भारतीय जनता पार्टी के वरिष्ठ नेता नरेंद्र मोदी रविवार नौ जून के तीसरइया घाव प्रधानमंत्री पद के सपथ लिही। सपथ ग्रहण समारोह राष्ट्रपति भवन म संझा छै बजे आयोजित करे जाही। आज एनडीए संसदीय दल के बइठका के दौरान भाजपा नेता प्रहलाद जोशी ह ए जानकारी दीन। राष्ट्रपति द्रौपदी मुर्मू, नरेंद्र मोदी अउ नवामंत्री मंडल ल सपथ दिलाही।
एनडीए नेता मन ह आज राष्ट्रपति ले मिलके नवा सरकार बनाय के दावा करीन। एखर पहिली आज एनडीए संसदीय दल ह सबके सहमति ले नरेंद्र मोदी ल पार्टी के नेता चुनिन। नई दिल्ली म पुराना संसद भवन के केंद्रीय कक्ष म एनडीए संसदीय दल के बइठका के दौरान भाजपा नेता राजनाथ सिंह ह श्री मोदी के नाम के प्रस्तावना दीन। जेखर गठबंधन के सब्बो नेता मन ह समर्थन करीन। श्री मोदी ल लोकसभा म भाजपा अउ संसदीय दल के नेता के रूप म घलो चुने गेहे।
श्री मोदी के नाम के प्रस्ताव राखत श्री राजनाथ सिंह ह किहीन कि ओमन ए पद बर सबले योग्य मनखे हे। ओमन ह किहीन कि ए गठबंधन कोनो मजबूरी नही बल्कि हमर प्रतिबध्दता हे। भाजपा के वरिष्ठ नेता अमित शाह अउ नीतिन गडकरी ह प्रस्ताव के समर्थन करीन।
तेलुगुदेसम पार्टी प्रमुख चंद्रबाबू नायडू ह किहीन कि नरेंद्र मोदी के दूरदर्सी नेतृत्व म एनडीए सरकार ह पाछू दस बछर म जरूरी काम करे हे। ओमन ह किहीन कि देस के प्रगति अउ परिवर्तन देखे हे। श्री मोदी ल समर्थन देत बिहार के मुख्यमंत्री अउ जनता दल यूनाइटेड अध्यक्ष नीतिश कुमार ह किहीन कि ओमन श्री मोदी के नेतृत्व म मिलके काम करही। श्रीकुमार ह किहीन कि श्रीमोदी ह देस के सेवा करे हे अउ जेन काम करे बर बचे हे, ओला अब पूरा करही।
ए बेरा म श्री मोदी ह किहीन कि एनडीए ओ दल के समूह नइ हे, जेन सत्ता बर एक संग आय हे। बल्कि ए राष्ट्र प्रथम के भावना के संग काम करे बर प्रतिबध्द गठबंधन हे। ओमन ह किहीन कि एनडीए भारत के इतिहास म सबले सफल गठबंधन हे अउ हमर लक्ष्य सबो निर्णय म सर्वसम्मति बनाना होही।
छत्तीसगढ़ उच्च न्यायालय
छत्तीसगढ़ उच्च न्यायालय के मुख्य न्यायाधीश रमेश सिन्हा ह आज वीडियो कॉन्फ्रेंसिंग के माध्यम ले लंबित न्यायालयीन प्रकरण के समीक्षा करीन। ए दौरान मुख्य न्यायाधीश ह उच्च न्यायालय म चलत नवा भवन के आधारभूत संरचना के नवीनीकरण के काम के जानकारी लीन।
जानबा के मुताबिक छत्तीसगढ़ उच्च न्यायालय म 13 मई ले 07 जून तक ग्रीष्मकालीन अवकास हे। ए दौरान मुख्य न्यायाधीश रमेश सिन्हा के निरदेस के अनुसार रिट, क्रिमिनल अपील, क्रिमिनल रिवीजन, अवमानना प्रकरण अउ आने प्रकरण म औचित्यहीन लंबित प्रकरण ल चिन्हांकन कर सूचीबध्द करे के काम करे जात हे। प्रकरण के भौतिक सत्यापन जिला न्यायालय बिलासपुर, रईपुर अउ दुरूग म पदस्थ चालिस न्यायिक अधिकारी अउ उच्च न्यायालय म पदस्थ लगभग छत्तीस अधिकारी-कर्मचारी डहार ले करे जात हे।
सातवां वेतनमान एरियर
राज्य शासन के वित्त विभाग ले मिले जानकारी के अनुसार राज्य के सासकीय सेवक के अनुरूप निगम, मंडल, आयोग, अर्धशासकीय अउ अनुदान प्राप्त संस्था मनके कर्मचारी मन ल फरवरी ले जून दू हजार अट्ठारह तक के अवधि के एरियर राशि के भुगतान करे जाय के स्वीकृति दे गीस। ए राशि सातवां वेतनमान के आखिरी किश्त बताय जात हे।
एनेश्वर वर्मा-नवोन्मेषी किसान पुरस्कार
भारतीय कृषि अनुसंधान संस्था ह राजनांदगांव के युवा किसान एनेश्वर वर्मा ल नवोन्मेषी किसान पुरस्कार ले सम्मानित करे हे। नई दिल्ली के डॉक्टर बीपी पाल ऑडिटोरियम म आयोजित ए कारीकरम म देसभर के प्रगतिसील किसान सामिल होइन।
तबादला
छत्तीसगढ़ म लोकसभा चुनाव के आचार संहिता खत्म होवत ही राज्य सरकार ह भारतीय प्रशासनिक सेवा के तीन अधिकारी मनके तबादला करीन। छत्तीसगढ़ के अतिरिक्त मुख्य निर्वाचन पदाधिकारी नीलेश कुमार क्षीरसागर ल कांकेर जिला के नवा कलेक्टर बनाय गेहे। उहें, कांकेर के कलेक्टर अभिजीत सिंह ल गृह अउ जेल विभाग के बिसेस सचिव बनाय गेहे। अइसने वासु जैन ल योजना अउ आर्थिक सांख्यिकी विभाग के अवर सचिव पद के जिम्मेदारी दे गेहे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत विश्व पर्यावरण दिवस म छत्तीसगढ़ म करे जात पौधारोपण के संग आने बिसय म वन विभाग के अपर प्रधान मुख्य वन संरक्षक शालिनी रैना ले लेगे भेंटवार्ता प्रसारित करे जाही। प्रसारण आकाशवाणी केन्द्र रायपुर डहार ले काली आठ जून के बिहनिया साढ़े दस बजे करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
बेमेतरा आयुर्वेदिक चिकित्सा
बेमेतरा जिला के कलेक्टर रणबीर शर्मा ह आज जिला अस्पताल परिसर स्थित आयुर्वेद चिकित्सा केन्द्र म आयुष विंग के सुरूवात करीन। ए बेरा म ओमन ह किहीन कि जिला म आयुर्वेदिक चिकित्सा सेवा के विस्तार होय हे। ए कार्यक्रम म जिला आयुर्वेद अधिकारी अउ मुख्य चिकित्सा स्वास्थ्य अधिकारी के संग आने-आने विभाग के अधिकारी, डॉक्टर अउ मनखे उपस्थित रिहीन। ए दउरान कलेक्टर रणबीर शर्मा ह जिला चिकित्सालय म दालभात केन्द्र के घलो निरीक्षण करीन।
जानबा के मुताबिक आयुर्वेद चिकित्सा केन्द्र म आने-आने आयुर्वेदिक उपचार उपलब्ध कराय जाही, जेमा पंचकर्म, हर्बल उपचार अउ योग सामिल हे। ए केन्द्र म विशेषज्ञ डॉक्टर के टीम नियुक्त करे गेहे, जेन मन मरीज ल अपन सेवा दीही। ए कार्यक्रम म आने अतिथि मन घलो अपन विचार दीन अउ ए पहल के सराहना करीन। ओमन किहीन कि आयुष विंग के ए नया केन्द्र जिला के लोगन मनके स्वास्थ्य म सुधार लाय म जरूरी भूमिका निभाही।
राजनांदगांव-बंधक
राजनांदगांव म महाराष्ट्र के तीन युवक ल बंधक बनाके राखे के मामला आगू आय हे। जानबा के मुताबिक महाराष्ट्र के तीन युवक ऑनलाइन गेमिंग के काम करत रिहीस। एखर एवज म रईपुर अउ यूपी के चार युवक मन ह तीन युवक ले पइसा के मांग करे रिहीस। पइसा नइ मिले म चारों युवक नकली पुलिस बनके महाराष्ट्र के तीन युवक ल भुसावल ले राजनांदगांव लेके आय रिहीस। ए दौरान ओमन ह सहर के एक होटल म तीनों युवक ल बंधक बनाके पच्चीस लाख रूपिया परिजन ले फिरौती मांगे रिहीस, जेखर सूचना मिलत ही भुसावल पुलिस राजनांदगांव पहुंचिस अउ लोकेसन ट्रेस करके चारों आरोपित युवक ल गिरफ्तार करीन। उहें, बंधक बनाय तीनों युवक मन ल घलो संग ले गेहे।
नेशनल टूर्नामेंट-चयन
महाराष्ट्र के आमगांव म आज ले सुरू होय फिट इंडिया चैंपियन ट्रॉफी ताइक्वांडो प्रतियोगिता बर नारायणपुर जिला के सात खिलाड़ी मन के चयन होय हे। कोच आर. बलरामपुर ह बतइन कि तीन बछर ले नारायणपुर म ए खिलाड़ी मन ल ताइक्वांडो, किक बॉक्सिंग अउ मार्सल आर्ट के ट्रेनिंग दे जात हे। ए खिलाड़ी मन म विशाल भौमिक, अंजली कांगे, दिनु गावड़े, सुमन सलाम, दिव्या कांगे, मुस्कान साहू अउ श्वेता भौमिक सामिल हे। कलेक्टर बिपिन मांझी ह ए सब्बो खिलाड़ी मन ल अच्छा प्रदर्सन बर सुभकामना दीन।
गांजा-बरामद
जशपुर जिला के फरसाबहार पुलिस ह एक अंतर्राज्यीय गांजा तस्कर ल गिरफ्तार करे हे। एखर तीर ले लगभग पंद्रह किलो गांजा बरामद करे गेहे। जब्त गांजा के कीमत करीब डेढ़ लाख रूपिया बताय गेहे। आरोपी गांजा ल उड़ीसा ले छत्तीसगढ़ लाके खपाय के कोसिस म रिहीस। पुलिस ह तस्करी म उपयोग करे गे मोटर साइकिल जब्त कर लेहे।
उहें, सरगुजा पुलिस ह ‘‘ऑप्रेसन विश्वास‘‘ के तहत बावन नग प्रतिबंधित नसीला इंजेक्सन जब्त करे हे। एखर कीमत पच्चीस हजार रूपिया आंके गेहे। ए मामला म एक आरोपी ल गिरफ्तार करे गेहे।
अउ अब मौसम के हाल…
दक्षिण-पश्चिम मानसून के छत्तीसगढ़ पहुंचे बर अनुकूल परिस्थिति बने हे। मौसम विभाग के अनुसार ग्यारह जून तक मानसून बस्तर पहुंचे के संभावना हे दक्षिण बस्तर म काली एक-दू जघा म हल्का बरसा हो सकत हे। उहें, आज प्रदेस के कुछ हिस्सा म तेज हवा चले के संग बरसा होय के खबर हे। सुकमा, अंबागढ़ चौकी अउ कवर्धा म हल्का बरसा होय के समाचार मिले हे। रईपुर के संग कुछ जिला मन म गरज-चमक के संग छींटा पडे़ अउ अंधड़ चले के संभावना हे।