केन्द्र सरकार ह सर्वोच्च न्यायालय ल सूचित करे हे कि एक हजार पांच सौ तिरसठ नीट-यूजी के छात्र मन ल एमबीबीएस, बीडीएस अउ आने-आने पाठ्यक्रम म दाखिला ले बर उपरहा अंक देके के फइसला ल रद्द कर दे गेहे। न्यायाधीश न्यायमूर्ति विक्रमनाथ अउ संदीप मेहता के पीठ ल केन्द्र अउ राष्ट्रीय परीक्षा एजेंसी ह बतईन कि जउन विद्यार्थी मन ल उपरहा अंक मिले रिहीस, उंखर तीर तेईस जून के दुबारा परीक्षा देके विकल्प रइही। एजेंसी ह किहीन कि पहिली ले घोसित काउंसिलिंग कार्यक्रम म कोनो बदलाव नइ होवय, काबर कि दुबारा होवइया परीक्षा के रिजल्ट तीस जून तक घोसित करे जाही। सर्वोच्च न्यायालय ह आज ए बात ल दोहरईन कि ओमन नीट-यूजी प्रवेस काउंसिलिंग प्रक्रिया म रोक नइ लगावय।
इही बीच, केन्द्र सरकार ह किहीन हे कि नीट-यूजी म प्रश्नपत्र लीक होय के कोनों सबूत नइ मिले हे। सरकार ह परीक्षा म कोनों भी गड़बड़ी के आरोप ले घलो इंकार करत हे। नई दिल्ली म शिक्षा मंत्रालय के कार्यभार संभाले के बाद मीडिया ले गोठबात करत धर्मेन्द्र प्रधान ह छात्र अउ पालक मन ल आश्वासन दीन कि केन्द्र ओमन ल न्याय देवाय बर प्रतिबद्ध हवय। ओमन किहीन कि मामला सर्वोच्च न्यायालय म हे अउ परीक्षा के संबंध म शिक्षाविद मनके एक ठिन समिति घलो बनाय गेहे।
विस-मानसून सत्र
छत्तीसगढ़ विधानसभा के मानूसन सत्र बाईस जुलाई ले सुरू होय के संभावना हे। विधानसभा अध्यक्ष डॉक्टर रमन सिंह ह बतईन कि संसदीय कार्य मंत्री के प्रस्ताव म मुख्यमंत्री विष्णुदेव साय ह मानसून सत्र बर तारीख तय कर लेहे, जेखर बर अधिसूचना जल्दीच जारी होय के संभावना हे।
नये विधानसभा भवन-बैठक
नया रईपुर म बनत नवा विधानसभा भवन, विधायक विश्राम गृह अउ विधानसभा के अधिकारी-कर्मचारी मनके आवास निर्माण के संबंध म आज मुख्यमंत्री निवास कार्यालय म एक अहम बइठका होईस। बइठका म विधानसभा अध्यक्ष डॉक्टर रमन सिंह, मुख्यमंत्री विष्णुदेव साय, उप मुख्यमंत्री अरूण साव समेत लोक निर्माण विभाग के अधिकारी मौजूद रिहीन। ए दउरान डॉक्टर सिंह ह लोक निर्माण विभाग के अधिकारी मन ल नवा विधानसभा भवन के ऊर्जा जरूरत के पूर्ति बर सोलर सिस्टम लगाय के संगेसंग परिसर म वृक्षारोपण करे, वाटर हार्वेस्टिंग के काम ल सुघ्घर ढंग ले कराय के निरदेस दीन हे।
ईडी-छापा
प्रदेस म कथित चावल घोटाला मामला प्रवर्तन निदेशालय-ईडी ह आज राजनांदगांव सहर के एक झिन अनाज कारोबारी मनोज अग्रवाल के घर म छापा मारीन। ओमन जिला राईस मिल एसोसिएशन के कोषाध्यक्ष हे।
मिले खबर के मुताबिक आज बिहनिया पांच बजे ईडी के पांच सदस्यीय टीम व्यापारी के घर पहुंचीन अउ छापा मारे के कार्रवाई करीन। ईडी के टीम दस्तावेज मनके जांच करत हे। एखर पहिली, ईडी ह मनोज अग्रवाल के डोंगरगढ़ स्थित घर म पाछु आठ अउ नौ जून के दबिस देके दस्तावेज मनके जांच करे रिहीन।
रक्तदान शिविर
काली विश्व रक्तदान दिवस हरय। ए मउका म मुख्यमंत्री विष्णुदेव साय ह युवा मन ले रक्तदान करके लोगन मनके जिनगी बचाय के अपील करीन हे। ओमन किहीन कि हर बछर चौदह जून के विश्व स्वास्थ्य संगठन समेत पूरा दुनिया रक्तदान ल बढ़ावा दे अउ रक्तदान के प्रति जागरूकता बढ़ाय के उद्देश्य ले विश्व रक्तदान दिवस मनाथे। श्री साय ह किहीन कि रक्तदान महादान के महत्व ल लोगन मन समझ जाय। रक्तदान करे म कोनों प्रकार के नुकसान नइ होवय।
ओपन स्कूल परीक्षा
छत्तीसगढ़ राज्य ओपन स्कूल डहार ले आयोजित हाईस्कूल अउ हायर सेकेंडरी के मुख्य अउ अवसर परीक्षा अब साल म तीन घांव आयोजित करे जाही। पहिली परीक्षा अप्रैल महीना म, दूसर परीक्षा अगस्त म अउ तीसर परीक्षा नवंबर म ले जाही। ए बछर अप्रैल महीना म राखे गे परीक्षा असन दूसर परीक्षा अउ तीसर परीक्षा म सामान्य, क्रेडिट, आर.टी.डी. अउ अवसर के परीक्षार्थी मन सामिल हो सकत हे। ओपन स्कूल के अधिकारी मन ह बतईन कि अगस्त म होवइया परीक्षा बर सामान्य सुल्क के संग प्रवेस के आखिरी तारीख तीस जून हवय।
राष्ट्रीय आम महोत्सव
रईपुर के इंदिरा गांधी कृषि विश्वविद्यालय म तीन दिवसीय राष्ट्रीय आम महोत्सव के आयोजन करे जावत हे। उद्यानिकी अउ प्रक्षेत्र वानिकी, छत्तीसगढ़ शासन अउ प्रकृति की ओर सोसायटी के सामलात राखे गे ए महोत्सव के सुभारंभ काली कृषि मंत्री रामविचार नेताम ह करीन। एमा छत्तीसगढ़ समेत देस के आने-आने राज्य के आम उत्पादक मन सामिल होवत हे। ए मउका म कृषि मंत्री ह किहीन कि छत्तीसगढ़ के माटी अउ जलवायु सबो प्रकार के फसल के उत्पादन बर उपयुक्त हवय। छत्तीसगढ़ के आने-आने जिला म फसल के संगेसंग किसान मन आम के खेती घलो करत हे।
समारोह के पगरइति करत कृषि विश्वविद्यालय के कुलपति डॉक्टर गिरीश चंदेल ह किहीन क ए आम महोत्सव म छत्तीसगढ़ समेत देस के आने-आने राज्य के तीन सौ सत्ताईस किस्म के आमा के प्रदर्सन करे जावत हे। एखर संगेसंग कृषि विश्वविद्यालय के वैज्ञानिक अउ छात्र मन डहार ले बनाय गे आमा के छप्पन व्यंजन के प्रदर्सन घलो करे जावत हे।
महंगाई भत्ता
राज्य सरकार के सामान्य प्रशासन विभाग ह जम्मों विभाग मनके विभागाध्यक्ष, संभागीय आयुक्त अउ कलेक्टर मन ल अखिल भारतीय सेवा के सदस्य मन ल पाछु एक जनवरी ले पुनरक्षित दर म पचास प्रतिसत महंगाई भत्ता के भुगतान करे के निरदेस देहे। खबर के मुताबिक केन्द्र सरकार के कर्मचारी मन ल भारत सरकार के वित्त मंत्रालय डहार ले एक जनवरी ले छियालीस ले पचास प्रतिसत महंगाई भत्ता मंजूर करे गेहे।
प्रदेस म काली एक-दू जघा म हल्का बरसा होय अउ गरज-चमक के संग छींटा पड़े के संभावना हे। मौसम विभाग के मुताबिक एक ऊपरी हवा के चक्रीय चक्रवाती घेरा बिहार के ऊपर बने हे। एखर असर ले प्रदेस म एक-दू जघा म गरज-चमक के संग अंधड़ चले अउ आकाशीय बिजली गिरे के संभावना हे। मौसम विभाग ह बतईन कि प्रदेस म जादा तापमान म कोनों बिसेस बदलाव नइ होवय।
रायपुर कलेक्टर-साख समिति
रईपुर कलेक्टर डॉक्टर गौरव सिंह ह आज तिल्दा विकासखंड के सारागांव अउ अड़सेना गांव के कृषि साख सहकारी समिति के निरीक्षण करीन। ए दउरान ओमन किसान मन ले गोठबात करीन अउ खाद-बीज के संबंध म जानकारी लीन। कलेक्टर ह अधिकारी मन ल किसान मनके उंखर मांग के अनुरूप खाद-बीज के उपलब्धता के संगेसंग ओखर गुणवत्ता सुनिश्चित निरदेस दीन अउ उंखर नमूना लेके जांच बर प्रयोगशाला भेजे बर घलो किहीन। ओमन किसान क्रेडिट कार्ड के नियम ल सरल करके जादा ले जादा किसान मन ल एखर फायदा देवाय के घलो निरदेस समिति के कर्मचारी मन ल दीन।
अउ अब थोरकुन समाचार सार म –
– मुंगेली जिला म अखिल भारतीय संत समिति के कार्यकर्ता मन ह जम्मू-कश्मीर म तीर्थयात्री मनके उपर आतंकवादी हमला के विरोध म राष्ट्रपति के नाम कलेक्टर ल ज्ञापन सौंपीन।
– जिला रोजगार अउ स्वरोजगार मार्गदर्शन केन्द्र, रईपुर डहार ले अट्ठारह जून के पुराना पुलिस मुख्यालय परिसर म बिहनिया ग्यारह बजे ले रोजगार मेला के आयोजन करे जाही।
– जांजगीर के चांपा थाना क्षेत्र म तेज रफ्तार ट्रक ह एक झिन युवक ल टक्कर मार दीस। ए हादसा म ओखर मउकाच मौत होगे।
अउ
– गौरेला-पेण्ड्रा-मरवाही जिला के पुलिस ह एक ठिन गाड़ी ले करीबन चौदह सौ बीस लीटर सराब जब्त करे हे।