छत्तीसगढ़ माध्यमिक शिक्षा मंडल ह आज दसवीं अउ बारहवीं बोर्ड परीक्षा के नतीजा जारी कर देहे। दसवीं के परीक्षा म करीबन छिहत्तर प्रतिसत विद्यार्थी पास होय हे। उहें, बारहवीं के परीक्षा म करीबन इक्यासी प्रतिसत विद्यार्थी सफल होय हे। छत्तीसगढ़ माध्यमिक सिक्षा मंडल के अध्यक्ष रेणु जी. पिल्ले अउ सचिव पुष्पा साहू ह परीक्षा परिणाम जारी करीन। ओमन बतइन कि दसवीं परीक्षा म पास होय नोनी मनके प्रतिसत उनयासी प्रतिसत ले जादा हे अउ बाबू मनके प्रतिसत करीबन इकहत्तर प्रतिसत रिहीस। अइसने बारहवीं के परीक्षा म चौरासी प्रतिसत नोनी अउ ससत्तर प्रतिसत बालक पास होय हे। एसो घलो ए दूनों परीक्षा म नोनी मन ह बाजी मारिन हे। दसवीं के प्रावीण्य सूची म जशपुर के स्वामी आत्मानंद शासकीय उत्कृष्ट अंग्रेजी माध्यम स्कूल के छात्रा सिमरन शबा ह निनान्वे दसमलव पांच प्रतिसत अंक लाके अव्वल स्थान म जघा बनाय हे।
उहें, गरियाबंद जिला के कोपरा के सरस्वती शिशुमंदिर के छात्रा होनिशा ह अंठानवे दसमलव आठ-तीन प्रतिसत नंबर लाके दूसर स्थान अउ जशपुर के ही स्वामी आत्मानंद अंग्रेजी माध्यम स्कूल के छात्र श्रेयांश कुमार यादव ह अंठानवे दसमलव तीन-तीन प्रतिसत अंक लाके तीसर स्थान म जघा बनाय हे। दसवीं के टॉपटेन सूची म उनसठ विद्यार्थी मन ह जघा बनइन। दूसर कोति बारहवीं के प्रावीण्य सूची म सरायपाली के महक अग्रवाल संतानवे दसमलव चार प्रतिसत अंक के संग अव्वल आय हे। बलौदाबाजार जिला के कोपल अम्बस्ट ह संतानवे प्रतिसत लाके दूसर अउ छियानवे दसमलव आठ प्रतिसत नंबर संग बलौदाबाजार जिला के प्रीति अउ जशपुर जिला के आयुषी गुप्ता ह संयुक्त रूप ले तीसर स्थान हासिल करे हे। बारहवीं के टॉपटेन सूची म बीस विद्यार्थी मन सामिल हे।
दसवीं/बारहवीं-परिणाम-02
परीक्षा परिणाम जारी होय के बाद पत्रकार मन ले गोठबात करत माध्यमिक सिक्षा मंडल के अध्यक्ष रेणु जी. पिल्ले ह बतइन कि दसवीं के मुख्य परीक्षा म तीन लाख चालीस हजार ले जादा परीक्षार्थी सामिल होय रिहीन। बारहवीं के मुख्य परीक्षा म दू लाख अंठावन हजार ले जादा विद्यार्थी सामिल होइन। ओमन बतइन के परीक्षा के नतीजा मंडल के वेबसाइट म देखे जा सकथे।
राज्यपाल विश्वभूषण हरिचंदन अउ मुख्यमंत्री विष्णुदेव साय ह दसवीं अउ बारहवीं परीक्षा म पास होय पढ़ईया लइका मन ल बधई अउ सुभकामना दीन हे। राज्यपाल ह किहीन कि विद्यार्थी मन अपन जिनगी के महत्वपूर्ण पड़ाव पार करे हे, जउन ओखर मेहनत अउ लगन के परिणाम हे। संगेसंग ओमन ए परीक्षा म जउन विद्यार्थी पास नइ होय हे, ओमन ल निरास नइ होय के समझाइस देत फेर लगन अउ मेहनत ले पढ़ई करे बर किहीन। उहें, मुख्यमंत्री ह किहीन कि जउन लइका मन के नतीजा उंखर सोच के मुताबिक नइ आय हे, ओमन ल निरास होय के जरूरत नइ हे। सरलग मेहनत करय, भविष्य म अउ बने मउका मिलही।
व्यापमं-परीक्षा तिथि संशोधन
छत्तीसगढ़ व्यावसायिक परीक्षा मंडल व्यापम ह चालू सैक्षणिक सत्र बर आने-आने प्रवेस अउ पात्रता परीक्षा के तारीख म फेरबदल करे हे। अब पी.ए.टी., पी.व्ही.पी.टी., बीएसी.(कृषि), बीएससी (उद्यानिकी), पशुपालन म डिप्लोमा अउ मत्यस्यकी विज्ञान म डिप्लोमा, प्री.बी.ए.एड. अउ प्री.बीएसी बीएड के परीक्षा अब नौ जून के होही। पहिली ए परीक्षा बर सोलह जून के तारीख तय करे गे रिहीस। उहें, बीएससी नर्सिंग, पोस्ट बेसिक नर्सिंग अउ एमएससी नर्सिंग के परीक्षा सात जुलाई के जघा म चौदह जुलाई के होही। उहें, पी.ई.टी., पी.एम.सी.ए. अउ पी.पी.एच.टी. के परीक्षा तेरह जून के ले जाही। उहें, पी.पी.टी. अउ टी.ई.टी. पात्रता परीक्षा तेईस जून अउ प्री बीएड अउ प्री डी.एल.एड के परीक्षा तीस जून के होही।
राज्यपाल मुलाकात
राज्यपाल विश्वभूषण हरिचंदन ले आज राजभवन म बछर दू हजार तेईस बैच के भारतीय प्रशासनिक सेवा के चार परिवीक्षाधीन अधिकारी मन ह सौजन्य भेंट करीन। ए मउका म राज्याल ह अधिकारी मन ल सुभकामना दीन अउ किहीन कि ओमन अपन जिम्मेवारी बने ढंग ले निभात देस अउ समाज के सेवा बर हमेसा तियार रहय। ओमन किहीन कि छत्तीसगढ़ आदिवासी बहुल प्रदेस हे। इंहा जनजाति समस्या ल सुलझाय बर संवेदना के संग काम करे बर पढ़ही।
उहें, राज्यपाल ह आज राजभवन म आने-आने विश्वविद्यालय के कुलपति मनले घलो भेंट करीन। एमा रईपुर के इंदिरा गांधी कृषि विश्वविद्यालय के कुलपति डॉक्टर गिरिश चंदेल, स्वामी विवेकानंद तकनीकी विश्वविद्यालय भिलाई के कुलपति डॉक्टर एम. के. वर्मा, अटल बिहारी वाजपेयी विश्व विद्यालय बिलासपुर के कुलपति प्रोफेसर ए.डी.एन. वाजपेयी अउ पंडित रंविशंकर शुक्ल विश्व विद्यालय रईपुर के कुलपति प्रोफेसर सच्चिदानंद शुक्ला सामिल रिहीन।
मुख्य निर्वाचन पदाधिकारी-आभार
राज्य के मुख्य निर्वाचन पदाधिकारी रीना बाबासाहेब कंगाले ह प्रदेस म लोकसभा चुनाव म अपन भागीदारी देवइया अधिकारी, करमचारी, सरकारी प्राईवेट संगठन, लोकसेवी संस्था अउ मतदाता मन बर आभार जतइन हे। ओमन किहीन कि प्रदेस मतदाता मन ह उछाह के संग अपन अधिकार के परयोग करीन अउ लोकतांत्रिक व्यवस्था म अपन भागीदारी दीन। श्रीमती कंगाले ह केंद्रीय सुरक्षा बल अउ राज्य पुलिस बल बर अपन आभार जतात किहीन कि ओमन स्वतंत्र, निष्पक्ष, चुनाव कराय म महत्ता के भूमिका निभाइन हे। ओमन प्रिंट इलेक्ट्रानिक अउ सोसल मीडिया के पत्रकार मन बर आभार जतइन कि ओमन चुनाव के बेरा ओखर ले जुड़े जरूरी दिसा-निरदेस अउ मतदाता मन ल वोट डारे बर प्रेरित करीन।
खबर के मुताबिक प्रदेस म ए बखत के लोेकसभा चुनाव के मतदान प्रतिसत म एक दसमलव तीन-एक प्रतिसत के बढ़वार होय हे। लोकसभा चुनाव के तीन चरण मतदान होय म प्रदेस के करीबन तिहत्तर प्रतिसत मतदाता मन ह अपन अधिकार के परयोग करीन। जउन प्रदेस म अभी तक होय लोकसभा चुनाव म मतदान के सबले जादा प्रतिसत हे।
स्वास्थ्य मंत्री बैठक
स्वास्थ्य मंत्री श्याम बिहारी जायसवाल ह प्रदेस के सबो अस्पताल मन म परयाप्त मात्रा म दवई राखे के निरदेस दीन हे। अधिकारी मनके बइठका म किहीन कि प्रदेस के जनता ल सस्ता अउ बने जेनेरिक दवई मिल सकय एखर बर सबो जिला अस्पताल अउ सामुदायिक स्वास्थ्य केंद्र म प्रधानमंत्री जनौषधी केंद्र खोले जाही।
राज्यपाल-ज्ञापन
राष्ट्रीय पात्रता सह-प्रवेश परीक्षा नीट म करीबन चार सौ विद्यार्थी मन संग होय कथित अन्याय ल लेके कांग्रेस के एक प्रतिनिधि मंडल ह आज राजभवन म राज्यपाल विश्वभूषण हरिचंदन ले भेंट करके ज्ञापन सौंपिन। कांग्रेस के नेता मन ह मांग करीन कि परभावित लइका मन बर फेर ले परीक्षा ले जाय या ओमन ल बोनस अंक दे जाय। ए मउका म प्रदेस कांग्रेस कमेटी के प्रभारी महामंत्री मलकित िंसंह गैंदू, शैलेष नितिन त्रिवेदी अउ वरिष्ठ प्रवक्ता विकास तिवारी मौजूद रिहीन।
न्योता भोजन
प्रदेस के स्कूल मन म बने सिक्षा संग लइका मन ल पौष्टिक भोजन देके सुरू करे गे योजना न्योता भोजन ल अवइया सिक्षा सत्र ले अउ जादा प्रभावित बनाय जाही। एमा सबो जिला सिक्षा अधिकारी मन ल वार्षिक कैलेंडर बनाय के निरदेस दे गहे। जेखर ले सबो स्कूल म लइका मन ल महिना म कम से कम दू घांव न्योता भोजन के फायदा मिल सकही।
समर स्पेशल ट्रेन
गर्मी म रेल यात्री मनके सुविधा ल धियान म राखत रेलवे ह अहमदाबाद-पुरी-पालधी के बीच एक अतिरिक्त फेरा बर समर स्पेसल ट्रेन के सुविधा देहे। ए ट्रेन काली दस मई के अहमदाबाद ले पुरी-पालधी बर रवाना होही। उहें, बारह मई के ए पुरी-पालधी ले अहमदाबाद बर चलही। एमा कुल बाईस कोच हवय।
दुर्घटना
राजनांदगांव जिला म डोंगरगांव ले लगे संबलपुर गांव तीर आज दू ठन फटफटी के बीच होय भिडंत म फटफटी चलइया दूनों मनखे के मउकच म मउत होगे। उहें, दू झन नोनी घायल होगे हे, जउन मन ल प्राथमिक उपचार के बाद राजनांदगांव मेडिकल कॉलेज म ईलाज बर भेजे गेहे।