छत्तीसगढ़ राज्य विद्युत नियामक आयोग ह घरेलू बिजली के दर म बीस पइसा प्रति यूनिट के दर ले बढ़वार करे के घोसना करे हे। ए जानकारी छत्तीसगढ़ राज्य विद्युत नियामक आयोग के चेयरमेन हेमंत वर्मा ह आज रईपुर म राखेगे एक पत्रकार वार्ता म दीन। ओमन बतइन कि पाछू बछर म बिजली कंपनी ल चार हजार चार सौ करोड़ रूपिया के घाटा होय हे, जेखर भरपाई बर राज्य सरकार ह बिजली कंपनी ल एक हजार करोड़ रूपिया के अनुदान दे हे। एला देखत आयोग ह बिजली के दर म आठ दसमलव तीन-पांच प्रतिसत के बढ़वार करे के अनुसंसा करे हे।
सिलेंडर-कीमत
तेल विपणन कंपनी ह व्यावसायिक एलपीजी सिलेंडर के कीमत म उनहत्तर रूपिया पचास पइसा के कटौती करे हे। इंडियन ऑयल कार्पोरेसन ह बतइन कि दिल्ली म एक व्यावसायिक सिलेंडर के कीमत एक हजार छै सौ छिहत्तर रूपिया होही। ए सिलेंडर अब कोलकाता म बहत्तर रूपिया, मुंबई म उनहत्तर रूपिया पचास पइसा अउ चेन्नई म सत्तर रूपिया पचास पइसा सस्ता मिलही। एखर संगेसंग विमान ईधन के कीमत म घलो साढ़े छै प्रतिसत के कमी करे गेहे।
मंत्री चिंतन-शिविर
रईपुर के भारतीय प्रबंध संस्थान-आईआईएम म राज्यमंत्री मंडल के सदस्य मन बर राखेगे चिंतन सिविर ल आज दूसर दिन नीति आयोग के पूर्व सीईओ अउ जी-ट्वेंटी के शेरपा अमिताभ श्रीकांत ह संबोधित करीन। ओमन किहीन कि छत्तीसगढ़ म विकास के अपार संभावना हे। छत्तीसगढ़ खनिज संपदा ले भरे हे। कहू इंहा मैन्यूफैक्चरिंग अउ सर्विस सेक्टर ल बढ़ावा दे जाय त, लोगन बर रोजगार बाढ़ही। संगेसंग शिक्षा अउ स्वास्थ्य सबले जादा जरूरी हे। एमा काम करके तेजी ले विकास करत आर्थिक बढ़वार होही।
एखर पहिली सिविर के जघा म मुख्यमंत्री विष्णुदेव साय ह अपन मंत्री मंडल के सहयोगी मन संग योगाभ्यास करीन अउ भारतीय प्रबंध संस्थान ल देखिन। ए दउरान मुख्यमंत्री ह परिसर म बने स्पोर्ट्स कैम्पस, हॉस्टल मेस, फाउंडेसन स्टोन, प्रशासनिक भवन, जैव विविधता बर बनाय परिसर अउ क्वीन्स पैलेस के क्वीन्स पैलेस म घुमिन। ए मउका म आईआईएम के प्रोफेसर सत्यशिबादास अउ गिरिश पहाड़िया ह संस्थान के संबंध म मुख्यमंत्री अउ मंत्री मन ल जानकारी दीन।
खैरागढ़ विश्व विद्यालय-निलंबन
इंदिराकला संगीत विश्व विद्यालय खैरागढ़ के सहायक कुल सचिव अउ दू सहायक प्राध्यापक मन ल निलंबित कर दे गेहे। विश्व विद्यालय प्रशासन ह ए कार्रवाई कारण बताओ नोटिस के जुवाब नइ दे के सेति करे हे। विश्व विद्यालय के एतिहास म पहिली घाव होय हे कि एक संग अधिकारी संवर्ग के तीन झन ल निलंबित करे गेहे। खबर के मुताबिक विश्व विद्यालय म नियुक्ति ल लेके राजभवन ले मिले चिट्ठी के आधार म सहायक कुल सचिव अउ दू सहायक प्राध्यापक मन ल कारण बताओ नोटिस जारी करे गे रिहीस। तय बेरा म जुवाब नइ दे के सेति विश्व विद्यालय प्रशासन ह ए कार्रवाई करे हे।
बस-आगजनी
जगदलपुर ले राजधानी रईपुर आवत एक यात्री बस म आगी लगे ले एक महिला घायल होगे। ए बस म करीबन पैंतीस झिन यात्री बइठे रिहीन। खबर के मुताबिक जगदलपुर ले बस राजधानी रईपुर बर निकले रिहीस। इही दौरान अभनपुर तीर चलत बस म आगी लग गे। देखते देखत आगी तेजी ले फैल गे अउ यात्री मनके बीच अफरा-तफरी मचगे। आगी लगे के बाद ड्राइवर कंडक्टर समेत यात्री मन ह बस ले कूद के अपन जान बचाइन। उहें, बस जलके खाक होगे। सूचना मिलतेच पुलिस अउ दमकल के टीम मउका म पहुंचिस। अइसन आसंका जताय जात हे कि एसी के पाइप लाइन फटे ले बस म आगी लगिस। जांच के बादे आगी लगे के कारण के पता चल सकही।
ओति बलौदाबाजार भाटापारा जिला के सुहेला के विद्युत सब-स्टेसन म दू सौ बीस केबी लाइन म सार्ट सर्किट के सेति आगी लग गे। करमचारी मनके सूझबूझ ले आगी म काबू पा ले गीस।
अब जानन मौसम के हाल…
प्रदेस म प्रचंड गर्मी के दौर चलत हे। नवतपा के संग हरेक दिन तापमान म बढ़वार होवत हे। इही बीच मौसम विभाग ह राज्य के रईपुर, बिलासपुर, राजनांदगांव समेत इक्कीस जिला म हीटवेव के अलर्ट जारी करे हे। मौसम विभाग के मुताबिक प्रदेस म औसत तापमान छियालिस दसमलव आठ डिग्री दरज करे गेहे, जउन जिला म हीटवेव के अलर्ट जारी करे गेहे, ओमा सरगुजा, मनेन्द्रगढ़-चिरमिरी-भरतपुर, कोरिया, सूरजपुर, बलरामपुर, बिलासपुर, रायगढ़, कोरबा, मुंगेली, जांजगीर-चांपा, सक्ति, मोहला-मानपुर-अंबागढ़ चौकी, राजनांदगांव, खैरागढ़-छुईखदान-गंडई, रईपुर, बलौदाबाजार-भांटापारा, महासमुंद, दुरूग, बालोद, बेमेतरा अउ कबीरधाम सामिल हे। मौसम विभाग के मुताबिक पश्चिम उत्तर प्रदेस ले पश्चिम असम तक एक द्रोणिका बने हे, जेखर परभाव ले अवइया चौबीस घंटा म प्रदेस के एक-दू जघा म छुटपूट बरसा अउ गरज-चमक संग छींटा बौछार होय के संभावना हे। आज गरियाबंद जिला के पांडुका म बरसा होइस। इही बीच जांजगीर-चांपा जिला म लू के सेति चार झन के मउत होगे। काली चांपा म एक ड्राइवर अउ हेल्पर के लू लगे ले मउत होगे। मउत होय ड्राइवर अमृत सिंह दुरूग के खुर्सीपार अउ हेल्पर शंभू कोरवा झारखंड के धुरकी के रहवइया रिहीस।
उहें, जांजगीर के रेलवे स्टेसन तीर एक सियान के अउ शिवरीनारायण म एक आने ड्राइवर जगपाल सिंह के लू के सेति मउत होय रिहीस।
ओति कांकेर जिला म विशाखापट्टनम ले डामर लेके चारआमा पहुंचे ट्रक ड्राइवर के लू लगे ले तबियत बिगड़गे ओला चारआमा के सामुदायिक स्वास्थ्य केंद्र ले जाय गीस। जिहां इलाज के बेरा काली संझा ओखर मउत होगे।
रेमल चक्रवात
चक्रवात रेमल के परभाव के सेति पश्चिम बंगाल समेत पूर्वी राज्य मन म भारी बरसा अउ भू-स्खलन ले करीबन अड़तीस झन के मउत होगे। प्रधानमंत्री नरेंद्र मोदी ह चक्रवात रेमल के सेति अपन जान गवइया अउ घायल मनके परिवार ल आर्थिक मदद देके बात किहीन हे।
उहे, मुख्यमंत्री विष्णुदेव साय ह मउत होय लोगन बर अपन संवेदना जतात घायल मनके जल्दी स्वस्थ्य होय के कामना करे हे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
जिले की चिट्ठी
प्रादेशिक समाचार एकांश आकाशवाणी रईपुर कोति ले प्रस्तुत कारीकरम जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही। ए बखत के अंक म ‘‘कोंडागांव‘‘ जिला के गतिविधि के संबंध म जानकारी दे जाही।
राष्ट्रीय आम महोत्सव
इंदिरागांधी कृषि विश्व विद्यालय रईपुर म अवइया बारह जून ले तीन दिवसीय राष्ट्रीय आम महोत्सव के आयोजन करे जाही। एमा आम के एक सौ पचास ले जादा कीसम अउ एखर ले बने छप्पन व्यंजन के प्रदर्सन करे जाही। इंदिरागांधी कृषि विश्व विद्यालय संचालनालय उद्यानिकीय अउ प्रक्षेत्र वानिकीय छत्तीसगढ़ शासन तथा प्रकृति की ओर सुसायटी कोति ले राखेगे ए राष्ट्रीय आम महोत्सव म छत्तीसगढ़ समेत देस के आने-आने राज्य के आम उत्पादक संघरही। आयोजन के पहिली दिन बिहनिया नौ बजे ले बारह बजे तक पंजीयन करे जाही। ए प्रदर्सनी लोगन बर रतिहा नौ बजे तक खुले रइही। ए प्रदर्सनी म लगे आम के आने-आने कीसम एखर ले बनइया जिनिश अउ पौधा लोगन बिसा सकही।
विश्व दुग्ध दिवस
आज विश्व दुग्ध दिवस हरय। ए मउका म प्रदेसभर म कतकोन कारीकरम राखे गेहे। एमा मुंगेली जिला के सोंढार म विश्व दुग्ध दिवस के आयोजन करे गीस। एमा पशुधन विकास विभाग के संचालक ह किहीन कि ए दिवस मनाय के उद्देस्य दुध उत्पादन म बढ़वार करना हे। भारत दूध उत्पादन के क्षेत्र म विश्व म दूसर स्थान म हवय। ए मउका म कलेक्टर ह पशुपालक मन ल सम्मानित करीन अउ आंगन बाड़ी के लइका मन ल दूध पियाय गीस।