राष्ट्रीय जनतांत्रिक गठबंधन-एनडीए ह प्रधानमंत्री नरेन्द्र मोदी ल सर्व-सम्मति ले अपन नेता चुने जाय के संग केन्द्र म नवा सरकार बनाय के प्रक्रिया सुरू कर देहे। एनडीए नेता मन ह काली नई दिल्ली म होय बइठका म पारित एक प्रस्ताव म केहे गीस कि श्री मोदी के नेतृत्व म एनडीए सरकार के कार्यकाल म पाछु दस बछर म भारत ह सबो क्षेत्र म अपन विकास करे हे। प्रस्ताव म ए भी केहे गीस कि देस के जनता ह छह दसक के बाद लगातार तीसरइया बार पूर्ण बहुमत के संग एक मजबूत नेतृत्व चुने हे। ए बेरा म श्री मोदी ह कहिन कि लगातार तीसइया बार सरकार बनाय बर ये एक ऐतिहासिक जनादेस हे। बइठका के दउरान सबो के सहमति ले निर्णय ले गीस कि एनडीए सरकार देस के विकास के दिसा म काम करत रइही।
ओति, इंडिया गठबंधन के सहयोगी मन ह घलो केन्द्र म सरकार बनाय के रणनीति तय करे बर काली नई दिल्ली म बइठका करीन। ए बइठका कांग्रेस अध्यक्ष मल्लिकार्जुन खरगे के आधिकारिक आवास म होईस। बइठका म श्री खरगे ह किहीन कि जनादेश प्रधानमंत्री नरेन्द्र मोदी के खिलाफ आय हे। ओमन ह कहिन कि ए श्री मोदी बर भारी राजनीतिक क्षति अउ नैतिक हार हे।
भाजपा प्रबंधन समिति-बैठक
भारतीय जनता पार्टी लोकसभा चुनाव प्रबंधन समिति के बइठका आज रईपुर स्थित प्रदेस भाजपा कार्यालय कुशाभाऊ ठाकरे परिसर म आयोजित करे गीस। बइठका म मुख्यमंत्री विष्णुदेव साय, प्रदेस भाजपा अध्यक्ष किरण सिंह देव, उप मुख्यमंत्री अरूण साव, क्षेत्रीय संगठन महामंत्री अजय जामवाल, संगठन मंत्री पवन साय के संग आने वरिष्ठ नेता सामिल होइन। ए मउका म प्रदेस भाजपा अध्यक्ष ह छत्तीसगढ़ म दस लोकसभा सीट म जीत हासिल करइया भाजपा सांसद मनके सुवागत करीन।
बइठका के बाद पत्रकार मन ले चर्चा करत मुख्यमंत्री श्री साय ह किहीन कि छत्तीसगढ़ म भारतीय जनता पार्टी ह ग्यारा म दस सीट म जीत दर्ज करे हे। छत्तीसगढ़ ले केंद्रीय कैबिनेट म कतना मंत्री बनाय जाय के सवाल म श्री साय ह किहीन कि मंत्री बनाय जाय के बिसेस अधिकारी प्रधानमंत्री ल होथे।
नीति आयोग-बैठक
नया रईपुर स्थित राज्य नीति आयोग म आज ‘‘छत्तीसगढ़ वीजन दो हजार सैंतालिस‘‘ डॉक्यूमेंट तैयार करइया वर्किंग गु्रप के बइठका होइस। बइठका म वर्किंग गु्रप के सदस्य मन ह अपन बिचार रखिन। बइठका म सस्टनेबिलिटी एंड रिजनरेटिव डेव्हलपमेंट के मामला म छत्तीसगढ़ ल अग्रणी राज्य बनाय म बिचार विमर्स करे गीस। वर्किंग गु्रप के सदस्य मन ह बइठका म सुसासन अभिसरण विभाग योजना, आर्थिक अउ सांख्यिकी विभाग, वन अउ जलवायु परिवर्तन विभाग, खनिज संसाधन विभाग, उर्जा विभाग, पंचायत अउ ग्रामीण विकास विभग ले संबंधित भविष्य के लक्ष्य, चुनौती अउ सामर्थ्य के प्रेजेटेंसन दीन।
जनबा के मुताबिक वीजन डॉक्यूमेंट तैयार करे के जिम्मेदारी राज्य नीति अयोग ल सौंपे गेहे। ए बछर सितंबर महिना तक वीजन डॉक्यूमेंंट के आखिरी रिपोर्ट तैयार करे के लक्ष्य राखे गेहे।
शासकीय स्कूल-आदेश
छत्तीसगढ़ सरकार ह निजी स्कूल के तर्ज म शासकीय स्कूल म घलो सिक्षक-अभिभावक मुलाकात-पैरेंट्स मीट करे के निरदेस देहे। राज्य के स्कूल सिक्षा सचिव सिद्धार्थ कोमल परदेशी ह किहीन कि ए नवाचार करइया छत्तीसगढ़ ह देस के चौथा राज्य होही। एखर पहिली, गुजरात, महाराष्ट्र अउ हरियाणा म पैरेंट्स मीट के आयोजन करे जात हे। ओमन ह बतईन कि सासकीय स्कूल म साल म तीन घांव सिक्षक-अभिभावक मुलाकात होही। ओमन ह कहिन कि ए नवाचार ले लइका मनके सबो गतिविधि ल पालक मन देख सकही। लइका मनके काउंसलिंग ले ओमन ल परीक्षा के तनाव नइ रइही अउ स्कूल ले ड्राप आउट यानि पढ़ाई छोड़इया लइका मन ल रोके जा सकही। स्कूल सिक्षा सचिव ह कलेक्टर मन ल पत्र लिखके पहिली पैरेंट्स मीट के तारीख नौ अगस्त तय कर देहे।
पशु कल्याण समिति
मुख्यमंत्री विष्णुदेव साय ह रायपुर ग्रामीण के विधायक मोतीलाल साहू अउ प्रेमनगर विधायक भूलन सिंह मरावी ल रायपुर स्थित राज्य स्तरीय पशु चिकित्सालय के रोगी पशु कल्याण समिति के सदस्य मनोनीत करे हे। ए समिति पशुधन के हित के संरक्षण अउ संवर्धन बर काम करत हे, जेखर उद्देश्य पशुधन ल उंखर अच्छा जीवन जीये के हक देना हे।
आभा ऐप
आयुष्मान भारत डिजिटल मिसन-आभा के अंतर्गत जगदलपुर के महारानी अस्पताल म मरीज मन ल ओपीडी पर्ची बर अब लाइन म लगे के जरूरत नइ होही। मरीज या उंखर परिजन घर बइठे ही मोबाइल ऐप आभा ले अपन रजिस्ट्रेसन करवा सकत हे। या ओमन आभा ऐप के क्यूआर कोड के इस्तेमाल घलो कर सकत हे। ए ऐप म मरीज के एक आभा कार्ड बनही, जेमा मरीज ल चौदह अंक के कार्ड नंबर मिलही। एमा मरीज के स्वास्थ्य संबंधी पूरा जानकारी होही। ए ऐप डहार ले देस म कहू भी डॉक्टर डहार ले मरीज के स्वास्थ्य रिपोर्ट जाने म सहूलियत होही।
महारानी अस्पताल के सिविज सर्जन डॉक्टर संजय प्रसाद ह बतइन कि आभा ऐप के उपयोग कोनो भी स्मार्ट मोबाइल धारक कर सकत हे। ऐप के माध्यम ले रजिस्टर्ड ऑप्सन म जाके कोनो भी व्यक्ति अपन मोबाइल नंबर अउ आधार कार्ड नंबर दर्ज करके खुद ल रजिस्टर्ड कर सकत हे।
ट्रेन परिचालन
दक्षिण पूर्व मध्य रेलवे के नागपुर मंडल के सालेकसा-दरेकसा के बीच अप एंड डाउन रेलवे क्रॉसिंग म गर्डर लॉन्चिंग के काम करे जाही। एखर सेति सात अउ बारह जून के दस गाड़ी मनके परिचालन परभावित रइही। एमा दुरूग-गोंदिया-दुरूग मेमू पैसेंजर स्पेसल, गोंदिया-नेताजी सुभाषचंद्र बोस-गोंदिया इतवारी मेमू पैसेंजर स्पेसल, डोंगरगढ़-गोंदिया-डोंगरगढ़ मेमू पैसेंजर स्पेसल के संग ए रूट ले जवइया दस आने ट्रेन घलो रद्द रइही।
म्यूथाई चैम्पियनशिप
गुवाहाटी म पच्चीस ले तीस मई तक आयोजित म्यूथाई चैम्पियनशिप म छत्तीसगढ़ के चार खिलाड़ी मन ह स्वर्ण पदक अउ तीन खिलाडी मन ह कांस्य पदक जीते हे। स्वर्ण पदक जीतइया खिलाड़ी मन म राजकुमार, दिव्या अग्रवाल, तोषी पांडेय अउ समीधा अग्रवाल सामिल हे। उहें, शुभांश मानिकपुरी, प्रवीण जायसवाल अउ अर्चित केशवानी ह कांस्य पदक जीतिस।
ए खिलाड़ी मन ह आज रईपुर म खेलमंत्री टंकराम वर्मा ले मुलाकात करीन। खेलमंत्री ह खिलाड़ी मन के उत्साह वर्धन करत ओमन ल बधई दीन। ए चैम्पियनशिप म छत्तीसगढ़ के संग उनतीस राज्य के लगभग आठ सौ खिलाड़ी अउ अधिकारी मन ह भाग लीन।
सीसीपीएल
रायपुर के शहीद वीरनारायण सिंह अंतर्राष्ट्रीय क्रिकेट स्टेडियम म काली सात जून ले छत्तीसगढ़ क्रिकेट प्रीमियर लीग के आयोजन करे जाही। ए प्रतियोगिता म प्रदेस के छह टीम भाग लीही। एमा रायपुर रिहोन्स, बिलासपुर बुल्स, रायगढ़ लायन, राजनांदगांव पैंथर, सरगुजा टाइगर अउ बस्तर बायसन के टीम सामिल हे। पहिली मुकाबला रायपुर रिहोन्स अउ बिलासपुर बुल्स के बीच काली मंझनिया पांच बजे ले खेले जाही। ए क्रिकेट प्रतियोगिता सोलह जून तक आयोजित होही। छत्तीसगढ़ प्रीमियर लीग म विजेता टीम ल पन्द्रह लाख रूपिया अउ उप विजेता टीम ल ग्यारह लाख रूपिया के इनाम दे जाही। एमा दर्सक मन ल निःशुल्क प्रवेस दे जाही। छत्तीसगढ़ क्रिकेट प्रीमियर लीग के मुख्य उद्देश्य प्रदेस ल अच्छा क्रिकेट खिलाड़ी के चयन कर ओमन ल अवसर प्रदान करना हे।
कोंडागांव पुलिस-अभियान
कोंडागांव पुलिस के साइबर सेल ह पाछु बीस दिन म दू सौ तीस गुमे मोबाइल ल ढूंढे म सफलता हासिल करे हे। ए मोबाइल के वर्तमान बाजार मूल्य करीब पैंतालीस लाख रूपिया बताय जात हे। पुलिस अधीक्षक कार्यालय म एक समारोह आयोजित करके ए मोबाइल मन ल संबंधित व्यक्ति मन ल लहुटाय गीस। साइबर सेल डहार ले ढूंढे गे मोबाइल छत्तीसगढ़ के आने-आने जिला मनके अलावा सीमावर्ती राज्य मन ले बरामद करे गेहे।
जानबा के मुताबिक कोंडागांव पुलिस ह अभियान चलाके पाछु छह महीना म गुमे चार सौ ले जादा मोबाइल मन ल ढूंढ के संबंधित व्यक्ति मन ल लहुटाय हे।
जल जीवन मिशन-समीक्षा
रईपुर कलेक्टर डॉक्टर गौरव सिंह आज जल जीवन मिसन के काम के समीक्षा करीन। ओमन ह एमा अवइया सब्बों योजना मन के काम ल तुरते पूरा करे बर किहीन। ओमन ह किहीन कि संगेसंग ग्रामीण क्षेत्र म सड़क के मरम्मत के काम घलो जल्दी पूरा करे जाय।