बीजापुर जिला म माओवादी मन डहार ले थाना-प्रभारी के वाहन ल निसाना बनावत हुए आईईडी विस्फोट करे गीस। मिले जानकारी के अनुसार थाना फरसेगढ़ अउ छत्तीसगढ़ के सशस्त्र बल के संयुक्त टीम ह गस्त बर निकले रिहीस। इही दौरान माओवादी मन ह कुटरू-फरसेगढ़ रद्दा म सोमनपल्ली करा थाना प्रभारी के वाहन म आईईडी के ब्लास्ट कर दीन। ए घटना म वाहन ल क्षति पहुंचे हे अउ प्रभारी फरसेगढ़ निरीक्षक आकाश मसीह अउ प्रधान आरक्षक संजय दूनों सुरक्षित हे। ए घटना के बाद इलाका म सर्चिंग अभियान जारी हे।
ओति, दंतेवाड़ा जिला म डीआरजी अउ सीआरपीएफ के टीम ह पांच झन माओवादी मन ल गिरफ्तार करे हे। एमा ले एक झन ईनामी माओवादी हे। ए सब्बो माओवादी अरनपुर इलाका म सक्रिय रिहीन।
माओवादी आत्मसमर्पण-मुख्यमंत्री
बीजापुर जिला म तीस झन माओवादी मनके आत्मसमर्पण करे जाय उपर मुख्यमंत्री विष्णुदेव साय ह खुसी जताय हे। ओमन आत्मसमर्पण करइया माओवादी मनके पुनरूत्थान बर काम करे के बात किहीन। सोसल मीडिया म ओमन लिखे हे कि ए अत्यंत हर्ष के विसय हे कि माओवादी मनके विचारधारा ले असहमत होके अउ छत्तीसगढ़ शासन के आत्मसमर्पण अउ पुनर्वास नीति ले प्रभावित होके बीजापुर के तीस झन माओवादी मन ह पुलिस के आगू आत्मसमर्पण करे हे। एमा कई झन ईनामी माओवादी घलो सामिल हे।
बतादन कि आदिवासी क्षेत्र मन म विकास बर राज्य सरकार ह ‘‘नियद नेल्लानार‘‘ याने ‘‘आपका अच्छा गांव‘‘ योजना के सुरूआत करे हे। ए योजना के तहत सरकार गांव मन म मुलभूत सुविधा उपलब्ध करावत हे। संगेसंग सरकार के आत्मसमर्पण अउ पुनर्वास नीति ले घलो माओवादी मन प्रभावित होके हिंसा ल छोड़त हे। आत्म समर्पण करइया तीस झन माओवादी मन म नौ झन माओवादी मन लगभग उनतालीस लाख रूपिया के ईनामी रिहीन। ए बछर अब तक एक सौ अस्सी माओवादी गिरफ्तार होय हे। उहें, छिहत्तर झन माओवादी मन आत्म समर्पण करे हे।
सुरक्षा बल-नवीन कैम्प
नारायणपुर जिला के मोहंदी गांव म सुरक्षा बल डहार ले नवा कैम्प खोले गेहे। ए कैम्प के स्थापना ले क्षेत्र म विकास अउ नक्सल उन्मूलन अभियान म तेजी आही। कैम्प के स्थापना म डीआरजी, बस्तर फाइटर अउ आईटीबीपी के महत्वपूर्ण भूमिका हे। ग्राम मोहंदी ओरछा ब्लाक के कोहकामेटा तहसील अउ कोहकामेटा थाना के अंतर्गत हे। मोहंदी म नवा कैम्प स्थापित होय ले आसपास के क्षेत्र सड़क, पानी, पुल-पुलिया, शिक्षा, चिकित्सा, मोबाइल नेटवर्क कनेक्टिविटी अउ मूलभुत सुविधा मनके विस्तार होही। कैम्प स्थापना के अवसर म पुलिस अधीक्षक प्रभात कुमार, आईटीबीपी के सेनानी अमित भाटी अउ अतिरिक्त पुलिस अधीक्षक रोबिनसन गुड़िया मौजूद रिहीन।
गृह मंत्रालय-अलर्ट
साइबर अपराधी मन डहार ले ब्लैकमेलिंग अउ डिजीटल अरेस्ट के धमकी के बाढ़त घटना मनके बीच केंद्रीय गृह मंत्रालय ह नागरिक मन ल सावधान रेहे बर केहे हे। एखरे संग दूरसंचार विभाग ह, सरकारी अधिकारी मनके छद्म रूप धारण कर लोगन मन ल ठगइया विदेसी मोबाइल नंबर ले व्हाट्सएप कॉल के बारे म घलो परामर्स जारी करे हे। लोगन मन ल साइबर अपराध हेल्पलाइन नंबर-एक नौ तीन सून्य म अइसन घटना मनके रिपोर्ट करे बर घलो केहे गेहे।
संस्कृत विद्यामण्डलम्-परिणाम
छत्तीसगढ़ संस्कृत विद्यामण्डलम् रायपुर डहार ले आयोजित ए बछर के मुख्य परीक्षा परिणाम विद्यामण्डलम कार्यालय म आज सचिव अल्का दानी डहार ले घोसित करे गीस। परीक्षा परिणाम छियानवे दसमलव तीन-पांच प्रतिसत रेहे हे, जेमा कुल तीन हजार पांच सौ चार परीक्षार्थी सामिल हे। परीक्षार्थी मन म दू हजार नब्बे बालक अउ एक हजार चार सौ चौदह बालिका रिहीन। ए बछर के मुख्य परीक्षा बर छत्तीसगढ़ म कुल इकतालीस परीक्षा केंद्र बनाय गे रिहीस।
होर्डिंग्स संचालक-बैठक
रायपुर नगर-निगम के आयुक्त अविनाश मिश्रा ह सहर म सुरक्षित ढंग ले कोर्डिंग्स लगाय जाय ल लेके विज्ञापन एजेंसी मनके संचालक अउ नगर-निगम के अधिकारी मनके काली बइठका लीन। बइठका म ओमन किहीन कि मुंबई जइसन हादसा रायपुर म झन होवय, ए विज्ञापन एजेंसी मन सुनिश्चित करय। बइठका म विज्ञापन एजेंसी के संचालक अउ प्रतिनिधि मन ल कोर्डिंग्स के ढांचागत जांच कराके एक हफ्ता के भीतर जांच ले संबंधित प्रमाण पत्र नगर-निगम के नगर निवेश विभाग ल सौंपे बर किहीन। ओमन होर्डिंग्स गिरे या कोनो भी तरह के दुर्घटना ले बचाव बर सबो आवश्यक सुरक्षात्मक उपाय करे बर घलो किहीन।
वजन तिहार
प्रदेस म लइका मन के सुपोषण के जांच बर वजन तिहार मनाय जात हे। लइका मनके पोषण स्तर म सुधार अउ उंखर आकलन बर बाईस मई तक प्रदेस के सब्बों आंगन बाड़ी केंद्र मन म वजन तिहार मनाय जात हे।
राजनांदगांव जिला के कलेक्टर संजय अग्रवाल ह वजन तिहार के पहलइया दिन राजनांदगांव सहर के शंकरपुर वार्ड, कन्हारपुरी अउ ग्राम सुंदरा के आंगन बाड़ी केंद्र मनके निरीक्षण करीन। उहें, कलेक्टर ह खुदे लइका मनके वजन अउ ऊंचाई नापिन। ओमन लइका मनके पोषण स्तर के नियमित निगरानी करे बर विभागीय अधिकारी मन ल निरदेस दीन।
चोरी घटना-परामर्श
आसपास के जिला म बाढ़त चोरी के घटना ल देखत हुए सक्ती पुलिस ह लोगन मन ल चोर मन ले सतर्क रेहे बर परामर्स जारी करे हे, जेमा पुलिस ह लोगन मन ल चोर मन ले सावधान रेहे के चेतावनी देहे। सात बिन्दु के एडवाइजरी म बताय गेहे कि चोर मन के गिरोह पड़ोसी जिला म सक्रिय हे, अउ ओमन हाइवे, रेलवे लाइन के आसपास के घर अउ सुन्ना मकान मन ल निसाना बनावत हे।
पुलिस ह लोगन मन ल केहे हे कि अगर उंखर घर के आसपास अंजान लोगन मन घुमत दिखय त, उंखर फोटो लेके कंट्रोल रूम ल सूचना देवय। संगेसंग कंट्रोल रूम के फोन नंबर घलो पुलिस ह जारी करे हे।
हत्या-आरोपी गिरफ्तार
नारायणपुर जिला म परिवहन संघ के सचिव अउ कांग्रेस नेता विक्रम बैस के गोली मारके हत्या करइया तीन झन आरोपी मन ल पुलिस ह गिरफ्तार करे ेहे। पुलिस ल सूचना मिले रिहीस हे कि हत्या के आरोपी दुरूग म छुपे हुए हे। नारायणपुर अउ दुर्ग पुलिस के संयुक्त टीम ह ए सफलता पाय हे। अब तक ए मामला म आने-आने जिला ले छै झन आरोपी मन ल गिरफ्तार करे जा चुके हे। पकड़े गे तीनों आरोपी हॉस्पिटल सेक्टर भिलाई के रहइया आय। हत्या के मास्टर माइंड अभी तक पुलिस के पकड़ ले बाहिर हे।
भालू हमला-मौत
रायगढ़ जिला के छाल क्षेत्र म भालू के हमला म एक झन बुजुर्ग महिला के मौत होगे। मिले जानकारी के अनुसार सामहरसिंघा बीट म पदस्थ फॉरेस्ट गार्ड के बुजुर्ग मां ह आज बिहनिया बोजिया के जंगल म तेंदूपत्ता तोड़े बर गे रिहीन। तभे भालू के हमला ले सियान ह गंभीर रूप ले घायल होगे अउ मौका म ही मौत होगे। घटना के बाद वन विभाग अउ छाल पुलिस आगू के कार्रवाई म जुट गेहे।
अउ अब थोरकुन समाचार सार म –
– बेमेतरा जिला के ग्राम भैंसा म तरिया म बूड़े ले दू झन लइका मनके मौत होगे। बताय जात हे कि ए दूनों लइका नहाय बर तरिया म गे रिहीन।
– दुरूग जिला के जामूल थाना क्षेत्र म रील बनाय के दौरान ऊंचाई ले गिरे ले एक झन युवक के मौत होगे। बताय जात हे कि ए युवक एक ठन निजी कंपनी म हेल्पर के रूप म कार्यरत रिहीस। पुलिस मामला के जांच म जुटे हे।
अउ
– मनेन्द्रगढ़-चिरमिरी-भरतपुर जिला म आज कलेक्ट्रेट कार्यालय करा तेज रफ्तार दू ठन मोटर साइकिल के जोरदार टक्कर म मोटर साइकिल दू झन युवके मौत होगे। उहें, गंभीर रूप ले घायल एक झन युवक ल अस्पताल म भर्ती कराय गेहे।