केंद्र सरकार ह आमतौर म प्रयोग होवइया इकचालीस दवई के कीमत म कटौती करे हे। एमा मधुमेह, हृदय अउ लीवर के बीमारी के ईलाज म इस्तेमाल होवइया दवई सामिल हे। राष्ट्रीय औषधि मूल्य निर्धारक प्राधिकरण के बइठका म जरूरी दवई ल सुलभ बनाय बर ए निर्णय ले गीस। बइठका म फार्मा कंपनी मन ल निरदेस दे गेहे कि ओमन आने-आने दवई के कम कीमत के जानकारी तुरते डीलर अउ थोक वितरक मन ल दे।
अमित शाह-प्रशंसा
केंद्रीय गृहमंत्री अमित शाह नक्सल मोर्चा म मिले अब तक के सफलता म छत्तीसगढ़ सरकार के तारीफ करे हे। ओमन ह किहीन कि राज्य म भाजपा के सरकार बने के बाद पाछू साढ़े चार महिना म एक सौ बारह माओवादी मारे गेहे । उहें, लगभग तीन सौ पछहत्तर माओवादी मन ह आत्मसमर्पण करे हे। एखर ेअलावा एक सौ तिरपन माओवादी गिरफ्तार करे गेहे। श्री साय ह किहीन कि डबल इंजन के सरकार नक्सलवाद के खिलाफ मजबूती ले लड़ाई लड़त हे।
गृहमंत्री डहार ले छत्तीसगढ़ सरकार के प्रसंसा करे म मुख्यमंत्री विष्णुदेव साय ह श्री शाह के आभार जतइन। अपन सोसल मीडिया हैंडल एक्स म ओमन ह लिखे हे कि केंद्र सरकार के कुसल मार्गदर्सन म हम नक्सल समस्या के स्थाई समाधान डहार आगू बढ़त हन।
एम्स-छत्तीसगढ़ आर्मी
अखिल भारतीय आयुर्विज्ञान संस्थान एम्स रईपुर के डॉक्टर अउ छत्तीसगढ़ आर्मी पब्लिक वेलफेयर फॉउंडेसन, सामाजिक जागरूकता बर मिलके काम करही। ए संबंध म फाउंडेसन के अध्यक्ष हरप्रित िंसंह अउ उपाध्यक्ष विशाल देशमुख ह एम्स के कार्यपालक निदेशक लेफ्टिनेंट जनरल, अशोक जिंदल(सेवा निवृत्त) ले मुलाकात करीन। ए बेरा म सबो झन मिलके सामाजिक उत्थान बर आने-आने क्षेत्र म काम करे बर सहमति जतइन। फाउंडेसन ह एम्स के आने-आने विभाग के संग मिलके स्वास्थ्य अउ रक्तदान सिविर लगाय के संग जागरूकता कारीकरम आयोजित करे के प्रस्ताव घलो दीन, जेन ल स्वीकार कर ले गेहे।
ए बेरा म लेफ्टिनेंट जनरल श्री जिंदल ह बतइन कि एम्स म पूर्व सैनिक मन ल अत्याधुनिक चिकित्सा सुविधा कैसलेस दे जावत हे।
अरपा नदी-याचिका
छत्तीसगढ़ उच्च न्यायालय ह आज अरपा नदी के संरक्षण म लगाय गे आने-आने जनहित याचिका म सुनवाई करीन। ए दौरान कोर्ट ह जिला प्रशासन बिलासपुर अउ गौरेला-पेण्ड्रा-मरवाही ल छब्बीस जून के अरपा नदी के उदगम अउ संरक्षण के एक्सन प्लान देखाय बर किहीन। कोर्ट के निरदेस म अरपा रिवाईवल कमेटी के बइठका म जरूरी निर्णय ले गेहे।
जानबा के मुताबिक अरपा उदगम बचाव संघर्ष समिति पेण्ड्रा डहार ले संरक्षक राम निवास तिवारी, बिलासपुर के अधिवक्ता, अरविंद कुमार शुक्ल, सोमनाथ यादव अउ अक्षय नामदेव ह बिलासपुर उच्च न्यायालय म आने-आने याचिका दायर करे रिहीस।
व्यापमं-राज्य पात्रता परीक्षा
छत्तीसगढ़ व्यावसायिक परीक्षा मंडल-व्यापमं डहार ले ए बछर के राज्य पात्रता परीक्षा बर तेरह मई ले ऑनलाइन आवेदन के प्रक्रिया सुरू होगे हे। परीक्षा म सामिल होय बर अभ्यर्थी व्यापमं के पोर्टल म नौ जून तक ऑनलाइन आवेदन कर सकत हे। दस ले बारह जून तक त्रुटि सुधार करे जा सकही। राज्य पात्रता परीक्षा इक्कीस जुलाई के संभावित हे। ए परीक्षा बर छत्तीसगढ़ के स्थानीय निवासी प्रतिभागी मनले कोनो भी प्रकार के परीक्षा सुल्क नइ ले जाही।
बैंक कैशियर-फर्जीवाड़ा
सक्ती जिला के बंधन बैंक म फर्जीवाड़ा करइया कैश्यिर के खिलाफ पुलिस ह धारा-चार सौ बीस के तहत धोखाधड़ी के मामला दर्ज करे हे। जानबा के मुताबिक कैश्यिर ह जीवित महिला के फर्जी मृत्यु प्रमाण पत्र बनाके बीमा क्लेम करे रिहीस। एखरे संग डेढ़ लाख रूपिया के गबन घलो करे रिहीस। फिलहाल कैश्यिर के गिरफ्तारी अब तक नइ होय हे।
सोनमणि-बोरा-आवासीय विद्यालय
प्रदेस के आदिमजाति, अनुसूचित जाति, अन्य पिछड़ा वर्ग अउ अल्पसंख्यक विकास विभाग के प्रमुख सचिव सोनमणि बोरा ह आज रईपुर के सड्डू स्थित प्रयास आवासीय विद्यालय के निरीक्षण करीन। ए मउका म ओमन ह किहीन कि नवोदय विद्यालय के तर्ज म प्रयास विद्यालय ल विकसित करे जाही। श्री बोरा ह भौतिक अउ रसायन विज्ञान प्रयोगशाला के संग लाइब्रेरी के निरीक्षण घलो करीन। ओमन ह छात्र मन ल थ्योरी के संगेसंग प्रैक्टिकल घलो कराय के निरदेस दीन। एखरे संग ओमन ह लाइब्रेरी म सबो जरूरी किताब अउ कम्प्यूटर के व्यवस्था करे बर किहीन। निरीक्षण के दौरान श्री बोरा स्कूल म जेईई, आईआईटी के संग प्रतियोगी परीक्षा के तइयारी करत छात्र मन ले घलो मिलीन। एखर अलावा ओमन ह सड्डू म बाईस करोड़ रूपिया ले जादा के लागत ले बनत सात सौ पचास सीटर आवासीय एकलव्य भवन के निरीक्षण घलो करीन।
डेंगू दिवस
आज राष्ट्रीय डेंगू दिवस हे। डेंगू बीमारी के लक्षण अउ बचाव के उपाय बर जन-जागरूकता लाय बर प्रदेस भर म आने-आने कारीकरम आयोजित करे जात हे। इही कड़ी म गौरेला-पेण्ड्रा-मरवाही जिला कलेक्टर लीना कमलेश मंडावी ह जागरूकता रथ ल हरा झंडी दिखाके रवाना करीन। ए रथ के जरिया ले जिला के लोगन मन ल डेंगू बीमारी ले बचाव बर जागरूक करे जात हे। जिला स्वास्थ्य समिति डहार ले राष्ट्रीय वेक्टर जनित रोग नियंत्रण कारीकरम के तहत डेंगू बीमारी के लक्षण अउ बचाव के बारे म बैनर पोस्टर ले जन-जागरूकता रथ ल सजाय गे हे।
राष्ट्रीय डेंगू दिवस म आज जगदलपुर म घलो जिला प्रशासन डहार ले जागरूकता रैली निकाले गीस। ए दौरान लोगन मन ले डेंगू मलेरिया ले बचाव अउ उपचार बर सतर्क रहे के अपील करे गीस। ए रैली म अधिकारी-कर्मचारी के संग नर्सिंग छात्रा, मितानिन-आंगनबाड़ी कार्यकर्ता, स्वच्छता ब्रांड एंबेसडर अउ आम लोगन सामिल होइन। ए मउका म कला जत्था दल डहार ले नुक्कड़ नाटक देखाके डेंगू मलेरिया ले बचाव के उपाय अउ उपचार संबंधी संदेस दे गीस।
नारायणपुर हत्या-खुलासा
नारायणपुर म परिवहन संघ के सचिव अउ कांग्रेस नेता विक्रम बैस के हत्या के खुलासा पुलिस ह आज कर देहे। पुलिस के मुताबिक विक्रम बैस के हत्या पुराना रंजिस के चलत करे गेहे। ए हत्याकांड म सामिल छै आरोपी ले पुलिस ह हथियार के संग दू पहिया गाड़ी अउ मोबाइल फोन जब्त करे हे। ए मामला म नारायणपुर, दुर्ग, रईपुर अउ बिलासपुर पुलिस ह बतइन कि हत्या के बाद सीसीटीवी फुटेज के बारिकी ले जांच के दौरान एक संदिग्ध के पता चलिस। जेखर ले पूछताछ के आधार म बाकी आरोपी मन के गिरफ्तारी करे गीस।
जानबा के मुताबिक नारायणपुर जिला के बखरूपारा म पाछू तेरह मई के विक्रम बैस के गोली मारके हत्या कर दे गे रिहीस।
आईपीएल-बैंक खाता
आईपीएल क्रिकेट मैच म सट्टा के रकम के लेन-देन बर दूसर के नाव म बैंक खाता खुलवइया तीन आरोपी ल रईपुर पुलिस ह गिरफ्तार करे हे। जानबा के मुताबिक आरोपी मन ह अब तक लगभग डेढ़ सौ ले जादा बैंक खाता खुलवाय हे। एंटीक्राइम एंड साइबर यूनिट अउ गंज थाना पुलिस के संयुक्त टीम डहार ले अब तक ए मामला म सोलह आरोपी ल गिरफ्तार करे जा चुके हे। उंखर तीर ले बारह लैपटाप, साठ मोबाइल, बत्तीस पासबुक, पांच चेकबुक अउ तैंतीस एटीएम कार्ड जब्त करे गेहे।
अउ अब पेस हे मौसम के हाल…
ए बछर दक्षिण-पश्चिम मानसून के केरल म इकतीस मई के पहुंचे के संभावना हे। आमतौर म केरल म मानसून जून के पहिली सप्ताह म पहुंचथे। भारतीय मौसम विज्ञान विभाग डहार ले ए दरी देस म मानसून के निर्धारित तारीख के पहिली पहुंचे के संभावना जताय गेहे।
इही बीच मौसम विभाग ह अवइया चौबीस घंटा के दौरान एक-दू जघा म हल्का बरसा होय या गरज-चमक के संग छींटा पड़े के संभावना जताय हे। मौसम विभाग के अनुसार दक्षिण बिहार के उपर एक चक्रिय-चक्रवाती घेरा बने हे। एखर असर ले प्रदेस म काली एक-दू जघा म गरज-चमक के संग अंधड़ चले अउ आकाशीस बिजली गिरे के संभावना हे। बरसा के प्रमुख जघा दक्षिण छत्तीसगढ़ रइही।
उहें, मौसम विभाग के अनुसार अवइया कुछ दिन म उत्तर अउ मध्य छत्तीसगढ़ के अधिकतम तापमान म दू ले तीन डिग्री सेल्सियस के बढ़ोत्तरी होही।