प्रदेस म अब आईआईटी के तर्ज म प्रौद्योगिकी संस्थान मनके स्थापना करे जाही। मुख्यमंत्री विष्णुदेव साय ह आज सोसल मीडिया प्लेटफॉर्म एक्स म ट्वीट करके ए जानकारी दीन। ओमन लिखे हे कि राज्य सरकार ह अब छत्तीसगढ़ म आई.आई.टी. असन कई ठिन जघा म प्रौद्योगिकी संस्थान के स्थापना करही। ओमन बतइन कि राज्य सरकार के लक्ष्य प्रदेस म तकनीकी सिक्षा के स्तर ल सुघ्घर बनाना हे।
महादेव सट्टा ऐप-लेनदेन
महादेव ऑनलाइन सट्टा ऐप मामला म क्रिप्टो करेंसी के जरिया लेनदेन करे जात हे। रईपुर पुलिस महानिरीक्षक अमरेश मिश्रा ह आज मीडिया ले चर्चा दौरान ए जानकारी दीन। ओमन किहीन कि महादेव सट्टा ऐप के पेनेलिस्ट ले पूछताछ म ए खुलासा होय हे। उहें, ए मामला म अट्ठारा ठिन राज्य मन म बैंक अकांउट सीज करे गेहे। ओमन किहीन कि बैंक अकांउट खोले के प्रक्रिया के दुरूपयोग होय हे। कहू अगर ए मामला म बैंक के सहभागिता आगू आही त, उहू ल नोटिस जारी करके कार्रवाई करे जाही। आईजी ह बतइन कि दूबई म महादेव ऐप सट्टा ऐप ले जुड़े संचालक मन ल लाय बर हर संभव कार्रवाई करे जात हे।
उहें, अवइया तीन-चार महिना म सबो प्रक्रिया पूरा कर ले जाही।
नीति आयोग डायरेक्टर-दौरा
नीति आयोग दिल्ली के एडिसनल मिसन डायरेक्टर आनंद शेखर आज मोहला-मानपुर जिला के दउरा म रिहीन। ए दौरान ओमन कई ठिन गांव म पहुंचके किसान मनले मोटहा अनाज याने मिलेट्स उत्पादन बारे म जानकारी लीन। संगे आने सासकीय सुविधा मनके व्यवस्था ल घलो देखिन।
श्री शेखर ह गांव बांधाटोला म स्थित आयुष्मान आरोग्य केंद्र पहुंचके स्वास्थ्यकर्मी मन ले केंद्र म उपलब्ध कराय जावत सहूलियत मनके संगे समस्या बारे म घलो जानकारी लीन। उहें, ओमन स्वामी आत्मानंद स्कूल अंबागढ़ चौकी म स्मार्ट क्लास, लैब अउ पढ़ई ले संबंधित सुविधा मन के अवलोकन करीन। ए मउका म ओमन सिक्षक मन ले घलो गोठबात करीन। संगेसंग श्री शेखर ह चिल्हाटी क्षेत्र म स्थित ठोस अउ तरल अपशिष्ट प्रबंधन इकाई मरारटोला म घलो दौरा करीन।
आयाम-ऊंची उड़ान
अखिल भारतीय अउ राज्य प्रशासनिक परीक्षा मनके तइयारी म जुटे जवान लइका मन बर अवइया अट्ठारा मई आयाम-ऊंची उड़ान के आयोजन करे जाही। एमा अखिल भारतीय सेवा के प्रशासनिक, पुलिस, वन-संवर्ग के अधिकारी मनले गोठबात करके प्रतिभागी मन अपन तइयारी बारे म गाइडेंस ले सकही। हाले म यूपीएससी म चुने गे युवा मन घलो ए मउका म अपन अनुभव बांटही।
रईपुर जिला प्रशासन डहार ले होवइया ए कारीकरम म हाई स्कूल अउ हायर सेकेण्डरी परीक्षा म मेरिट म आय पढ़इया लइका मन ल मेधा सम्मान ले सम्मानित करे जाही।
माओवादी मुठभेड़
धमतरी जिला म पुलिस के संग होय मुठभेड़ म एक झिन माओवादी मारेगे हे। उहें, एक आने माओवादी के घायल होय के खबर हे।
नक्सल ऑपरेसन के डीएसपी आर.के. मिश्रा ह बतइन कि धमतरी-गरियाबंद जिला के सरहदी क्षेत्र म माओवादी मनके सकलाय के सूचना मिले बाद धमतरी अउ गरियाबंद पुलिस के संघरा टीम सर्चिंग बर निकले रिहीस, तभे भैंसामुड़ा के जंगल म आगू ले घात लगाय बइठे माओवादी मन जवान मन उपर फायरिंग सुरू कर दीस। तहां जवान मन डहार करे गे जवाबी कार्रवाई म एक झिन माओवादी मारे गीस। जेखर लास बरामद कर ले गेहे। मारेगे माओवादी के पहिचान मंगल मड़काम उर्फ अशोक के रूप म होय हे।
खैरागढ़-मंडीप खोल गुफा
खैरागढ़ जिला के मंडीप खोल गुफा ह काली श्रध्दालू मन बर खुलही। ए मानता हे कि ए गुफा ह भगवान शिव ल समर्पित हे। एला विश्व के छटवां अउ भारत के दूसर सबले बड़का गुफा माने जथे। ए गुफा म भक्ति अउ प्रकृति के अनोखा संगम देखे बर मिलथे।
इंहा ए बतादन कि छुईखदान विकासखंड के गांव ठाकुरटोला तीर बियाबान जंगल भीतरी मंडीप खोल गुफा स्थित हे। ए गुफा ल हर बछर अक्ति के बाद पड़इया पहिली सम्मार के पर्यटक मन बर खोले जथे। ए गुफा ल देखे बर छत्तीसगढ़ के संगे आने राज्य मनके मनखे मन घलो पहुंचथे।
सक्ती-ठगी
सक्ती म स्क्रैप के बिसई-बेचई करइया एक झन मनखे ले कोलकाता के रहवइया दू झन मन उनचास लाख रूपिया ले जादा के ठगी करे हे। ए मामला म पुलिस ह आरोपी मनके खिलाफ एफआई दर्ज करके जांच सुरू कर देहे।
मिले जानकारी मुताबिक सक्ती निवासी रचित अग्रवाल ह स्क्रैप बेचई-बिसई के काम करथे, जउन ह एक ठिन कंपनी ले दाल मिल के प्लांट, मसीनरी, आयरन पाइप, लोहा के सेड, रोलिंग सटर डोर, वॉयर केबल, मोटर अउ आने जिनिस मनके बिसई बर संपर्क करे रिहीस। ए जिनिस मनके सौदा चार करोड़ दस लाख रूपिया म तय होय रिहीस। एखर बाद बैंक के जरिया एक करोड़ ग्यारा लाख रूपिया ले जादा के भुगतान करे गीस। जेमा ले करीबन इकसठ लाख रूपिया के जिनिस पठोय गीस। फेर बांचे उनचास लाख चालीस हजार रूपिया के जिनिस नइ भेजे गीस। फिरहाल ए मामला म सक्ति पुलिस ह जुर्म दर्ज करके आरोपी मनके तलास करत हे।
सिपाही-गोली
रायगढ़ के जूट मिल थाने म पदस्थ कांस्टेबल सनी मालाकार ह आज बिहनिया अपन घर म खुदे ल गोली मार लिस। ए हादसा म कांस्टेबल ह गंभीर रूप ले घायल होगे हे। प्राथमिक इलाज के बाद घायल जवान ल बिलासपुर रेफर कर दे गेहे। घटना के जानकारी मिलतेसाठ पुलिस अधीक्षक दिव्यांग पटेल ह अस्पताल पहुंचके घायल जवान के हालचाल जानीन।
दुर्घटना
जांजगीर-चांपा जिला के गांव अमरताल म ट्रक के चपेट म आय ले एक झिन ग्रामीण के मउत होगे। घटना के बाद घुस्साय गवई मनखे मन चक्काजाम करके अवई-जवई ल छेक देहे। फेर बाद म पुलिस के समझाइस के बाद चक्काजाम सिराइस। उहे, इही जिला के गांव पकरिया म होय रोड एक्सीडेंट म दुर्घटना म एक झिन माईलोगिन के मउत होगे।
क्रिकेट समर कैम्प
जांजगीर म जिला क्रिकेट एसोसिएसन डहार ले समर कैम्प राखे जात हे। जेमा जांजगीर-चांपा जिला के संगे सक्ती जिला के खिलाड़ी मन घलो भाग लेवत हे। जिला क्रिकेट एसोसिएसन क्रिकेट के सचिव पदमेश शर्मा ह बतइन कि ए समर कैम्प म नोनी अउ बाबू दूनों वर्ग के खिलाड़ी भाग लेवत हे।
ओति, भिलाई म बीएसपी डहार ले पढ़इया लइका मन बर ग्रीष्मकालीन खेल प्रसिक्षण सिविर राखे जाही। एखर बर काली ले रजिस्ट्रेसन सुरू होगे हे। अवइया पंद्रह मई के बाद सिविर के औपचारिक उद्घाटन करे जाही। ए सिविर म पचीस ठिन खेल बर ट्रेनिंग दे जाही।
मातृ दिवस
आज दुनिया भर म मातृ दिवस मनाय जात हे। ए दिवस ल हरेक बछर मई महिना के दूसर ईतवार के मनाय जाथे। छत्तीसगढ़ म घलो कई ठिन कारीकरम आयोजित करके मातृ सक्ति मन ल नमन करे जात हे।
मातृ दिवस के मउका म मुख्यमंत्री विष्णुदेव साय ह वीडियो के माध्यम ले प्रदेस के सबो महतारी मन ल नमन करीन हे।
अउ अब सुनव मौसम के हाल…
मौसम विभाग ह अवइया चौबीस घंटा के दौरान प्रदेस के एक-दू जघा म गरजई-चमकई के संगे आंधी-तूफान अउ करा गिरे के चेतावनी देहे। मौसम विभाग क अनुसार पश्चिम उत्तर प्रदेस ले दक्षिणी असम तक एक ठिन द्रोणिका बने हुए हे। उहें, पूर्वी झारखंड म उपरी हवा के एक ठिन चक्रीय चक्रवाती घेरा स्थित हे। एखर असर ले प्रदेस म बादर पानी के स्थिति बनत हे।