लोकसभा चुनाव के तीसरा चरण म प्रदेस के सात ठन संसदीय क्षेत्र रईपुर, दुरूग, बिलासपुर, कोरबा, सरगुजा, जांजगीर-चांपा अउ रायगढ़ म काली मतदान होही। एखर बर निर्वाचन अयोग ह सबो तियारी पूरा कर लेहे। तीसर चरण म एक सौ अड़सठ उम्मीदवार मन चुनाव मैदान म हे, जिंखर भाग्य काली ईवीएम म बंद हो जही। एमा एक सौ बयालिस पुरूष अउ छब्बीस महिला प्रत्यासी सामिल हे। एमा सबले जादा अड़तीस उम्मीदवार मन रईपुर लोकसभा क्षेत्र म हे। उहें, सबले कम दस उम्मीदवार मन सरगुजा लोकसभा क्षेत्र म हवय।
राज्य के मुख्य निर्वाचन पदाधिकारी रीना बाबासाहेब कंगाले ह आज रईपुर म राखे गे पत्रकारवार्ता म बतइन कि काली बिहनिया सात बजे ले संझा छै बजे तक वोट डारे जाही। गर्मी ल देखत सब्बो मतदान केंद्र म छाया, पिये के पानी , नींबू पानी अउ सरबत के व्यवस्था करे गेहे। संगेसंग मतदाता मन बर वेटिंग हाल घलो बनाय गेहे। मतदान दल ल मेडिकल किट घलो दे जाही, जेमा जरूरी दवा अउ ओ.आर.एस. होही। ओमन ह बतइन कि सांतिपूर्ण अउ निष्पक्ष मतदान कराय बर सुरक्षा के कड़ा इंतेजाम करे गे हवय। एखर बर सुरक्षा बल के दू सौ बीस कंपनी तैनात करे जाही। उहें, सात हजार आठ सौ सत्यासी केंद्र म वेबकॉस्टिंग के व्यवस्था करे गेहे। एखर माध्यम ले निर्वाचन आयोग ह, ए केंद्र मन उपर नजर राखही। पंद्रह हजार सात सौ चौहत्तर कैमरा के माध्यम ले मतदान प्रक्रिया उपर घलो निगरानी रखे जाही। तीसर चरण म पचीस ठन मतदान केंद्र ल असुरक्षित अउ एक हजार बहत्तर मतदान केंद्र ल संवेदनसील घोसित करे गेहे। ए मतदान केंद्र मन म सुरक्षा के जादा व्यवस्था करे जावत हे। तीसर चरण म दू सौ तिरासी मतदान केंद्र के पहिचान शेडो एरिया के रूप म करे गे हवय।
तीसरा चरण-मतदान-02
मुख्य निर्वाचन पदाधिकारी ह बतइन कि सात ठन लोकसभा क्षेत्र म काली होवइया मतदान बर पंद्रह हजार सात सौ एक मतदान केंद्र बनाय गेहे, जेमा ले एक सौ चौदह सहायक मतदान केंद्र हवय। उहें, दू हजार आठ सौ नौ संगवारी मतदान केंद्र, अंठावन दिव्यांग मतदान केंद्र, दू सौ पैंतीस युवा मतदान केंद्र अउ तीन सौ छै आदर्स मतदान केंद्र घलो सामिल हे। उहें, इकसठ हजार छै सौ चौसठ मतदान कर्मी मनके ड्यूटी लगाय गे हवय अउ करीब सोलह हजार मतदान कर्मी मन ल रिजर्व म राखे गे हवय। ए मतदान दल के अलावा सोलह सौ अंठावन सेक्टर ऑफिसर तैनात करे गेहे जउन ह प्रति दू घंटा म अपन रिर्टनिंग अधिकारी ल मतदान प्रतिसत के जानकारी दीही। सब्बो मतदान केंद्र के मतदाता मन ल सहायक बूथ म बीएलओ नियुक्त करे जाही जउन ह मतदाता मन ल उंखर नाव अउ सरल क्रमांक ढूंढे म मदद करही।
ए सात ठन लोकसभा क्षेत्र म मतदाता मन के कुल संख्या एक करोड़ उनचालीस लाख एक हजार दू सौ पचासी हे। एमा पुरूष के मुकाबले महिला मतदाता मनके संख्या जादा हे। पुरूष मतदाता मनके संख्या उनहत्तर लाख तैंतीस हजार एक सौ इक्कीस अउ माईलोगिन मनके संख्या उनहत्तर लाख सड़सठ हजार पांच सौ चवालिस हे। उहें, तृतीय लिंग मतदाता मनके संख्या छै सौ बीस हवय। ए चरण म अट्ठारा ले उन्नीस आयु वर्ग के तीन लाख अंठानवे हजार चार सौ सोलह मतदाता हे। तीसर चरण म पाछू लोकसभा चुनाव के तुलना म मतदाता मनके संख्या करीबन साढ़े नौ फीसदी बढ़े हे। तीसर चरण के सात ठन लोकसभा क्षेत्र म सामिल अंठावन ठन विधानसभा क्षेत्र के उनतीस ठन विधानसभा क्षेत्र म मतदाता मनके लिंगानुपात एक हजार ले जादा हे। उहें, पांच मई के स्थिति म कुल दू हजार सात सौ पचीस सियान अउ दिव्यांग मतदाता मनके घर-घर जाके डाकमत पत्र के माध्यम ले मतदान कराय जा चुके हे।
तीसरा चरण-मतदान-03
मुख्य निर्वाचन पदाधिकारी ह बतइन कि मतदान बर सात लोकसभा क्षेत्र ले संबंधित जिला मन म काली सार्वजनिक अउ सामान्य अवकाश घोसित करे गे हवय। उहें, श्रम विभाग ह श्रमिक मन घलो संवैतनिक अवकास के घोसना करे हे। ए सात ठन लोकसभा सीट अउ राज्य के पड़ोसी जिला म मतदान प्रक्रिया सिराय तक सुष्क दिवस घोसित करे गेहे। ए दौरान सब्बो सराब दुकान मन बंद रइही।
लोकसभा चुनाव के सब्बो सीट बर मतगणना चार जून के होही अउ इही दिन परिणाम घलो घोसित करे जाही। निर्वाचन आयोग ह पाछू उन्नीस अप्रैल बिहनिया सात बजे ले अवइया एक जून संझा साढ़े छै बजे तक प्रिंट अउ इलेक्ट्रानिक मीडिया म निर्वाचन ले जुड़े कोनो भी प्रकार के एग्जिट पोल के प्रसारण उपर रोक लगा देहे।
मतदान दल-रवाना
प्रदेस के सात ठन संसदीय क्षेत्र बर मतदान दल मन ल चुनाव सामग्री संघरा रवाना करे के सिलसिला काली ले सुरू होगे हे। जांजगीर-चांपा लोकसभा क्षेत्र बर जिला निर्वाचन अधिकारी आकाश छिकारा ह जिला मुख्यालय जांजगीर ले आठ सौ पंद्रह मतदान दल ल सामग्री के साथ केंद्र बर रवाना करीन। ए मउका म जिला निर्वाचन अधिकारी ह कर्मचारी मन ल गुलाब भेंट करके निष्पक्ष मतदान कराय के संदेस घलो दीन। ए दल मन ल बस म बिठाके मतदान केंद्र भेजे गीस।
सरगुजा जिला निर्वाचन अधिकारी विलास भोसकर ह घलो हरा झंडा दिखाके मतदान दल ल रवाना करीन। ओमन ह बने तरीका ले मतदान काम कराय बर मतदान दल के हौसला बढ़ाइन।
अइसने, कोरबा जिला म सामान्य प्रेक्षक कैलाश सुखदेव पगारे अउ जिला निर्वाचन अधिकारी विनय कुमार लंगेह ह महिला मतदान कर्मी मन ल हरा झंडा देखाके संगवारी मतदान केंद्र बर रवाना करीन। जिला म दस ठन संगवारी मतदान केंद्र बनाय गे हवय।
उहें, संसदीय क्षेत्र सरगुजा बर बलरामपुर, रामानुजगंज, जिला निर्वाचन अधिकारी ह रिमिजियुस एक्का अउ वरिष्ठ पुलिस अधीक्षक डॉक्टर लाल उमेद सिंह ह मतदान दल ल स्ट्रांग रूम ले मतदान सामग्री देके ओमन ल रवाना करीन।
राज्यपाल-अपील
राज्यपाल विश्वभूषण हरिचंदन ह प्रदेस के सात ठन लोकसभा क्षेत्र म काली होवइया चुनाव बर सबो वयस्क नागरिक मन ले मताधिकार के परयोग करे के अपील करीन हे। राज्यपाल ह किहीन कि हमर देस विश्व के सबले बड़े लोकतांत्रिक देस हे अउ लोकतंत्र के एक महापरब म हरेक मतदाता ल सहभागी बनना चाही। ओमन किहीन कि देस के संविधान ह वयस्क नागरिक मन ल मत देके अधिकार सौंपे हे, एखर उपयोग जिम्मेदारी से करना चाही। ओमन किहीन कि सब्बो नागरिक मन के कर्तव्य हे कि ओमन ह अपन मताधिकार के परयोग करन।
स्टेट आईकॉन-मतदान अपील
भारत निर्वाचन आयोग ह आने-आने क्षेत्र म सुघ्घर काम करइया लोगन ल स्टेट आईकॉन के रूप म मनोनीत करे हे। ए सबो झन ह लोगन ले अपील करीन कि काली ओमन ह वोट डारे बर जरूर जावय।
छत्तीसगढ़ के प्रसिध्द लोकगायिका पद्मश्री ममता चंद्राकर ह लोगन ले किहीन कि ओमन ह लोकसभा चुनाव म बिना डर के अउ कोनो दबाव अउ लालच के वोट डारे बर जाय।
भारतीय महिला हॉकी टीम के पूर्व कप्तान पद्मश्री सबा अंजुम ह किहीन कि मतदान आपके अधिकार के संग कर्तव्य घलो हे। एखर सेति सात मई के वोट देके लोकतंत्र ल मजबूत बनावव।
मास्टर सेफ विजय शर्मा ह लोगन ले अपन वोट के कीमत समझे के अउ सात मई के होवइया तीसर चरण के मतदान म अनिवार्य रूप ले वोट डारे के अपील करीन हे।
उहें, ट्रांसजेंडर सशक्तिकरण बर काम करइया विद्या राजपूत ह किहीन कि लोकतंत्र ल मजबूत करे बर अउ राष्ट्र निर्माण बर हरेक वोट जरूरी हे। तेखर सेति सबो झन ल मतदान करना चाही।
मतदाता पहचान पत्र
सात लोकसभा क्षेत्र के सबो मतदान केंद्र के मतदाता मन ल सूचना पर्ची बांटे जा चुके हे। मुख्य निर्वाचन पदाधिकारी रीना बाबा साहेब कंगाल ह बतइन कि निर्वाचन आयोग डहार ले सबो मतदाता मन ल फोटो वाले पहिचान पत्र घलो जारी कर देहे। ओमन अपन पहिचान पत्र देखाके वोट कर सकत हे। ओमन बतइन कि अगर कोनो मतदाता ए पहिचान पत्र ल अपन संग नइ ला सकही त, ड्राइविंग लाइसेंस, पासपोर्ट, आधार कार्ड, पैन कार्ड अउ बैंक पासबुक के फोटो कापी संघरा बारह ठन दस्तावेज ल देखाके घलो अपन मताधिकार के परयोग कर सकत हे। उहें, प्रवासी मतदाता मन ल मतदान केंद्र म अपन मूल पासपोर्ट देखाय के बादेच वोट डारन दे जाही।