बेमेतरा जिला के बेरला म पाछु पच्चीस मई के बारूद फैक्ट्री म होय विस्फोट के बाद स्पेसल ब्लास्ट लिमिटेड कंपनी म उत्पादन अउ आने काम-काज उपर अवइया आदेस तक रोक लगादे गेहे। ए बारे म बेमेतरा कलेक्टर रणवीर शर्मा ह आदेस जारी करके यहू केहे हे कि फैक्ट्री के ंअंदर विस्फोटक जिनिस के सुरक्षा के जुवाबदारी फैक्ट्री प्रबंधन के होही। इही बीच बारूद फैक्ट्री म होय मामला के न्यायिक जांच के आदेश कलेक्टर रणवीर शर्मा ह देहे। ए विस्फोट के जांच बेरला एसडीएम पिंकी मनहर ल सौंपे गेहे। कलेक्टर ह पैंतालीस दिन म ए मामला के जांच करके प्रतिवेदन पेस करे के निरदेस दे हवय। कलेक्टर ह जांच बर चार ठिन बिन्दु राखे हे, जेमा विस्फोट के कारण, फैक्ट्री प्रबंधन डहार ले करे गे सुरक्षा उपाय के जांच, विस्फोट म कोनों प्रकार के लापरवाही होय हे, त ओखर जिम्मेवारी काखर होही, ए जम्मों बिन्दु उपर जांच करे जाही। ए घटना म मारे गे अउ लापता लोगन मन ल लेके प्रसासन कोति ले जारी आंकड़ा ल गांव के लोगन मन ह खारिज कर देहे। सरकार के मुताबिक ए हादसा म एक झन मजूर के मउत होय हे अउ आठ झिन श्रमिक मन ल लापता बताय गेहे। संगेसंग आठ झिन मजूर मन ल घायल बताय गेहे।
ऐति, नेता प्रतिपक्ष डॉक्टर चरणदास महंत ह बारूद फैक्ट्र म होय विस्फोट के घटना उपर किहीन कि राज्य सरकार के लापरवाही के सेति ए दुर्घटना होय हे। डॉक्टर महंत ह मृतक के परिवार मन ल एक-एक करोड़ रूपिया के मुआवजा देके संगेसंग परिवार के एक झिन सदस्य ल नौकरी म राखे के मांग करीन हे।
माओवादी मुठभेड़/गिरफ्तार
बीजापुर जिला म आज सुरक्षा बल मनके संग होय मुठभेड़ म एक झिन माईलोगिन के संग दू झिन माओवादी मारे गीस। जिला के पुलिस अधीक्षक जितेन्द्र यादव ह बतईन कि ए मुठभेड़ मद्देड़ थाना क्षेत्र के बद्देपारा के जंगल म आज बिहनिया होइस। मुठभेड़ म मारे गे महिला माओवादी उपर आठ लाख रूपिया के इनाम घोसित करे गे रिहीस। पुलिस ह घटना वाले जघा ले मारे गे दूनों माओवादी के सव के संगेसंग दू ठन हथियार घलो बरामद करे हे।
त उहें, सुकमा जिला म पुलिस ह पांच लाख रूपिया के एक झिन इनामी महिला माओवादी ल गिरफ्तार करे हे। जिला के पुलिस अधीक्षक किरण चव्हाण ह बतईन कि ए वर्दीधारी माओवादी मलांगीर एरिया कमेटी के डॉक्टर टीम के कमांडर बताय जावत हे।
मतगणना-तैयारी
लोकसभा चुनई म छत्तीसगढ़ के संगेसंग देस म चार जून के होवइया मतगणना के तियारी अब आखिरी चरण म हवय। निर्वाचन आयोग डहार ले वोट ल गिने के काम म लगे अधिकारी अउ करमचारी मन ल प्रसिक्षण दे जावत हे। इही कड़ी म कोंडागांव म मतगणना सहायक, पर्यवेक्षक, माईक्रो आब्जर्वर अउ टेबुलेटर मन ल प्रसिक्षण देके संगेसंग मतगणना के काम के बारीकी के बारे म बताय गीस। प्रसिक्षण के दउरान मत मनके गणना, वीवीपैट स्लिप गणना, मतगणना सिराय के बाद ईवीएम अउ निर्वाचन जिनीस मन ल मुहरबंद करे के बारे म जानबा दे गीस।
जिला के अपर कलेक्टर अउ उप जिला निर्वाचन अधिकारी चित्रकांत चार्ली ठाकुर ह किहीन कि मतगणना के बारे म कोनों प्रकार के संसो होय उपर ओखर निराकरण जरूर करयं। मत के गिनती सुरू होय के पहिली मउका म उपस्थिति उम्मीदवार अउ उंखर अभिकर्ता मन ल निर्वाचन आयोग ले मिले दिसा-निरदेस के जानबा दे बर किहीन।
आगजनी
रईपुर जिला के खमतराई म एक ठिन फोम फैक्ट्री म आगी लगे ले दू झिन माईलोगिन करमचारी के मउत होगे। फायर ब्रिगेड के टीम ह मउका म पहुंच के आगी बुताय म लगे हे। आगी कइसे लगिस एखर बारे म जानबा नइ मिल पाय हे।
ओति, जगदलपुर म स्थित एक ठिन कपड़ा के दुकान म आगी लग गे। आगी लगे ले तीर-तखार के दुकान मन ह घलो एखर चपेट म आगे। सूचना मिलतेच आगी बुझइया गाड़ी ह मउका म जाके आगी उपर काबू पाइन। फेर, दुकान म आगी लगे ले दुकान म रखे समान अउ दुकान के बाहिर खड़े एक ठिन कार अउ फटफटी ह जर के राख होगे हे।
गरियाबंद-गबन मामला
गरियाबंद जिला के मैनपुर स्वास्थ्य केंद्र म तीन करोड़ तेरह लाख रूपिया ले जादा के गबन के मामला म आरोपी ग्यारह अधिकारी-करमचारी मनके खिलाफ पुलिस कार्रवाही चलत हे। ए मामला म स्वास्थ्य विभाग के पूर्व लिपिक वीरेंद्र भंडारी ल गिरफ्तार करके जेल भेज दे गेहे।
जानबा के मुताबिक मैनपुर स्वास्थ्य केंद्र म तनखा के आने-आने फायदा के नाव उपर जिला कोषालय ले मिलके तीन करोड़ तेरह लाख रूपिया ले जादा के पइसा निकाल ले गे रिहीस। ए मामला म जिला प्रशासन ह जांच के बाद मैनपुर थाना म प्रतिवेदन पेस करके कार्रवाई के मांग करे रिहीस।
किर्गिस्तान-घर वापसी
किर्गिस्तान के राजधानी बिश्केक म मेडिकल के पढ़ाई करे बर गे छात्र-छात्रा मनके ए बेरा भारत वापसी होवत हे। इही कड़ी म छत्तीसगढ़ के गौरेला-पेण्ड्रा-मरवाही जिला के छात्रा आयशा राय घलो सामिल हे।
जानबा के मुताबिक पाछु दिन किर्गिस्तान म आम लोगन अउ दूसर देस के पढ़ईया छात्र मनके बीच विवाद बाढ़े ले तनाव जइसन स्थिति सुरू होगे रिहीस, जेखर बाद छात्र-छात्रा मन ह वीडियो जारी कर भारत सरकार ले मदद के गुहार लगाय रिहीन।
सुनील शर्मा-राज्यपाल परिसहाय
राज्य सासन ह भारतीय पुलिस सेवा के बछर दू हजार सत्रह बैच के अधिकारी अउ सहायक पुलिस महानिरीक्षक सुनील कुमार शर्मा ल राज्यपाल के परिसहाय के पद म अवइया आदेस तक नियुक्त करे गेहे। ए बारे म गृह विभाग डहार ले आदेस जारी कर दे गेहे।
आपराधिक कानून-प्रशिक्षण
देसभर म एक जुलाई ले लागू होवइया तीन ठिन नवा आपराधिक कानून ल लाय बर कोरिया जिला म पुलिस अधीक्षक सूरज सिंह परिहार के निरदेस उपर थाना प्रभारी मन ह जांच अधिकारी मन ल प्रसिक्षण दीस। प्रसिक्षण सत्र के पहिली चरण म जिला ले पचीस विवेचक मन सामिल होइन। प्रसिक्षण म बताय गीस हे कि तीन ठिन नवा कानून के बारे म छत्तीसगढ़ पुलिस के अधिकृत वेबसाइट म एखर बारे म पूरा जानबा दे गेहे।
होटल-कार्रवाई
रईपुर नगर-निगम ह राजधानी रईपुर के वीआईपी रोड स्थित एक ठिन प्राइवेट होटल डहार ले पैंतालिस सौ वर्ग फीट उपर करे गे अवैध कब्जा ल तोड़ देहे। निगम अधिकारी संतोष पांडेय ह बतइन कि ए होटल के तीर विधायक कॉलोनी हे, होटल प्रबंधन डहार ले इंहा ले निकले नाला उपर कब्जा करे के सेति नाला के पानी ह विधायक कॉलोनी म घुस जथे। सिकइत के बाद नगर-निगम के टीम ह कार्रवाई सुरू कर देहे।
शोएब ढेबर-एफआईआर
राजधानी रईपुर के सिविल लाइन्स थाना म अनवर ढेबर के बेटा शोएब ढेबर अउ एक झिन अन्जान वकील के खिलाफ मामल दरज करे गेहे। एखर मन उपर आरोप हे कि एमन कथित सराब घोटाला मामला के गवाह ल ईओडब्ल्यू ऑफिस के तीर रोक के धमकी दीन। ए मामला म पुरानी बस्ती थाना म घलो एफआईआर दर्ज कराय गेहे, जेमा अनवर ढेबर ल घलो आरोपी बनाय गेहे।
अउ अब मौसम के हाल…
दक्षिण-पश्चिम मानसून के अवइया चौबीस घंटा म केरल म पहुंचे बर स्थिति बनत हे। मौसम विभाग ले मिले जानबा के मुताबिक इकतीस मई तक प्रदेस म मौसम के सुष्क बने रहे के संभावना बताय गेहे। एक ठिन द्रोणिका उत्तर-पश्चिम उत्तर प्रदेस ले पश्चिम बंग्लादेस तक बने हे। उत्तर -पश्चिम ले अवइया गरम अउ सुष्क हवा के सेति मध्य अउ उत्तर छत्तीसगढ़ म अवइया दू दिन तक जोरदरहा गर्मी पड़े के संभावना हवय।
मुंगेली जिला म काली प्रदेस के सबले जादा तापमान सैंतालीस डिग्री सेल्सियस दरज करे गीस, त उहें, बिलासपुर म छियालिस दसमलव छै अउ रईपुर म पैंतालिस दसमलव आठ डिग्री सेल्सियस दर्ज करे गीस।
इही बीच, चरचरावत घाम अउ लू ले बांचे बर गौरेला-पेण्ड्रा-मरवाही जिला के कलेक्टर लीना कमलेश मंडावी ह लोगन मन ले जरूरी सावधानी बरते के अपील करे हे। जम्मों स्वास्थ्य केंद्र मन म दवई मन के बेवस्था करे के घलो निरदेस देहे।