भाजपा के बड़का नेता नरेंद्र मोदी ह आज प्रधानमंत्री के पदभार संभाल लीन। पदभार के बाद प्रधानमंत्री ह किसान सम्मान निधि के सत्रहवां किस्त जारी कर देहे। करीबन बीस हजार करोड़ रूपिया के ए किस्त म नौ करोड़ तीस लाख किसान मन ल फायदा होही। प्रधानमंत्री ह किहीन कि अवइया बेरा म ओखर सरकार ह कृषि क्षेत्र अउ किसान मनके कल्याण बर कतकोन काम करही।
एखर पहिली भाजपा के वरिष्ठ नेता नरेंद्र मोदी ह काली नई दिल्ली के राष्ट्रपति भवन म सरलग तीसर घांव प्रधानमंत्री पद के सपथ लीन। राष्ट्रपति द्रौपदी मुर्मू ह ओमन ल पद अउ गोपनीयता के सपथ दिलाइन।
मंत्रिमंडल म इकतीस कैबिनेट मंत्री, पांच स्वतंत्र प्रभार राज्यमंत्री अउ छत्तीस राज्यमंत्री के संगेसंग बहत्तर मंत्री मन ह सपथ लीन। नवा केंद्रीय मंत्रिपरिषद म भाजपा के बड़का नेता राजनाथ सिंह, अमित शाह, नितिन गडकरी, एस. जयशंकर, पीयूष गोयल, धर्मेन्द्र प्रधान, निर्मला सीतारमन, जे.पी. नड्डा, शिवराज सिंह चौहान, मनोहरलाल खट्टर अउ सर्बानंद सोनोवाल के संगेसंग इकतीस झिन कैबिनेट मंत्री म ल सपथ देवाय गीस।
प्रधानमंत्री नरेन्द्र मोदी के नवा मंत्रिमंडल के सदस्य के रूप म छत्तीसगढ़ के बिलासपुर ले सांसद तोखन साहू ह घलो सपथ लीन। ए लोकसभा चुनाव म तोखन साहू ह कांग्रेस प्रत्यासी देवेन्द्र यादव ल एक लाख चौंसठ हजार ले जादा वोट ले हराय हे।
मुख्यमंत्री-प्रधानमंत्री बधाई
मुख्यमंत्री विष्णुदेव साय ह प्रधानमंत्री नरेन्द्र मोदी ल सरलग तीसर घव प्रधानमंत्री बने उपर बधाई दे हवय। ओमन किहीन कि डबल इंजन के सरकार ह प्रदेस के विकास ल नवा रद्दा दिखाही।
उहें, मुख्यमंत्री, उपमुख्यमंत्री के संगेसंग राज्य मंत्रिमंडल के सदस्य मन ह घलो प्रधानमंत्री के मंत्रिपरिषद म छत्तीसगढ़ के सांसद तोखन साहू ल सामिल करे जाए उपर बधाई दे हे।
जैतखाम-न्यायिक जांच
गिरौदपुरी धाम होय कथित तोड़फोड़ के विरोध म एक ठिन समाज विशेष के लोगन मन ह बलौदाबाजार म धरना प्रदर्सन करीन। संगेसंग जिला कलेक्टर कार्यालय के घेराव करे के घलो परयास करीन। ए दउरान कोनों-कोनों प्रदर्सनकारी मन उग्र होगे अउ ओमन कलेक्टर आफिस म तोड़फोड़ करे के संगेसंग बलौदाबाजार मुख्य रद्दा म आगी लगा दीन। एखर अलावा प्रदर्सनकारी मन डहार ले पुलिस जवान मन उपर घलो पथराव करे के समाचार मिले हे। तनाव के स्थिति ल देखत रईपुर ले अतिरिक्त पुलिस बल मउका म भेजे गेहे।
राज्य शासन ह गिरौदपुरी धाम के जैतखाम म होय तोड़फोड़ के न्यायिक जांच कराए के घोसना करे हे। उपमुख्यमंत्री विजय शर्मा ह ए पूरा मामला के न्यायिक जांच कराए के बात केहे हे। ओमन किहीन कि प्रदेस म कोनो जघा सामाजिक स्थिति ह बिगड़ना नई चाही। जिहां भी अइसन घटना होही, त दोषी मनके खिलाफ कड़ा कार्रवाई करे जाही।
पीएम जनमन योजना
प्रधानमंत्री जन-मन योजना के फायदा देवाय बर गौरेला-पेण्ड्रा-मरवाही जिला के बैगा बाहुल्य ग्राम पंचायत म बिसेस सिविर चलाए जात हे। तीन जुलाई तक चलइया ए बिसेस सिविर मन म आधार कार्ड, रासनकार्ड, मनरेगा जॉब कार्ड, प्रधानमंत्री आवास, विद्युत कनेक्सन, उज्जवला गैस कनेक्सन, आयुष्मान कार्ड के संगेसंग जाति प्रमाण-पत्र, किसान क्रेडिट कार्ड अउ प्रधानमंत्री सुरक्षा बीमा के छूट हितग्राही मनले जुड़े विभाग डहार ले सिविर मन म फायदा दे जाना हे। ए योजना के तहत आज ग्राम पंचायत चुकतीपानी म सिविर लगाए गीस। त उहें, बारह जून के ग्राम पंचायत केंवची के बैगा पारा म बिसेस सिविर लगाए जाही।
हाथी हमला-मौत
कोरबा जिला म जंगली हाथी के हमला म एक झिन माईलोगिन के मउत होगे हे। वन विभाग के अधिकारी मन बतईन कि कोरबा वनमंडल के कुदमुरा वनक्षेत्र म होय हमला म मृतक महिला के पहिचान यादो कुंवर बाई के रूप म होय हे। जानबा के मुताबिक आज बिहनिया ए महिला ह अपन गोसइया के संग गिरारी गांव जावत रिहीन, तभे बीच म जंगली हाथी ह एखर मन उपर हमला कर दीन।
मेघदूत-दामिनी ऐप
केन्द्र सरकार ह किसान मन बर मौसम ले जुड़े जानबा अउ आकासीय बिजली ले जनहानि रोके बर मेघदूत अउ दामिनी ऐप बनाए हे। मेघदूत ऐप के माध्यम से किसान मन ह मौसम के बारे म पूरा जानबा के संगेसंग हवा के गति अउ दिसा के जानबा ले सकथे। त उहें दामिनी ऐप के माध्यम ले बीस ले तीस किलोमीटर के दायरा म गाज गिरे के पहिली ले अनुमान बताए जा सकही। ए दूनों ऐप ल गूगल प्ले स्टोर के माध्यम ले कोनों भी एंड्राइड मोबाइल म डाउनलोड करे जा सकथे। राजस्व अउ आपदा प्रबंधन विभाग ह जम्मों कलेक्टर मन ल ए दूनों ऐप के प्रचार करे के संगेसंग गवई-गांव मन म मुनादी कराए के निरदेस दे हे।
मौसम
मौसम विभाग के मुताबिक काली दक्षिण छत्तीसगढ़ म हल्का बरसा हो सकथे। त उहें प्रदेस के एक-दू जघा म गरज-चमक के संग बूंदाबांदी होय के संभावना हे। संगेसंग कोनों-कोनों जघा म हवा गरेर चले अउ गाज गिरे के संभावना बताए गेहे।
मौसम विभाग के मुताबिक एक ठिन द्रोणिका पूर्वी बिहार ले नागालैंड तक बने हे। उहें, एक ठिन उपरी हवा के चक्रीय-चक्रवाती घेरा मराठवाड़ा के उपर करीबन तीन किलोमीटर उंचाई म स्थित हे। एखर सेति काली प्रदेस के तापमान म दू ले तीन डिग्री के बढ़ोत्तरी होही।
स्वास्थ्य विभाग-कार्रवाई
सरगुजा जिला के प्राथमिक स्वास्थ्य केन्द्र नवानगर म प्रसूता डहार ले भुईंया म प्रसव कराए जाए के घटना के मामला म खंड चिकित्सा अधिकारी डॉक्टर पी.एन. राजवाड़े ल निलंबित कर देहे। संगेसंग ए.एन.एम. मीणा चौहान ल हटाके आयुष्मान मंदिर रेवापुर म काम सउपे गेहे अउ संगेसंग ड्यूटी म पदस्थ स्टाफ नर्स ल घलो निलंबित कर दे गेहे।
जानबा के मुताबिक मामला के संज्ञान लेवत स्वास्थ्य मंत्री श्याम बिहारी जायसवाल ह घटना के जांच के निरदेस दे रिहीन। स्वास्थ्य विभाग ह ए मामला के जांच के बाद कार्रवाई करे हे।
मुख्यमंत्री-खिलाड़ी मुलाकात
नई दिल्ली के छत्तीसगढ़ सदन म आज मुख्यमंत्री विष्णुदेव साय ह नेसनल जूनियर अउ सब जूनियर प्रतियोगिता म भाग लेबर आए छत्तीसगढ़ के बत्तीस झिन पावर लिफ्टर खिलाड़ी मन ले मिलीन। ए मउका म छत्तीसगढ़ के उपमुख्यमंत्री विजय शर्मा अउ अरूण साव ह घलो सामिल रिहीन। मुख्यमंत्री ह खिलाड़ी मनके मेहनत उपर प्रसंसा करीन अउ संगेसंग उपमुख्यमंत्री ह खिलाड़ी मनके हिम्मत बढ़ाके आगू भविष्य बर सुभकामना दीन।
आईटीबीपी-फील्ड अस्पताल
आईटीबीपी ह बस्तर अउ महाराष्ट्र के सीमा वाले मोहला-मानपुर के माओवाद प्रभावित सीतागांव म एक ठिन फील्ड अस्पताल खोले के फइसला लेहे। सत्ताईसवां वाहिनी के कमांडेंट विवेक पांडेय ह बतईन कि गांव-गवई के लोगन मन ल बने ढंग ले इलाज के सुविधा मिले, एखर सेती ए पहल करे गेहे। ओमन बतईन कि ए फील्ड अस्पताल म ओपीडी, आईपीडी, दवाखाना, लेबोरेटरी के संगेसंग आने कतकोन सुविधा मुफ्त म दे जाही। उहें, आईटीबीपी के चिकित्सा अधिकारी मन हे गांव के लोगन मनके मुफ्त म इलाज करही।
दुर्घटना
बिलासपुर ले कोरबा जावत ए ठिन बस ह मोहतराई के तीर अनते-तनते होके पलट गे। ए घटना म छह झिन मनखे मन घायल होगे हे। घायल मन ल अस्पताल म भरती कराए गेहे। ए घटना रतनपुर थाना क्षेत्र के हरय।
राज्य सरकार ह पूर्व मुख्य सचिव सुनील कुमार कुजूर ल राज्य सहकारी निर्वाचन आयुक्त बनाए हे। ए बारे में अधिसूचना जारी कर दे गेहे। श्री कुजूर ह उन्नीस सौ तिरासी बैच के रिटायर आईएएस अधिकारी हरय। दो हजार अट्ठारह म प्रदेस म सत्ता परिवर्तन के बाद ओमन ल राज्य के मुख्य सचिव के जिम्मेवारी दे गे रिहीस। राज्य सहकारी निर्वाचन आयुक्त के रूप म उंखर नियुक्ति एसो के अक्टूबर महीना तक करे गेहे।
अउ अब थोरकुन समाचार सार म –
– राज्य के सासकीय औद्योगिक प्रसिक्षण संस्था मन म छात्रावास अधीक्षक अउ छात्रावास अधीक्षिका के पद बर अभ्यर्थी मनके के छठवां चरण के दस्तावेज सत्यापन तेरह जून के सासकीय औद्योगिक प्रसिक्षण संस्थान सड्ढू रायपुर म करे जाही।
– जगदलपुर के जिला कौशल विकास प्राधिकरण अउ जिला रोजगार-स्वरोजगार मार्गदर्सन केन्द्र डहार ले लाइवलीहुड कालेज आड़ावाल म बारह अउ तेरह जून के प्लेसमेंट कैम्प के आयोजन करे जाही। एखर माध्यम ले सिक्योरिटी गार्ड के पद म भरती करे जाही।
अउ
– जसपुर जिला म बागबहार पुलिस ह तीन झिन महिला के संगेसंग चार झिन गांजा तस्कर मन ल गिरफ्तार करे हे। इंखर तीर ले करीबन चालीस किलो गांजा बरामद करे गेहे, जेखर कीमत चार लाख रूपिया बताए जाते हे।