इही बीच, छत्तीसगढ़ के मुख्य निर्वाचन पदाधिकारी रीना बाबा साहेब कंगाले ह आज रायपुर म मतगणना प्रेक्षक मनके प्रशिक्षण कार्यक्रम ल संबोधित करत हुए किहीन कि मतगणना के दउरान प्रेक्षक के भूमिका निभइया अधिकारी मन ल मतगणना के सबो पहलू मनके जानकारी होना चाही। ओमन बतईन कि मतगणना बर छत्तीसगढ़ के छप्पन झन अधिकारी मन ल देस के अलग-अलग निर्वाचन क्षेत्र मन म मतगणना प्रेक्षक के जिम्मेदारी सौंपे गेहे। एमा भारतीय प्रसासनिक सेवा के बीस अउ राज्य प्रसासनिक सेवा के छत्तीस झन अधिकारी सामिल हे।
इही बीच, रायपुर कलेक्टर अउ जिला निर्वाचन अधिकारी डॉक्टर गौरव सिंह ह काली अभ्यर्थी अउ राजनीतिक दल के प्रतिनिधि मनके बइठका लीन। ओमन किहीन कि मतगणना के दिन समय के बिसेस ध्यान रखे जाय। मतगणना अभिकर्ता बिहनिया साढ़े सात बजे मतगणना स्थल पहुंच के अपन निर्धारित स्थान म ही बइठय। ओमन बतईन कि डाक मतपत्र मन ल जिला कोषालय के स्ट्रांग रूम ले बिहनिया छह बजे सासकीय इंजीनियरिंग कॉलेज सेजबहार मतगणना स्थल लाय जाही। मतगणना अभिकर्ता बर आवेदन एक जून तक ले जाही। रायपुर जिला के सात ठन विधानसभा के आवेदन रिटर्निंग अधिकारी संबंधित एआरओ करा जमा करा सकहीं।
विजय शर्मा-मुलाकात
सुकमा जिला म आईईडी विस्फोट म घायल महिला ल रायपुर के एम्स म बेहतर इलाज बर भर्ती कराय गेहे, जेखर ले मिले बर उप मुख्यमंत्री विजय शर्मा आज एम्स पहुंचीन अउ घायल महिला के हालचाल जानीन।
बतादन कि माओवादी मन ह सुकमा जिला के भीमापुरम गांव म एक ठन घर म आईईडी छुपा के राखे रिहीन, जेमा विस्फोट होय ले दू झन महिला मन घायल होगे रिहीन।
माओवादी सहयोगी-गिरफ्तार
दंतेवाड़ा जिला म सुरक्षा बल ह पन्द्रह झन माओवादी सहयोगी मन ल गिरफ्तार करे हे। एमा सात झन महिला माओवादी घलो सामिल हे।
जिला के पुलिस अधीक्षक गौरव राय ह बतईन कि ए माओवादी मन ल दंतेवाड़ा के गुमलनार-गिरसापरा अउ मुस्तलनार के जंगल ले डिस्ट्रिक्ट रिजर्व गार्ड-डीआरजी अउ बस्तर फाइटर के संयुक्त टीम ह घेराबंदी करके गिरफ्तार करे हे। ए सबो झन के खिलाफ दंतेवाड़ा के गीदम थाना म पहिली ले ही मामला पंजीबद्ध हवय। गिरफ्तार माओवादी मन करा ले डेटोनेटर, पिट्ठू, टिफिन, इलेक्ट्रिकल वायर, माओवादी वर्दी समेत कई ठन सामान बरामद करे गेहे।
पीडिया मुठभेड़-सर्व आदिवासी समाज
बीजापुर जिला म पीडिया के जंगल म पाछु दस मई के होय मुठभेड़ ल सर्व आदिवासी समाज ह फर्जी बताय हे। आदिवासी समाज ह कथित फर्जी एनकाउंटर के खिलाफ बंद के आह्वान करे रिहीन। बंद ल समर्थन देवत हुए कांकेर, कोंडागांव अउ बीजापुर म व्यापारी मन ह अपन दुकान ल बंद राखीन। सड़क म घलो लोगन मनके आवाजाही कम दिखीस। बस्तर चेम्बर ऑफ कॉमर्स ह घलो बंद ल अपन सहमति देवत हुए आधा पहर बर दुकान, प्रतिष्ठान मन ल बंद करे के बात किहीन। उहें, कोंडागांव के फरसगांव म घलो दुकान मन बंद रिहीस। एखर अलावा केशकाल म बंद के आंसिक असर देखे बर मिलीस। बीजापुर जिला के अंदरूनी इलाका मन म व्यापारी मन अपन प्रतिष्ठान अउ व्यावसायिक परिसर ल बंद करके आदिवासी समाज ल समर्थन दीन। ए बंद ल कांग्रेस ह घलो अपन समर्थन देहे।
सोशल मीडिया विवादित पोस्ट
जांजगीर-चांपा के शिवरीनारायण पुलिस ह सोशल मीडिया म विवादित पोस्ट करे के आरोप म तीन झन लोगन ल गिरफ्तार करे हे। आरोपी मन ह सरकारी जमीन म अवैध कब्जा कर जैतखंभ के स्थापना कर दे रिहीन। फेर, जब राजस्व विभाग के टीम ह अवैध कब्जा हटाय बर किहीन, त ओमन ए मामला ल सांम्प्रदायिकता ले जोड़ दीन अउ सोशल मीडिया म जैतखंभ म लगे झंडा ल भगवा रंग के झंडा ले बदले के खबर वायरल कर दीन, जेखर बाद पुलिस ह कार्रवाई करत हुए तीनों आरोपी मन ल हिरासत म लेहे।
वीर सावरकर-जयंती
स्वतंत्रता संग्राम सेनानी वीर सावरकर के आज जयंती हे। ए अवसर म मुख्यमंत्री विष्णुदेव साय ह उनला श्रद्धांजलि अर्पित करत हुए महान राष्ट्रभक्त अउ भारत के वीर सपूत बतईन। मुख्यमंत्री ह किहीन कि वीर सावरकर भारत के एक ऐसे स्वतंत्रता सेनानी, क्रांतिकारी, विचारक, लेखक अउ सामाजिक कार्यकर्ता रिहीन, जेन ह राष्ट्रहित बर कई झन क्रांतिकारी मन ल प्रेरित करीन।
रेत परिवहन-कार्रवाई
गौरेला-पेण्ड्रा-मरवाही जिला म रेत के अवैध परिवहन करे के मामला म बारह ठन वाहन उपर खनिज अधिनियम के तहत कार्रवाई करे गेहे। जिला खनिज अधिकारी ह बतईन कि मरवाही क्षेत्र के ग्राम कोलबिर्रा, पथर्रा अउ सिलपहरी म सोन नदी ले रेत के अवैध परिवहन करत हुए दस ठन ट्रक ल जब्त करे गेहे। उहें, ग्राम खोडरी अउ लालपुर के अंतर्गत मलनिया नदी ले घलो एक ठन ट्रैक्टर अउ एक ठन डंपर ल जब्त कर कार्रवाई करे गेहे।
गरियाबंद-वन विभाग कार्रवाई
गरियाबंद जिला के उदंती सीतानदी टाईगर रिजर्व क्षेत्र म अतिक्रमण के मामला म वन विभाग के टीम ह कार्रवाई करे हे। ए मामला म बीस झन आरोपी मन ल गिरफ्तार कर जेल भेज दे गेहे। बताय जात हे कि ए सबो आरोपी ओड़िशा के रायघर के रहइया आय अउ गरियाबंद वन परिक्षेत्र के इंदागांव-पीपलखुटा म जंगल के जमीन म कब्जा करे रिहीन।
माहवारी स्वच्छता दिवस
माहवारी स्वच्छता दिवस के अवसर म जांजगीर म आज ‘‘माहवारी की बात सबके साथ‘‘ कार्यक्रम के आयोजन करे गीस। ए मउका म कलेक्टर आकाश छिकारा ह किहीन कि बालिका मन ले माहवारी जागरूकता के बिसय उपर बातचीत करे जाना चाही। ओमन किहीन कि सबो पंचायत, कॉलेज, छात्रावास अउ स्कूल मन म माहवारी स्वच्छता प्रबंधन के कार्य एक अभियान के रूप म करे जाय। ओमन हसदेव वॉलिटिंयर, आंगनबाड़ी कार्यकर्ता, मितानिन अउ सिक्षिका मनके टीम तैयार कर माहवारी के प्रति जागरूकता अभियान चलाय के बात घलो किहीन। ओमन किहीन कि माहवारी कोई अभिशाप नो हय, बल्कि एक सारीरिक प्रक्रिया आय।
मौसम पूर्वानुमान-ऐप
आकाशीय बिजली के घटना मनले निपटे अउ मौसम संबंधित पूर्वानुमान बर भारत सरकार डहार ले दामिनी अउ मेघदूत ऐप विकसित करे गेहे। दामिनी ऐप ले बीस ले इकतीस किलोमीटर के भीतर आकाशीय बिजली के पूर्वानुमान लगाय जा सकही, जेखर ले जरूरी तैयारी अउ बचाव बर उपाय करे जा सकही। उहें, मेघदूत ऐप ले तापमान, बरसा के स्थिति, हवा के गति अउ दिसा ले संबंधित जानकारी ले जा सकही। ए दूनों ही ऐप ल गूगल प्ले-स्टोर ले डाउनलोड करे जा सकत हे।
इही कड़ी म गौरेला-पेण्ड्रा-मरवाही जिला के कलेक्टर लीना कमलेश मंडावी ह सबो विभाग प्रमुख मन ल परिपत्र जारी कर ए दूनों ऐप के उपयोगिता सुनिश्चित करे के निर्देश देहे। ओमन पटवारी, सिक्षक, पंचायत सचिव अउ आंगनबाड़ी कार्यकर्ता मनके माध्यम ले व्यापक प्रचार-प्रसार के संगेसंग ही ग्राम कोटवार मन डहार ले मुनादी करवा के मोबाइल फोन म दूनों ऐप डाउनलोड करवाय बर जन-जागरूकता लाय बर किहीन।
अउ अब मौसम के हाल…
प्रदेस म भीषण गर्मी के स्थिति लगातार बने हुए हे। मौसम विभाग के अनुसार काली अउ परन दिन बिलासपुर, गौरेला-पेण्ड्रा-मरवाही, कोरबा, मुंगेली, जांजगीर, सक्ती, रायगढ़, सारंगढ़-बिलाईगढ़, राजनांदगांव, खैरागढ़, मोहला-मानपुर, रायपुर, बलौदाबाजार-भाटापारा, महासमुंद, गरियाबंद, धमतरी, बालोद, बेमेतरा अउ कबीरधाम जिला म एक-दू जघा म लू चले के संभावना हे।
इही बीच, रायपुर जिला म आज अधिकतम तापमान पैंतालीस डिग्री सेल्सियस दर्ज करे गेहे।