बेमेतरा जिला के सोड़गांव म होय सड़क हादसा म महतारी-बेटा के मउत होगे। बताय जावत हे कि धान लुए बर टेक्टर म सवार होके जावत रिहीन, इही बेरा टेक्टर ट्राली ह इंजन ले अलग होके नहर म जाके गिरगे।
उहें, रायगढ़ जिला के लैलूंगा थाना इलाका म फटफटी सवार तीन झन युवक दुर्घटना के सिकार होगिन। हादसा म तीनों झन युवक के मउका म मउत हो गिस। बताय जावत हे कि कर्राहन गांव के तिर तेज रफ्तार फटफटी के रूख ले टकराय के सेति हादसा होइस।
उहें, बिलासपुर अउ कोरबा के बीच राष्ट्रीय राजमार्ग म रतनपुर के तिर एक ठन तेज रफ्तार गाड़ी ह आने गाड़ी ले टकरागे। हादसा के बेरा गाड़ी म छै लोगन सवार रिहीन हें, जेमा एक झन के मउका म मउत होगे। उहें, सबो घायल मनके इलाज जारी हे।
ऐति, कोंडागांव जिला के दहीकांगा के तिर एक ठन टरक ह फटफटी ल अपन चपेट म ले लिस। ए घटना म फटफटी सवार के मउकच म मउत होगे। उहें, ओखर दू झन लइका घायल होगिन। घटना के बाद पुलिस ह टरक चलइया ल गिरफ्तार कर लिस।
ट्रेन-हादसा
राजधानी रइपुर के उरकुरा स्टेसन के तिर आज बिहनिया शालीमार-लोकमान्य तिलक एक्सप्रेस दुर्घटनग्रस्त होगे। उरकुरा स्टेसन ले गुजरत बेरा एक्सप्रेस के एसी कोच उपर खंभा गिरगे। ए हादसा म दू झन यात्री मन गंभीर रूप ले घायल हो गिन। उहें, आने यात्री मन ल थोरकुन लागे हे। उहें, खंभा हटाय म करीबन एक घंटा के बेरा लागिस। ओखर बाद रेलगाड़ी ल रवाना करे गिस। रइपुर रेलवे स्टेसन पहुंचे के बाद घायल यात्री मन ल अस्पताल पहुंचाय गिस। ऐति, घटना के सूचना मिलतेच रइपुर रेल मंडल प्रबंधक – संजीव कुमार समेत आने अधिकारी मउका म पहुंचिन। फेरहाल हादसा के जांच करे जावत हे।
इही बीच, रेलवे प्रबंधन ह तीन बिंदु उपर स्पष्टीकरण जारी करे हे, जेमा रेलवे बतइस हे कि जउन खंभा एसी कोच उपर गिरे रिहीस। ओ ह रेलवे के नइ रिहीस, ओला छत्तीसगढ़ राज्य विद्युत बोर्ड के डहार ले अवैध रूप ले लगाय गे रिहीस हे, जेमा सुरक्षा के धियान नइ राखे गिस। रेलवे बताइस कि सबो झन घायल मन सुरक्षित हें।
कोरबा-युवक मौत
कोरबा जिला के बुंदेली गांव म कुआं के सफई करे बर उतरे रिहीन दू झन युवक बेहोस हो गिन। घटना के बाद तिर-तखार के लोगन मन पुलिस ल एखर सूचना दिन। जेखर बाद मउका म नगर सेना के रेस्क्यू टीम पहुंचिस अउ दूनों युवक ल कुआं ले बाहिर निकालिन, जेमा ले एक झन के मउत होगे। उहें, दूसर युवक के इलाज चलत हे। बताय जावत हे कि कुआं म जहरीला गैस के सेति युवक के मउत होइस, पुलिस ह घटना के जांच करत हे।
राउंड टेबल इंडिया संस्था-राज्यपाल
काली राजभवन म राज्यपाल विश्वभूषण हरिचंदन ले राउंड टेबल इंडिया संस्था के प्रतिनिधि मन भेंट करिन। ए बेरा ओमन राज्यपाल ल संस्था के कारज ले अवगत कराइन। ओमन राज्यपाल ल बतइन कि राउंड टेबल इंडिया संस्था जम्मो देसभर म पढ़ई ले दूरिहा लकइा मनके सिक्षा ल बढ़िया बनाय खातिर कारज करत हे। संस्था ह जम्मो देस म लइका मन बर 9 हजार ले जादा क्लास रूम बनाय हे। एखर अलावा खेल मैदान घलो बनाय गेहे। उहें, छत्तीसगढ़ के 50 ले जादा स्कूल मन म घलो करीबन अढ़ाई सौ क्लास रूम तइयार करे गे हें।
स्काउट गाइड-पेयजल
बाढ़े गर्मी ल देखत रईपुर रेलमंडल के आने-आने स्टेसन म ठंडा पानी के मुफत बेवस्था करे गेहे। इही कड़ी म डब्ल्यूआरएस रेलवे स्टेसन म भारत स्काउट -गाइड कोति ले यात्री मन ल गर्मी ले बचाय बर ठंडा पानी पियाय जावत हे। डब्ल्यूआरएस स्टेसन म ए सेवाकार्य ह गर्मी भर चालू रइही। एमा भारत स्काउट गाइड दल के प्रसिक्षक मन घलो मदद करत हें।
अवैध राखड़ डंप-कार्रवाई
सक्ती जिला के अकलसरा गांव म अवैध राखड़ डंप के सिकायत उपर प्रसासन ह कार्रवाई करिस। ए मामला म अवैध राखड़ डंप करत दू ठन गाड़ी ल घलो जब्त करे गिस हे। बतादन कि राखड़ ले समस्या होय के बाद परेसान ग्रामीन मन घेरी-बेरी कलेक्टर ले सिकायत करत रिहीन। जेखर बाद कलेक्टर अमृत विकास तोपनो ह तहसीलदार ल जांच के निरदेस दे रिहीस।
अवैध खाद-कार्रवाई
मोहला-मानपुर जिला के कलेक्टर एस. जयवर्धन के निरदेस म कृषि विभाग ह भारी मात्रा म अवैध जैविक खाद ल जब्त करे हे। विभाग के अधिकारी मन ग्राम हर्राटोला म टरक ले दू सौ तैंतालिस कुंटल अवैध जैविक खाद बरामद करिन हें। उहें, ग्राम मेटेपार के व्यावसायिक भवन म घलो अवैध रूप ले भंडारण उपर छापामार कार्रवाई करे गिस।
समर कैम्प
स्कूल सिक्षा विभाग डहार ले गर्मी छुट्टी म प्रदेसभर म समर कैंप के आयोजन करे जावत हे। विभाग के सचिव सिध्दार्थ कोमल सिंह परदेसी के निरदेस म बस्तर, दुरूग, रइपुर, बिलासपुर अउ सरगुजा संभाग म खेल-खेल म लइका मन ल साक्षरता अउ संख्या ज्ञान सिखाय जावत हे। एखर माध्यम ले स्पोकन इंग्लिस, कैलीग्राफी, साइंस मॉडल, हैंडीक्राफ्ट, योगा अउ धियान, पेंटिंग, बांसुरी वादन, नाच-गाना, कठपुतली, मेहंदी, शतरंज, बॉलीबॉल, खो-खो, फुटबॉल अउ कराटा समेत आने-आने विधा ल सामिल करे गेहे। एखर आयोजन बिहनिया सात बजे ले साढ़े नौ बजे तक करे जाथे।
बतादन कि समर कैंप के उद्देस्य लइका मन ल मनोरंजन के संगेसंग प्रतिभा ल उभारना अउ उंखर म आत्मविस्वास ल बढ़ाना हे।
बालिका सशक्तीकरण अभियान
देसभर म आज ले बालिका सशक्तीकरण अभियान सुरू होगे हे। इही कड़ी म भिलाई के एन.एस.पी.सी.एल. संस्थान म घलो ए अभियान के सुरूआत करे गिस। एन.टी.पी.सी. के क्षेत्रीय कार्यकारी निदेसक सी. शिवकुमार ह ए अभियान के उद्घाटन करिन। कारीकरम के अध्यक्षता एन.एस.पी.एल. के महाप्रबंधक सोमनाथ चट्टोपाध्याय ह करिन। ए मउका म ‘‘बालिकाएं सक्षम-राष्ट्र उत्तम सीर्षक ले तइयार करे गे स्मारिका के विमोचन घलो करे गिस।
ए अभियान के तहत चुने गेय आने-आने गांव के 6 ठन स्कूल के बियालिस झन नोनी लइका मन ल सिक्षा, कम्प्यूटर विज्ञान, शारीरिक सिक्षा, योगा, कला अउ सिल्प के परसिक्षण दे जाही। जउन ह एक महीना तक चलही।
प्रवासी पक्षी व्हिंब्रेल
छत्तीसगढ के पक्षी बिसेसज्ञ मन जी.एस.एम. अउ जी.पी.एस. लगे प्रवासी पक्षी व्हिंब्रेल के फोटू खींच के राखिन हें। अइसन पहिली घांव हे जब बेमेतरा के गिधवा परसदा म जी.एस.एम. अउ जी.पी.एस. लगे प्रवासी पक्षी के जानकारी राखे गिस हे। व्हिंब्रेल एक प्रवासी पक्षी हे जउन करीबन 4 ले 6 हजार किलोमीटर के दूरिहा ले छत्तीसगढ़ अमरे हे। व्हिंब्रेल के संरक्षन बर कतकोन उदिम करे जावत हे। सेटेलाइट टैगिंग अउ जी.एस.एम. – जी.पी.एस. के मदद ले व्हिंब्रेल के प्रवास अउ पैटर्न ल सरलग टै्रक करे जावत हे। ए कारज म डॉ. हिमांशु गुप्ता, जागेश्वर वर्मा अउ अविनाश भोई सामिल रिहीन।
अउ अब जानन मौसम के हाल..
प्रदेस म भारी गर्मी के बीच कोनो-कोनो जघा बरसा होवत हे। मौसम विभाग के अनुसार काली एक-दू जघा म थोरकुन बरसा अउ गरज-चमक के संगे छींटा परही। उहें, कुछ जघा म हवा गरेर अउ गाज गिरे के संभावना हे।
मौसम विभाग के अनुसार उत्तर-पश्चिम उत्तरप्रदेस ले उत्तर बंग्लादेस तक एक ठन द्रोणिका विस्तारित हे। उहें, आने द्रोणिका पूर्वी उत्तरप्रदेस ले मराठवाड़ा तक बने हे। एखरे परभाव ले छत्तीसगढ़ के कोनो-कोनो जघा काली थोरकिन बरसा हो सकथे।