मुख्यमंत्री विष्णुदेव साय ह आज रईपुर स्थित भारतीय प्रबंधन संस्थान आईआईएम म दू दिन तक चलइया चिंतन सिविर के सुभारंभ करीन। सिविर म मुख्यमंत्री के संगेसंग उप मुख्यमंत्री अउ मंत्री मंडल के आने सहयोगी मन घलो भाग लेवत हे।
पहिली सत्र ल नीति आयोग के सीईओ बीवीआर सुब्मण्यम ह संबोधित करीन। ओमन भारत ल विकास के रद्दा म बने ढंग ले आगू ले जा सकय एखर बारे म अपन बात राखिन। ओमन किहीन कि विकसित भारत के संकल्प पूरा करे म छत्तीसगढ़ के बड़का भूमिका होही। छत्तीसगढ़ के घलो विकसित राज्य के श्रेणी म आय के पूरा संभावना हे। चिंतन सिविर म मंत्री मन ह अपन भागीदारी निभावत प्रदेस म ए बारे म बनाय जात नीति के बारे म बतइन। संगेसंग कोनो प्रकार के उंखर मन म संसो रिहीन, त वहू बात ल सिविर म राखिन।
जानबा के मुताबिक दू दिन तक चलइया ए चिंतन सिविर म छत्तीसगढ़ के वीजन बर गोठबात होना हे।
मुख्यमंत्री-अग्निशामक यंत्र जांच
मुख्यमंत्री विष्णुदेव साय ह प्रदेस के जम्मों सरकारी आफिस, छोटे बड़े उद्योग, होटल, बड़का-बड़का इमारत, मॉल, गेमिंग जोन अउ पेट्रोल पंप मनके निरीक्षण करे अउ अग्निसामक यंत्र के सुविधा इंहा हे कि नइ एखर उपर अधिकारी मन ल जानबा लेके निरदेस देहे।
मुख्यमंत्री ह किहीन कि ए बेरा गर्मी के सेति आगी लगे के घटना होवत हे। एला देखत नियम के कड़ाई ले पालन होना चाही। मुख्यमंत्री ह जम्मों संस्था के संचालक मन ल केहे हवय कि ओमन अग्निसामक यंत्र अपन तीर जरूर राखंय।
विशेष लोक अदालत
उच्चतम न्यायालय म लंबित राजीनामा जइसन मामला ल लोक अदालत के माध्यम ले निपटारा बर उनतीस जुलाई ले तीन अगस्त तक बिसेस लोक अदालत लगाय जाही। छत्तीसगढ़ राज्य विधिक सेवा प्राधिकरण बिलासपुर के सदस्य सचिव अशोक कुमार लाल ह बतइन कि ए बिसेस लोक अदालत म प्रदेस ले जुड़े एक सौ बियालीस प्रकरण ल चिन्हांकित करे गेहे। ए जम्मों प्रकरण मन ल विधिक सेवा प्राधिकरण ल भेजे गेहे, अउ संगेसंग एखर ले जुड़े पक्षकार मन ल चिट्ठी के माध्यम ले सूचना देके लोक अदालत म सामिल होय के निरदेस दे हवय।
बेमेतरा-फैक्ट्री-दंडाधिकारी जांच
बेमेतरा जिला के बोरसी-पिरदा म पाछू पचीस मई के होय स्पेसल ब्लास्ट फैक्ट्री म बिस्फोट मामला के दंडाधिकारी जांच सुरू होगे हे। बेरला एसडीएम पिंकी मनहर ल जांच अधिकारी बनाय गेहे। जउन भी मनखे मन ए घटना के बारे म मौखिक गवाही या साक्ष्य पेस करना चाहथे, ओमन बेरला के एसडीएम न्यायालय म सात ले सत्रह जून तक अपन साक्ष्य पेस कर सकथे।
जानबा के मुताबिक पाछू पचीस मई के बेमेतरा जिला के बोरसी स्थित एक ठिन बारूद फैक्ट्री म बिस्फोट होय ले एक झिन मनखे के मउत होगे रिहीस अउ आठ झिन मनखे मन लापता बताय जात हे।
ईडी-छापा
प्रवर्तन निदेसालय ईडी ह कस्टम मिलिंग घोटाला मामला म आज रईपुर, दुर्ग अउ खरोरा म छापामार कार्रवाई करीन। रईपुर अउ दुरूग म दू-दू अउ खरोरा म एक जघा म जांच चलत हे।
जानबा के मुताबिक ईडी ह राईस मिल एसोसिएसन के पूर्व महासचिव प्रमोद अग्रवाल के इहां छापा मारे हे। ईडी डहार ले राईस मिल एसोसिएसन के रईपुर स्थित ऑफिस अउ अध्यक्ष कैलाश रूंगटा के इहां घलो कार्रवाई करे के खबर हे। कस्टम मिलिंग के मामला म ईडी के दूसर छापामार कार्रवाई हरय।
परसा कोल ब्लॉक-फैसला
सरगुजा संभाग के हसदेव अरण्य क्षेत्र म परसा कोल ब्लॉक ल लेके छत्तीसगढ़ राज्य अनुसूचित जनजाति आयोग ह ए फैसला देवत माने हे कि परसा कोल ब्लॉक के प्रस्ताव ल पारित करइया ग्राम सभा ह नियम के मुताबिक नइ करे हे। आयोग ह अवइया आदेस तक एला जस के तस बनाय राखे के आदेस सरगुजा कमिश्नर ल दे हवय।
जानबा के मुताबिक आयोग ह ए मामला के काली सुनवाई करे रिहीस, जेमा जिला प्रशासन अउ गांव के पक्ष सुने के बाद ए फैसला दे गीस।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत लोकसभा चुनाव के तहत चार जून मंगलवार के होवइया मतगणना के तियारी उपर छत्तीसगढ़ के मुख्य निर्वाचन पदाधिकारी रीना बाबा साहेब कंगाले ले लेगे भेंटवार्ता प्रसारित करे जाही। प्रसारण आकाशवाणी केन्द्र रायपुर डहार ले काली एक जून के बिहनिया साढ़े दस बजे करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
जल जगार अभियान
धमतरी म जल जगार अभियान के सुरूआत करे गेहे। कलेक्टर नम्रता गांधी ह जिला म नारी सक्ति ले जल सक्ति अभियान के तहत जल जगार उत्सव मनाय के योजना बनाय हे। एखर मुख्य उद्देस्य रैन वॉटर हार्वेस्टिंग, रूफटर्क वाटर अउ वेस्ट वाटर मेनेजमेंट के माध्यम ले साफ पानी ल भुईयां के अंदर भेजना हे। ए अभियान म जिला के चार विकास ख्ांड के पांच-पांच ठिन अइसन गांव ल चुने गेहे, जेमा पानी के समस्या रहिथे। कलेक्टर डहार ले जिला म चलत जम्मों प्राइवेट स्कूल, अस्पताल के संगेसंग बड़का भवन मन म पंद्रह जून तक रेन वाटर हार्वेसि्ंटग अउ रूफटर्क वाटर स्ट्रक्चर बनाय के निरदेस दे हवय।
उहें, धमतरी के नवागांव थुहा म जल जगार कारीकरम के तहत गांव के लोगन मन ल पानी के सही ढंग ले परयोग करे जाय, एखर उपर सपथ देवइन। ए मउका म पानी बचाय के दिसा म बढ़िया काम करइया गांव के लोगन मन ल सम्मानित घलो करे गीस।
विश्व तम्बाकू निषेध दिवस
आज विश्व तम्बाकू निषेध दिवस हरय। ए मउका म प्रदेस म कतकोन कारीकरम चलत हे। बिलासपुर जिला म विश्व तम्बाकू निषेध दिवस के मउका म एनसीसी के छात्र मन ह विप्र महाविद्यालय ले गांधी चौक तक जन-जागरूकता रैली निकालिन। मुख्य चिकित्सा अउ स्वास्थ्य अधिकारी डॉक्टर प्रभात कुमार श्रीवास्तव ह हरा झंडी दिखाके रवाना करीन। रैली म एनसीसी कैडैट अउ सहरी मितानिन मन ह घलो भाग लीन। रैली के बाद महाविद्यालय परिसर म एनसीसी विंग अधिकारी डहार ले तम्बाकू के कोनो भी प्रकार ले सेवन नइ करे के सपथ देवाइन।
त उहें, कोरिया जिला म घलो विश्व तम्बाकू निषेध दिवस के मउका म मुख्य चिकित्सा अउ स्वास्थ्य अधिकारी डॉक्टर आर.एस. सेंगर ह जागरूकता रथ ल हरा झंडी दिखाके रवाना करीन।
माओवादी-गिरफ्तार
बीजापुर जिला म सुरक्षाबल मन ह काली सोला झिन माओवादी मन ल गिरफ्तार करे हे। हमर संवाददाता ले मिले जानबा के मुताबिक डिस्ट्रिक्ट रिजर्व गार्ड डीआरजी अउ पुलिस के संयुक्त टीम ह सर्चिंग बर निकले रिहीन। इही दौरान गोरना-पड़ियापारा ले ग्यारा झिन माओवादी मन ल गिरफ्तार करे गेहे। त उहें, केंद्रीय रिजर्व पुलिस बल सीआरपीएफ अउ कोबरा बटालियन डहार ले थाना उसूर के भूसापुर के जंगल ले पांच झिन माओवादी मन ल पकड़े गीस। पकड़े गे माओवादी मन अब्बड़ बेरा ले माओवादी संगठन म सक्रिय रिहीन। गिरफ्तार माओवादी मन के तीर ले बैनर पोस्टर के संगेसंग पाम्पलेट घलो बरामद करे गेहे। ए जम्मों माओवादी मन ल न्यायालय म पेस करे गीस। जेखर बाद न्यायिक रिमांड म भेज दे गेहे।
किसान-प्रशिक्षण कार्यक्रम
छत्तीसगढ़ युवा प्रगतिशील किसान संघ डहार ले प्रदेस के किसान मन बर काली एक जून के कुम्हारी किसान संघ कार्यलय म एक दिन के प्रसिक्षण कारीकरम राखे गेहे, जेमा भाग लेवइया किसान मन ल स्कील डेवलपमेंट के बारे म जानबा दे जही अउ संगेसंग किसान मन ल मिर्चा अउ भांटा के उत्पादन बढ़िया ढंग ले कइसे करे जाय। एखर बारे म घलो विस्तार ले बताय जाही।
जानबा के मुताबिक ए कारीकरम किसान मन बर हर महिना राखे जात हे। जेमा आने-आने प्रदेस के किसान मन ह घलो भाग लेथे।
हत्या-आरोपी गिरफ्तार
बलरामपुर जिला के डुमरखी जंगल म पाछू सत्ताईस मई के एक झिन युवक अउ युवती के हत्या के मामला म पुलिस ह तीन झिन गांव के लोगन मन ल गिरफ्तार करे हे। पुलिस के मुताबिक सुजीत अउ किरण के मउत बिजली के करंट लगे ले होय रिहीस। ए मामला म क्षेत्रीय विधायक मंत्री रामविचार नेताम ह किहीन कि परिवार वाले मन डहार ले मांग करे उपर ए मामला के उच्च स्तरीय जांच कराय जा सकथे।
जानबा के मुताबिक ए दोहरा हत्याकांड के विरोध म इंहा के लोगन मन ह बलरामपुर के मुख्य रद्दा उपर चक्काजाम घलो करे रिहीन।