बलौदाबाजार जिला म होय तोड़फोड़ अउ आगजनी के घटना ल लेके आज मुख्यमंत्री विष्णुदेव साय ह अपन निवास कार्यालय म एक ठन उच्च स्तरीय बइठका लीन। ए बइठका म उप मुख्यमंत्री विजय शर्मा अउ अरूण साव के संगेसंग राज्य सरकार के पांच झन मंत्री मन ह मौजूद रिहीन।
ओति, तोड़फोड़ अउ आगजनी के जांच सुरू कर दे गेहे अउ कुछेक मनखे मन उपर एफआईआर दरज करे के समाचार मिले हे।
उहें, उपमुख्यमंत्री विजय शर्मा ह बलौदाबाजार जिला मुख्यालय म काली करे गे तोड़फोड़ अउ आगजनी घटना के जायजा लीन। उंखर संग खाद्य मंत्री दयालदास बघेल अउ राजस्व मंत्री टंकराम वर्मा ह घलो मौजूद रिहीन। श्री शर्मा ह कलेक्टर अउ एसपी के घटना के जम्मों जानकारी लीन। संगेसंग ओमन परिसर म होय आगजनी म जिला पंचायत, कुटुम्ब न्यायालय, जनपद पंचायत कार्यालय के संगेसंग सहर के घलो जायजा लीन। श्री शर्मा ह दोषी मनके खिलाफ सख्त कार्रवाई करे के निरदेस अधिकारी मन ल दीन। ओमन किहीन कि पाछु महीना अमर गुफा म जैतखाम ल क्षति पहुंचाए गे रिहीस हे, जेमा पुलिस टीम के जांच ले असंतुष्ट होके समाज के लोगन मन ह जांच के मांग करे रिहीन। ओमन बतईन कि जम्मों किसम के चरचा करे के बाद न्यायिक जांच के घोषणा मुख्यमंत्री के निरदेस म करे गे रिहीस हे। जेमा समाज के लोगन मन ह संतुष्टि जाहिर करे खातिर मुख्यमंत्री ल धन्यवाद ज्ञापित करे बर एक ठिन कारीकरम राखे गे रिहीस। इही दउरान कुछ असामाजिक मनखे मन ह भीड़ म खुसर के आगजनी के घटना ल अंजाम दीन। एखर जांच करे जात हे अउ दोषी मन उपर कड़ा कारवाही करे जाही। खबर के मुताबिक बलौदाबाजार जिला म सोलह जून तक धारा-एक सौ चवालीस लागू कर दे गेहे।
मुख्यमंत्री-जवान स्वास्थ्य
मुख्यमंत्री विष्णुदेव साय ह बलौदाबाजार हिंसा म घायल होय पुलिस जवान संदीप खलको के जल्दीच स्वस्थ होय के काममना करे हे। मुख्यमंत्री के निरदेस म श्री खलको ल अपोलो अस्पताल म भर्ती कराय गेहे, जिखर उहां बढ़िया इलाज चलत हे। खबर के मुताबिक आईजी संजीव शुक्ला, कलेक्टर अवनीश शरण अउ पुलिस अधीक्षक रजनीश सिंह ह अस्पताल के दउरा करके श्री खलको के हालचाल जानीन। उहें, अधिकारी मन ह घायल जवान के परिवार वाले मन ले घलो भेंट करीन अउ ओमन ल सांत्वाना दीन।
केन्द्र-कर धनराशि
केन्द्र सरकार डहार ले राज्य मन ल जून महीना बर एक लाख उनतालीस हजार सात सौ पचास करोड़ रूपिया के कर धनराशि जारी कर दे गेहे। एमा छत्तीसगढ़ ल चार हजार सात सौ एकसठ करोड़ रूपिया ले जादा के रासि आवंटित करे गेहे। वित्त मंत्रालय ह किहीन हे कि ए रासि ह राज्य सरकार मन ल विकास अउ पूंजी संबंधी खर्चा म तेजी लाए म मदद करही। दू हजार चौबीस-पच्चीस के अंतरिम बजट म राज्य मन ल कर हस्तांतरण करे खातिर बारह लाख करोड़ रूपिया ले जादा के प्रावधान हे। वित्त मंत्रालय ह बतईन हे कि ए किस्त के संगेसंग केन्द्र सरकार ह दस जून तक राज्य मन ल दू लाख उनयासी हजार करोड़ रूपिया ले जादा के धनराशि दे देहे।
उहें, केन्द्रीय वित्त मंत्रालय डहार ले छत्तीसगढ़ ल राशि जारी करे के बाद मुख्यमंत्री विष्णुदेव साय ह प्रधानमंत्री नरेन्द्र मोदी अउ केन्द्रीय वित्त मंत्री निर्मला सीतारमण के आभार प्रकट करीन।
केंद्रीय-मंत्री पदभार
केन्द्र सरकार के मंत्री मन के विभाग ल बांट दे गेहे। खबर के मुताबिक राजनाथ सिंह ल रक्षा मंत्रालय, अमित शाह ल गृह अउ सहकारिता मंत्रालय, नितिन गडकरी ल सड़क परिवहन अउ राजमार्ग मंत्रालय, निर्मला सीतारमन ल वित्त के संगेसंग कारपोरेट कार्य मंत्रालय, उहें डाक्टर सुब्रमण्यम जयशंकर ल विदेश मंत्री के पदभार सउपे गेहे। जगत प्रकाश नड्डा ल स्वास्थ्य अउ परिवार कल्याण के संगेसंग रसायन अउ उर्वरक मंत्री बनाए गेहे। शिवराज सिंह चौहान ल कृषि, किसान कल्याण अउ ग्रामीण विकास मंत्रालय के पदभार सउपे गेहे। अश्विनी वैष्णव ल रेल मंत्रालय के संगेसंग सूचना तथा प्रसारण मंत्रालय के पदभार दे गेहे।
हरियाणा के पूर्व मुख्यमंत्री मनोहरलाल खट्टर ल आवास अउ सहरी विकास मंत्री के संगेसंग ऊर्जा मंत्रालय के जिम्मेदारी दे गेहे। किरेन रिजिजू ल संसदीय कार्य मंत्री, अन्नपूर्णा देवी ल महिला विकास मंत्री, चिराग पासवान ल खाद्य, प्रसंस्करण मंत्री, ज्योतिरादित्य सिंधिया ल संचार मंत्रालय, एचडी कुमार स्वामी ल भारी उद्योग मंत्री, बिहार के पूर्व मुख्यमंत्री जीतनराम मांझी ल सूक्ष्म, लघु अउ मध्यम उद्यम मंत्री, सर्बानंद सोनोवाल ल जहाजरानी मंत्री, राजीव रंजन सिंह उर्फ ललन सिंह ह पंचायती राज अउ प्रहलाह जोशी ल उपभोक्ता मंत्रालय के जिम्मेवारी दे गेहे। गिरिराज सिंह ल कपड़ा मंत्रालय, भूपेन्द्र यादव ल पर्यावरण मंत्रालय, हरदीप सिंह पुरी ल पेट्रोलियम, मनसुख मंडाविया ल खेल मंत्री, डाक्टर एल. मुरूगन ल सूचना अउ प्रसारण मंत्रालय म राज्यमंत्री बनाए गेहे।
उहें, छत्तीसगढ़ के बिलासपुर सांसद तोखन साहू ल शहरी विकास अउ आवास राज्यमंत्री बनाए गेहे।
कैबिनेट-पीएम आवास
केन्द्र सरकार डहार ले ग्रामीण अउ सहरी परिवार मन बर आवास के जरूरत ल पूरा करे खातिर तीन करोड़ के उपराहा मकान दे जाही। काली नई दिल्ली म नवा बनाए गे एनडीए सरकार के पहिलीच बइठका म फइसला ले गीस। केन्द्र सरकार ह पात्र गांव वाले अउ सहर के परिवार वाले मन ल बुनियादी सुविधा देवाय खातिर बछर दू हजार पंदरा ले प्रधानमंत्री आवास योजना सुरू करे हे। ए योजना के तहत पाछु दस बछर म पात्र गरीब परिवार के मनखे मन बर कुल चार करोड़ इक्कीस लाख मकान बनाए गेहे।
राष्ट्रीय परीक्षा एजेंसी-आश्वासन
राष्ट्रीय परीक्षा एजेंसी-एनटीए के महानिदेशक सुबोध कुमार सिंह ह देसभर के मेडिकल प्रवेस परीक्षा-नीट के उम्मीदवार मन ल आस्वासन दे हे कि छह ठन परीक्षा केन्द्र के एक हजार पांच सौ तिरसठ उम्मीदवार मनके परिणाम मनके दुबारा पूरक अंक समीक्षा के सेती उंखर मनके रैकिग ह परभावित नई होवय। आकासवाणी समाचार ले गोठबात करत श्री सिंह ह किहीन कि ए मामला के जांच करे खातिर चार झन सदस्य वाले उच्च स्तरीय समिति बनाए गेहे, जउन ह एक हफ्ता के भीतर अपन रिपोर्ट ल पेस करही।
बाल श्रम निषेध दिवस
काली अंतर्राष्ट्रीय बाल श्रम निषेध दिवस मनाय जाही। ए मउका म मुख्यमंत्री विष्णुदेव साय ह संदेस जारी करत किहीन हे कि लइका मन ह हमर देस के भविष्य हरय अउ समाज के अमूल्य धरोहर हरय, जेखर देखभाल करे के जिम्मेवारी हम सब्बो झन लोगन मनके हरय। ओमन अपील करीन हे कि नान्हें लइका मन तिरन मजदूरी झन करावय।
अभियंता-प्रशिक्षण कार्यक्रम
राजधानी रईपुर म आज ले लोक निर्माण विभाग कोती ले रईपुर अउ दुरूग संभाग के अभियंता मन बर चार दिवसीय प्रसिक्षण कार्यक्रम के सुरूआत करे गीस। प्रसिक्षण के उद्घाटन सत्र म राज्य के उपमुख्यमंत्री अरूण साव ह किहीन कि सड़क अउ पुल-पुलिया बनाए खातिर नवा-नवा तकनीक के जानकारी ले अभियंता मनके काम ह अउ जादा बढ़िया हो जही।
विशेषज्ञ चिकित्सक-समिति
विधानसभा अध्यक्ष डॉक्टर रमन सिंह के अगुवई म आज विधानसभा सचिवालय म स्वास्थ्य मंत्री श्याम बिहारी जायसवाल अउ उप मुख्यमंत्री विजय शर्मा के मौजूदगी म प्रदेस के स्वास्थ्य व्यवस्था अउ मेडिकल कालेज मनके सुविधा म विस्तार ले गोठबात करे गीस। विधानसभा अध्यक्ष ह राज्य के मेडिकल कॉलेज मन म विशेषज्ञ डॉक्टर मनके कमी ल लेके चिंता जतईन हे। संगेसंग ओमन ए डॉक्टर मनके मानदेय बढ़ाय अउ नियमित करे के जरूरी निदेस दीन। स्वास्थ्य मंत्री ह विधानसभा अध्यक्ष के सुझाव उपर एक ठन समिति बनाय के निरदेस दीन।
आम महोत्सव
रईपुर के इंदिरा गांधी कृषि विश्वविद्यालय म काली ले तीन दिन चलइया राष्ट्रीय आम महोत्सव के कारीकरम करे जाही। एमा डेढ़ सौ ले जादा आमा के प्रजाति मन ल देखाय जाही। ए महोत्सव म छत्तीसगढ़ समेत देस के कई ठन राज्य मनके आमा के खेती करइया मन ह सामिल होही। ए महोत्सव के उद्घाटन राज्य के कृषि मंत्री रामविचार नेताम ह करही।
अउ अब मौसम के हाल…
मौसम विभाग के मुताबिक राज्य म बरसा के गतिविधि म तेरह जून ले तेजी आही। एखर बाद मानसून ह तेजी ले आगू बाढ़ही। अवइया चौबीस घंटा के दउरान राज्य के तापमान म बढ़ोतरी होय के संभावना हे।
मौसम विभाग के मुताबिक एक ठन द्रोणिका ह पूर्वी उत्तरप्रदेश ले नागालैंड तक फइले हवय, जेखर असर ले राज्य म काली एक-दू ठन स्थान म हल्का बरसा होय के संभावना हे। उहें, कोनों-कोनों जघा म आंधी-तूफान अउ गाज गिरे के चेतावनी दे गेहे। एखर अलावा बस्तर संभाग के दक्षिणी जिला के संगेसंग दुरूग, रईपुर अउ बिलासपुर संभाग के कोनों-कोनों जघा मन म गरज-चमक के संग हवा-गरेर अउ गाज गिरे के संभावना जताय गेहे।