केंद्रीय माध्यमिक शिक्षा बोर्ड-सीबीएसई ह आज दसवीं अउ बारहवीं परीक्षा के नतीजा घोसित कर देहे। सीबीएसई ह ए बयान म केहे हे कि बारहवीं म कुल सत्यासी दसमलव नौ आठ प्रतिसत छात्र परीक्षा म उत्तीर्ण होय हे। ए प्रतिसत पाछू बछर के तुलना म सून्य दसमलव छह-पांच प्रतिसत जादा हे। चौबीस हजार ले जादा परीक्षार्थी मन पनचान्वे प्रतिसत ले जादा अंक प्राप्त करे हे अउ एक लाख सोलह हजार ले जादा छात्र मन नब्बे प्रतिसत ले जादा अंक प्राप्त करे हे। लड़की मन के पास होय के प्रतिसत लड़का मन के तुलना म छह दसमलव चार-सून्य प्रतिसत जादा हे।
उहें, दसवीं बोर्ड परीक्षा म विद्यार्थी मनके कुल उत्तीर्ण प्रतिसत तिरानवे दसमलव छह सून्य रेहे हे। जेमा लड़की मनके उत्तीर्ण प्रतिसत चौरानवे दसमलव सात-पांच हे। जबकि लड़का मनके उत्तीर्ण प्रतिसत बियानवे दसमलव सात एक हे। परीक्षा परिणाम बोर्ड के डब्ल्यू.डब्ल्यू.डब्ल्यू.डॉट सीबीएसई रिजल्ट डॉट एनआईसी डॉट इन के संगेसंग डिजीलॉकर अउ उमंग एप्स म घलो देखे जा सकत हे।
प्रधानमंत्री नरेंद्र मोदी ह केंद्रीय माध्यमिक शिक्षा बोर्ड-सीबीएसई के उत्तीर्ण विद्यार्थी मन ल बधाई दीन। एक ठन सोसल मीडिया पोस्ट म श्री मोदी ह किहीन कि विद्यार्थी मनके अथक परिश्रम अउ उपलब्धि उपर हमला गर्व हे। ओमन विद्यार्थी मनके सफलता म परिवार अउ शिक्षक मनके सहयोग बर उंखर सराहना करीन।
उहें, मुख्यमंत्री विष्णुदेव साय ह सीबीएसई के दसवीं अउ बारहवीं परीक्षा के नतीजा जारी होय म उत्तीर्ण छात्र-छात्रा मन ल सुभकामना दीन।
माओवादी-गिरफ्तार/आत्मसमर्पण
बीजापुर जिला म सुरक्षा बल ह आज इकतालीस लाख रूपिया के चौदह झन इनामी माओवादी मन ल गिरफ्तार करे हे।
पुलिस अधीक्षक जितेन्द्र यादव ह बतइन कि डिस्ट्रिक्ट रिजर्व गार्ड-डीआरजी अउ थाना गंगालूर के संयुक्त टीम गस्त बर मुतवेंडी-पीड़िया डहार ले निकले रिहीन। इही दौरान मुतवेंडी के जंगल ले विस्फोटक अउ माओवादी संगठन के प्रचार-प्रसार के सामग्री के संग चौदह झन माओवादी मन ल गिरफ्तार करे गीस। गिरफ्तार माओवादी मन म आठ-आठ लाख रूपिया के दू झन ईनामी माओवादी अउ पांच-पांच लाख रूपिया के तीन झन ईनामी माओवादी सामिल हे।
पुलिस अधीक्षक ह बतइन कि पकड़े गे माओवादी मन मिलिट्री कंपनी नंबर दू अउ गंगालूर एरिया कमेटी अंतर्गत सक्रिय रिहीन। गिरफ्तार माओवादी मन ले चार ठन टिफिन बम, दू कुकर बम, डेटोनेटर, कार्डेक्स वायर अउ जिलेटीन स्टीक बरामद करे गेहे। ए माओवादी मन ल कोर्ट म पेस करे गीस, जिहां ले उनला जेल भेज दे गीस।
उहें, दंतेवाड़ा जिला म आज दू झन माओवादी मन पुलिस के आगू आत्मसमर्पण कर देहे। पुलिस महानिरीक्षक कमलोचन कश्यप अउ पुलिस अधीक्षक गौरव राय के मौजूदगी म ए दूनों माओवादी मन आत्मसमर्पण करीन। ए दूनों उपर कई ठन माओवादी घटना म सामिल होय के आरोप हे। ए दूनों माओवादी मन ल राज्य सरकार के पुनर्वास योजना के तहत पच्चीस-पच्चीस हजार रूपिया के प्रोत्साहन रासि दे जाही।
महादेव सट्टा ऐप
राजधानी रायपुर के एक झन कारोबारी ह महादेव ऑनलाइन सट्टा ऐप के मामला म आत्महत्या कर लेहे। ए घटना सिविल लाईन्स थाना क्षेत्र के आय। घटना स्थल ले पुलिस ल सुसाइट नोट मिले हे, जेमा कारोबारी ह महादेव सट्टा ऐप बर एक झन ल एक बछर पहिली करीब दस लाख रूपिया उधार दे अउ रकम वापस मांगे ले जान से मारे के धमकी देके बात केहे गेहे। पुलिस डहार ले ए मामला के पड़ताल करे जात हे।
इही बीच, उप मुख्यमंत्री अरूण साव ह किहीन कि महादेव सट्टा ऐप मामला म लगातार जांच करे जात हे। लोगन मन एमा पड़के आर्थिक अउ मानसिक रूप ले परेसान होय हे। राज्य सरकार एला लेके गंभीर हे। पुलिस डहार ले ए मामला के लगातार जांच करे जात हे।
एनएमडीसी कर्मचारी-हड़ताल
दंतेवाड़ा स्थित एनएमडीसी के किरंदुल अउ बचेली परियोजना के करमचारी मन ह वेतन पुनरीक्षण के मांग ल लेके काली हड़ताल सुरू कर देहे। एमा लौह अयस्क के उत्पादन अउ परिवहन प्रभावित होय हे। ए हड़ताल म करमचारी मन ह टूल डाउन घोसित कर एनएमडीसी प्रबंधन ल वेतन समझौता उपर गंभीरता से विचार करे के अपील करे हे। संगेसंग करमचारी मनके वेतन पुनरीक्षण ल लंबा समय ले टाले जाय उपर घलो प्रबंधन के खिलाफ हे।
पीआईबी-आपराधिक कानून
पत्र सूचना कार्यालय डहार ले तीन नवा आपराधिक कानून मन उपर रायपुर म काली चौदह मई के वार्तालाप के आयोजन करे जाही। ए वार्तालाप म पुलिस अधिकारी, पत्रकार अउ अलग-अलग सामाजिक संगठन के लोगन मन सामिल होही। बतादन कि ए नवा कानून पूरा देस म एक जुलाई ले लागू होही।
‘‘आयाम-ऊंची उड़ान का‘‘-तिथि
जून महिना म आयोजित यूपीएसी के प्रारंभिक परीक्षा ल देखत हुए अट्ठारा मई के प्रस्तावित मार्गदर्शी कारीकरम ‘‘आयाम-ऊंची उड़ान का‘‘ के आयोजन के तिथि आगू बढ़ा दे गेहे। परीक्षा म सम्मिलित होवइया युवा अउ उंखर अभिभावक मन ह आज रईपुर कलेक्टर गौरव कुमार िंसंह ले मुलाकात कर युपीएससी प्रारंभिक परीक्षा के बाद ही कार्यशाला आयोजित करे के अनुरोध करीन। कलेक्टर डॉक्टर सिंह ह बतइन कि अब ए कार्यसाला युपीएससी प्रीलिम्स परीक्षा के बाद जून के तीसरइया सप्ताह म संभावित हे। ए कार्यसाला म देस के प्रतिष्ठित संस्थान मनके प्रमुख अउ विषय विशेषज्ञ मन डहार ले युवा मन ल मार्गदर्सन दे जाही।
दुर्घटना
कोरबा जिला के करतला थाना क्षेत्र म आज एक ठन कार म भीषण आगी लग गे। ए दुर्घटना म कार चलावत शिक्षक के मउत होगे।
मिले जानकारी के मुताबिक लुढ़खेता मोहल्ला ले कार गुजरत रिहीस, इही दौरान कार म आगी लग गे। मृतक रायगढ़ जिला के छाल थाना इलाका के रहइया रिहीन। कार म शार्ट सर्किट होय के आसंका जताय जात हे। ए हादसा के सूचना गांव के कोटवार ह करतला थाना प्रभारी ल दीन।
अउ अब पेस हे मौसम के हाल…
मौसम विभाग ह अवइया चौबीस घंटा के दौरान प्रदेस म एक-दू जघा म गरज-चमक के संग अंधड़ चले, करा गिरे अउ आकाशीय बिजली गिरे के चेतावनी देहे। मौसम विभाग के अनुसार पश्चिम उत्तर प्रदेस ले दक्षिणी असम तक एक ठन द्रोणिका बने हुए हे। उहें, पूर्वी झारखंड म उपरी हवा के एक चक्रीय-चक्रवाती घेरा स्थित हे। एखर असर ले प्रदेस म बदली अउ बरसा के स्थिति बनत हे। आज प्रदेस के कुछेक जघा म तेज हवा चले, हल्का बरसा होय अउ छींटा पड़े के संभावना हे। उहें, प्रदेस के अधिकतम तापमान म थोरकुन गिरावट होय हे। राजनांदगांव जिला म आज हल्का बूंदाबांदी होइस। संगेसंग दिन के तापमान अड़तीस डिग्री सेल्सियस रिकॉर्ड करे गीस।
उहें, प्रदेस के कुछ संभाग मन म एक-दू जघा म आज हल्का बरसा होइस।
अउ अब थोरकुन समाचार सार म –
– कोंडागांव के कलेक्टर कुणाल दुदावत ह मतदान के बाद ईवीएम के सुरक्षा व्यवस्था देखे बर शासकीय गुण्डाधुर स्नातकोत्तर महाविद्यालय म बनायगे स्ट्रांग रूम के निरीक्षण करीन।
– गौरेला-पेण्ड्रा-मरवाही के कलेक्टर लीना कमलेश मंडावी ह आज कलेक्टोरेट म अधिकारी मन के बइठका लेके अरपा नदी के संवर्धन बर अब तक करेगे काम मनके जानकारी लीन।
– राजनांदगांव के कोतवाली पुलिस ह फर्जी दस्तावेज ले रजिस्ट्री के बाद जमीन ल बेच के फरार दू आरोपी मन ल गिरफ्तार करे हे। ए मामला म दून झन आरोपी मन ल पहिली ही जेल भेजे जा चुके हे।
अउ
– जांजगीर-चांपा जिला के पामगढ़ पुलिस ह चोरी के दू ठन मोटर साइकिल समेत एक झन आरोपी ल गिरफ्तार करे हे। आरोपी ल न्यायायिक हिरासत म भेज दे गेहे। इही मामला के दू झन आने आरोपी मन फरार हे।