उहें, नेता प्रतिपक्ष चरणदास महंत ह घटना उपर दुख जतावत उच्च स्तरीय जांच अउ पीड़ित मन ल उचित मुआवजा देय के राज्य सरकार ले मांग करिन हें।
कांग्रेस-पत्रकारवार्ता
बीजापुर के पीडिया म सुरक्षाबल अउ माओवादी मनके बीच होय मुठभेड़ उपर कांग्रेस पार्टी ह आज पत्रकारवार्ता के आयोजन करिस। जेला संबोधित करत प्रदेस कांग्रेस अध्यक्ष दीपक बैज ह ए घटना के जांच हाईकोर्ट के जज के निगरानी म कराय के मांग करिन हें। कांग्रेस ह ग्रामीन के हवाला ले दावा करे हे कि मारे गेय सबो लोगन नक्सली नइ रिहिन, उहें, पुलिस के दावा रिहिस कि ओमन सबो झन नक्सली रिहिन। ग्रामीन मनके दावा के बाद प्रदेस कांग्रेस ह एक ठन जांच दल के गठन घलो करे रिहिस। जांच दल के संयोजक संतराम नेताम ल बनाय गिस। उहें, विधायक इंद्रशाह मंडावी, विक्रम मंडावी, जनकलाल धु्रव, सावित्री मंडावी, रजनू नेताम, शंकर कुडियम अउ छविन्द्र कर्मा दल के सदस्य रिहिन।
बतादन कि दस मई बछर दू हजार चौबीस के बीजापुर के पीडिया म होय मुठभेड़ म बारह लोगन के मउत अउ छै लोगन घायल होय रिहिन। उहें, झीरम के माओवादी घटना उपर दीपक बैज ह किहिन कि ए घटना म राजनीतिक षडयंत्र के दिसा म कोनो जांच नइ होइस। ओमन आरोप लगाइन कि न्यायिक जांच आयोग के कार्यकाल ल जब कांग्रेस सरकार ह बढ़ाइस अउ जांच के दायरा म घटना के षडयंत्र ल जोरिस तब तत्कालीन नेता प्रतिपक्ष धरमलाल कौशिक ह हाईकोर्ट ले स्टे लेके आ गिस।
माओवादी-आत्मसमर्पण/मुठभेड़
बीजापुर जिला म तैंतीस झन माओवादी मन आत्मसमर्पण कर देइन। ए सबो माओवादी गंगालूर एरिया कमेटी के आरपीसी पुसनार, डुमरीपालनार म रहिके दुगोली, करका अउ हिरोली म माओवादी संगठन के आने-आने पद म सक्रिय रिहीन। जिला के पुलिस अधीक्षक अउ सीआरपीएफ के डीआईजी समेत पुलिस अधिकारी मनके आगू म माओवादी मन आत्मसमर्पण करिन हें। जेमा ले तीन झन माओवादी मन उपर पांच-पांच लाख रूपिया के इनाम रिहिस। एमा कतकोन झन माओवादी बड़का नक्सल घटना म सामिल रिहिन। आत्समर्पित माओवादी मन ल राज्य सरकार डहार ले पुनर्वास नीति के तहत पचीस-पचीस हजार रूपिया के प्रोत्साहन रासि दे गिस। उहें, सुकमा जिला के कोंटा के किद्रेलपाड़ इलाका म सुरक्षाबल अउ माओवादी मनके बीच मुठभेड़ होइस। पुलिस ह ए मुठभेड़ म कतकोन माओवादी मनके घायल होय के दावा करे हे।ओति, बीजापुर जिला के मिरतुर थाना क्षेत्र के जप्पेमरका अउ कमकानार के जंगल म घलो सुरक्षाबल अउ माओवादी मनके मुठभेड़ होइस। जेखर बाद जवान मन घटनास्थल के तलासी लेवत हें।
मतगणना तैयारी-दौरा
देसभर समेत कोंडागांव म घलो चार जून के होवइया मतगणना के तियारी जोरसोर ले चलत हे। अतिरिक्त मुख्य निर्वाचन पदाधिकारी निलेश कुमार महादेव क्षीरसागर ह कोंडागांव के सहीद गुण्डाधुर शासकीय स्नातकोत्तर महाविद्यालय म मतगणना केंद्र के निरीक्षण करिन। ए बेरा ओमन विधानसभावार मतगणना कक्ष, उम्मीदवार अउ गणना अभिकर्ता मनके बइठक बेवस्था, प्रवेस पास, सीसीटीवी कैमरा समेत आने बेवस्था मन के जानकारी लिन। उंखर संग जिला निर्वाचन अधिकारी अउ कलेक्टर कुणाल दुदावत समेत कतकोन अधिकारी मौजूद रिहिन।
आरटीई-राशि भुगतान
राज्य सरकार ह निजी स्कूल मन ल निसुल्क अउ अनिवार्य बाल सिक्षा अधिकार अधिनियम-आरटीई के तहत बछर 2022-23 बर एक सौ चौंतीस करोड़ तीस लाख रूपिया ले जादा के रासि जारी कर देहे। उहें, बांचे रासि करीबन सत्तर करोड़ रूपिया के भुगतान के कार्यवाही प्रक्रिया म हे। लोक सिक्षण संचालनालय ह किहिस कि स्कूल मन डहार ले बेरा म दावा आपत्ति करे के बाद सुल्क रासि के भुगतान करे जाही।
लोक शिक्षण संचालनालय ह स्पष्ट कर देय हे कि आरटीई के तहत निजी स्कूल मन ल सुल्क के करीबन 285 करोड़ रूपिया के रासि लंबित होय के समाचार गलत हे।
गौवंश अभ्यारण्य योजना
सड़क रद्दा म खुल्ला किंजरत गाय-गरू के सुरक्षा अउ दुर्घटना उपर रोक लगाय बर राज्य सरकार ह प्रदेस म गोवंश अभ्यारण्य योजना लानही। मुख्यमंत्री विष्णुदेव साय ह अधिकारी मन ल एखर सेति कार्ययोजना बनाय के निरदेस देइन हें।
राज्य म पसुधन विकास विभाग, पंचायत, राजस्व अउ वन विभाग के समन्वय ले गोवंश अभ्यारण्य संचालित करे के योजना हे। एखर ले सड़क-रद्दा म भूखे-प्यासे भटकइया गोवंश ल रोज्जे न सिरिफ चारा मिल सकही, भलूक उंखर देखभाल घलो बने ढंग ले होही।
जैविक खेती-कार्यशाला
जैविक खेती के जागरूकता बर शाक वाटिका कार्यसाला के आयोजन काली राजधानी रइपुर म करे जाही। ए कार्यसाला म घर के बारी अउ छत म साग-भाजी उगाय के जानकारी देय जाही। ए प्रसिक्षण मुफत म होही, जेखर बर पहिली ले पंजीयन कराना होही। ए कार्यसाला म केंद्रीय प्रसिक्षण परमुख के.ई.एन. राघवन मौजूद रइहीं।
हेलमेट बैंक
बिलासपुर पुलिस ह सड़क दुर्घटना म होवइया मउत के सेति चकरभाठा थाना म प्रदेस के पहिली हेलमेट बैंक के सुरूआत करे हे। ए मउका म पुलिस अध्अधीक्षक ह किहिन कि अब कोनो घलो मनखे यात्रा के बेरा ए बैंक म अपन परिचय पत्र देखाके हेलमेट ले सकत हे, अउ हेलमेट ल चौबीस घंटा के भीतर लहूटाना होही। जेखर बर ओमन ले कोनो सुल्क नइ ले जाही।
यूपीएससी-मॉक टेस्ट
रइपुर जिला प्रशासन के डहार ले संघ लोकसेवा आयोग माने यूपीएससी के प्रारंभिक परीक्षा-2024 बर काली निसुल्क मॉक टेस्ट के आयोजन करे जाही। एखर बर 485 प्रतिभागी मन पंजीयन कराय हें। ए परीक्षा दू पारी म होही। युवा मन ल वास्तविक परीक्षा के अनुभव कराय बर ऑनलाइन के जघा ऑफलाइन मॉक टेस्ट ले जावत हे। एखर प्रश्नप्रत्र हिन्दी अउ अंग्रेजी भाषा म होही। जिला प्रशासन डहार ले मॉक टेस्ट के बाद प्रश्न के विस्तार ले उत्तर दे जाही। संगे पहिली तीन स्थान पवइया प्रतिभागी मन ल इनाम घलो दे जाही।