लोकसभा चुनई के तहत देसभर समेत छत्तीसगढ़ म घलो चार जून के मतगणना होही, जेखर बर सुरक्षा के कड़ा बेवस्था करे गेहे। मतगणना बर निर्वाचन आयोग ह प्रशासन स्तर म सब्बो तइयारी कर डारे हे। छत्तीसगढ़ के ग्यारा ठन लोकसभा क्षेत्र के मतगणना सब्बो तैंतीस जिला मुख्यालय म करे जाही।
उहें, जांजगीर-चांपा जिला कलेक्टर अउ पुलिस अधीक्षक ह जिला के मतगणना केंद्र के निरीक्षण करिन। ए बेरा ओमन जरूरी दिसा-निरदेस जारी करिन। ओमन मतगणना के दिन अधिकारी-करमचारी मन ल बेरा म अमरे के घलो निरदेस देइन।
इही बीच, अंबिकापुर म मतगणना के तइयारी के जायजा लेय बर जिला कलेक्टर ह आज पॉलीटेक्निक कॉलेज पहुंचिन। ए बेरा मतगणना कारज बर नियुक्त सब्बो अधिकारी-करमचारी मन के तइयारी ल ओरखे बर मतगणना स्थल म ड्राई रन करे गिस। ए मउका म राजनीतिक दल के प्रतिनिधि घलो मौजूद रहइी।
प्रधानमंत्री-चुनाव आयोग सराहना
प्रधानमंत्री नरेंद्र मोदी ह लोकसभा चुनई ल निष्पक्ष अउ व्यवस्थित तरीका ले संपन्न कराय म निर्वाचन आयोग के भूमिका ल संहराइन हें। सोसल मीडिया म एक ठन पोस्ट करत ओमन किहीन कि आयोग के समर्पण अउ सुघ्घर परयास के सेति भारतीय लोकतंत्र म लोगन के आस्था अउ बाढ़ गेहे, संगे देसवासी मन आत्मबिस्वास के संग वोट डारिन हें। श्री मोदी ह किहीन कि भारत के चुनई प्रक्रिया लोकतांत्रिक मूल्य म बिस्वास बढ़ाथे।
प्रधानमंत्री ह चुनई के बेरा सुरक्षाबल के भूमिका ल घलो संहराइन हें। ओमन किहीन कि सुरक्षाबल के सेति सुरक्षित ढंग ले मतदान हो पाइस अउ लोगन मन घलो सहज ढंग ले चुनई प्रक्रिया म सामिल हो पाइन।
एग्जिट पोल-प्रतिक्रिया
लोकसभा चुनई के मतगणना ले पहिली निजी टीवी चैनल अउ आने-आने एजेंसी मन चुनई के बाद सर्वेक्षण के आंकड़ा जारी करिन हें। एमा ले जादा झन के सर्वेक्षण म केहे गेय हे कि भारतीय जनता पार्टी के अगुवई वाला राष्ट्रीय जनतांत्रिक गठबंधन-एनडीए लोकसभा चुनई म बहुमत हासिल करके सत्ता म लहुटही।
एग्जिट पोल उपर अपन बिचार राखत छत्तीसगढ़ के मुख्यमंत्री विष्णुदेव साय ह किहीन कि एहा पहिली ले तय रिहीस कि देस के जनता के आसीर्वाद भारतीय जनता पार्टी अउ प्रधानमंत्री नरेंद्र मोदी ल मिलही। ओमन यहू किहीन कि प्रदेस के सब्बो ग्यारह सीट भारतीय जनता पार्टी ल मिलत हे।
उहें, भारतीय जनता पार्टी के प्रदेस अध्यक्ष किरण सिंह देव ह किहीन- ए अनुमान ए गोठ प्रमान हे कि भाजपा ह भारत देस अउ बिसेस रूप ले छत्तीसगढ़ के जनता के निरनय ल धरातल म रहिके ओरखे हे।
दूसर डहार कांग्रेस के प्रदेस अध्यक्ष दीपक बैज ह किहीन कि एग्जिट पोल के नतीजा भ्रामक हे। कांग्रेस पार्टी ह अइसन नतीजा ल खारिज करथे। चार जून के जब चुनई परिणाम आही, तब देस म (इंडिया) गठबंधन के सरकार बनही।
माओवादी आत्मसमर्पण
सुकमा जिला म आज चार इनामी समेत आठ झन माओवादी मन पुलिस के आगू आत्मसमर्पण कर दिन। एमा ले एक माओवादी उपर दू लाख अउ तीन माओवादी मन उपर एक-एक लाख रूपिया के इनाम रिहीस। ए माओवादी मन राज्य सरकार के छत्तीसगढ़ नक्सलवाद उन्मूलन नीति अउ सुकमा पुलिस के ‘‘पुना नर्कोम अभियान‘‘ ले परभावित होके आत्मसमर्पण करिन। इंखर उपर पुलिस उपर हमला, सड़क काटे अउ ग्रामीण मन ले वसूली करे के आरोप हे।
माओवादी मनके आत्मसमर्पण करे उपर मुख्यमंत्री विष्णुदेव साय ह खुसी जतावत किहीन कि राज्य सरकार के नीति अउ योजना ले परभावित होके माओवादी मन बंदूक छोड़के समाज के मुख्यधारा म लहुटत हें।
व्यापमं-परीक्षा
छत्तीसगढ़ व्यावसायिक परीक्षा मंडल के डहार ले नौ जून के पीएटी, पीपीटी के संगे प्री-बीए बीएड अउ प्री-बीएससी बीएड के परवेस परीक्षा आयोजित करे जाही। एखर बर व्यापमं ह परवेस पत्र जारी कर डारे हे। जेला अभ्यर्थी मन व्यापमं के वेबसाइट म डाउनलोड कर सकत हें। अभ्यर्थी मन ल परीक्षा केंद्र म फोटूवाला परिचय पत्र जइसे वोटर आईडी, ड्राइविंग लाइसेंस, पेनकार्ड, आधार कार्ड, पासपोर्ट या फेर स्कूल के फोटूवाला परिचय पत्र ले जाना जरूरी हे। परिचय पत्र के फोटूकापी मान्य नइ होही।
बतादन कि पीएटी अउ पीपीटी के परीक्षा बिहनिया के पारी म होही। उहें, प्री-बीए बीएड अउ प्री-बीएससी बीएड के परीक्षा दूसरइया पारी म होही।
निजी अस्पताल-कार्रवाई
केंद्र सरकार के आयुष्मान भारत योजना म पंजीकृत निजी अस्पताल के मानमानी अउ फर्जीवाड़ा उपर राज्य सरकार ह कार्रवाही करे हे। एखर तहत स्वास्थ्य विभाग ह तीस ले जादा पंजीकृत अस्पताल मन उपर लाखों रूपिया के जुर्माना लगाइस। फर्जीवाड़ा के सेति जिला के सबो मुख्य चिकित्सा अधिकारी मन ल निजी अस्पताल मनके औचक निरीक्षण के निरदेस दे गेहे।
रायपुर पुलिस-पहल
रइपुर पुलिस ह लोगन ल घाम ले बचाय बर सुघ्घर अकन उदिम करे हे। एखर तहत सहर के सबो परमुख चौक-चौराहा म सेड लगाय हे। एखर ले ट्रैफिक सिग्नल म रूकइया लोगन ल भारी घाम ले राहत मिलत हे। ए अस्थाई सेड के जरिया ले रइपुर पुलिस ह नसा जिनिस के खिलाफ सुरू करे गे अभियान ‘‘निजात‘‘ ल जन-जन तक बगराय के उदिम करत हे।
सीसीपीएल
भरतीय क्रिकेट कंट्रोल बोर्ड के अनुमति मिले के बाद छत्तीसगढ़ स्टेट क्रिकेट संघ डहार ले आईपीएल के तर्ज म छत्तीसगढ़ क्रिकेट प्रीमियर लीग के आयोजन सात जून ले सोलह जून तक करे जाही। रइपुर के सहीद वीरनारायण सिंह अंतर्राष्ट्रीय क्रिकेट स्टेडियम म होवइया ए प्रतियोगिता म छै टीम के बीच मुकाबला होही। जेमा रइपुर रिहोन्स, बिलासपुर बुल्स, रायगढ़ लॉयन, राजनांदगांव पैंथर, सरगुजा टाइगर अउ बस्तर बायसन सामिल हें। छत्तीसगढ़ प्रीमियर लीग म विजेता टीम ल पंद्रह लाख रूपिया अउ उपविजेता टीम ल ग्यारा लाख रूपिया के पुरस्कार दे जाही। कारीकरम देखे बर दर्सक मन ल निसुल्क परवेस दे जाही। बतादन कि छत्तीसगढ़ क्रिकेट प्रीमियर लीग के परमुख उद्देस्य प्रदेस के बेहतर खिलाड़ी मन के चयन करके आगू बाढे़ के मउका देना हे।
पर्यावरण दिवस-कार्यक्रम
विश्व पर्यावरण दिवस के मउका म नवा रइपुर के सेंध झील म एक ठन कारीकरम के आयोजन करे गिस। भारतीय सेना मुख्यालय छत्तीसगढ़ अउ ओडिशा सब एरिया कार्यालय के डहार ले आयोजित कारीकरम म पर्यावरण उपर जागरूकता संदेस दे गिस। ‘‘ऑलिव ग्रीन विथ गो ग्रीन‘‘ बिसय उपर आयोजित ए समारोह म रइपुर के आने-आने संस्थान के पढ़इया लइका, सेना के जवान अउ आने लोगन सामिल होइन। ए बेरा सेंध झील के तिर-तखार म स्वच्छता अभियान, वॉकथॉन अउ संगीत समारोह होइस। कारीकरम म ग्लोबल वार्मिंग, मरूस्थलीकरण अउ भूमि बहाली, सुख्खा जघा, जल संचय अउ पौधारोपन बर जागरूकता बगराय के संदेस जन-जन तक अमराय के गोठ किहीन।
अउ अब पेस हे मौसम के हाल…
मौसम विभाग ह आज अउ काली प्रदेस म भारी घाम अउ लू चले के संभावना जताय हे। मौसम विभाग के अनुसार आज बिलासपुर, कोरबा अउ राजनांदगांव समेत आठ जिला लू के चपेट म रइही। उहें, काली बिलासपुर, मुंगेली, कोरबा, जांजगीर-चांपा अउ कवर्धा जिला म लू चल सकथे।
ऐति, बिलासपुर के अपर कलेक्टर आर. ए. कुरूवंशी ह भारी गर्मी ल देखत उद्योग-धंधा अउ आने सेवा ले जुड़े संगठन पदाधिकारी मन के बइठका लिन। जेमा ओमन अपन संस्थान म कारज करइया मजदूर अउ खुद के बचाव बर उपाय करे के निरदेस देइन हें।
इही बीच, दुरूग-भिलाई के कुछ जघा म आज मंझनिया अचानक मौसम बदलगे अउ हवा गरेर के संग पानी गिरिस।
उहें, जगदलपुर म घलो कोनो-कोनो जघा गरज-चमक अउ हवा गरेर के संग पानी गिरे हे। एखर ले लोगन ल गर्मी ले थोरकुन राहत मिले हे।
मौसम विभाग ह मानसून के दस ले बारह जून तक बस्तर पहुंचे के संभावना जताय हे। जेखर बाद अट्ठारा ले बीस जून तक जम्मो छत्तीसगढ़ म मानसून बगरे के आसार हे।