सुकमा जिला म आज बिहनिया पुलिस संग होय मुठभेड़ म एक झिन माओवादी ह मारे गीस। जिला के पुलिस अधीक्षक किरण चव्हाण ह बतइन कि पुलिस ल पोलमपल्ली थाना क्षेत्र के टेटराई-तोलनाई के जंगल म माओवादी मनके जुरे के सूचना मिले रिहीस। इही आधार म पुलिस अउ डिस्ट्रिक्ट रिजर्व गार्ड याने डीआरजी के जवान मन ल मउका बर रवाना करे गीस। ए दौरान टेटराई-तोलनाई के जंगल म पहिली ले घात लगाय माओवादी मन ह पुलिस पार्टी उपर हमला कर दीन। जवान मन कोति ले करे गे जवाबी कार्रवाई म एक झन माओवादी मारे गीस। घटना के जघा ले माओवादी के सव के संग एक बंदूक, अब्बड़ मात्रा म विस्फोटक अउ आने-आने नक्सल सामग्री बरामद होय हे।
आत्मसमर्पित माओवादी-दसवीं पास
माओवाद के रद्दा ल छोड़के अउ समाज संग जुड़के कबीरधाम जिला के आत्मसमर्पित माओवादी लिवरू उर्फ दिवाकर ह पुलिस के सहयोग ले दसवीं के परीक्षा पास कर लीस हे। प्रदेस के उप मुख्यमंत्री विजय शर्मा ह आज वीडियो कॉल उपर दिवाकर ले गोठबात करीन अउ उंहला ए उपलब्धि उपर बधई दीन। ए मउका म उप मुख्यमंत्री ह दूसर माओवादी मन ले घलो हिंसा के तरीका ल छोड़के समाज के मुख्य धारा ले जुड़े के आह्वान करीन।
सुनइया मन ल बतादन कि पूर्व माओवादी लिवरू उर्फ दिवाकर उपर चौदा लाख रूपिया अउ उंखर गोसइन उपर आठ लाख रूपिया के ईनाम राखे गे रिहीस। सत्रह बछर तक माओवादी संगठन ले जुड़े रेहे के बाद ए जोड़ी ह आत्मसमर्पण करे रिहीन।
आर्मी कमांडर-दौरा
आर्मी कमांडर लेफ्टिनेंट जनरल एन.एस.राजा सुब्रमणि ह काली छत्तीसगढ़ अउ ओड़िसा उप क्षेत्र-कोसा अउ नवा रईपुर के सैन्य स्टेसन के दौरा करीन। ए मउका म श्री सुब्रमणि ह बस्तर जइसन दूरिहा जघा म पूर्व सैनिक मनके कल्याण म काम करत आने-आने संगठन के अधिकारी मन ले भेंट करीन। ओमन ह आर्मी कमांडर ल पूर्व सैनिक मनके कल्याण अउ पुनरूत्थान बर चलाय जावत योजना के जानकारी दीन। ए दउरा म श्री सुब्रमणि ह छत्तीसगढ़ के अमर सहीद लेफ्टिनेंट राजीव पांडेय अउ कर्नल विप्लव त्रिपाठी के परिवार ल सम्मानित करीन। कारीकरम म लेफ्टिनेंट जनरल अशोक जिंदल, मेजर जनरल परमजीत सिंह दहिया समेत कई झन बड़का सैन्य अधिकारी मन घलो जुरे रिहीन।
भारत आटा/चावल
दक्षिण पूर्व मध्य रेलवे के रईपुर रेलमंडल के रईपुर, दुरूग, भिलाई पॉवर हाउस, भांटापारा अउ धमतरी रेलवे स्टेसन परिसर म मोबाइल वैन ले सस्ता रेट म आज ले भारत आटा अउ भारत चावल के बिक्री सुरू करे गेहे। नेसनल एग्रीकल्चर को-ऑपरेटिव मार्केटिंग फेडरेसन ऑफ इंडिया लिमिटेड के योजना के तहत भारत आटा अउ भारत चावल बेचे बर तीन महिना के अनुमति दे गेहे। मोबाइल वैन ह बताय गे स्टेसन मन म संझा चार बजे ले छै बजे तक उपलब्ध रइही। भारत आटा के बिक्री साढ़े सत्ताइस रूपिया प्रतिकिलो अउ भारत चावल उनतीस रूपिया प्रतिकिलो के दर ले करे जाही।
बिलासपुर आईजी-नये कानून
देसभर म एक जुलाई ले लागू होवइया तीन नवा आपराधिक कानून के प्रभावी क्रियान्वयन बर बिलासपुर रेंज के पुलिस महानिरीक्षक डॉक्टर संजीव शुक्ला ह पुलिस अधीक्षक मनके बइठका लीन। ए बइठका म ओमन ह ए तीनों कानून ल लागू करे जाय के पहिली सब्बों अधिकारी मन ल प्रसिक्षण देवाय के संबंध म करे जावत काम उपर चर्चा करीन। बेलासपुर आईजी ह जिला म लंबित आने अपराध अउ खासकर माईलोगिन अउ लइका मन ले जुडे़ आपराध उपर समय सीमा म कार्रवाई करे के निरदेस दीन। संगेसंग पुलिस अधिकारी मन ल अनुसूचित जाति-जनजाति एक्ट के प्रकरण के निराकरण कोति बिसेस धियान देबर किहीन।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के परसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र एके संघ रिले करही। ए बखत के अंक म ‘‘जशपुर‘‘ जिला के काम-काज के बारे म जानकारी दे जाही।
सारंगढ़/बिलाईगढ़-हत्या
सारंगढ़-बिलाईगढ़ जिला के सलिहा थाना क्षेत्र के गांव थरगांव म ए झन मनखे ह एके परिवार के पांच झन के हत्या कर दीस।
मिले जानकारी अनुसार आरोपी ह आज बिहनिया गांव के एक परिवार के घर पहुंचिस अउ पांचो झन के हत्या कर दीस। मृतक म तीन माईलोगिन, एक पुरूष अउ एक लइका सामिल हे। पुलिस ह मउका म पहुंच के हत्या अउ आत्म हत्या के कारण के जांच सुरू कर दीस हे।
पीलिया-युवक मौत
राजनांदगांव सहर के शांति नगर वार्ड म एक युवक के पीलिया ले मउत होगे। एखर इलाज पाछू तीन दिन ले मेडिकल अस्पताल म चलत रिहीस। मउत के खबर के बाद निगम आयुक्त अभिषेक गुप्ता ह जल विभाग अउ अमृत मिसन के अधिकारी मनके बइठका लेके गंदा पानी के सिकायत वाले वार्ड म गंभीरता ले जांच करके व्यवस्था ल ठीक करे के निरदेस दीन। ओमन ह बिहनिया पानी सप्लाई के बेरा म सबो अधिकारी मन ल अपन प्रभार के वार्ड म खुद जाके निरीक्षण करे बर घलो किहीन।
शराब घोटाला-याचिका खारिज
कथित सराब घोटाल मामला म त्रिलोक सिंह ढिल्लन ल कोर्ट ले कोनो राहत नइ मिले हे। ओखर कोति ले लगाय जमानत याचिका उपर एसीबी अउ ईओडब्ल्यू के विसेस अदालत म सुनवई होइस। न्यायालय ह दूनों पक्ष के वकील के बहस सुने के बाद जमानत याचिका ल रद्द कर दीस। एखर ले पहिली विसेस न्यायालय ह होटल कारोबारी अनवर ढेबर के जमानत याचिका ल घलो रद्द कर दे रिहीस।
उहें, पूर्व आबकारी अधिकारी अरूणपति त्रिपाठी, अरविंद सिंह, अनवर ढेबर अउ त्रिलोक सिंह ढिल्लन के न्यायायिक रिमांड ल बिसेस अदालत ह तीस मई तक बढ़ा दिस हे।
रायपुर-समर कैम्प
रईपुर जिला म पढ़इया लइका मन बर समर कैंप के आयोजन करे जावत हे। कलेक्टर डॉक्टर गौरव कुमार सिंह ह समर कैंप के आज सुभारंभ करीन। ए मउका म ओमन किहीन कि गर्मी के छुट्टी के सदुपयोग करे बर लइका मन ल रचनात्मक काम कोति ले जाय बर ए समर कैंप ह सुघ्घर परयास हे। ए कैंप बर अब तक छै सौ ले जादा लइका मन ह निसुल्क पंजीयन कराय हे। समर कैंप म स्पोकन इंग्लिस, कैलीग्राफी, रूबिक्स क्यूब, साईंस मॉडल, हैंडीक्राफ, योग अउ धियान, आर्टीफिसियल इंटेलीजेंस, पेंटिंग, बासुरी वादन, नृत्य, गायन, कठपुतली, मेंहदी, शतरंज, रोप स्कीपिंग, वालीबॉल, खो-खो, फुटवाल अउ ताईक्वांडो जइसन आने-आने विधा ल सिखाय जाही। ए कैंप म भाग ले के इच्छुक विद्यार्थी मन ह कालीबाड़ी के जे.आर.दानी शासकीय उत्कृष्ट हिंदी माध्यम विद्यालय म बिहनिया सात बजे ले दस बजे के बीच पंजीयन करा सकथे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
अउ अब मौसम के हाल…
मौसम विभाग के अनुसार एक द्रोणिका उत्तर-पश्चिम उत्तरप्रदेस ले पश्चिम बंगाल अउ सिक्किम तक स्थित हे। उहें, एक आने द्रोणिका दक्षिण छत्तीसगढ़ ले कर्नाटक तक बने हुए हे। एखर असर ले काली प्रदेस म एक-दू जघा म हल्का बरसा अउ गरजे-लउके के संग बूंदाबांदी होय के संभावना हे। उहें, एक-दू जघा म हवा गरेर अउ गाज गिरे के आसंका हे। बरसा के मुख्य क्षेत्र उत्तर अउ दक्षिण छत्तीसगढ़ रइही।
ओति, कोंडागांव जिला के लांजोड़ा गांव म काली गाज गिरे ले घर के तीर खड़े एक मनखे के मउत होगे। उहें, एक झन लइका ह झुलस गीस, जेखर इलाज जिला अस्पताल म चलत हे।