ओति, लोकसभा चुनई म कांग्रेस ह कई सीट म अपन दिग्गज नेता मन ल प्रत्याशी बनाय रिहीस। एमा पूर्व मुख्यमंत्री भूपेश बघेल, पूर्व गृह मंत्री ताम्रध्वज साहू अउ पूर्व मंत्री कवासी लखमा सामिल रिहीन। चुनई म न सिरिफ ए दिग्गज नेता हार गीन, बल्कि कांग्रेस ल अपन बस्तर के सीट घलो गवाना पड़ीस। बस्तर म भाजपा के महेश कश्यप ह कांग्रेस प्रत्याशी अउ पूर्व मंत्री कवासी लखमा ल हरईन।
छत्तीसगढ़ म ए दरी सबले बड़का जीत मंत्री बृजमोहन अग्रवाल ह दरज करीन। ओमन कांग्रेस के विकास उपाध्याय ल पांच लाख पचहत्तर हजार ले जादा वोट ले हरईन। उहें, कांकेर के भाजपा प्रत्याशी भोजराज नाग ल सबले कम वोट ले जीत हासिल करीन। ओमन कांग्रेस उम्मीदवार बीरेश ठाकुर ल अट्ठारह सौ चौरासी मत ले हरईन। प्रदेस के सबले हाईप्रोफाइल सीट राजनांदगांव म कांग्रेस प्रत्याशी अउ पूर्व मुख्यमंत्री भूपेश बघेल ल भाजपा प्रत्याशी संतोष पांडेय ह हरईन। उहें, महासमुंद म भाजपा प्रत्याशी रूपकुमारी चौधरी ह कांग्रेस उम्मीदवार अउ पूर्व गृहमंत्री ताम्रध्वज साहू ल हरईन। दुरूग सीट ले भाजपा प्रत्याशी विजय बघेल ह कांग्रेस के राजेन्द्र साहू ल हरा के ए सीट ले दूसर घांव जीत दरज करीन हे।
चुनाव परिणाम-छत्तीसगढ़-02
उहें, बिलासपुर म भाजपा के तोखन साहू ह कांग्रेस प्रत्याशी देवेन्द्र सिंह यादव ल हरईन। रायगढ़ लोकसभा क्षेत्र म भाजपा प्रत्याशी राधेश्याम राठिया ह कांग्रेस प्रत्याशी डॉक्टर मेनका देवी सिंह ल परास्त करीन। सरगुजा म भाजपा प्रत्याशी चिंतामणी महराज ह कांग्रेस के शशि सिंह ल पराजीत करीन। जांजगीर-चांपा म भाजपा प्रत्याशी कमलेश जांगड़े ह कांग्रेस उम्मीदवार अउ पूर्व मंत्री डॉक्टर शिवकुमार डहरिया ल हरईन।
मुख्यमंत्री-पत्रकारवार्ता
छत्तीसगढ़ म भारतीय जनता पार्टी के जीत के बाद मुख्यमंत्री विष्णुदेव साय ह किहीन कि प्रदेस म लोकसभा चुनाव के परिणाम बने रिहीस। ग्यारह म ले दस सीट म भाजपा ह जीत दरज करे हे। श्री साय ह काली संझा भाजपा मुख्यालय कुशाभाऊ ठाकरे परिसर म पत्रकार मन ले चर्चा करत छत्तीसगढ़ के जनता अउ भाजपा कार्यकर्ता मनके आभार जतईन। ओमन किहीन कि जम्मों मन मोदी के गारंटी उपर विश्वास करीन। गर्मी म घलो कार्यकर्ता मन मेहनत करीन अउ जनता मतदान बर पहुंचीस। मुख्यमंत्री ह किहीन कि देस म घलो एनडीए के प्रदर्सन अच्छा रेहे हे। सरलग तीसर घांव नरेन्द्र मोदी प्रधानमंत्री बनइया हे।
कैबिनेट बैठक-इस्तीफा
प्रधानमंत्री नरेन्द्र मोदी के आवास म आज होय केन्द्रीय मंत्रिमंडल के बइठका म सत्रहवां लोकसभा ल भंग करे के सिफारिश करे गीस। बइठका म केन्द्रीय मंत्री अमित शाह, नितिन गडकरी, राजनाथ सिंह अउ दूसर कैबिनेट मंत्री मौजूद रिहीन। उहें, प्रधानमंत्री ह राष्ट्रपति द्रौपदी मुर्मू ले मिलके अपन अउ मंत्रिमंडल के इस्तीफा सौंपीन। राष्ट्रपति ह उंखर इस्तीफा स्वीकार करीन अउ ओमन ल नवा सरकार बने तक कार्यभार संभाले बर किहीन।
सरकार-गठन
राजनीतिक दल मन लोकसभा चुनाव के परिणाम के घोसना के बाद सरकार गठन बर प्रयास तेज कर देहे। पांच सौ तैंतालीस सदस्य वाले लोकसभा चुनई म भारतीय जनता पार्टी के अगुवई वाला एनडीए गठबंधन ल दू सौ बयानवे सीट मिले हे। भाजपा ह अकेक्कला दू सौ चालीस सीट पाय हे। तेलगु देशम पार्टी ल सोलह अउ जनता दल यूनाईटेड ल बारह सीट मिले हे।
उहें, इंडिया गठबंधन ह दू सौ तैंतीस सीट जीते हे। दूसर के खाता म अट्ठारह सीट गे हे। कांग्रेस ल निन्यानवे सीट मिले हे। समाजवादी पार्टी ह सैंतीस सीट जीते हे। जबकि तृणमूल कांग्रेस ह उनतीस अउ डीएमके ह बाईस सीट म विजय पाय हे।
इही बीच, प्रधानमंत्री नरेन्द्र मोदी ह किहीन कि लोगन मन सरलग तीसर घांव एनडीए गठबंधन उपर विश्वास जताय हे अउ ए देस के इतिहास म एक बड़का उपलब्धि हरय। ओमन जीत ल संविधान म विश्वास अउ सबका साथ-सबका विकास के मंत्र बतईन।
विश्व पर्यावरण दिवस-01
आज विश्व पर्यावरण दिवस मनाय जात हे। ए दिन पर्यावरण के प्रति जागरूकता फैलाय अउ पर्यावरण के मुद्दा उपर काम करे के सेती मनाय जाथे। ए मउका म प्रधानमंत्री नरेन्द्र मोदी ह बुद्ध जयंती पार्क म पौधा बो के ‘‘एक पेड़ मां के नाम‘‘ अभियान के सुरूवात करीन। ए अभियान के उद्देश्य देशभर म करोड़ों पौधा लगाय बर जन-आंदोलन बनाना हे।
ऐति, छत्तीसगढ़ के मुख्यमंत्री विष्णुदेव साय ह अपन धर्मपत्नी कौशल्या साय के संग अपन निवास परिसर म चीकू, नीम अउ रूद्राक्ष के पौधा रोपीन। ए मउका म ओमन प्रदेसवासी मन ले अपन घर अउ तीर-तखार म पौधा लगाय अउ पौधा मन ल जीवित रखे के जिम्मेदारी लेके अपील करीन।
उहें, छत्तीसगढ़ पर्यटन मंडल डहार ले आज ‘‘प्राकृतिक पुर्नउत्पादन अउ बीज संरक्षण पर वॉक कम फील्ड कार्यशाला‘‘ के आयोजन जंगल सफारी म करे गीस। एमा पचास ले जादा स्वयंसेवक, पर्यावरण प्रेमी अउ विद्यार्थी मन भाग लीन।
अइसने, छत्तीसगढ़ पर्यावरण संरक्षण मंडल के क्षेत्रीय कार्यालय कोति ले रईपुर के कला केन्द्र म पोस्टर प्रतियोगिता राखे गीस। अच्छा पोस्टर बनइया प्रतिभागी मन ल पुरस्कृत करे गीस।
गौरेला-पेण्ड्रा-मरवाही जिला म एक निजी संस्था डहार ले वृक्षारोपण कार्यक्रम राखे गीस। ए मउका म पुलिस अधीक्षक भावना गुप्ता ह नीम अउ अतिरिक्त पुलिस अधीक्षक ओम चंदेल ह चंदन के पौधा रोपीस।
विश्व पर्यावरण दिवस-02
कबीरधाम जिला म अमृत सरोवर जघा म ग्रामीण मन बढ़-चढ़के वृक्षारोपण अभियान म हिस्सा लीन। एखरे संग सरोवर के तीर साफ-सफाई करत जल संरक्षण अउ जैव विविधता के महत्व ल जानत बरसा के पानी ल बचाय के संकल्प लीन।
विश्व पर्यावरण दिवस म आज धमतरी नगर पालिका डहार ले आने-आने जघा तालाब समेत दूसर जल स्त्रोत के साफ-सफाई करे गीस। ए दउरान सामाजिक कार्यकर्ता, स्वयं सेवी संगठन के प्रतिनिधि, ग्रीन आर्मी के सदस्य, प्रेस प्रतिनिधि, अधिकारी, कर्मचारी समेत बड़का संख्या म शहरवासी मन श्रमदान करीन।
धमतरी-जल जगार उत्सव
जल जगार अभियान के तहत आज धमतरी जिला के ग्राम कन्हारपुरी म रेलवे विभाग डहार ले साढ़े पांच एकड़ क्षेत्र म बनइया तालाब गहरीकरण अउ सौंदर्यीकरण काम के स्थानीय जनप्रतिनिधि अउ ग्रामीण मन सुभारंभ करीन। कार्यक्रम ल संबोधित करीन कलेक्टर नम्रता गांधी ह किहीन कि जिला म भू-जल स्तर तेजी ले नीचे जावत हे। अइसे म रेलवे डहार ले तालाब गहरीकरण अउ सौंदर्यीकरण काम कराय ले जल संरक्षण म सहयोग मिलही। ओमन किसान मन ल आह्वान करीन कि ओमन धान के बदला कम पानी वाला फसल जइसे – दलहन अउ तिलहन बोवय।
ए मउका म रेन वाटर हार्वेस्टिंग, रूफटॉप स्ट्रक्चर अउ वेस्ट वाटर हार्वेंस्टिंग के जानकारी दे गीस।
मुख्य निर्वाचन पदाधिकारी-आभार
राज्य के मुख्य निर्वाचन पदाधिकारी रीना बाबासाहेब कंगाले ह लोकसभा चुनई म सहभागिता देवइया जम्मों अधिकारी, कर्मचारी, शासकीय अउ अशासकीय संगठन लोक सेवी संस्था अउ मतदाता मन बर आभार व्यक्त करीन हे। ओमन किहीन कि प्रदेस के मतदाता मन उछाह ले अपन मताधिकार के प्रयोग करके लोकतांत्रित व्यवस्था म अपन सहभागिता दीन हे। ओमन निर्वाचन कार्य म संलग्न जम्मों अधिकारी अउ कर्मचारी मन ल धन्यवाद दीन हे।
मुख्य निर्वाचन पदाधिकारी ह केन्द्रीय सुरक्षा बल अउ राज्य पुलिस बल बर घलो आभार जतईन, जउन मन स्वतंत्र अउ निष्पक्ष चुनई कराय म महत्वपूर्ण भूमिका निभईन। एखर संग ओमन प्रिंट, इलेक्ट्रानिक अउ वेब मीडिया के जम्मों पत्रकार मन बर आभार जतईन।
अउ अब मौसम के हाल…
छत्तीसगढ़ म मानसून के आय के पहिली प्रदेस के कई ठिन इलाका म बारिस के सिलसिला सुरू होगे हे। मौसम विभाग के मुताबिक एक ठिन द्रोणिका पश्चिमी उत्तरप्रदेश ले पूर्वी बंग्लादेश तक बगरे हे, जेखर असर ले काली दक्षिण छत्तीसगढ़ म कुछेक जघा मन म हल्का बरसा होय या गरज-चमक के संग छींटा पड़े के संभावना हरय। उहें, एक-दू जघा म अंधड़ चले अउ गाज गिरे के चेतावनी दे गेहे।