बेमेतरा जिला के स्पेशल ब्लॉस्ट फैक्ट्री म होय विस्फोट के मामला म पुलिस ह कंपनी के पदाधिकारी अवधेश जैन अउ आने लोगन के खिलाफ एफ.आई.आर. दर्ज कर लेहे। जानबा के मुताबिक विस्फोटक सामग्री के रखरखाव म चूक अउ सुरक्षा मानक म कमी ल लेके अपराध पंजीबद्ध करे गेहे।
जानबा के मुताबिक पाछु पच्चीस मई के बेमेतरा के बोरसी स्थित बारूद फैक्ट्री म विस्फोट होय ले एक मजदूर के मउत होगे रिहीस। फेर, आठ आने मजदूर अभी भी लापता हे।
अमृतकाल छत्तीसगढ़ विजन
‘‘अमृतकाल छत्तीसगढ़ विजन-दू हजार सैंतालीस‘‘ डॉक्यूमेंट तैयार करे बर काली नवा रईपुर के राज्य नीति आयोग के सभाकक्ष म वर्किंग गु्रप के अधिकारी मनके बइठका होइस। बइठका म वर्किंग समिति ह ‘‘गुणवत्तपूर्ण स्वास्थ्य और पोषण‘‘ बिसय म आधारित लघु, मध्यम अउ दीर्घकालिक लक्ष्य म सुझाव दीन। बइठका म पावर पॉइंट प्रेजेटेंशन के जरिया ले स्वास्थ्य अउ परिवार कल्याण विभाग के संग महिला अउ बाल विकास विभाग के अधिकारी मन ह अपन विभाग के लक्ष्य, चुनौती अउ सामर्थ्य के जानकारी दीन। बइठका म राज्य म मृत्युदर कम करे, एनीमिया मुक्त करे, केन्द्र सरकार के योजना ले लाभ पाय, ट्रेनिंग संस्था मनके गुणवत्ता सुधारे, रिसर्च संस्थान म जोर, टीकाकरण, मेडिकल टूरिज्म हब बनाय के संग आने जरूरी बिसय म घलो चर्चा करे गीस।
पूर्व सरपंच-हत्या कोशिश
बिलासपुर जिला के बीजा गांव के कोटवार ह जमीन विवाद ल लेके पूर्व महिला सरपंच के उपर ट्रैक्टर चढ़ाके उंखर हत्या करे के कोसिस करीस। ए महिला बालका कोल गांव के सरपंच रिहीस। गंभीर हालत म महिला ल बिलासपुर रिफर करे गेहे। ए घटना ले आक्रोशित लोगन मन ह तखतपुर थाना के घेराव करीन, जेखर बाद पुलिस ह कोटवार उपर हत्या के कोसिस करे के मामला दर्ज कर लेहे। उहें, चार आने लोगन मनके खिलाफ घलो एफआईआर दर्ज कर ले गेहे।
कैदी फरार-प्रहरी निलंबित
केन्द्रीय जेल अंबिकापुर म बंद एक कैदी के तबीयत खराब होय के कारण मेडिकल कॉलेज अस्पताल रेफर करे गे रिहीस। ए दउरान ओला एम्बुलेंस म केन्द्रीय जेल ले मेडिकल कॉलेज अस्पताल ले जाय जात रिहीस, उही समय रद्दा म ए कैदी एम्बुलेंस ले कूदके भाग गीस। जेल प्रहरी मन ह ए मामला के पुलिस म सिकायत दर्ज करा देहे। उहें, जेल अधीक्षक ह दूनों प्रहरी मन ल लापरवाही बरते म तत्काल प्रभाव ले निलंबित कर देहे।
ठगी
भिलाई म क्रिप्टोकरेंसी अउ शेयर बाजार म निवेस के झांसा देके दू लोगन मनले करीब पौने दू करोड़ रूपिया के ठगी के मामला सामने आय हे। जानबा के मुताबिक चंदू लाल चंद्राकर मेडिकल कॉलेज म आई डिपार्टमेंट के एचओडी डॉक्टर लिपी चक्रवर्ती ह क्रिप्टोकरेंसी म निवेस के नाम म अंट्ठावन लाख रूपिया गंवा दिस। उंहे, बीएसपी के सेवानिवृत्त अधिकारी प्रलेश शांति बशु ले शेयर बाजार म निवेस के नाम म एक करोड़ छब्बीस लाख रूपिया के ठगी कर ले गीस।
बताय जात हे, कि दूनों मामला म ठग मन ह लिंक भेज के एप डाऊनलोड करवाइस। अउ ए एप के जरिया ले उंखर मन ले ठगी करीस। ठगी के एहसास होय म दूनों पीड़ित मन ह अलग-अलग थाना म सिकायत दर्ज कराइन।
उहें, जशपुर पुलिस ह प्रधानमंत्री आवास योजना के नाम म एक लाख चौंतीस हजार रूपिया के ठगी करइया दू फरार साइबर ठग ल गिरफ्तार करे हे। ए आरोपी मन ह पीएम आवास के नाम म धोखा ले बायोमैट्रिक फिंगर मसीन म अंगूठा लगाके लोगन मन ले लाखों के ठगी करे रिहीन।
हिन्दी पत्रकारिता दिवस
आज हिन्दी पत्रकारिता दिवस हे। हिन्दी पत्रकारिता के यात्रा तीस मई अट्ठारह सौ छब्बीस के पंडित जुगल किशोर शुक्ल डहार ले सुरू करे गे पहिली हिन्दी समाचार पत्र ‘‘उदन्त मार्तण्ड‘‘ के प्रकासन ले सुरू होइस। ए दिन सच्चाई अउ साहस के संग जनकल्याण के उद्देश्य से काम करइया हिन्दी पत्रकार मनके बिसेस योगदान ल समर्पित हे। ए समाचार पत्र ले भारत म पत्रकारिता के एक नवा युग सुरू होइस।
जवान-मौत
जैसलमेर म पदस्थ सीमा सुरक्षा बल-बीएसएफ के एक जवान सेवक राम कोर्राम के ड्यूटी के दउरान तबीयत बिगड़े ले मउत होगे हे। ए जवान धमतरी जिला के गांव बरबांधा के रहवइया रिहीस। जवान के तबीयत बिगड़े म ओला दिल्ली के एक अस्पताल म भर्ती कराय गे रिहीस, जिहां उंखर मउत होगे। काली ए जवान के पार्थिव सरीर ल उंखर गांव बरबांधा लाय गीस, जिहां पूरा राजकीय सम्मान के संग उंखर अंतिम संस्कार करे गीस। जवान ल श्रद्धांजलि दे बर क्षेत्र के विधायक के संग गांव के लोगन बड़ संख्या म मौजूद रिहीन। सेवक राम कोर्राम करीब छब्बीस साल ले बीएसएफ म अपन सेवा देवत रिहीस।
हत्या
धमतरी जिला म संपत्ति विवाद ल लेके दू आने-आने मामला म दू लोगन मन ह अपन-अपन पिता के हत्या कर दीन। पहिली मामला कुरूद थाना क्षेत्र के सिवनीकला गांव के हे, जिहां भागीरथी पटेल ह पुलिस ल बतईस कि उंखर पिता फिरंता पटेल के उंखर बड़े भाई पूनमचंद पटेल ह अपन तीन आने साथी मन संग मिलके हत्या कर दीन। उहें, दूसर मामला कुरूद के ही बकली गांव के हे, जिहां दीनानाथ देवांगन ह घलो पुलिस म सिकायत करीन कि उंखर पिता पंचराम देवांगन के उंखर भाई सुदामा देवांगन ह अपन दू साथी संग मिलके हत्या कर दीन। दूनों मामला म पुलिस ह चार आरोपी मन ल गिरफ्तार कर लेहे।
उहें, इही जिला के केरेगांव म चाय पीये बर रूके पिकअप चालक उपर मोटरसायकल सवार तीन लोगन मन ह धारदार हथियार ले हमला करके उंखर हत्या कर दीन। पुलिस फरार आरोपी मन ल ढूंढत हे।
चोरी-आरोपी गिरफ्तार
जांजगीर-चांपा जिला के बलौदा पुलिस ह जर्वें गांव स्थित छत्तीसगढ़ राज्य ग्रामीण बैंक म चोरी करे के मामला म तीन आरोपी मन ल गिरफ्तार करके न्यायिक हिरासत म जेल भेज देहे। पुलिस ह आरोपी मन तीर ले ताला काटे के औजार, सेंसर मसीन अउ मोटरसाइकिल जब्त करे हे। पुलिस के अनुसार आरोपी मन ह बैंक के कैश वाल्ट ल काटे के कोसिस करे रिहीन। ए घटना पच्चीस-छब्बीस मई के रात के हरय, जिहां आरोपी मन ह सीसीटीवी के केबल काट के बैंक के दरवाजा के ताला तोड़े रिहीस अउ सेंसर मसीन ल चोरी कर ले रिहीस।
अउ अब मौसम के हाल…
ऐति, छत्तीसगढ़ म भीषण गर्मी के दौर जारी हे। आज प्रदेस के अधिकतम तापमान रायपुर जिला म पैंतालीस दशमलव सात डिग्री सेल्सियस रिहीस। उहें, बिलासपुर म अधिकतम तापमान पैंतालीस दशमलव दू अउ कोरबा म पैंतालीस दशमलव एक डिग्री सेल्सियस दर्ज करे गीस।
इही बीच, मौसम विभाग ह काली प्रदेस के रायपुर, दुर्ग, बिलासपुर, राजनांदगांव, जांजगीर-चांपा, कोरबा, बलौदाबाजार-भाटापारा, महासमुंद के संग सत्रह जिला म लू चले के संभावना जतईन। उहें, काली उत्तर अउ दक्षिण छत्तीसगढ़ के एक-दू जघा म हल्का बरसा होय या गरज-चमक के संग छींटा पड़े के संभावना हे।
भीषण गर्मी ल देखत हुए राज्य शासन डहार ले आयोजित करे जात प्रदेस स्तर के समर कैम्प ल रोक दे गेहे।
मैत्रीबाग-वन्यजीव सि्ंप्रकलर
भिलाई इस्पात संयंत्र के मैत्रीबाग चिड़ियाघर म वन्यजीव मन ल गर्मी ले बचाय बर बिसेस व्यवस्था करे गेहे। एखर तहत बंदर अउ पक्षी मन बर पानी छिड़काव के व्यवस्था करे गेहे अउ सांभर अउ हिरण के बाड़ा म फव्वारा के बेवस्था करे गेहे। उहें, बाघ मन बर कृत्रिम वाटरफॉल तैयार करे गेहे। एखर अलावा जानवर मनके पिंजरा ल धूप ले बचाय बर चारों डहार ले हरा नेट लगाय गेहे।
उद्यानिकी विभाग के उप महाप्रबंधक अउ मैत्री बाग प्रभारी डॉक्टर नवीन कुमार जैन ह बतईन कि चिड़िया घर के वन्यप्राणी मनके लू ले सुरक्षा बर वातावरण ल ठंडा रखे जात हे। खुला म रहवइया जानवर मन बर पानी के बौछार करे जात हे। संगेसंग जानवर मनके खाना-पानी म घलो मौसम के अनुसार बदलाव करे गेहे, जेखर ले उंखर सरीर म ठंडक बने रेहे अउ इंखर स्वास्थ्य म असर न पडे़। ओमन ह बतईन मैत्री बाग चिड़ियाघर म अभी करीब तीन सौ चालीस वन्यप्राणी राखे गेहे।