उपमुख्यमंत्री अरूण साव ह आज रइपुर म प्रधानमंत्री नरेंद्र मोदी के विकसित भारत-दू हजार सैंतालीस के विजन उपर पत्रकार मन ले गोठबात करीन। ओमन ए बारे म बतइन कि छत्तीसगढ़ सरकार ह अवइया योजना मन ल धियान म राखत जम्मों विभाग मन बर डॉक्यूमेंट तियार करे उपर जोर देवत हे। ओमन विकसित छत्तीसगढ़ बनाय उपर घलो गोठबात करीन।
उपमुख्यमंत्री ह बेमेतरा के बारूद फैक्ट्री के घटना उपर किहीन कि राज्य सरकार ह ए घटना ल गंभीरता ले लेहे मउका म राहत अउ बचाव के काम चलत हे, सेना के विशेषज्ञ टीम ले घलो मदद ले जात हे। श्री साव ह किहीन कि ए मामला के न्यायिक जांच कराय जाही। अउ दोषी मनके खिलाफ कड़ा कार्रवाई करे जाही।
इही बीच, अमृतकाल छत्तीसगढ़ विजन दू हजार सैंतालीस डॉक्यूमेंट बर बनाय गे स्टेरिंग कमेटी के दूसरा बइठका राज्य नीति आयोग के उपाध्यक्ष अजय सिंह अउ मुख्य सचिव अमिताभ जैन के सह अध्यक्षता म राज्य नीति आयोग म होइस। बइठका म छत्तीसगढ़ विजन दू हजार सैंतालीस डॉक्यूमेंट तियार करे के बारे म गोठबात होइस।
पद्मश्री-हेमचंद मांझी
राज्य सरकार ह पद्मश्री पुरूस्कार ले सम्मानित नारायणपुर के रहवइया हेमचंद मांझी ल माओवादी डहार ले कथित रूप ले धमकी दे जाय के बाद राज्य सरकार डहार ले ओमन ल वाय श्रेणी के सुरक्षा दे गेहे। ए बारे म गृह मंत्रालय ह आदेस जारी कर देहे। जानबा के मुताबिक राज्य शासन ह प्रोटेक्सन रिव्यू ग्रूप के बइठका म हेमचंद मांझी ल सुरक्षा श्रेणी दे जाय के अनुसंसा करे रिहीन। जेखर बाद ये आदेस जारी करे गेहे।
नारायणपुर जिला म छोटेडोंगर के रहवइया वैद्य हेमचंद मांझी पारम्परिक चिकित्सा पद्धति ले लोगन मनके इलाज करथे। चिकित्सा के क्षेत्र म उंखर बढ़िया योगदान बर पाछु बाइस अप्रैल के राष्ट्रपति द्रौपदी मूर्मू ह ओमन ल पद्मश्री ले सम्मानित करीन।
बेमेतरा बारूद-विस्फोट
बेमेतरा जिला के पिरदा म स्पेसल ब्लास्ट लिमिटेड फैक्ट्री म पाछु पच्चीस मई के होय ब्लास्ट के बाद आठ झिन लोगन लापता होय रिहीन। जिला के कलेक्टर रणवीर शर्मा ह बतइन कि सेना के टेक्नीकल टीम के निगरानी म घटना स्थल ले मलबा हटाय के काम पूरा हो गेहे। मउका ले मानव अंग मनके अवशेस मिले हे ए अवशेस मन ल डीएनए टेस्ट बर भेजे जाही।
इही बीच, कंपनी प्रबंधन कोति ले मृतक के परिवार मन ल पांच-पांच लाख रूपिया के सहायता रासि देके घोसना करे गेहे।
सौम्या-चौरसिया मामला
कोयला घोटाला अउ मनी लॉड्रिंग के केस म जेल म बंद पूर्व मुख्यमंत्री की उपसचिव सौम्या चौरसिया ल हाईकोर्ट ले अंतरिम राहत नइ मिल पाय हे। जमानत अर्जी उपर हाईकोर्ट ह ईडी ले जवाब मांगे हे। मामला के सुनवाई न्यायाधिस एन.के व्यास के बेंच म होइस। मामला के अगला सुनवाई दस जून के बाद होही। जानबा के मुताबिक कथित कोयला घोटाला मामला म सौम्या चौरसिया ल मनी लॉड्रिंग के केस म ईडी ह दू दिसंबर दू हजार बाइस के गिरप्तार करे रिहीन। जेखर बाद ले सौम्या चौरसिया ह रइपुर के सेंट्रल जेल म बंद हे।
राज्यपाल-छत्तीसगढ़ी भाषा सदस्य मुलाकात
राज्यपाल विश्वभूषण हरिचंदन ले आज राजभवन म छत्तीसगढ़ी भाषा छात्र विकास समिति के अध्यक्ष रितुराज साहू के अगुवई म समिति के सदस्य मन ह मिलीन। ओमन ह राज्यपाल ल राज्य राज्य म शिक्षा, शासकीय कामकाज अउ रोजगार के क्षेत्र म छत्तीसगढ़ी भाष के परयोग ल बढ़ावा देके बारे म ज्ञापन सौंपीन।
शाला प्रवेश-उत्सव
प्रदेस म साला प्रवेस उत्सव के आयोजन अट्ठारा जून ले करे जाही। इही कड़ी म गौरेला-पेण्ड्रा-मरवाही जिला के कलेक्टर लीना कमलेश मंडावी ह साला प्रवेस उत्सव के सुरवाती तियारी अउ प्रचार-प्रसार के निरदेस जिला शिक्षा अधिकरी अउ एखर ले जुड़े विभाग मन ल देहे।
कलेक्टर ह साला प्रवेस उत्सव सुरू होय के पहिली भवन अउ कक्षा मनके साफ-सफई के संगेसंग मरम्मत करे के घलो निरदेस देहे।
यूपीएससी-मॉक टेस्ट
यूपीएससी दू हजार चोबीस बर राखे गे निसुल्क मॉक टेस्ट म पढ़हइया छात्र मन ह बढ़ चढ़ के भाग लीन। रईपुर के संगेसंग आने-आने जिला के छात्र मन ह घलो ये टेस्ट म भाग लीन। पढ़हइया छात्र मनके कहना हे कि अइसन आयोजन ले पढ़हइया प्रतिभागी मन ल आगू बढ़े म मदद मिलही। जानबा के मुताबिक ये मॉक टेस्ट ऑफलाइन होइस, जेमा दू सौ अट्ठारा प्रतिभागी मन ह पंजीयन कराय रिहीन। ये टेस्ट के प्रश्नपत्र हिन्दी अउ अंग्रेजी दूनों भाषा म होइस।
दुर्घटना
कोरिया जिला के धौराटिकरा मोड़ के तीर मजूर मन ले भरे एक ठिन पिकअप ह पलट गे। ए गाड़ी म तीस झिन मजूर मन बइठे रिहीन। जानबा के मुताबिक गांव ग्राम सोस ले मजूर मन ल लाय जात रिहीस। घटना म गाड़ी म बइठे लोगन मन ल थोर बहुत चोट आय हे।
जानबा के मुताबिक राज्य सरकार डहार ले कबीरधाम म होय सड़क दुर्घटना के बाद यात्री मन ल मालवाहक गाड़ी म लाय ले जाय उपर सरलग कार्रवाई करे जात हे। रइपुर म घलो अइसन गाड़ी मन ऊपर जांच के बाद कार्रवाई करे जात हे। जांच अधिकारी के मुताबिक इक्कीस मई ले सुरू होय ए जांच अभियान म अब तक पच्चीस ले जादा गाड़ी मन उपर कार्रवाई करे जा चुके हे।
बैंक-चोरी
जांजगीर-चांपा जिला के बलौदा के जर्वे गांव के ग्रामीण बैंक म चोरी के घटना आगू आय हे। अज्ञात चोर मन ह बैंक के कम्प्यूटर ल चोरा लेहे। चोरी करत बेरा चोर मन ह सी.सी.टीवी के केबल ल काट दिन। जेखर बाद दरवाजा के ताला तोड़ के बैंक के अंदर घुसीन पुलिस के टीम ह जांच म जुट गेहे।
ऐति, राजनांदगांव जिला के गांव चिचोला के तीर एक ठिन पेट्रोल पंप के मैनेजर ले चउदा लाख रूपिया के लूट होगे।
जानबा के मुताबिक आरोपी मन ह मैनेजर के संग मारपीट घलो करीन। घटना वाले जघा ले सी.सी.टीवी फुटेज म एक ठिन सफेद कार दिखत हे। पुलिस ह नाकाबंदी करके आरोपी मनके खोजबीन सुरू कर देहे। उंहे, आइजी दीपक झा ह पूरा मामला के बारिकी ले जांच करे के निरदेस देहे।
हत्या-चक्काजाम
बलरामपुर जिला के गांव डुमरखी के जंगल म दू झिन मनखे के शव मिले हे, पुलिस के मुताबिक ये दूनों शव ल जलाय के परयास करे गेहे। पुलिस मामला के जांचव करत हे। ऐती, ये दोहरा हत्याकांड के विरोध म बजरंग दल के अगुवई म लोगन मन ह बलरामपुर के रद्दा म चक्काजाम करीन। राष्ट्रीय राजमार्ग क्रमांक-तीन सौ तिरालीस म चक्काजाम के बाद दूनों कोति गाड़ी मनके लम्बा कतार लग गे बाद म प्रशासन के समझाय के बाद चक्काजाम ल हटाय गीस।
अउ अब मौसम के हाल…
प्रदेस म ए बेरा चरचरावत गर्मी पड़त हे, मौसम विभाग के मुताबिक अवइया तीन दिन तक प्रदेस के मध्य छत्तीसगढ़ म जोरदरहा गर्मी पड़े के संभावना हे। उत्तर-पश्चिम ले अवइया गरम अउ शुष्क हवा के सेती प्रदेस के तापमान म सरलग बढ़ोतरी होवत हे।
काली अट्ठाईस मई के गौरेला-पेण्ड्रा-मरवाही, बिलासपुर, मुंगेली, रईपुर, दुरूग, राजनांदगांव, मोहला-मानपुर, खैरागढ़, बालोद, बेमेतरा अउ कबीरधाम जिला के कोनों-कोनों जघा म लू चले के चेतावनी दे गेहे।
जानबा के मुताबिक काली इतवार के प्रदेस के सबले जादा तापमान बेमेतरा जिला म चौंवालीस दशमलव एक डिग्री सेल्सियस रिकार्ड करे गीस।
अउ अब थोरकुन समाचार सार म –
– आयुष्मान भारत प्रधानमंत्री जन आरोग्य योजना के तहत छुटे जम्मों हितग्राही मनके आयुष्मान कारड बनाय बर उन्तीस अउ तीस मई के दू दिन के महाअभियान के आयोजन बस्तर जिला के जम्मों ग्राम पंचायत मन म करे जाही।
– जांजगीर-चांपा के महुदा गांव स्थित हसदेव नदी म बुड़े एक झिन मनखे के अब तक पता नई चल पाय हे। गोताखोर मनके मदद ले एसडीआरएफ के टीम ह युवक ल खोजत हे।
अउ
– जांजगीर के अकलतरा के तरौद म स्थित महानदी पावर प्लांट म मजूर यूनियन मन ह हड़ताल कर दिन। मजदूर मनके पांच सूत्रीय मांग ल लेके ए हड़ताल करे जात हे।