आपराधिक कानून-प्रशिक्षण
नवा आपराधिक कानून मनके प्रभावी क्रियान्वयन बर ए मन ल लागू करे के पहिली पुलिस विभाग के विवेचक अधिकारी मन ल एखर प्रसिक्षण दे जाही। नवा कानून मनके प्रसिक्षण दे बर पुलिस विभाग डहार ले हिदायतुल्ला राष्ट्रीय विधि विस्वविद्यालय ले एमओयू करे गेहे।
बतादन के भारत सरकार डहार ले तीन ठिन नवा आपराधिक कानून मनके के प्रकासन राजपत्र म करे गेहे। ऐला अवइया एक जुलाई ले लागू करे जाही। ए संबंध म पुलिस महानिदेसक कोती ले जम्मों रेंज के पुलिस महानिरीक्षक अउ वरिष्ठ पुलिस अधीक्षक समेत जम्मों अधिकारी मन ल जरूरी कार्यवाही सुनिस्चित करे के निरदेस दे गेहे।
रेल मदद ऐप
भारतीय रेलवे ह सिकायत प्रबंधन प्रणाली ल पूरा डिजिटल करत रेल यात्री मनके सिकायत के निवारण के प्रक्रिया ल सुधारे अउ तेज करे बर रेलवे डहार ले ‘‘रेल मदद’’ नाम के एक ठिन ऐप जारी करे हे। यात्री ल ए ऐप म रजिस्ट्रेसन के बाद एसएमएस के जरिया सिकायत संख्या तुरते उपलब्ध करा के रेलवे डहार ले उठाए गे कदम के जानकारी घलो एसएमएस ले दे जाथे।
दक्षिण पूर्व मध्य रेलवे रईपुर रेलमंडल के अंतर्गत रेल मदद ऐप म रेल यात्री मनले मिले समस्या अउ सिकायत के तुरते समाधान करे जात हे। हेल्पलाइन नंबर – एक, तीन नौ म घलो कॉल करे ले रेल मदद कोती ले यात्री मनके समस्या के निराकरण करे जाथे।
ट्रेन परिचालन
मध्य रेलवे के मुंबई मंडल के सीएसएमटी स्टेसन के प्लेटफार्म विस्तार बर स्टेसन अउ स्टेसन यार्ड म नॉन इंटरलाकिंग के काम करे जात हे। एखर सेती दक्षिण पूर्व मध्य रेलवे ले जुड़े कुछ गाड़ी मनके परिचालन प्रभवित रिही। एखर तहत इकतीस मई के हावड़ा-सीएसएमटी दूरंतो एक्सप्रेस रद्द रिही। उंहे, दू जून के सीएसएमटी-हावड़ा दुरंतो एक्सप्रेस रद्द रिही। अइसने सोला मई ले इकतीस मई तक हावड़ा-सीएसएमटी सुपरफास्ट मेल एक्सप्रेस दादर स्टेशन म सिराही। इकतीस मई के हावड़ा-सीएसएमटी गीतांजली एक्सप्रेस दादर स्टेसन तक ही चलही।
सोलर पैनल बिजली
सूर्य घर मुफ्त बिजली योजना के तहत राजनांदगांव जिला म लोगन मन बिजली के खपत कम करे बर अपन घर म सौर पैनल घलो लगा सकही। एखर बर आवेदन प्रक्रिया घलो सुरू होगे हे। अब तक एक हजार पांच सौ ले जादा आवेदन आ चुके हे। बिजली कंपनी के सत्यापन के बाद सौर पैनल लगाए के काम सुरू हो जही। सौर पैनल लगाए बर हितग्राही मन ल अनुदान घलो दे जाही। अनुदान बर अलग-अलग श्रेणी तय करे गेहे।
छत मन म सौर पैनल लगाए बर हितग्राही मन ल दे जाने वाला अनुदान के अंतर्गत एक ले दू किलोवाट प्लांट के क्षमता वाले सौर पैनल बर डेढ़ सौ यूनिट तक बिजली खपत होय म तीस हजार ले साठ हजार रूपिया के अनुदान दे जाही। उहें, दू ले तीन किलोवाट क्षमता वाले सौर पैनल बर तीन सौ यूनिट तक के बिजली खपत होय म साठ हजार ले अटहत्तर हजार रूपिया के अनुदान दे जाही। ए योजना के तहत छत अउ खाली जघा मन म सौर पैनल लगाए बर हितग्राही मन ल बैंक ले लोन घलो दे जाही।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत गर्मी के मौसम म लू लगे के कारण अउ उंखर बचाव उपर एम्स रायपुर के विशेषज्ञ डॉक्टर वरूण आनंद ले लेगे भेंटवार्ता प्रसारित करे जाही। एखर प्रसारण आकाशवाणी केन्द्र रायपुर डहार ले काली अट्ठारा मई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
कर्मचारी-कार्रवाई
प्रदेस के सामान्य प्रसासन विभाग ह बिना छुट्टी ले लंबा समय तक अनुपस्थित रहे, सरकारी दायित्व म लापरवाही करे अउ छुट्टी स्वीकृत करके वेतन पाने वाला कर्मचारी मन उपर कड़ा कार्रवाई के आदेस जारी करे हे। सामान्य प्रसासन विभाग के सचिव मुकेश बंसल ह जम्मों विभागाध्यक्ष, सचिव, राजस्व बोर्ड, कमिश्नर, कलेक्टर और जिला पंचायत के सीईओ मन ल सर्कुलर भेज के लापरवाह कर्मचारी मन उपर कड़ा कार्रवाई करे बर किहीन हे। सामान्य प्रसासन विभाग ह कहे हे कि अइसना कर्मचारी मनके खिलाफ विभागीय जांच जल्दी पूरा कर ले जाए अउ गंभीर रूप ले दोषी पाए जाए म सेवा ले बर्खास्त करे जाए।
एसीबी-गिरफ्तार
एसीबी के टीम ह आज बिलासपुर के तहसील कार्यालय परिसर म आरआई संतोष कुमार देवांगन ल रिश्वत लेवत रंगेहाथ गिरफ्तार करे हे। मिले जानकारी के अनुसार आरआई संतोष कुमार देवांगन ले मोपका के एक किसान भू-अर्जन के मुआवजा दिलाए संबंधी प्रक्रिया जल्दी पूरा करे के आग्रह करत रिहीस। एमा आरआई डहार ले रिश्वत मांगे गीस। किसान ह एखर शिकायत एंटी करप्शन ब्यूरो ले करीस। एखर बाद एसीबी के टीम ह तहसील कार्यालय पहुंच के आरआई ल रिश्वत लेवत गिरफ्तार कर लीस।
उंहे, एसीबी के टीम ह अंबिकापुर स्थित नगर निवेश कार्यालय म छापा के कार्रवाई करीन। ए दउरान पैंतीस हजार रूपिया रिश्वत लेवत सहायक संचालक बाल कृष्ण चौहान अउ मानचित्रकार नीलेश्वर कुमार धुर्वे ल रंगे हाथ पकड़े गेहे। ओमन लोगन मन ले नक्शा पास कराय के बदला म रिश्वत मांगत रिहीन।
सुकमा-शिविर
सुकमा जिला के कलेक्टर हरीश एस. के निरदेस म सिलगेर अउ एलमागुंडा गांव म प्रसासन डहार ले सिविर लगाए गेहे। ए सिविर म आधार कार्ड के संघरा बैंक खाता खोले, वोटर आईडी, आय-जाति प्रमाण पत्र, पेंशन अउ वन अधिकार पत्र जइसे काम मउकाच म ही करे जात हे।
बतादन कि राज्य सरकार ह अइसना गांव-गवई मन ल चिन्हित करे हे, जेमा लंबा समय ले सासन के योजना नई पहुंच पाय हे। अइसे गांव मन म सासन ह नियद नेल्लानार योजना सुरू करके गांव मन तक बुनियादी सुविधा पहुंचाए के लक्ष्य राखे हे।
पांडुरंग शंकरराव मोघे-निधन
तेंदुआ-मौत
कोरबा जिला के पाली उपवनमंडल के चेतमा रेंज म एक तेंदुआ के शिकार करे के मामला म तीन मनखे मन ल गिरफ्तार करे गेहे। पुलिस के अनुसार ये लोगन मन ह तेंदुआ ल मारे बर जहर बउरे रिहीन। आरोपी मन तेंदुआ शरीर ले निकले खाल के कुछ हिस्सा मनके संघरा नाखुन, दांत अउ पूंछ घलो गायब कर दे रिहीन।
दुर्घटना
खैरागढ़-छुईखदान-गंडई जिला के ग्राम बाजार अतरिया म होय सड़क हादसा म एके परिवार के दू लइका मनके मउत होगे। बताय जात हे कि ए लइका मन बिहाव कारीकरम म सामिल होय बर रायपुर जाय बर सड़क तीर खड़े रिहीन। इहीं दउरान एक ठिन तेज रफ्तार ट्रक ह दूनों ल अपन चपेट म ले लीस। ए हादसा म दूनों लइका मनके मउकाच म मउत होगे। पुलिस ह आरोपी ट्रक ड्राईवर ल हिरासत म ले लेहे।
अउ अब पेस हे मौसम के हाल…
अवइया चौबीस घंटा के दउरान छत्तीसगढ़ म एक-दू जघा म हल्का बरसा होय या गरज-चमक के संग छींटा पड़े के संभावना हे। मौसम विभाग ले मिले जानकारी के अनुसार एक द्रोणिका मध्य भारत ले दक्षिण भारत तक बगरे हे। एखर सेती बंगाल के खाड़ी ले प्रदेस म नमी आवत हे। मौसम विभाग के अनुसार दक्षिण छत्तीसगढ़ म गरज-चमक के संग अंधड़ चले अउ गाज गिरे के संभावना हे। बस्तर संभाग के जम्मों जिला म बादल छाए के सेती तापमान म आज कमी आए हे। प्रदेस के तापमान म घलो दू ले तीन डिग्री सेल्सियस के गिरावट दरज करे गेहे।