लोकसभा चुनई के बाद देस के संगेसंग प्रदेस म घलो काली बिहनिया आठ बजे ले मतगणना सुरू हो जही, जेखर बर सुरक्षा के तगड़ा बेवस्था करे गेहे। मतगणना बर निर्वाचन आयोग ह प्रशासन स्तर म जम्मो तियारी पूरा कर लेहे। छत्तीसगढ़ के ग्यारह संसदीय क्षेत्र के मतगणना तैंतीस जिला मुख्यालय मन म करे जाही। सबले पहिली डाकमत पत्र के गिनती करे जाही।
जानबा के मुताबिक विधानसभावार होवइया वोट के गिनती म सबले कम राउंड के गिनती कोरबा सीट बर होही। इंहा एक सौ बयालिस राउंड म गिनती होही। त, उहे रईपुर लोकसभा सीट बर एक सौ पचहत्तर राउंड म गिनती करे जाही।
मुख्य निर्वाचन पदाधिकारी रीना बाबा साहेब कंगाले ह आज रईपुर म एक ठिन पत्रकारवार्ता म बतइन कि हरेक हाल म लोकसभा क्षेत्र म सामिल विधानसभा क्षेत्र के ईवीएम मतगणना पर छै ठिन विधानसभा-पंडरिया, कवर्धा, सारंगढ़, बिलाईगढ़, भरतपुर-सोनहत अउ कसडोल म इक्कीस ठिन टेबल अउ आने जम्मो चौरासी विधानसभा क्षेत्र म चौदा टेबल लगाके वोट के गिनती करे जाही। ओमन बतइन कि मतगणना बर ग्यारह झिन रिटर्निंग ऑफिसर, चार हजार तीन सौ बैंसठ झिन वोट के गिनती करइया कर्मचारी, चार सौ छिहत्तर झन रिटर्निंग अधिकारी के संगेसंग एक हजार छै सौ इकहत्तर माइक्रो ऑब्जर्वर नियुक्त करे गेहे। त उहें, नब्बे विधानसभा क्षेत्र बर बियालिस झिन काउंटिंग ऑब्जर्वर नियुक्त करे गेहे।
श्रीमती कंगाले ह बतइन कि मतगणना केंद्र मन म त्रिस्तरीय सुरक्षा बेवस्था करे गेहे। जिहां हरेक स्तर म पहिचान पत्र के जांच के बादेच प्रवेस दे जाही।
लोकसभा मतगणना-02
मुख्य निर्वाचन पदाधिकारी ह बतइन कि स्ट्रांग रूम ल तय करे गे बेरा म प्रेक्षक, रिटर्निंग अधिकारी अउ सहायक रिटर्निंग अधिकारी के आगू खोले जाही। मतगणना के संगेसंग पूरा काम-काज के वीडियोग्राफी कराय जाही। ओमन बतइन कि हरेक मतगणना केंद्र म मीडिया सेंटर बनाय जाही। जिहां बड़का अधिकारी के नियुक्ति करे गेहे, जउन ह मतगणना हाल के निरीक्षण करे के बाद कम संख्या म मीडिया समूह मन ल अंदर ले जाही।
मुख्य निर्वाचन पदाधिकारी ह बतइन कि लोकसभा निर्वाचन क्षेत्र म हरेक चरण के परिणाम के घोसना सहायक रिटर्निंग अधिकारी डहार ले करे जाही। मुख्य निर्वाचन पदाधिकारी ह बतइन कि निर्वाचन आयोग के पोर्टल अउ वोटर हेल्पलाइन एप के माध्यम ले घलो चुनाव परिणाम के जानबा ले जा सकथे।
मतगणना-सुरक्षा
काली होवइया मतगणना बर जम्मो जिला मन म प्रशासनिक स्तर म तियारी पूरा होगे हे। पुलिस अधिकारी मनके मुताबिक मतगणना वाले संवेदनसील जघा मन म स्थिति के हिसाब से पुलिस बल तैनात करे जाही। पुलिस जवान मनके त्रिस्तरीय सुरक्षा बेवस्था बनाय गेहे। पहिली अउ बाहिरी स्तर म जिला पुलिस बल ह तैनात रइही।
दूसर स्तर म राज्य सशस्त्र बल ल तैनात करे जाही अउ तीसर स्तर म मतगणना हाल के प्रवेस द्वार उपर केंद्रीय पुलिस बल सी.ए.पी.एफ. के तैनाती रइही।
ऐति, गौरेला-पेण्ड्रा-मरवाही जिला के पुलिस अधीक्षक भावना गुप्ता ह बतइन कि जिला के कलेक्ट्रेट परिसर म वोट मनके गिनती होही। सुरक्षा ल देखत सेमरा ले लेके रानी दुर्गावती तिराहा तक आम लोगन मनके अवई-जवई उपर रोक रइही।
माओवादी-आत्मसमर्पण
बीजापुर जिला म सुरक्षाबल मन ह बारह झिन माओवादी मन ल गिरफ्तार करे हे, जेमा ले तीन झिन माओवादी नाबालिक हे। ए जम्मों माओवादी मन ल आने-आने थाना ले गिरफ्तार करे गेहे। माओवादी मन उपर हत्या, आईडी प्लांट करे, रोड काटे अउ पाम्पलेट बैनर लगाय के आरोप हे। जिला पुलिस बल अउ डीआरजी के संयुक्त कार्रवाई म मीरपुर, जंगला अउ कुटरू थाना क्षेत्र ले ए जम्मों माओवादी मन ल गिरफ्तार करे गीस।
उहें, छत्तीसगढ़ शासन के नक्सलवाद उन्मूलन नीति अउ सुकमा पुलिस डहार ले चलाय जात ‘‘पूना नर्कोम अभियान‘‘ ले परभावित होके सुकमा जिला म एक झिन माओवादी दंपत्ति के संगेसंग पांच इनामी माओवादी मन ह पुलिस के आगू आत्मसमर्पण करे हे। एमा ले एक झिन माओवादी उपर आठ लाख अउ एक झिन आने माओवादी उपर पांच लाख रूपिया के संगेसंग जम्मो पांचो माओवादी मन उपर कुल सत्रह लाख रूपिया के इनाम घोसित रिहीस। ए माओवादी मन उपर पुलिस मुठभेड़ म सामिल होय के संगेसंग आने माओवादी घटना म सक्रिय रेहे के आरोप हे।
विशेष चुनाव बुलेटिन
काली लोकसभा चुनई बर होवइया मतगणना के ताजा जानकारी देबर आकाशवाणी रईपुर के समाचार एकांश कोति ले घलो हर घंटा बिसेस समाचार बुलेटिन प्रसारित करे जाही। ए बिसेस चुनाव बुलेटिन हिन्दी के संगेसंग छत्तीसगढ़ी म घलो प्रसारित करे जाही। ए बुलेटिन काली बिहनिया नौ बजे ले सुरू होही अउ संझा चार बजके दस मिनट तक चलही। एखर अलावा प्रादेसिक समाचार एकांश रईपुर डहार ले काली लोकसभा चुनाव परिणाम उपर एक ठिन बिसेस परिचर्चा कारीकरम घलो प्रसारित करे जाही। ए कारीकरम काली रतिहा आठ बजके तीस मिनट ले प्रसारित होही। काली आकाशवाणी रईपुर ले प्रसारित होवइया बिसेस चुनाव बुलेटिन अउ बिसेस परिचर्चा कारीकरम ल छत्तीसगढ़ स्थित आकाशवाणी के जम्मो केंद्र एके संघरा रिले करही।
माओवादी-ग्रामीण हत्या
नारायणपुर जिला के गांव मसपुर म माओवादी मन ह एक झिन गांव के मनखे ल पुलिस मुखबिरी के सक म हत्या कर दीन। हमर संवाददाता ले मिले जानबा के मुताबिक पाछू रतिहा करीबन पंद्रह ले बीस झिन वर्दीधारी माओवादी मन ह ए मनखे के घर पहुंचिन अउ परिवार वाले मनके आगू उंखर हत्या कर दीन। माओवादी मन ह घटना वाले जघा म कुतुल एरिया कमेटी के पर्चा फेंके हे।
मुख्यमंत्री-निर्देश
मुख्यमंत्री विष्णुदेव साय ह मानसून के दौरान बरसा ले होवइया बीमारी ल रोके बर जरूरी तियारी करे के निरदेस स्वास्थ्य अधिकारी मन ल देहे। ओमन प्रदेस के जम्मो अस्पताल अउ स्वास्थ्य केंद्र मन म जीवन रक्षक दवाई के पूरा मात्रा राखे बर केहे हे। मुख्यमंत्री ह बोरिंग, नलकूप अउ आने-आने पाइप लाइन मरम्मत के संगेसंग बने ढंग ले साफ-सफाई करे के निरदेस घलो देहे।
त उहें, मुख्यमंत्री ह जशपुर के संगेसंग अइसन जघा जिहां सांप के डसे के मामला जादा आथे, अइसन जघा के सामुदायिक स्वास्थ्य केंद्र मन म एन्टी स्नेक वेनम के पूरा मात्रा राखे के निरदेस अधिकारी मन ल देहे।
मुख्यमंत्री-खाद बीज
मानसून के पहिली किसान मन ल दे जाय खातू-बीजा के बेवस्था ल बने ढंग ले राखे के निरदेस मुख्यमंत्री विष्णुदेव साय दे हवय। ओमन अवइया खरीफ सीजन ल देखत खातू-बीजा के सोसाइटी म पूरा बेवस्था करे के बात केहे हे। ओमन किसान मन ल मांग के आधार म खातू-बीजा दे जाय के बेवस्था सोसाइटी के माध्यम ले करे के निरदेस देहे।
मुख्यमंत्री ह डीएपी खातू के मांग ल धियान म राखत अधिकारी मन ल बिसेस निगरानी राखे के निरदेस देहे।
ईओडब्ल्यू-रिमांड
कोयला घोटाला मामला म आरोपी निलंबित उप सचिव सौम्या चौरसिया अउ आईएएस अधिकारी रानू साहू के संगेसंग समीर बिश्नोई अउ कारोबारी सूर्यकांत तिवारी ल आज ईओडब्ल्यू कोर्ट म पेस करे गीस। आजे ए जम्मो झिन के पुलिस रिमांड खतम होवत रिहीस। कोर्ट ह सौम्या चौरसिया अउ रानू साहू के रिमांड ल पांच जून तक बढ़ाय हे। त, उहें आईएएस समीर बिश्नोई अउ कारोबारी सूर्यकांत तिवारी के पुलिस रिमांड ल दस जून तक बढ़ा देहे। कोर्ट ह जम्मों आरोपी मन ल ईओडब्ल्यू ल सौंप देहें
आगजनी
राजधानी रईपुर के जीई रोड स्थित एक ठिन प्राईवेट सॉपिंग मॉल म आज मंझनिया आगी लग गे सूचना मिलतेच फायर ब्रिगेड के टीम ह मउका म जाके आगी ल बुताय के परयास करत हे।
उहें, अंबिकापुर के आकाशवाणी चौक के तीर पांच मंजिल वाले एक ठिन इमारत के खेल के समान रखे दुकान म आगी लगगे, आगी ह भवन के कोटा म घलो पहुंचगे। सूचना मिलतेच फायर ब्रिगेड अउ एसडीआरएफ के टीम ह मउका म पहुंचिन अउ करीबन पांच घंटा के बाद आगी ल बुझाय जा सकिस।
जानबा के मुताबिक आगी जिहां लगे रिहीस, उहां लोगन मनके कतकोन घर तिर-तखार म रिहीस। फेर कोनो प्रकार के आगजनी ले जनहानि नइ होय हे। आगी लगे ले करोड़ो रूपिया के नुकसान होय के संसो जताय जात हे। सार्ट सर्किट होय के सेति आगी लगे ले ए घटना होइस।