प्रदेस म लोकसभा चुनई के तीसर चरण म रईपुर के संगेसंग सात संसदीय क्षेत्र म आज संझा ले चुनाव प्रचार थम गे। एखर बाद अब प्रत्यासी मन घर-घर जाके जनसंपर्क करही। राज्य के सात लोकसभा सीट रईपुर, दुरूग, बिलासपुर, कोरबा, जांजगीर-चांपा, सरगुजा अउ रायगढ़ म परनदीन सात मई को मतदान होही। ए दिन बिहनिया सात बजे ले संझा छै बजे तक वोट डाले जाही। ए जम्मों सात लोकसभा सीट म एक सौ अड़सठ उम्मीदवार चुनाव मैदान म हे। जेमा ले एक सौ बयालिस पुरूष अउ छब्बीस महिला उम्मीदवार सामिल हे। मतदान ल लेके निर्वाचन आयोग डहार ले जम्मों तियारी कर ले गेहे। ए मतदान केंद्र मन म सुरक्षाबल के लगभग दू सौ दू कंपनी तैनात करे गेहे।
तीसरा चरण प्रचार-अभियान
तीसर चरण के तहत चुनाव प्रचार के आखिरी दिन आज आने-आने राजनीतिक दल के स्टार प्रचारक मन अपन-अपन पार्टी के प्रत्यासी मन के पक्ष म चुनाव प्रचार करीन। इही बेरा भाजपा के राष्ट्रीय अध्यक्ष जे.पी. नड्डा ह सूरजपुर म पार्टी प्रत्यासी के पक्ष म चुनावी सभा ल संबोधित करीन।
उहें, भाजपा के वरिष्ठ नेता अउ मुख्यमंत्री विष्णुदेव साय ह बेमेतरा के नवागढ़, मनेन्द्रगढ़ के खड़गवां, धरसींवा के सारागांव अउ रईपुर के गुढ़ियारी म जनसभा ल संबोधित करीन। ए दौरान ओमन जनजाति समुदाय के उत्थान के संग भाजपा के संकल्प पत्र म लिखे गे जम्मों वादा ल पूरा करे के बात किहीन।
ऐति, मुंगेली जिला म उप मुख्यमंत्री अरूण साव ह रोड शो करके भाजपा प्रत्यासी के पक्ष म प्रचार करीन।
उहें, प्रदेस के पूर्व मुख्यमंत्री भूपेश बघेल ह सक्ती जिला के मालखरौदा म कांग्रेस प्रत्यासी के पक्ष म चुनावी सभा ल संबोधित करीन।
मतदान दल-रवाना
प्रदेस के सात संसदीय क्षेत्र म सात मई के होवइया मतदान ल देखत मतदान दल मन ल उंखर मतदान केंद्र तक पहुंचे के सिलसिला आज ले सुरू होगे हे। ए बेरा गौरेला-पेण्ड्रा-मरवाही जिला के कलेक्टर अउ निर्वाचन अधिकारी लीना कमलेश मंडावी ह कटघोरा बर दू सौ छब्बीस मतदान दल ल हरी झंडी दिखाके रवाना करीन। प्रदेस के आने संसदीय क्षेत्र मन म मतदान दल के रवाना काली करे जाही।
गर्मी के मौसम ल धियान म राखत मतदान केंद्र बर रवाना होवइया मतदान दल मन ल मेडिकल कीट घलो दे जावत हे। एमा तेरह जरूरी दवई के संगेसंग ओ.आर.एस. के पाकिट सामिल हे। बतादन कि स्वास्थ्य सेवा ल धियान म राखत जम्मों हेल्थ सेंटर, प्राथमिक स्वास्थ्य केंद्र अउ सामुदायिक स्वास्थ्य केंद्र ल घलो सचेत कर गेहे।
माओवादी-आत्मसमर्पण
दंतेवाड़ा जिला म आज तीन ईनामी सहित पैंतीस माओवादी मन आत्मसमर्पण करीन। बस्तर रेंज के पुलिस महानिरीक्षक सुंदरराज पी. ह बतइन कि लोन वर्राटु अभियान ले प्रभावित होके ए माओवादी मन आत्मसमर्पण करीन। भैरमगढ़ मलांगेर अउ कटेकल्याण एरिया कमेटी म सक्रिय ए माओवादी मन दंतेवाड़ा रेंज के पुलिस उप महानिरीक्षक कमलोचन कश्यप, सीआरपीएफ के पुलिस उप महानिरीक्षक, विकास कठेरिया अउ दंतेवाड़ा के पुलिस अधीक्षक गौरव राय के आगू म आत्मसमर्पण करीन। ए जम्मों माओवादी मन उपर आने-आने नक्सली गतिविधि म सामिल होय के आरोप हे। ओमन बतइन कि ए सबो माओवादी मन ल राज्य सरकार के पुर्नवास योजना डहार ले पचीस-पचीस हजार के प्रोत्साहन रासि अउ पुर्नवास योजना ले मिलइया जम्मों प्रकार के सुविधा के लाभ दे जाही।
बतादन कि लोन वर्राटु अभियान के तहत आज तक एक सौ अस्सी ईनामी माओवादी के संग कुल सात सौ छियानवे माओवादी मन आत्मसमर्पण करके समाज के मुख्यधारा म सामिल होगे हें।
भाजपा/कांग्रेस-पत्रकारवार्ता-
भाजपा के वरिष्ठ नेता अउ मुख्यमंत्री विष्णुदेव साय ह रईपुर के भाजपा कार्यालय म आयोजित पत्रकावार्ता म किहीन कि चुनावी सभा के बेरा जेन ढंग ले आने-आने वर्ग ले स्नेह मिले हे, एखर ले ओमन आस्वस्त हे कि भाजपा ल जम्मों सीट म सफलता मिलही। ओमन किहीन कि प्रधानमंत्री नरेंद्र मोदी के गारंटी ल पूरा करे संदेस सभा के दौरान दे गेहे। विकसित भारत अउ विकसित छत्तीसगढ़ ल लेके उंखर वीजन स्पष्ट हे। मुख्यमंत्री ह किहीन कि विधानसभा चुनाव के बेरा जनता ह प्रधानमंत्री के गारंटी उपर भरोसा जताके भाजपा के सरकार बनाय के मउका देहे। अइसन म अवइया बेरा म आने-आने वर्ग बर सुरू करे गे योजना ल जोरदरहा ढंग ले लागू करबो। पत्रकारवार्ता म भाजपा अध्यक्ष किरण सिंह देव घलो मौजूद रिहीन।
उहें, एकात्म परिसर म आयोजित पत्रकारवार्ता म भाजपा के राष्ट्रीय सचिव मनजिंदर सिंह सिरसा ह कांग्रेस उपर सिक्ख मन के कथित नरसंहार के आरोप लगाय हे।
भाजपा/कांग्रेस-पत्रकारवार्ता-
ओति, रईपुर के कांग्रेस भवन म आयोजित पत्रकारवार्ता म कांग्रेस के प्रदेस अध्यक्ष दीपक बैज ह किहीन कि कांग्रेस अउ इंडिया गठबंधन के प्रति मतदाता मनके झुकाव बड़ गेहे। ओमन कांग्रेस के पांच न्याय गारंटी के संग जनता के बीच पहुंचत हे। संगेसंग महालक्ष्मी योजना के तहत कांग्रेस के न्याय योजना के जानकारी दे जात हे। ओमन ह भाजपा उपर निसाना साधत किहीन कि ए चुनाव म भाजपा के छुपे हुए एजेंडा आरक्षण खतम करे के हे।
उहें, प्रदेस कांग्रेस भवन म आयोजित पत्रकारवार्ता म प्रदेस कांग्रेस कमेटी, चिकित्सा प्रकोष्ठ के प्रदेस अध्यक्ष डॉक्टर राकेश गुप्ता ह आयुष्मान योजना के क्रियान्वयन उपर सवाल उठाइन। ओमन किहीन कि कांग्रेस के शासन काल म प्रदेस म लोगन मन ल स्वास्थ्य सुविधा के लाभ सुचारू रूप ले मिलत रिहीस, अब भाजपा के सरकार ह आयुष्मान योजना के तहत भुगतान के उचित व्यवस्था नइ करे हे, जेखर ले मरीज मन परेसान होवत हे। ओमन आरोप लगाइन कि आयुष्मान योजना म तीन सौ पचास करोड़ रूपिया के भुगतान निजी अस्पताल मन ल करे गेहे। फेर आईएमए डहार ले जारी बयान म बताय गेहे कि ए ढंग ले भुगतान नइ करे गेहे। अइसने आयुष्मान योजना म गड़बड़ी करे जात हे।
मतदाता एडवायजरी-मौसम
सात मई के होवइया मतदान बर मौसम विभाग ह भारी गर्मी ल देखत एडवायजरी जारी करे हे। केहे गेहे कि बिहनिया दस बजे तक या संझा चार बजे के बाद सियान मतदाता मतदान करे ए बेरा म तापमान के असर सरीर म जादा नइ पड़य। संगेसंग मतदाता मतदान केंद्र जाय के पहिली तरल पेय पदार्थ के अच्छा से सेवन कर ल,े अपन संग पानी राखे रहय अउ बेरा-बेरा म घूट-घूट पानी पियत रहय। एखर ले सरीर म हाइड्रेट बने रहि। नौ बजे के बाद मतदान बर निकलइया मतदाता मन सरीर ल अच्छा ढंग ले ढांक ले अउ घाम म जादा देर ले खड़े मत रहे।