चिट्ठी
प्रादेसिक समाचार एकांश आकाशवाणी रईपुर डहार ले पेस करे गे कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस स्थित आकाशवाणी के जम्मों केंद्र मन एके संघरा रिले करही। ए बखत के अंक म ‘‘बालोद‘‘ जिला के बारे म जानकारी दे जाही।
नई औद्योगिक नीति
प्रदेस के नवा औद्योगिक नीति के पहिली ड्रॉफ्ट 31 जुलाई तक तियार हो जाही। ए जानकारी उद्योग मंत्री लखनलाल देवांगन ह दीन। ओमन बतइन कि एखर खातिर उद्योग विभाग डहार ले आने-आने उद्योग संगठन मन ले सुझाव ले जावत हे। अब तक 20 आने-आने उद्योग संघ ले सुझाव ले जा चुके हवय। एखर अलावा, गुजरात, महाराष्ट्र, ओड़िसा अउ मध्यप्रदेस समेत आने प्रदेस मनके उद्योग नीति के घलो विभाग कोति ले अध्ययन करे जावत हे।
बलौदाबाजार-शांति
बलौदाबाजार के कलेक्टोरेट अउ पुलिस अधीक्षक कार्यालय म बीते दिन म होय आगजनी के बाद अब जिला म सांति हवय। सामान्य दिन के जइसन दैनिक अउ शासकीय कामबूता पूरा तरीका ले सुरू होगे हवय। जिला के गांव के मनखे मन डहार ले घलो अब जिला कार्यालय म आके अपन समस्या अउ शासकीय कामबूता खातिर आवेदन जमा करे जावत हे। जिला के कलेक्टर दीपक सोनी ह बतइन कि कलेक्टोरेट म आगी लगे के घटना के बाद जिहां एक डहार रेस्टोरेसन के कामबूता म तेजी आय हे, उहें, दूसर डहार दूर-दराज ले कामकाज के सिलसिला म गांव के मनखे मन अपन आवेदन लेके जिला कार्यालय पहुंचत हवय। ओमन बतइन कि काली खाद्य शाखा म बड़ संख्या म आवेदक मन रासन कार्ड ले जुड़े कामबूता खातिर पहुंचे रिहीन, जेमा तुरते कार्रवाई करत 11 हितग्राही मन ल नवा रासनकार्ड अउ 8 हितग्राही मन ल नवीनीकरण रासनकार्ड प्रदान करे गीस।