प्रदेस म लोकसभा चुनई के तीसर चरण म सात संसदीय क्षेत्र म काली होय मतदान के आंकड़ा आ गेहे। निर्वाचन आयोग कोति ले जारी आंकड़ा के मुताबिक ए सबो लोकसभा क्षेत्र म करीबन बहत्तर प्रतिसत मतदान होइस हे। सबले जादा सरगुजा लोकसभा क्षेत्र म करीबन अस्सी प्रतिसत मतदान दरज करे गीस। उहें, सबले कमती बिलासपुर लोकसभा क्षेत्र म करीबन पैंसठ प्रतिशत मतदान होइस। उहें, रायगढ़ लोकसभा क्षेत्र म उनयासी, जांजगीर-चांपा म अड़सठ, कोरबा म छिहत्तर, दुरूग म चौहत्तर अउ रईपुर लोकसभा क्षेत्र म करीबन सड़सठ प्रतिशत मतदान होइस हे। विधानसभावार आंकाड़ा के बात करन त, रायगढ़ लोकसभा क्षेत्र के धरमजयगढ़ विधानसभा क्षेत्र म सबले जादा चौरासी दसमलव छै एक प्रतिसत मतदान होय हे। उहें, रईपुर लोकसभा क्षेत्र के रईपुर पश्चिम विधानसभा क्षेत्र म सबले कमती छप्पन दसमलव छै पांच प्रतिसत मतदान दरज करे गीस।
उहें, बछर दू हजार उन्नीस म होय लोकसभा चुनई म ए सातों लोकसभा क्षेत्र म करीबन इकहत्तर प्रतिसत मतदान होय रिहीस। पाछु बेरा के तुलना म ए बखत ए संसदीय क्षेत्र मन म मतदान के प्रतिसत करीबन एक प्रतिसत जादा हवय।
खबर के मुताबिक राज्य के ग्यारह लोकसभा सीट म पहिली चरण म उन्नीस अप्रैल के बस्तर म, छब्बीस अप्रैल के दूसर चरण म तीन लोकसभा सीट- राजनांदगांव, कांकेर अउ महासमुंद म मतदान होय रिहीस। वोट के गनती चार जून के होही अउ इही दिन चुनाव के नतीजा आही।
स्ट्रांग रूम-ईव्हीएम मशीन
प्रदेस म तीसर चरण के मतदान होय के बाद ईव्हीएम अउ वीवीपैट मसीन ल सुरक्षा के संग जिला म बनाय गे स्ट्रांग रूम म सील कर दे गेहे। उहें, स्ट्रांग रूम के बाहिर सुरक्षा के चाक-चौबंद व्यवस्था करे गेहे। संगेसंग सीसीटीवी कैमरा ले सरलग नजर राखे जात हे।
बलरामपुर जिला के भेलवाडीह के लॉइवलीहुड कॉलेज म बनाय गे स्ट्रांग रूम म ईव्हीएम अउ वीवीपैट मसीन ल जिला निर्वाचन अधिकारी रिमीजियूस एक्का, वरिष्ठ पुलिस अधीक्षक अउ राजनीतिक दल के प्रतिनिधि मनके मौजूदगी म सील करे गीस।
उहें, सक्ति जिला के नंदेली भाटा के स्ट्रांग रूम म ईव्हीएम मसीन ल सुरक्षा के बीच रखे गेहे। जिला प्रशासन कोति ले सीसीटीवी कैमरा ले निगरानी करे जात हे। एखर बर मॉनिरिंग कक्ष बनाय गेहे।
साय/बैज-बयान
मुख्यमंत्री विष्णुदेव साय ह किहीन हे कि भारतीय जनता पार्टी ह लोकसभा चुनाव विकसित भारत के विजन म लड़े हे। उहें, कांग्रेस नेता मन सिरिफ झूठ के संग दीन। श्री साय ह सोशल मीडिया म केहे हे कि कांग्रेस ह संविधान अउ आरक्षण म सरलग भरम फैलाय के परयास करीस। एखर बर फर्जी वीडियो घलो वायरल करे गीस। ओमन ह किहीन कि प्रदेस के जनता ह लोकसभा चुनई म वोट डारके भाजपा बर अपन भरोसा जतईन हे। श्री साय ह उम्मीद जतईन कि छत्तीसगढ़ के सबो ग्यारह लोकसभा सीट म भाजपा उम्मीदवार जीतही।
उहें, प्रदेस भाजपा अध्यक्ष किरण सिंह देव ह किहीन कि छत्तीसगढ़ के विकास बर जनता ह भाजपा के पक्ष म मतदान करे हे। ओमन यहू किहीन कि तीसर चरण के चुनाव म मतदाता मन म बहुते उछाह देखे गीस। श्री सिंह देव ह किहीन कि जनता सेवा, सुशासन अउ गरीब कल्याण बर भाजपा के सरकार चाहथे।
दूसर कोति, प्रदेस कांग्रेस अध्यक्ष दीपक बैज ह किहीन कि ए चुनाव देस के संविधान अउ लोकतंत्र बचाय बर हे। ओमन किहीन कि मतदान के बाद पोलिंग बूथ के बाहिर मतदाता मनके रूझान कांग्रेस कोति दिखाई दीस। किसान, मजदूर अउ माईलोगिन देस म कांग्रेस के पक्ष म हवय।
किरण सिंह देव-ओड़िशा
प्रदेस म लोकसभा चुनाव के तीसर चरण के मतदान होय के बाद भारतीय जनता पार्टी के प्रदेस अध्यक्ष किरण सिंह देव ओड़िसा के चार दिवसीय दउरा म हवय। ओमन ग्यारा मई तक कोरापुर, रायगड़ा, गुनपुर, जैपुर अउ कोटपाड़ म राखे गे बइठका के संग कतकोन कारीकरम म संघरही।
दसवीं-बारहवीं-परिणाम
छत्तीसगढ़ माध्यमिक सिक्षा मंडल कोति ले दसवीं अउ बारहवीं बोर्ड परीक्षा के नतीजा काली जारी करे जाही। मंडल के सचिव पुष्पा साहू ह आकाशवाणी समाचार ल बतईन कि परीक्षा परिणाम काली मंझनिया साढ़े बारह बजे रईपुर के छत्तीसगढ़ माध्यमिक सिक्षा मंडल के सभागार म जारी करे जाही। पढ़ईया लइका अपन परीक्षा के परिणाम मंडल के वेबसाइट म देख सकही। खबर के मुताबिक दसवीं के बोर्ड परीक्षा म करीबन साढ़े तीन लाख अउ बारहवीं के परीक्षा म करीबन ढाई लाख विद्यार्थी सामिल होय रिहीस।
ईओडब्ल्यू छापा
कथित सराब घोटाला मामला म पुलिस रिमांड म चलत सराब कारोबारी त्रिलोक सिंह ढिल्लन के घर म आर्थिक अपराध अन्वेषण ब्यूरो ईओडब्ल्यू ह छापा मार कार्रवाई करे हे। आज बिहनिया ईओडब्ल्यू के अधिकारी त्रिलोक सिंह ल पुलिस कस्टडी म लेके भिलाई के नेहरू नगर म उंखर घर पहुंचीन। कुछ दिन पहिलीच घर म छापा मारे गे रिहीस, तभे कार्रवाई के बेरा जम्मों आलमारी मन ल सील कर दे गे रिहीस। आज त्रिलोक सिंह के आगू सील बंद आलमारी ल खोले गीस। इही बीच, उंखर घर के बाहिर सुरक्षा बढ़ा दे गेहे।
उहें, ईओडब्ल्यू के टीम ह सराब कारोबारी विजय भाटिया के बंगला म घलो दबिस देहे।
बाल विवाह-समिति गठित
अक्ति के मउका म बाल विवाह ल रोके बर प्रसासन कोति ले सावधानी बरते जावत हे। राजनांदगांव म बाल विवाह ल रोके बर प्रसासन ह तीन स्तर म निगरानी समिति बनाय हे। ए समिति जिला, जनपद अउ ग्राम पंचायत स्तर म सक्रीय हवय। समिति कोति ले बाल विवाह ल रोके बर तीर-तखार के गांव म निगरानी करे जात हे। जिला कलेक्टर संजय अग्रवाल ह किहीन हे कि बाल विवाह के सूचना मिलते तुरते कार्रवाई करे जाय। बाल विवाह के जानकारी जउन ल भी मिलय ओमन टोल फ्री नंबर- एक सून्य नौ आठ म सूचना दे सकत हे। कलेक्टर ह जनप्रतिनिधि, स्वयं सेवी संगठन अउ आम लोगन ले बाल विवाह रोके म मदद करे के अपील करीन हे।
राजनांदगांव अग्नि सुरक्षा
राजनांदगांव म रेलवे पुलिस बल-आरपीएफ के टीम ह अग्नि सुरक्षा ल लेके जागरूकता अभियान चलइन। ए दउरान आपात कालीन अग्निसेवा सहायता कोति ले रेल करमचारी, सफाई करमचारी, अधिकारी अउ करमचारी मन ल आगी बूताय बर अग्नि सामक यंत्र ल बउरे के तरीका बताय गीस। उहें, रेलवे कालोनी म रहवइया लोगन अउ लइका मन ल आगी लगे म कइसे बचाव करे जा सकत हे, एखर जानकारी दे गीस।
उपमहानिदेशक-नारायणपुर
नारायणपुर जिला म एफएम रेडियो के बढ़वार ल लेके आकाशवाणी रईपुर के उपमहानिदेसक अभियांत्रिकीय वी.राजेश्वर एक दिन के दउरा म आज नारायणपुर पहुंचिन। ए मउका म ओमन कलेक्टर विपिन मांझी ले भेंट करके जिला म एफएम रेडियो स्टेसन के स्थापना खातिर करे जात काम के संबंध म गोठबात करीन।
फुटबॉल/ग्रीष्मकालीन खेल
नारायणपुर जिला के रामकृष्ण मिसन आश्रम के खेल मैदान म छत्तीसगढ़ मेन्स फुटबॉल लीग प्रतियोगिता होवत हे। आज रईपुर के रामा एफसी अउ आरकेएम के बीच खेले गे मुकाबला म आरकेएम ह रामा एफसी ल सून्य के मुकाबला दू गोल ले हरा दीस।
ऐति कबीरधाम जिला म दस ले इकतीस मई तक प्रसिक्षण सिविर लगाय जाही। एमा हॉकी, वॉलीबाल, बेसबॉल, साफ्टबॉल, कराते, बैडमिंटन, हैंडबॉल, खो-खो, कबड्डी, फुटबॉल अउ एथलेटिक्स जइसन खेल ल सामिल करे गेहे।
उहें, राजनांदगांव के हॉकी खिलाड़ी अनिशा साहू ल भारतीय जूनियर महिला हॉकी टीम बर चुने गेहे। ओमन नीदरलैंड म अट्ठारा ले इकतीस मई तक होवइया अंडर ट्वेंटी वन बालिका हॉकी चैंपियनसीप म भाग लीहि। ए प्रतियोगिता म भारत समेत बेल्जियम, जर्मनी, नीदरलैंड के टीम ह भाग लिही।
अब जानन मौसम के हाल…
मौसम विभाग ह अवइया चौबीस घंटा म प्रदेस के कुछेक जघा म छिटपुट बरसा अउ गरज-चमक संग छींटा बौछार होय के संभावना जताय हे। उहें, एक-दू जघा म हवा-गरेर संग गाज गिरे के चेतावनी दे गेहे।
मौसम विभाग के मुताबिक उपरी हवा के चक्रीय चक्रवाती घेरा राजस्थान के उपर बने हे। उहें, एक द्रोणिका राजस्थान ले असम तक हवय, जेखर परभाव ले प्रदेस के मौसम म फेरबदल होवत हे।