छत्तीसगढ़ उच्च न्यायालय ह कबीरधाम म होय सड़क हादसा म उन्नीस झिन आदिवासी मनके मउत के मामला ल जनहित याचिका के रूप म स्वतः संज्ञान म लेके आज प्रारंभिक सुनवाई करीस। मुख्य न्यायाधीश के डिवीजन बेंच ह प्रकरण के सुनवाई करत राज्य शासन, राष्ट्रीय राजमार्ग, परिवहन विभाग अउ कलेक्टर समेत जम्मों पक्षकार मन ले सपथ पत्र म जवाब मांगिन हे। उच्च न्यायालय ह राज्य सरकार समेत जम्मों पक्षकार मन ले सपथ पत्र म बताय बर किहीन कि ओमन सड़क हादसा रोके बर का उपाय करत हे। संघरा सुप्रीम कोर्ट डहार ले जारी गाइड लाइन म राज्य सरकार डहार ले करे गे कार्रवाई के रिपोर्ट घलो मांगे गेहे। मामला के अगला सुनवाई छब्बीस जून के होही।
बतादन कि कबीरधाम जिला के कुकदुर थाना क्षेत्र म होय सड़क दुर्घटना म उन्नीस लोगन मनके मउत होगे रिहीस। एमा अट्ठारा महिला सामिल रिहीन।
अपर मुख्य सचिव-दौरा
स्वास्थ्य विभाग के अपर मुख्य सचिव मनोज पिंगुआ ह गौरेला-पेण्ड्रा-मरवाही के जिला चिकित्सालय के निरीक्षण करीन अउ स्वास्थ्य सुविधा मनके जानकारी लीन। ओमन दवई मनके भंडारण अउ वितरण के अवलोकन करीन। श्री पिंगुआ ह दवई मनके एक्सपायरी डेट के तीन-चार महिना पहिली ही ओला बांटे बर किहीन।
अपन मुख्य सचिव ह हमर लैब समेत आने-आने बीमारी मनके जांच बर जरूरी मसीन मनके नियमित रख-रखाव करे के निरदेस दीन। ओमन ओपीडी बर मोबाइल ले क्यूआर कोड स्कैन करके सक्षम ऐप के माध्यम ले पंजीयन कराय के प्रक्रिया के अवलोकन घलो करीन। ओमन आयुष्मान कार्डधारी मरीज मन ल निसुल्क चिकित्सा सुविधा देवाय के निरदेस दीन। श्री पिंगुआ ह नवा जिला चिकित्सालय भवन निर्माण के संबंध म घलो जानकारी लीन।
उहें, अपर मुख्य सचिव मनोज पिंगुआ ह पेण्ड्रा विकास खंड के प्राथमिक स्वास्थ्य केंद्र कोटमी के घलो निरीक्षण करके स्वास्थ्य सुविधा मनके जानकारी लीन।
माओवादी आत्मसमर्पण/मुठभेड़
दंतेवाड़ा जिला म आज एक झन महिला समेत तीन माओवादी मन आत्मसमर्पण करे हे। ए माओवादी मन बस्तर रेंज के पुलिस महानिरीक्षक सुन्दरराज पी, दंतेवाड़ा के पुलिस उप महानिरीक्षक रेंज कमलोचन कश्यप, सीआरपीएफ के उप महानिरीक्षक विकास कठेरिया अउ पुलिस अधीक्षक गौरव राय के आगू आत्मसमर्पण करीन हे। आत्मसमर्पित जम्मों माओवादी मलांगेर एरिया कमेटी म सक्रिय रिहीन। ए तीनों माओवादी मन उपर सड़क खोदे अउ बैनर पोस्टर लगाय के संघरा दूसर माओवादी गतिविधि मन म सामिल रहय के आरोप हे।
आत्मसमर्पित माओवादी मन ल राज्य सरकार के पुनर्वास योजना के तहत पचीस-पचीस हजार रूपिया प्रोत्साहन रासि अउ जम्मों प्रकार के लाभ दे जाही।
बतादन कि जिला म लोन वर्राटू अभियान के तहत अब तक एक सौ अस्सी ईनामी माओवादी समेत कुल आठ सौ पांच माओवादी मन आत्मसमर्पण करे हे।
इही बीच, नारायणपुर-दंतेवाड़ा-बस्तर जिला के सीमा म काली होय मुठभेड़ के बाद पुलिस जवान मनके लहुटे के दौरान माओवादी मन संग एक घांव अउ मुठभेड़ होइस, जेमा एक झन अउ माओवादी मारे गीस। एखर सव बरामद कर ले गेहे। बतादन कि ए मुठभेड़ म अब तक आठ वर्दीधारी माओवादी मारे गेहे, जेखर सव बरामद कर ले गेहे।
क्रिप्टो करेंसी-आरोपी गिरफ्तार
सक्ति जिला के फगुरम चौकी पुलिस ह क्रिप्टो करेंसी म रूपिया ल तीन गुना करे के लालच देके दू लाख पैंतालिस हजार रूपिया के धोखाधड़ी करइया एक झन आरोपी ल बलरामपुर जिला ले गिरफ्तार करे हे। एखर खिलाफ आईपीसी के धारा चार सौ बीस के तहत अपराध दरज करे गेहे। आरोपी करा ले एक ठिन मोबाइल अउ धोखाधड़ी के बांचे पैंसठ हजार रूपिया ल जब्ती करके पुलिस ह ओला न्यायिक रिमांड म जेल भेज देहे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत वन क्षेत्र म आगजनी के कारण अउ ओखर रोकथाम उपर मुख्यवन संरक्षक सतर्कता वी.पी. सिंह ले लेगे भेंटवार्ता प्रसारित करे जाही। एखर प्रसारण आकाशवाणी केन्द्र रायपुर डहार ले काली पचीस मई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
वाहन जांच-जुर्माना
सड़क दुर्घटना मन म कमी लाय बर प्रदेस भर म यातायात जागरूकता संबंधित अभियान चलाय जात हे। उहें, ओवरलोड गाड़ी मनके जांच करे जात हे। इही कड़ी म राजनांदगांव पुलिस ह पाछू रतिहा सहरी अउ ग्रामीण क्षेत्र मन म गाड़ी मनके जांच करीस। ए दौरान बिना लाइसेंस, सराब पीके वाहन चलाय, कागजात पेस नइ करइया वाला अउ तीन सवारी समेत यातायात नियम के पालन नइ करइया वाले सतासी चालक मनके खिलाफ कार्रवाई करके जुर्माना वसूल करे गीस।
खदान ब्लास्टिंग-रोक
जांजगीर-चांपा जिला के बिरगहनी के छह अउ देवरहा के दू खदान मन उपर ब्लास्टिंग म रोक लगा दे हे। एखर ले आसपास के घर म दरार आय के सिकायत मिले रिहीस। हैवी ब्लास्टिंग के सिकायत के बाद रायगढ़ के खान सुरक्षा के निदेशक ह एक कार्रवाई करीन हे। ओमन करीबन एक महिना पहिली खदान के जांच करे बर उंहा पहुंचे रिहीन।
दुर्घटना
जांजगीर-चांपा जिला के नगपुरा-जावलपुर म एक ट्रेलर के चपेट म आय ले युवक के मउकच म मौत होगे। ए घटना ले गुस्साय लोगन मन उहां चक्का जाम कर दीन, जेखर सेति जांजगीर-बलौदा रद्दा उपर गाड़ी मनके अवई-जवई प्रभावित होइस। पुलिस घटना स्थल म पहुच के जांच करत हे। उहें, गौरेल-पेण्ड्रा-मरवाही जिला के ग्राम भाड़ी म घलो ट्रेलर के टक्कर ले एक युवक के मउकच म मौत होगे।
महिला-मौत
सक्ति जिला के नगरदा थाना क्षेत्र के दमऊधारा के जलकुंड म असनान्दे के दउरान डूबे ले एक महिला के मौत होगे। एखर बाद रेस्क्यू टीम के मदद ले महिला के सव ल बाहिर निकाले गीस। पुलिस ह मामला दरज करे हे, अउ सव के पोस्टमार्टम कराके परिजन मन ल सौंप देहे।
रेलवे समपार फाटक
रईपुर रेल मंडल के समपार फाटक, आर.व्ही.एच-मंदिरहसौद म रेलवे ट्रैक के मरम्मत के काम इकतीस मई ले एक जून तक करे जाही। ए सेति एक जून मंझनिया बारह बजे तक समपार फाटक ले गाड़ी मनके अवई-जवई बंद रिही।
उहें, रईपुर रेल मंडल के लखौली स्थित रेलवे समपार फाटक पलौद म रेलवे ट्रैक के मरम्मत के काम तीन जून ले चार जून मंझनिया बारह बजे तक करे जाही। ए दउरान समपार फाटक ले गाड़ी मनके अवई-जवई बंद रइही।
राष्ट्रीय फुटबॉल प्रतियोगिता
नारायणपुर के रामकृष्ण मिसन आश्रम म खेले गे अंडर-ट्वेंटी राष्ट्रीय फुटबॉल प्रतियोगिता के खिताब दिल्ली ह जीत लेहे। पाछू बाईस मई के दिल्ली अउ कर्नाटक के बीच फाइनल मुकाबला खेले गे रिहीस, जेमा दूनों टीम तीन-तीन गोल के बराबरी म रिहीस। एखर बाद पेनाल्टी सूटआउट म दिल्ली ह कर्नाटक ल तीन के मुकाबला चार गोल ले हराके खिताब म कब्जा जमाइन। खबर के मुताबिक, नारायणपुर म खेले गे अंडर-ट्वेंटी राष्ट्रीय फुटबॉल प्रतियोगिता म देसभर के बत्तीस टीम मन ह भाग ले रिहीन।
अउ अब मौसम के हाल…
दक्षिण-पश्चिम मानसून के आगू बढ़े बर अनुकूल परिस्थिति बने हे। मानसून मालदीव के कुछ भाग अउ कोमोरिन क्षेत्र, दक्षिण बंगाल के खाड़ी, अण्डमान अउ निकोबार द्वीप, अण्डमान सागर अउ पूर्व मध्य बंगाल के खाड़ी के कुछ भाग तक आज पहुंच गेहे।
मौसम विभाग के अनुसार एक द्रोणिका दक्षिण-पश्चिम राजस्थान ले छत्तीसगढ़ तक बगरे हे। उहें, एक चक्रीय-चक्रवाती घेरा उत्तर-पूर्व मध्य प्रदेस के उपर बने हे। एखर असर ले प्रदेस म काली एक-दू जघा म हल्का बरसा होय या गरज-चमक के संग छींटा पड़े के संभावना हे। उहें, एक-दू जघा म हवा गरेर चले अउ गाज गिरे के आसंका हे।