केंद्र म नवा सरकार के सपथ ग्रहण समारोह के तियारी ए बेरा चलत हे। राष्ट्रपति द्रौपदी मुर्मू ह राष्ट्रीय जनतांत्रिक गठबंधन एनडीए संसदीय दल के नेता नरेंद्र मोदी ल नवा सरकार बनाय बर बुलाय हे। सपथ ग्रहण समारोह काली संझा सात बजके पंद्रह मिनट म राष्ट्रपति भवन म होही। राष्ट्रपति द्रौपदी मुर्मू ह भाजपा के बड़का नेता नरेंद्र मोदी ल तीसर घांव प्रधानमंत्री पद के सपथ देवाही। सपथ ग्रहण समारोह म केंद्र सरकार के नवा मंत्री मंडल के सदस्य मन ह घलो पद अउ गोपनीयता के सपथ लिही।
सपथ ग्रहण समारोह के सोज्झे प्रसारण आकाशवाणी केंद्र ले करे जाही, जेखर सेति आकाशणवाणी केंद्र रईपुर ले काली संझा छै बजके पैंतालिस मिनट म प्रसारित होवइया प्रादेसिक समाचार के प्रसारण रतिहा आठ बजके तीस मिनट ले आठ बजके पैंतालिस मिनट तक करे जाही। काली छत्तीसगढ़ी समाचार बुलेटिन अपन बेरा म प्रसारित होही।
शपथ ग्रहण-आमंत्रण
काली प्रधानमंत्री नरेंद्र मोदी अउ केंद्रीय मंत्रिपरिषद के सपथ ग्रहण समारोह के मउका म भारत के पड़ोसी देस के बड़का नेता मन बिसेस अतिथि के रूप म ए समारोह म भाग लिही। संगेसंग कतकोन विशिष्टजन मन ल घलो सपथ ग्रहण समारोह म नेवता दे गेहे। एमा दक्षिण पूर्व मध्य रेलवे म काम करइया सहायक लोको पायलट स्नेह सिंह बघेल ल घलो नेवता दे गेहे। श्री बघेल ल वंदेभारत ट्रेन टीम के एक झिन प्रमुख सदस्य के रूप म बढ़िया सेवा देके सेति नेवता भेजे गेहे।
जानबा के मुताबिक दक्षिण पूर्व मध्य रेलवे के नागपुर मंडल के गोंदिया लॉबी म काम करइया स्नेह सिंह बघेल ह कर्मयोगी के तहत प्रसिक्षण पवइया रेलकर्मी हरय। ओमन ग्यारह दिसंबर दू हजार बाईस के सुरू होय बिलासपुर, नागपुर वंदेभारत एक्सप्रेस के चालकदल म सामिल रिहीन।
माओवादी मुठभेड़
नारायणपुर दंतेवाड़ा कोंडागांव जिला के सीमावर्ती जघा म सुरक्षाबल मन डहार ले चलाय गे संयुक्त आपरेसन म छै झिन वर्दीधारी माओवादी मारे गेहे। हमर संवाददाता ले मिले जानबा के मुताबिक पूर्व बस्तर डिवीजन के गांव मुंगेडी अउ गोबेल क्षेत्र म डिस्ट्रिक्ट रिजर्व गार्ड डीआरजी अउ आईटीबीपी के जवान मनके संग काली होय मुठभेड़ म ए माओवादी मारे गीस। त उहें, डीआरजी के तीन झिन जवान मन घलो घायल होय हे। घटना वाले जघा ले माओवादी मनके सव के संगेसंग हथियार घलो बरामद करे गेहे। क्षेत्र म सुरक्षाबल मन के सर्चिंग अभियान चलत हे।
बलरामपुर हत्या-एसआईटी जांच
बलरामपुर जिला म बजरंग दल के संयोजक सुजीत स्वर्णकार अउ एक झिन युवती के हत्या के जांच एसआईटी करही। पुलिस मुख्यालय म पदस्थ एआईजी रत्ना सिंह के अगुवई म बने ए टीम म फॉरेसिंक एक्सपर्ट ल घलो सामिल करे गेहे। जानबा के मुताबिक पाछू छब्बीस मई के ए दूनों झिन के सव बलरामपुर-अंबिकापुर के रद्दा म मिले रिहीस।
मुख्यमंत्री-स्वेच्छानुदान राशि
मुख्यमंत्री विष्णुदेव साय ह बाहपानी सड़क दुर्घटना अउ पिरदा म बारूद फैक्ट्री बिस्फोट म मारे गे लोगन मनके परिवार वाले मन ल अउ घायल के संगेसंग इंक्यावन झिन प्रभावित मन ल स्वेच्छानुदान ले एक करोड़ इंक्यावन लाख रूपिया ले जादा के पइसा मंजूर करे हे। जेमा ले अट्ठाइस मृतक मनके परिवार मन ल पांच-पांच लाख रूपिया अउ तेईस झिन घायल मन ल पचास-पचास हजार रूपिया के सहायता रासि दे गेहे।
जानबा के मुताबिक पाछू बीस मई के कबीरधाम जिला के बाहपानी गांव म होय सड़क दुर्घटना म उन्नीस झिन लोगन मारे गे रिहीस, त उहें, सोलह झिन मनखे मन घायल होय रिहीन।
अइसने पाछू पच्चीस मई के बेमेतरा जिला के गांव पिरदा म एक ठिन बारूद फैक्ट्री म होय बिस्फोट म एक झिन मनखे के मउत होय रिहीस हे अउ आठ झिन लापता हे। ए घटना म सात झिन मनखे मन घायल होय रिहीन।
वित्त विभाग-वाहन किराया आदेश
वित्त विभाग ह राज्य सरकार के जम्मों विभाग, निगम, मंडल अउ उपक्रम निकाय म गाड़ी मन ल किराया म लेके बेवस्था उपर तुरते परभाव ले रोक लगा देहे। वित्त विभाग ह गाड़ी किराया ले उपर करीबन बाइस ठन सर्त लागू करे हे। जेमा केहे गेहे कि कोन स्तर के अधिकारी मन कइसन किसम के गाड़ी किराया म लेके पात्रता राखही अउ ओखर किराया का होही। ए बारे म वित्त विभाग के सचिव मुकेश बंसल ह आदेस जारी कर देहे।
मानसून-दस्तक
दक्षिण-पश्चिम मानसून ह आज प्रदेस के सुकमा जिला म पहुंच गेहे। मौसम विज्ञानी एच.पी.चन्द्रा ह बतइन कि एसो मानसून ह अपन तय बेरा ले पहिली छत्तीसगढ़ पहुंच गेहे। ओमन बतइन कि ए पहिली मउका हरय, जब मानसून ह सबले पहिली सुकमा जिला म पहुंचे हे। वइसे मानसून ह बस्तर के रद्दा छत्तीसगढ़ प्रवेस करथे।
मौसम विभाग ह अवइया चौबीस घंटा के दौरान प्रदेस के एक-दू जघा म हल्का बरसा होय या फेर गरज-चमक के संग बूंदाबांदी होय के संभावना बताय हे। उहें, कोनो-कोनो जघा म हवा गरेर के संग गाज गिरे के चेतावनी दे गेहे।
मौसम विभाग ह अवइया पांच दिन तक बस्तर संभाग के जम्मों जिला म बरसा होय के संभावना बताय हे। पाछू चौबीस घंटा के दौरान बस्तर संभाग के कतकोन जिला म बने बरसा होय हे। एखर अलावा बलौदा बाजार, दरभा अउ गुरूर म घलो बरसा दरज करे गेहे।
परसा खदान-पौधारोपण
सरगुजा जिला के उदयपुर तहसील म परसा ईस्ट कांता बासन खदान परिसर म विश्व पर्यावरण दिवस के मउका म पच्चीस हजार पौधा लगाय गीस। संगेसंग पैदल मार्च निकालके लोगन मन ल पर्यावरण के रक्षा करे के संदेस दे गीस। अदाणी नेचुरल रिसोर्सेज ह क्षेत्र म बछर दू हजार तीस तक छियासी लाख रूख लगाय के लक्ष्य राखे हे। राजस्थान राज्य विद्युत उत्पादन निगम लिमिटेड के कोयला निकाले जा चुके भूईयां म पाछू दस साल म साढ़े ग्यारह लाख ले जादा रूख लगाय जा चुके हे। जेमा बियासी हजार पौधा साल के हरय।
दुर्घटना
दुरूग ले तीर्थयात्री ले भरे एक ठिन बस के आज अंतेतंते होके आगरा-लखनऊ एक्सप्रेस-वे उपर पलट जाय ले तीन झिन लोगन के मउत होगे। उहें, करीबन चालिस झिन यात्री घायल होगे। ए जम्मों यात्री मन वैष्णोदेवी के दर्सन करे के बाद छत्तीसगढ़ लहूटत रिहीन। जम्मों घायल मन ल सिकोहाबाद अस्पताल अउ फिरोजाबाद मेडिकल म भर्ती कराय गेहे। बस म करीबन पैंसठ झिन यात्री मन बइठे रिहीन।
मुख्यमंत्री ह ए घटना उपर सोक व्यक्त करे हे।
ईडी छापा
राजनांदगांव जिला के डोंगरगढ़ म प्रवर्तन निदेसालय ईडी ह मां बम्लेश्वरी मंदिर ट्रस्ट के अध्यक्ष अउ डोंगरगढ़ राईस मिल एसोसिएसन के अध्यक्ष मनोज अग्रवाल के घर आज छापा मारिन। ईडी के ए कार्रवाई कस्टम मीलिंग घोटाला ल लेके हे। ईडी के आरोप हे कि मार्कफेड के अधिकारी अउ राज्य चांवल मिलर्स एसोसिएसन के पदाधिकारी मन ह मिलके ए घोटाला करे हे।
मुख्यमंत्री-ट्रायबल यूथ हॉस्टल
मुख्यमंत्री विष्णुदेव साय ह आज नई दिल्ली के द्वारका स्थित ट्राइबल यूथ हॉस्टल के दउरा करीन। ए मउका म ओमन हॉस्टल के बेवस्था ल देखिन अउ छात्र मन ले गोठबात करीन। ओमन अधिकारी मन ल निरदेस दीन कि हॉस्टल म छात्र मनके सुविधा के बिसेस धियान रखे जाय अउ कोनो प्रकार के कमी होय त तुरते दूर करे जाय। मुख्यमंत्री ह हॉस्टल के सफई सुरक्षा अउ खाय-पिये के गुणवत्ता उपर बिसेस जोर दीन। ए मउका म मुख्यमंत्री ह बतइन कि यूथ हॉस्टल म पचास सीट ल बढ़ाके दू सौ सीट करे के योजना हे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
जिले की चिट्ठी
प्रादेसिक समाचार एकांश आकाशवाणी रईपुर डहार ले पेस करे गे कारीकरम जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस स्थित आकाशवाणी के जम्मों केंद्र मन ह रिले करही। ए बखत के अंक म ‘‘कांकेर‘‘ जिला के बारे म जानकारी दे जाही।
लेखा परीक्षण परीक्षा
प्रदेस म कोष, लेखा अउ पेंसन संचालनालय डहार ले राखेगे प्रसिक्षण सत्र के परीक्षा परिणाम जारी कर दे गेहे। संचालनालय के संचालक महादेव कावरे ह बतइन कि ए सत्र म दू सौ छियालिस छात्र म एक सौ उनसठ परीक्षार्थी पास होय हे, जेमा ले इकयासी झिन परीक्षार्थी प्रथम श्रेणी म पास होय हे। लेखा प्रसिक्षण परीक्षा म पहिली परयास म साठ प्रतिसत ले जादा अंक पवइया परीक्षार्थी मन ल अग्रिम वेतन वृध्दि के फायदा दे जाथे।