माओवादी घटना म लगाम लगाय अउ नक्सल प्रभावित क्षेत्र मन म विकास कार्य कराय बर राज्य सरकार लगातार प्रयास करत हे। माओवादी मन ल समाज के मुख्यधारा ले जोड़े बर पुनर्वास नीति घलो चलाय जावत हे। ए संदर्भ म राज्य सरकार डहार ले पुनर्वास नीति म सुझाव बर एक मेल आईडी अउ गूगल फॉर्म जारी करे गेहे। ए फार्म के जरिया ले उप मुख्यमंत्री विजय शर्मा ह माओवादी मन ले अनुरोध करे हे कि ओमन ह बताय कि उंखर पुनर्वास नीति म का प्रावधान होना चाही।
जानबा के मुताबिक राज्य सरकार के पुनर्वास नीति ले प्रभावित होके पाछु कुछ दिन म बस्तर संभाग म बड़ संख्या म माओवादी मन ह आत्मसमर्पण करे हे।
दुर्घटना
प्रदेस म पाछु चौबीस घंटा के दउरान होय अलग-अलग सड़क हादसा म तीन लोगन के मउत होगीस। फेर, चार आने लोगन घायल होगे हे।
भिलाई के अहिवारा म मॉर्निंग वॉक म निकले एक दंपत्ति ल ट्रैक्टर ह अपन चपेट म ले लीस, जेखर ले माईलोगिन के मउका म ही मउत होगीस। उहें, ओखर पति ह गंभीर रूप ले घायल होगे, जेखर इलाज चलत हे। जानबा के मुताबिक ट्रैक्टर चालक एक ट्रैक्टर म दू ट्रॉली लगाके ले जावत रिहीस, तभे एक ट्रॉली खुल गीस अउ पति-पत्नी उंखर चपेट म आ गीस। सूचना मिले म नंदिनी थाना के पुलिस मउका म पहुंचीस अउ ट्रैक्टर चलइया ल गिरफ्तार कर लीस।
उहें, खैरागढ़-छुईखदान-गंडई जिला के सोनेसरा वार्ड म बिहनिया टहले बर निकले एक बुजुर्ग ल अज्ञात गाड़ी ह ठोकर मार दीस, जेखर ले ओखर मउका म ही मउत होगे।
जांजगीर-चांपा जिला के भिलाई गांव म अज्ञात गाड़ी के चपेट म आय ले मोटर सायकल सवार एक मनखे के मउका म ही मउत होगीस। ए युवक कोरबा जिला के धतूरा गांव के रहवइया रिहीस।
ऐति, बलरामपुर जिला के दलधोवा गांव म राष्ट्रीय राजमार्ग क्रमांक-तीन सौ तिरालीस म ट्रक अउ पिकअप गाड़ी म टक्कर होगीस। ए हादसा म पिकअप म सवार तीन लोगन गंभीर रूप ले घायल होगे। घटना के सूचना मिले म हाइवे पेट्रोलिंग के टीम मउका म पहुंचीस अउ घायल मन ल जिला अस्पताल पहुंचईस।
कवर्धा हादसा-हाईकोर्ट
छत्तीसगढ़ उच्च न्यायालय ह कबीरधाम जिला के कुकदूर थाना क्षेत्र के बाहपानी गांव म दू दिन पहिली होय सड़क हादसा म उन्नीस आदिवासी मनके मउत के मामला ल संज्ञान म लेहे। मुख्य न्यायाधीश रमेश सिन्हा के डिवीजन बेंच ह एला जनहित याचिका मानके राज्य सरकार ले जवाब मांगे हे। ए मामला के सुनवाई चौबीस मई के होही।
इही बीच, मृतक मनके परिजन मन ले मिले बर कांग्रेस ह नौ सदस्यीय प्रतिनिधिमंडल के गठन करे हे। एखर संयोजक डोंगरगांव विधायक दुलेश्वर साहू ल बनाय गेहे। इही सप्ताह नेता मनके दल मृतक मनके परिजन मन ले गांव जाके मुलाकात करही।
आरटीई-सर्वें
शिक्षा के अधिकार अधिनियम-आरटीई म प्रवेस लेके बाद लइका मनके ड्राप आउट के सही कारण के पता लगाय बर राज्य सरकार ह सर्वें करे के फैसला करे हे। ए सर्वें सरकारी स्कूल के सिक्षक मनके माध्यम ले कराय जाही। हर सिक्षक ल आरटीई म ड्राप आउट होय लइका मनके पालक मनके मोबाइल नंबर दे जाही। सिक्षक, पालक मन ले बात करके पता लगाही कि लइका स्कूल काबर नइ जावत हे। एखर बर पारिवारिक कारण जिम्मेदार हे या स्कूल प्रबंधन।
एक दिन पहिली ही स्कूल सिक्षा सचिव सिद्धार्थ कोमल परदेशी ह प्रदेश के सबो कलेक्टर मन ल पत्र जारी करके आरटीई के लइका मनके ड्राप आउट म रिपोर्ट मांगे हे।
जानबा के मुताबिक प्रदेस म आरटीई के तहत हर बछर हजारों गरीब परिवार के लइका मनके निजी स्कूल म दाखिला होथे। ए लइका मनके पढ़ाई के खर्च सरकार वहन करथे, एखर बावजूद ज्यादातर लइका एक या दू बछर म पढ़ाई छोड़ देथे।
समर कैम्प
गर्मी के छुट्टी के दउरान लइका मन ल रचनात्मक गतिविधि ले जोड़े बर प्रदेसभर के स्कूल म समर कैम्प चलाय जात हे। एखर तहत रायगढ़ जिला प्रशासन डहार ले सौ ले जादा स्कूली लइका मन ल स्टील प्लांट अउ पावर प्लांट के शैक्षणिक भ्रमण कराय गीस। भ्रमण के दउरान स्कूली लइका मन ल स्टील उत्पादन ले जुड़े जानकारी दे गीस।
नीट परीक्षा-हाईकोर्ट
राष्ट्रीय पात्रता प्रवेश परीक्षा-नीट के प्रश्न पत्र के गलत सेट बांटे जाय के मामला म छत्तीसगढ़ उच्च न्यायालय ह सुनवाई करत राष्ट्रीय परीक्षा एजेंसी-एनटीए ले जवाब मांगे हे। ए मामला के अगला सुनवाई चौबीस मई के होही।
जानबा के मुताबिक नीट के परीक्षा बर देसभर संग बालोद जिला के एक स्कूल म घलो परीक्षा केन्द्र बनाय गे रिहीस। परीक्षा के दिन दोपहर दू बजे प्रश्न पत्र के पहिली सेट बांटे गे रिहीस, जेन सही नइ रिहीस। केन्द्र ल जब अपन गलती के एहसास होइस कि गलत प्रश्न पत्र बांट दे गेहे, त चालीस-पचास मिनट बाद प्रश्न पत्र के एक अउ सेट फेर बांटे गीस। प्रश्न पत्र के दूसर सेट म ओएमआर सीट के एक अलग सेट जुड़े रिहीस, जेला उम्मीदवार मन ल दुबारा भरना रिहीस, जेमा उंखर समय खराब होगीस। उहें, परीक्षार्थी मन ल जादा समय घलो नइ दे गीस।
जवान-घायल
नारायणपुर जिला म दुर्घटनावश गोली चले ले भारत-तिब्बत सीमा पुलिस बल-आईटीबीपी के एक जवान घायल होगे हे। जवान के हालत नाजुक होय के कारण ओला रायपुर रिफर करे गीस, जेखर बाद चॉपर के मदद ले जवान ल रायपुर लाय गीस।
जिला के अतिरिक्त पुलिस अधीक्षक राबिंसन गुरिया ह ए घटना के पुष्टि करे हे। ओमन ह बतईन कि घायल जवान आईटीबीपी के तिरपनावां बटालियन के हे, जउन केरल के कोल्लम जिला के रहवइया हे।
रेलवे जागरूकता अभियान
समपार फाटक म होवइया दुर्घटना ल रोके बर बिलासपुर रेलमंडल डहार ले आम नागरिक मन ल जागरूक करे के उद्देश्य ले अभियान चलाय जात हे। संरक्षा विभाग के सलाहकार अउ नागरिक सुरक्षा निरीक्षक मन डहार ले बिलासपुर के अमेरी फाटक म पाम्पलेट बांट के आम लोगन मन ल सुरक्षित फाटक पार करे के जानकारी दे गीस। ए दउरान पैदल अवइया-जवइया लोगन, मोटर सायकल चलइया, ट्रक अउ डंपर चलइया मन ल सावधानी बरते के निरदेस दे गीस। उहें, सेल्फी लेके कारण बाढ़त दुर्घटना बर लोगन मन ले रेल पटरी म सेल्फी नइ लेके अपील घलो करे गीस।
जल जगार उत्सव
जल जगार उत्सव के तहत धमतरी जिला के अंवरी अउ मुल्ले गांव म जल संरक्षण ल लेके लोगन मन ल जागरूक करे बर कार्यक्रम आयोजित करे गीस। ए दउरान जलप्रहरी नीरज वानखेड़े ह लोगन मन ल डेमो के माध्यम ले रैन वाटर हार्वेस्टिंग, रूफटॉप स्ट्रक्चर अउ वेस्ट वाटर हार्वेंस्टिंग तैयार करे के तरीका बतईन। संगेसंग ओमन ह गांव के पुराना हैंडपंप म रिचार्ज स्ट्रक्चर बनाय के विधि के प्रदर्शन करीन। जानबा के मुताबिक जिला म जल जगार उत्सव पन्द्रह जून तक आयोजित करे जाही।
सारंगढ़-बिलाईगढ़/प्राचीन मूर्ति
सारंगढ़-बिलाईगढ़ जिला के गुडीहारी गांव म खेत के जोतई के दउरान प्राचीन मूर्ति मिले हे। सूचना मिले म सरपंच, सचिव अउ जनसंपर्क अधिकारी ह मूर्ति के निरीक्षण करीन। एखर बाद मामला के जानकारी कलेक्टर धर्मेश कुमार साहू ल दे गीस। ओमन ह मूर्ति ल सुरक्षित संग्रहालय म राखे के निरदेस अधिकारी मन ल देहे। किसान मन ह बतईन कि गांव के खेत म एखर पहिली भी मूर्ति निकल चुके हे।
अउ अब पेस हे मौसम के हाल…
प्रदेस म काली एक-दू जघा म हल्का बरसा होय या गरज-चमक के संग छींटा पड़े के संभावना हे। मौसम विभाग के मुताबिक उत्तर पश्चिम राजस्थान ले बांग्लादेश तक एक द्रोणिका के बने ले हवा म लगातार नमी आवत हे। एखर असर ले अवइया चौबीस घंटा के दउरान प्रदेस के कुछ जघा म गरज-चमक के संग अंधड़ चले अउ आकाशीय बिजली गिरे के संभावना हे। फेर प्रदेस के जादा तापमान म कोनों बदलाव होय के आसार नइ हे।
इही बीच, राजधानी रईपुर म आज संझा अचानक मौसम बदलीस अउ जोरदरहा बरसा होइस। उहें, कबीरधाम संग आसपास के क्षेत्र म आज मंझनिया बाद मौसम बदलीस अउ तेज हवा के संग बरसा होइस। एखर ले लोगन मन ल गर्मी ले कुछ राहत मिले हे।