छत्तीसगढ़ म लोकसभा चुनाव के तीसर चरण म रईपुर, दुरूग, बिलासपुर, जांजगीर-चांपा, कोरबा, रायगढ़ अउ सरगुजा संसदीय क्षेत्र म आज सांतिपूर्ण ढंग ले मतदान होइस। एखरे संग ए सातों लोकसभा क्षेत्र म छब्बीस झन माईलोगिन मन संघरा एक सौ अड़सठ उम्मीदवार मनके किस्मत ईवीएम म कैद होगे हे। ए संसदीय क्षेत्र म संझा पांच बजे तक औसत रूप ले करीबन सड़सठ प्रतिसत मतदान दर्ज करे गीस। अंतिम आंकड़ा आना अभी बाकी हे। मिले जानकारी के अनुसार रईपुर संसदीय क्षेत्र म लगभग इकसठ प्रतिसत, दुरूग म लगभग सड़सठ प्रतिसत, बिलासपुर म लगभग साठ प्रतिसत , जांजगीर-चांपा म लगभग बैंसठ प्रतिसत, कोरबा म लगभग इकहत्तर प्रतिसत, रायगढ़ म लगभग छिहत्तर प्रतिसत अउ सरगुजा लोकसभा क्षेत्र म लगभग चौहत्तर प्रतिसत मतदान दर्ज करे गीस।
तीसर चरण के प्रमुख उम्मीदवार म रईपुर सीट ले भाजपा के बृजमोहन अग्रवाल अउ कांग्रेस के विकास उपाध्याय, दुरूग ले भाजपा के विजय बघेल अउ कांग्रेस के राजेन्द्र साहू, बिलासपुर ले भाजपा के तोखन साहू अउ कांग्रेस के देवेन्द्र यादव, जांजगीर-चांपा ले भाजपा के कमलेश जांगड़े अउ कांग्रेस के डॉक्टर शिवकुमार डहरिया, कोरबा ले भाजपा के सरोज पांडेय अउ कांग्रेस के ज्योत्सना महंत, रायगढ़ ले भाजपा के राधेश्याम राठिया अउ कांग्रेस के मेनका देवी सिंह, सरगुजा ले भाजपा के चिंतामनि महाराज अउ कांग्रेस के डॉक्टर शशिसिंह के बीच सीधा मुकाबला हे।
तीसरा चरण-मतदान-02
तीसरा चरण के मतदान बर पंद्रह हजार सात सौ एक मतदान केंद्र बनाय गे रिहीस। एमा ले पचीस ठन मतदान केंद्र ल संवेदनसील अउ एक हजार बहत्तर केंद्र ल अति-संवेदनसील घोसित करे गे रिहीस। ए चरण म स्वतंत्र अउ निष्पक्ष चुनाव कराय बर सुरक्षा बल के दू सौ दू कंपनी तैनात करे गे रिहीस। एखरे संग सबो संवेदनसील क्षेत्र म सुरक्षा के कड़ा इंतेजाम करेगे रिहीस। उहें, सात हजार आठ सौ सत्यासी केंद्र म वेबकॉस्टिंग के व्यवस्था करे गे रिहीस। एखर माध्यम ले निर्वाचन आयोग डहार ले ए केंद्र मन उपर नजर राखे गीस। तीसर चरण म इकसठ हजार ले जादा मतदानकर्मी मनके ड्यूटी लगाय गे रिहीस।
ए संसदीय क्षेत्र म मतदान के सेति लोगन म अब्बड़ उछाह देखे गीस। बिहनियच ले सबो मतदान केंद्र म लोगन के भीड़ रिहीस अउ ओमन ह घाम अउ गर्मी म घलो अपन बारी के अगोरा करत दिखीन। कतकोन मतदान केंद्र म मतदाता मनके सुविधा बर छांव अउ पिये के पानी के अलावा नींबू पानी अउ सरबत के व्यवस्था करे गे रिहीस। संगेसंग मतदाता मनके बइठे बर बैंच अउ खुर्सी घलो राखे गे रिहीस। उहें, मतदान दल ल मेडिकल किट म जरूरी दवा अउ ओआरएस घोल घलो देगे रिहीस।
मधुमक्खी हमला
बलरामपुर जिला के कुसमी थाना क्षेत्र के जवाहर नगर मतदान केंद्र म मतदान के दौरान मधुमक्खी के हमला म पांच झन घायल होगिन, जउन मन ल स्थानीय स्वास्थ्य केंद्र म भर्ती कराय गे हवय। उहें, गंभीर रूप ले घायल दू झन ल कुसमी रिफर कर दे गेहे। डॉक्टर ह सबो घायल मनके स्थिति खतरा ले बाहर बताय हे।
विशेष कार्यक्रम
सुनईया मन ल बतादन कि रईपुर, दुरूग, बिलासपुर, जांजगीर-चांपा, रायगढ़ अउ सरगुजा लोकसभा क्षेत्र म आज होय मतदान उपर प्रादेसिक समाचार एकांश डहार ले एक ठिन बिसेस कारीकरम प्रसारित करे जाही। आकाशवाणी केंद्र रईपुर डहार ले ए बिसेस कारीकरम ल आज रतिहा आठ बजे ले प्रसारित करे जाही, जेला छत्तीसगढ़ के आकाशवाणी के सब्बों केंद्र मन ह एके संघरा रिले करही।
तीसरा चरण-मतदान-03
तीसर चरण के मतदान म राज्यपाल अउ मुख्यमंत्री संघरा कतकोन जनप्रतिनिधि अउ अधिकारी मन ह घलो बढ़-चढके के हिस्सा लीन। राज्यपाल विश्वभूषण हरिचंदन अउ प्रथम महिला सुप्रभा हरिचंदन ह घलो रईपुर के सिविल लाइन के आदर्स मतदान केंद्र म अपन मताधिकार के परयोग करीन। उहें, मुख्यमंत्री विष्णुदेव साय ह जशपुर जिला के गृहग्राम बगिया म परिवार संग मतदान करीन।
अइसने मंत्री रामविचार नेताम ह घलो अपन परिवार संग बलरामपुर जिला के सनवाल गांव म वोट डारिन। नेता प्रतिपक्ष डॉक्टर चरणदास महंत अउ कोरबा लोकसभा क्षेत्र ले कांग्रेस के प्रत्यासी ज्योत्सना महंत ह सक्ति जिला के सारागांव म वोट डारिन। एखर अलावा सरगुजा लोकसभा क्षेत्र ले भाजपा के प्रत्यासी चिंतामणी महाराज ह श्रीकोट-कुसमी म अपन परिवार संघरा वोट डारिन। उहें, रायगढ़ संसदीय क्षेत्र ले कांग्रेस के प्रत्यासी डॉक्टर मेनका सिंह ह सारंगढ़-बिलाईगढ़ जिला के मतदान केंद्र म मतदान करीन।
ऐति, राज्य के मुख्य निर्वाचन पदाधिकारी रीना बाबासाहेब कंगाले ह रईपुर के धरमपुरा के मतदान केंद्र म वोट डारिन। ए दौरान ओमन ह मतदान केंद्र म मतदाता मन ल दे जावत सुविधा के जायजा लीन। उहें, अतिरिक्त मुख्य निर्वाचन पदाधिकारी नीलेश कुमार महादेव क्षीरसागर ह रईपुर के अमलीडीह के मतदान केंद्र म वोट डारिन। रईपुर के जिला निर्वाचन अधिकारी डॉक्टर गौरव सिंह ह बीपी पुजारी स्कूल म अपन मताधिकार के उपयोग करीन।
तीसरा चरण-मतदान-04
सियान अउ दिव्यांग मतदाता मन ह घलो लोकतंत्र के ए महापर्व म मतदान करके अपन सहभागिता निभाइन। गौरेला-पेण्ड्रा-मरवाही जिला के सेमरा म निन्यानवे बछर के सियान आनंद राम राठौर ह मतदान करीन।
उहें, बैकुंठपुर विधानसभा क्ष्ेत्र के चेहरा पारा वार्ड म नब्बे बछर के कतवारी राम ह वोट डारके लोकतंत्र म अपन सहभागिता देखाइन।
अइसने, गौरेला-पेण्ड्रा-मरवाही जिला के सेखवा म दिव्यांग मतदाता शांति बाई माझी ह वोट डारिन। एखर अलावा रायगढ़ जिला म दिव्यांग मतदाता तपन चौहान ह मतदान करके दूसर मन बर मिसाल पेस करीन।
सरगुजा के जिला आईकॉन थर्ड जेंडर तमन्ना जायसवाल ह घलो मतदान करके मतदाता मन ल प्रेरित करीन। उहें, सरगुजा जिला के भरतपुर के मतदान केंद्र म नवा बिहाव वाले जोड़ा ह पहिली घांव मतदान करिस।
ओति, रायगढ़ के कचकोबा म विसेस पिछड़ा जनजाति बिरहोर के मतदाता मन ह घलो मतदान म हिस्सा लीन।
इही बीच, एनसीसी, एनएसएस अउ स्काउट-गाइड के विद्यार्थी मन ह मतदान केंद्र म सियान अउ दिव्यांग मतदाता मनके मदद करीन।
कांग्रेस ले इस्तीफा दे के बाद राधिका खेड़ा ह आज नई दिल्ली म भाजपा प्रवेस करीन। ए दौरान राधिका खेड़ा ह कांग्रेस के नेता मन उपर कतकोन गंभीर आरोप लगाइन। ओमन किहीन कि छत्तीसगढ़ म कांग्रेस के कुछेक नेता मन डहार ले उंखर संग दुर्व्यवहार करे गीस।
अउ अब पेस हे मौसम के हाल…
प्रदेस म अवईया चौबीस घंटा के दौरान कुछेक जघा म हल्का ले मध्यम बरसा होय के अउ गरज-चमक के संग छींटा पड़े के संभावना हे। उहें, एक दू जघा म अंधड़ चले के, आकाशीय बिजली गिरे के अउ ओला गिरे के घलो चेतावनी दे गेहे। मौसम विभाग के अनुसार एक ठन द्रोणिका ओड़िसा ले राजस्थान तक बने हे। जेखर असर छत्तीसगढ़ म घलो देखे बर मिलत हे।
इही बीच, राजधानी रईपुर संघरा प्रदेस के कुछेक जिला म मौसम म आय बदलाव के सेति लोगन ल थोरकुन राहत मिले हे, कई जघा म अधिकतम तापमान म मामूली गिरावट दर्ज करे गेहे।
तीरंदाजी प्रशिक्षण शिविर
वनवासी विकास समिति डहार बारह ले अट्ठारह बछर के विद्यार्थी मन बर तीरंदाजी प्रसिक्षण सिविर के आयोजन रईपुर म दस ले तीस मई तक करे जाही। सिविर म भाग लेबर प्रत्येक प्रतिभागी ल तीन सौ रूपिया सुल्क देना होही। रईपुर के बाहिर के प्रतिभागी मन बर रूके के व्यवस्था करे जाही। प्रसिक्षण म भाग लेबर रईपुर के रोहिणीपुरम कार्यालय म संपर्क करे जा सकत हे।