राष्ट्रपति द्रौपदी मुर्मू ह राष्ट्रपति भवन म राखेगे समारोह म जांजगीर-चांपा जिला के भंवरमाल गांव के रामलाल बरेठ ल कत्थक नृत्य के क्षेत्र म उंखर योगदान बर पद्मश्री पुरस्कार ले सम्मानित करीन। पंडित रामलाल बरेठ के जनम छै मार्च उन्नीस सौ छत्तीस के होइस। श्री बरेठ नृत्य के संगेसंग तबला वादन अउ गायन म घलो पारंगत हवय। अपन कला के प्रदर्सन देस म कतकोन जघा म करे हे। श्री रामलाल ससत्तर बछर ले कला साधना करत हे।
खबर के मुताबिक रामलाल बरेठ अउ उंखर पिता कार्तिक राम बरेठ रायगढ़ राजघराना ले जुडे़ रही के कत्थक सिखावत रिहीन। रायगढ़ के चक्रधर संगीत विद्यालय ले घलो नाता रिहीस। एखर पहिली कतकोन पुरस्कार अउ सम्मान मिल चुके हे।
उच्च न्यायाधीश-ग्रीष्म अवकाश
छत्तीसगढ़ उच्च न्यायालय म तेरह मई ले सात जून तक गर्मी के छुट्टी घोषित करे गेहे। ए संबंध म हाईकोर्ट के रजिस्ट्रार विनोद कुजूर ह आदेस जारी करे हे। उच्च न्यायालय दस जून के फेर से खुलही। छुट्टी के दौरान हाईकोर्ट के जज मन ल सुनवाई अउ केस दाखिल करे के निरदेस जारी करे गेहे। ए बेरा म सबो सिविल अपराधिक अउ रिट मामला दायर करे जाही। अवकास कालीन न्यायधीश बिहनिया साढ़े दस बजे ले डिवीजन बेंच कोर्ट के सुनवाई करही। उहें, गर्मी के छुट्टी के दौरान शनिच्चर, ईतवार अउ छुट्टी ल छोड़के रजिस्ट्री बर हरेक दिन बिहनिया दस बजे ले पांच बजे तक खुले रइही।
मुख्य न्यायधीश-म्यूजिसम उद्घाटन
छत्तीसगढ़ उच्च न्यायालय के मुख्य न्यायधीश रमेश सिन्हा ह उच्च न्यायालय भवन म आर्काइव अउ म्यूजियम कक्ष के काली उद्घाटन करीन। ए मउका म जम्मों न्यायमूर्तिगण मौजूद रइही। आर्काइव कक्ष म बछर अट्ठारा सौ उनयासी के दस्तावेज सेंट्रल प्रोविजन्स अउ बरार के नक्सा, सेंट्रल प्रोविजन्स म नागपुर उच्च न्यायालय ले जुड़े दस्तावेज अउ भवन के सुंदर फोटो संविधान समिति के सदस्य मनके फोटू अउ अविभाजित मध्य प्रदेस के प्रथम मुख्यमंत्री स्वर्गीय रविशंकर शुक्ल के फोटू घलो हवय।
उहें, मध्यप्रदेस उच्च न्यायालय, जबलपुर के भवन के फोटू, छत्तीसगढ़ उच्च न्यायालय बिलासपुर के स्थापना ले जुड़े राजपत्र के फोटू के संगेसंग बहुत अकन ऐतिहासिक फोटू लगाय गेहे। एखर ले लोगन ल छत्तीसगढ़ उच्च न्यायालय अउ न्यायिक व्यव्स्था के संबंध म जानकारी मिलही।
न्यायाधीश-शपथ
छत्तीसगढ़ उच्च न्यायालय के मुख्य न्यायाधीश रमेश सिन्हा ह न्यायमूर्ति राकेश मोहन पांडेय, न्यायमूर्ति सचिन सिंह राजपूत अउ न्यायमूर्ति राधाकिसन अग्रवाल ल सपथ देवाइन। न्यायमूर्ति राकेश मोहन पांडेय स्थाई जज के रूप म, न्यायमूर्ति सचिन सिंह राजपूत अउ न्यायमूर्ति राधाकिसन अग्रवाल ह एडिसनल जज के रूप म सपथ लीन। ए बेरा म सबो माननीय न्यायमूर्तिगण मौजूद रिहीन।
खबर के मुताबिक विधि अउ विधायी कार्य विभाग नई दिल्ली कोति ले नौ मई के ए संबंध म अधिसूचना जारी करे गे रिहीस।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली अउ छत्तीसगढ़ राज्य सेवा विधिक सेवा प्राधिकरण बिलासपुर कोति ले ऐसो होवइया राष्ट्रीय लोक अदालत के तारीख म फेर बदल करे गेहे। एखर मुताबिक ग्यारा मई के होवइया राष्ट्ररीय लोक अदालत ह अब तेरह जुलाई के होही। अइसने चौदह सिंतबर के होवइया नेसनल लोक अदालत के आयोजन इक्कीस सितंबर के करे जाही।
विजय बघेल-पत्रकारवार्ता
भरतीय जनता पार्टी के सांसद विजय बघेल ह आज रईपुर म पत्रकारवार्ता म बोलत पूर्व मुख्यमंत्री भूपेश बघेल के स्वामी आत्मानंद स्कूल के नाव बदले उपर देगे बयान के आलोचना करीन हे। ओमन किहीन कि स्वामी आत्मानंद स्कूल ल पीएमश्री योजना म लाय के योजना हे। एखर ले स्कूल के गुणवत्ता म सुधार होही।
खनिज सचिव-बैठक
केंद्रीस खनिज सचिव वी.एल.कांताराव ह नवा रईपुर म राजस्व पर्यावरण अउ खनिज विभाग के सचिव, अधिकारी मनके बइठका लेके छत्तीसगढ़ म खनन के काम ल बने ढंग ले चलाय खातिर गोठबात करीन। बइठका म केंद्रीय सचिव श्री राव ह किहीन कि खुदई वाले क्षेत्र म ग्रीन माइनिंग के नवा तकनीक बउरे जाना चाही। ओमन खनिज संसाधन के जीडीपी म अभी म दू प्रतिसत के भागीदारी ल बढ़ाय म बनही।
सड़क दुर्घटना-नियंत्रण
राज्य म होवइया रद्दा दुर्घटना ल रोके के उपाय के संबंध म पुलिस महानिरीक्षक नेहा चंपावत के अगुवई म वर्चुअल समीक्षा बइठका राखे गीस। एमा रद्दा दुर्घटना होय के कारण अउ ओमा जरूरी सुधार म गोठबात करे गीस। संगेसंग केंद्र सरकार के तीन नवा कानून के संबंध म जानकारी दे गीस। एखर संगेसंग हिट-एंड-रन मामला ल तुरते सुलझाय के निरदेस दे गीस। ए बइठका म ए.आई.जी. टै्रफिक समेत यातायात के सबो अधिकारी संघरीन।
माओवादी मुठभेड़
बीजापुर जिला के पीड़िया के जंगल म काली होय मुठभेड़ म मारेगे बारह झिन मारेगे माओवादी म दस झिन के पहिचान कर ले गेहे। ए माओवादी बस्तर, दरभा, मलांगीर अउ गंगालूर क्षेत्र म कमांडर के रूप म सक्रिय रिहीन।
खबर के मुताबिक सूचना मिलतेच सुरक्षा बल गस्त म निकलीन। सुरक्षाबल अउ माओवादी मनके बीच मुठभेड़ बारह घंटा तक चलिस। ए मुठभेड़ म बारह झिन माओवादी के सव बरामद करे गीस। उहें, तीन झिन माओवादी अउ गांव के एक मनखे घायल अवस्था म मिले हे, जउन ल इलाज खातिर जिला अस्पताल म भर्ती कराय गेहे। सुरक्षा बल ह मउका ले बारह बोर के बंदूक बीजीएल लॉन्चर, रायफल बड़ मात्रा म विस्फोटक के संग दवई, माओवादी वर्दी अउ साहित्य बरामद करे हे।
जीएसटी-छापा
स्टेट जीएसटी के टीम ह रईपुर के तीन कारोबारी के इंहा छापामार के करोड़ो रूपिया के जीएसटी चोरी पकड़े हे। अधिकारी मन ह ड्रीम डेकोरेटर्स, फ्लावर स्टोरी अउ टेंट फैक्टरी के नाव ले चलत वबेसाइट प्रतिष्ठान के जांच करे गीस। ए दुकान मन ह अपन गलती मानत करीबन साढ़े चार करोड़ रूपिया जीएसटी मउकच म जमा करीन। उंखर तीर ले टेंट, पर्दा अउ सजावटी जिनिस के जरूरत ले जादा स्टाक मिले हे, जेमा अधिकारी कोति ले टैक्स अउ ब्याज लगाय गीस।
रिक्त पद-अनुमति
राज्य सरकार ह सब्बो सरकारी विभाग म सोज्झे भर्ती के खाली पद ल भरे बर वित्त विभाग के मंजूरी जरूरी कर देहे। एमा लोकसेवा आयोग ले होवइया सीधी भर्ती के खाली पद के संग अनुकंपा नियुक्ति के पद म छूट दे गेहे। उहें, चालू वित्तीय बछर ले लोकसेवा आयोग कोति ले हरेक बछर होवइया, संयुक्त राज्य सेवा परीक्षा म सामिल पद ल छोड़के विभाग मन म राज्य लोक सेवा आयोग कोति ले भरइया आने पद म भर्ती सुरू करे के पहिली वित्त विभाग के मंजूरी जरूरी करे गेहे।
समर स्पेशल ट्रेन
रेलवे कोति ले पुणे अउ बालेश्वर के बीच एक फेरा बर समर स्पेसल ट्रेन चलाय जाही। ए ट्रेन अट्ठारा मई के पुणे ले बालेश्वर बर रवाना होही। उहें, बीस मई के बालेश्वर ले पुणे लहुटही। ए गाड़ी म बाईस कोच रिही। उहें, छत्रपति शिवाजी महाराज टर्मिनल अउ बालेश्वर के बीच घलो एक फेरा बर समर स्पेसल ट्रेन के सुविधा दे जावत हे।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र एके संघ रिले करही। ए बखत के अंक म ‘‘बलौदाबाजार‘‘ जिला के काम-काज के बारे म जानकारी दे जाही।
हल्बी/गोण्डी-समाचार बुलेटिन
अउ अब जानन मौसम के हाल…
प्रदेस म काली कुछेक जघा म छुटपूट बरसा संग हवा गरेर अउ गाज गिरे के संभावना जताय हे। मौसम विभाग ले मिले जानकारी के मुताबिक एक द्रोणिका पश्चिमी उत्तर प्रदेस ले दक्षिणी असम तक हवय। उहें, एक द्रोणिका मराठवाड़ा ले कोमोरान तक बने हे, जेखर परभाव ले काली प्रदेस के कुछेक जघा म छुटपूट बरसा हो सकत हे।