बीजापुर जिला म सुरक्षा बल अउ माओवादी मनके बीच मुठभेड़ होय के खबर हे। पुलिस अधीक्षक जितेन्द्र यादव ह बतईन कि गंगालूर थाना क्षेत्र के पीड़िया के जंगल म माओवादी नेता मनके मौजूद होय के सूचना मिले म सुकमा, बीजापुर अउ दंतेवाड़ा ले एसटीएफ, डीआरजी अउ सीआरपीएफ के संयुक्त टीम मउका बर रवाना करे गे रिहीस। इहीं दउरान आज बिहनिया माओवादी मन संग जवान मनके मुठभेड़ होगे। मुठभेड़ म सात ले आठ माओवादी मनके मारे जाय के खबर हे।
पद्म पुरस्कार
राष्ट्रपति द्रौपदी मुर्मू ह काली राष्ट्रपति भवन म राखे गे एक समारोह म दू पद्म विभूषण, नौ पद्म भूषण अउ छप्पन पद्मश्री पुरस्कार दीन। पद्मश्री पुरस्कार पाने वाला म छत्तीसगढ़ के जशपुर जिला के समाज सेवक जागेश्वर यादव घलो सामिल रिहीन। बिरहोर जनजाति के जागेश्वर यादव ल ए साल पद्मश्री पुरस्कार बर चुने गे रिहीस। बिरहोर आदिवासी मनके उत्थान बर अच्छा काम करे के सेती ओमन ल ए सम्मान दे गेहे। जागेश्वर यादव बगीचा विकासखंड के भीतघरा गांव के रहइया हरय अउ ओमन बछर उन्नीस सौ नवासी ले बिरहोर जनजाति के बिकास बर काम करत हे। ओमन जशपुर जिला म एक आश्रम के घलो स्थापना करे हे।
बता दन कि बछर दू हजार पंदरा म जागेश्वर यादव ल आदिवासी उत्थान म उंखर असाधारण योगदान बर राज्य सरकार डहार ले सहीद वीरनारायण सिंह पुरस्कार दे गे रिहीस।
जागेश्वर यादव ल पद्मश्री दे जाए म मुख्यमंत्री विष्णुदेव साय ह ओमन ल बधई अउ सुभकामना दीन हे। ओमन उखंर जीवन ल प्रेरणादायक बताइन।
उहें, वित्त मंत्री ओ.पी. चौधरी ह घलो जागेश्वर यादव ल देश के चौथा सर्वोच्च नागरिक पुरस्कार पद्मश्री मिले म बधई दीन।
महादेव सट्टा ऐप
महादेव सट्टा ऐप मामला म दुरूग के सराफा व्यापारी प्रकाश सांखला ल आर्थिक अपराध अन्वेषण ब्यूरो-ईओडब्ल्यू ह हिरासत म लेहे। ईओडब्ल्यू ह काली दुरूग म उंखर घर अउ भिलाई स्थित दुकान म दबिश दे रिहीस। काली रतिहा ओमन ल हिरासत म रईपुर लाय गे रिहीस। उंखर उपर महादेव ऐप ले जुड़े लोगन मनके पइसा कारोबार म निवेस करे के आरोप हे।
हाईकोर्ट-आईपीएस जीपी सिंह
छत्तीसगढ़ के उन्नीस सौ चौरानबे बैच के आईपीएस जी.पी. सिंह ल छत्तीसगढ़ उच्च न्यायालय ह बड़का राहत दे हे। उंखर उपर लगाए गे राजद्रोह के मामला के प्रोसिडिंग उपर हाईकोर्ट ह रोक लगा देहे। उहें, एखर पहिली एक मई के केंद्रीय प्रसासनिक न्यायाधिकरण-कैट ह जी.पी. सिंह ले जुड़े जम्मों मामला मनके निराकरण करके बहाल करे जाए के आदेस दे रिहीन।
मुख्यमंत्री-विद्यार्थी बातचीत
मुख्यमंत्री विष्णुदेव साय आज दसवीं अउ बारहवीं के टॉपर विद्यार्थी मन संग सीधा वीडियो कॉल करके गोठबात करीन अउ ओमन ल सफलता बर बधई दिन। लइका मन के अपन मुख्यमंत्री ले अइसे अचानक गोठबात करना अच्छा अनुभव रिहीस। मुख्यमंत्री लइका मन ले उंखर भविष्य के योजना मनके बारे में घलो पूछीन अउ ओमन ल सरगल मेहनत करे के सलाह दीन। मुख्यमंत्री ह लइका मन ल देस के भविष्य बतावत ओमन के अभिभावक अउ गुरू मन ल भी बधई अउ सुभकामना दीन।
केदारनाथ धाम
उत्तराखंड म आज ले पवित्र चारधाम यात्रा के सुभारंभ होईस। अक्ती के पावन मउका म ग्यारहवां ज्योर्तिलिंग श्री केदारनाथ, गंगोत्री अउ यमुनोत्री धाम के कपाट श्रद्धालु मन बर खोल दे गीस। केदारनाथ धाम के कपाट आज बिहनिया वैदिक मंत्रोच्चार अउ पारंपरिक अनुष्ठान के संग खोले गीस, जेखरे संग चारधाम यात्रा के सुरूआत होइस। उहें, बद्रीनाथ के कपाट बारह मई के विधि-विधान ले खोले जाही।
राज्यपाल-कृषि विवि
राज्यपाल विश्वभूषण हरिचंदन ह काली इंदिरा गांधी कृषि विश्वविद्यालय के कुलपति डॉक्टर गिरीश चंदेल ले सौजन्य भेंट करीन। इही दउरान डॉक्टर चंदेल ह राज्यपाल ल कृषि विश्वविद्यालय डहार ले विकसित धान के नवा प्रजाति ‘संजीवनी धान’ के बारे म जानकारी दीन। डॉक्टर चंदेल ह बतईन कि भाभा एटॉमिक रिसर्च इंस्टीट्यूट मुंबई के सहयोग ले औषधीय गुण वाले परंपरागत् प्रजाति ले ऐला तियारी करे गेहे, जउन सरीर के रोग-प्रतिरोधक क्षमता ल बढ़ाथे अउ संघरा एमा एंटी कैंसर गुण घलो पाए गेहे। ए मउका म राज्यपाल ह किहीन कि संजीवनी धान के जादा मात्रा म उत्पादन करे जाए, जेखर ले जादा ले जादा लोगन मन ल एखर फायदा मिल सकय।
अक्षय तृतीया
ए मउका म रईपुर के इंदिरा गांधी कृषि विश्वविद्यालय म आज अक्ती तिहार समारोह राखे गीस। कुलपति डॉक्टर गिरीश चंदेल ह विश्वविद्यालय परिसर म माटी पूजन अउ बीज संस्कार करके खेत म धान के बीज के बोआई करीन। ए मउका म ओमन विश्वविद्यालय के आंतरिक बस सेवा के सुभारंभ घलो करीन।
राज्यपाल विश्वभूषण हरिचंदन ह अक्ती के मउका म प्रदेसवासी मन ल हार्दिक बधई दीन हे।
ए साल अक्षय तृतीया म होवइया बाल विवाह ल रोके बर जिला प्रसासन चौकस रिहीस। दंतेवाड़ा कलेक्टर मयंक चतुर्वेदी के निरदेस म यूनिसेफ के सहयोग ले जिला बाल संरक्षण इकाई डहार ले बाल विवाह के रोकथाम बर पच्चीस अपै्रल ले दस मई तक बाल विवाह रोकथाम पखवाड़ा के आयोजन करे गीस। एखर तहत यूनिसेफ के युवोदय वॉलेंटियर्स डहार ले ‘पहले पढ़ाई फिर विदाई’ नारा के संग जिला के जम्मों पंचायत अउ सहरी क्षेत्र मन म बैनर-पोस्टर, रैली, नुक्कड़-नाटक, रंगोली अउ सुपोषण चौपाल जइसे आने-आने आयोजन के माध्यम ले बाल विवाह के दुष्परिणाम के जानकारी दे गीस।
इही बीच, जांजगीर-चांपा जिला के अकलतरी गांव म जिला प्रसासन के मदद ले आज एक झिन नाबालिग नोनी के बिहाव रूकवाय गीस। ए गांव म दू बहिनी मनके एके संग बिहाव होवत रिहीस, जेमा छोटे बहनी नाबालिग रिहीस। सूचना मिले के बाद महिला अउ बाल विकास विभाग के अधिकारी मन गांव में दबिश दीन अउ नाबालिग लड़की के बिहाव रूकवाइस।
दीपक बैज-आत्मानंद स्कूल
प्रदेस कांग्रेस अध्यक्ष दीपक बैज ह किहीन कि प्रदेस म स्वामी आत्मानंद स्कूल मनके नाव बदले जाए के उंखर पार्टी हर स्तर म विरोध करही। ओमन आज एक बयान म किहीन कि स्वामी आत्मानंद छत्तीसगढ़ म जन्मे एक विद्वान संत अउ विश्व विख्यात आध्यात्मिक व्यक्तित्व रिहीन। ए स्कूल महत्वाकांक्षी योजना के तहत सुरू करे गे रिहीस, जेमा गरीब लइका मन ल मुफत म अंग्रेजी माध्यम के सिक्षा दे गीस अउ एखर सार्थक परिणाम घलो आगू आईस।
श्री बैज ह किहीन कि अब भारतीय जनता पार्टी के सरकार स्कूल ले उंखर नाव ल हटाना चाहत हे। सासन कोती ले स्वामी आत्मानंद स्कूल योजना के नाव बदलके पीएमश्री करे के आदेस जारी करे गेहे।
बातों-बातों में
रायपुर ननि-फूल बाजार
रायपुर नगर निगम ह राजधानीवासी मन ल फूल बाजार देके तियारी सुरू कर देहे। भाटागांव बस स्टैंड के आगू खाली पड़े जमीन उपर ए बाजार बनाय जाही। निगम आयुक्त अविनाश मिश्रा ह मउका के निरीक्षण करीन अउ अधिकारी मन ल नवा फूल बाजार बनाए के प्रस्ताव तियार करके जरूरी कार्यवाही करे के निर्देस दीन।