प्रदेस म लोकसभा चुनाव के तीसरा चरण म चुनाव प्रचार अपन चरम म हे। आने-आने राजनीतिक दल के वरिष्ठ नेता छत्तीसगढ़ म आके अपन-अपन प्रत्यासी मनके पक्ष म जनसभा लेवत हे। इही कड़ी म कांग्रेस के राष्ट्रीय महासचिव प्रियंका गांधी ह आज कोरबा लोकसभा क्षेत्र के अंतर्गत चिरमिरी म पार्टी प्रत्यासी ज्योत्सना महंत के समर्थन म आमसभा ल संबोधित करीन। ए कारीकरम म कांग्रेस के प्रदेस प्रभारी सचिन पायलेट, प्रदेस कांग्रेस अध्यक्ष दीपक बैज, पूर्व मुख्यमंत्री भूपेश बघेल अउ नेता प्रतिपक्ष चरणदास महंत संग सबो वरिष्ठ कांग्रेस नेता उपस्थित रिहीन।
उहें, भाजपा के वरिष्ठ नेता अउ मुख्यमंत्री विष्णुदेव साय ह आज सरगुजा लोकसभा क्षेत्र के अंतर्गत बलरामपुर जिला के शंकरगढ़ म अउ जांजगीर-चांपा लोकसभा क्षेत्र के मालखरौदा म पार्टी प्रत्यासी मनके पक्ष म जनसभा ल संबोधित करीन। ए मउका ओमन किहीन कि पाछू दस बछर म प्रधानमंत्री नरेंद्र मोदी के नेतृत्व म केंद्र के भाजपा सरकार ह गरीब, किसान, आदिवासी संग सबो वर्ग के हित बर आने योजना के सुरूआत करे हे।
चुनाव तैयारी-01
प्रदेस म लोकसभा चुनाव के तीसरा चरण के तहत ए दिन मन म पोस्टल बैलेट के माध्यम ले मतदान के संगेसंग बहुत बुजुर्ग मनखे अउ दिव्यांग जन मन बर होम वोटिंग के सिलसिला जारी हे।
रईपुर स्थित मुख्य निर्वाचन पदाधिकारी कार्यालय म उप मुख्य निर्वाचन पदाधिकारी शैलाभ साहू ह आज संझा एक ठिन पत्रकारवार्ता म बतइन कि राज्य म पहिली, दूसर अउ तीसरा तीनों चरण ल मिलाके काली एक मई तक के स्थिती म करीबन पचीस हजार नौ सौ डाकमत पत्र मिले हे। सबले जादा करीबन पांच हजार डाकमत पत्र कांकेर लोकसभा क्षेत्र म मिले हे। उहें, सबले कम नौ सौ बारह सरगुजा संसदीय क्षेत्र ले मिले हे।
चुनाव ड्यूटी म लगे अधिकारी अउ करमचारी बर रईपुर के टाउन हाल अउ पुलिस लाइन के सामुदायिक केंद्र म मतदान सुविधा केंद्र बनाय गेहे। इंहा पुलिस अउ आने विभाग के अधिकारी अउ करमचारी ह पोस्टल बैलेट के माध्यम ले मतदान करीन। अब तक पोस्टल बैलेट ले रईपुर म लगभग नौ सौ नब्बे वोटिंग होय हे। बांचे अधिकारी अउ करमचारी चार, पांच अउ छै मई के टाउन हाल म डाकमत पत्र के माध्यम ले मतदान कर सकही। ए मतदान सुविधा केंद्र म बनाय गे ‘‘चुनई मड़वा‘‘ म छत्तीसगढ़ी संस्कृति के झलक दिखाई देवत हे।
इही बीच, राज्य म तीसरा चरण के तहत जेन सात संसदीय क्षेत्र मन म सात मई के मतदान होना हे, ओखर ले संबंधित जिला मन म ईवीएम अउ वीवीपैट के कमीशिनिंग के काम लगभग पूरा हो चुके हे।
फ्लैग मार्च
प्रदेस म लोकसभा चुनाव के तीसरा चरण म रायपुर संग सात संसदीय क्षेत्र मन म सात मई के होवइया मतदान ल लेके प्रसासनिक तैयारी तेज होगे हे। उहें, पुलिस डहार ले आने-आने जिला मन म फ्लैग मार्च घलो निकाले जात हे। एखरे तहत गौरेला-पेण्ड्रा-मरवाही जिला म कलेक्टर कमलेश लीना मंडावी अउ पुलिस अधीक्षक भावना गुप्ता के नेतृत्व म फ्लैग मार्च निकाले गीस। ए फ्लैग मार्च म सशस्त्र बल के दू सौ अउ पुलिस के पचास जवान सामिल रिहीन। ए दउरान कलेक्टर अउ पुलिस अधीक्षक ह लोगन ल बिना डरे मतदाधिकार के प्रयोग करे के अपील करीन।
राज्य शासन ह मीसाबंदी मन ल दे जाने वाला सम्मान निधि के भुगतान बर वर्तमान वित्तीय वर्ष हेतु आने-आने जिला मन ल बजट आवंटित कर देहे। खबर के मुताबिक राज्य के भाजपा सरकार ह मीसाबंदी मनके पेंसन फेर सुरू करे निर्णय ले रिहीन। एखरे तहत पाछू पांच साल के बकाया भुगतान के संग ए बछर के पेंसन बर करीबन पचास करोड़ रूपिया जारी करे गेहे।
उल्लेखनीय हे कि राज्य के पूर्ववर्ती कांग्रेस सरकार ह मीसाबंदी मनके पेंसन ल बंद कर दे रिहीन।
आबकारी घोटाला
कथित आबकारी घोटाला म जेल म बंद आरोपी अनवर ढेबर, अरविंद सिंह अउ अरूणपति त्रिपाठी ल आज न्यायिक रिमांड खतम होय म आर्थिक अपराध अन्वेषण ब्यूरो-ईओडब्ल्यू ह बिसेस कोर्ट म पेस करीन। कोर्ट ह तीनों के न्यायिक रिमांड चौदह दिन बर बढ़ा देहे।
उहें, इही मामला म गिरफ्तार त्रिलोक सिंह ढिल्लन ल घलो पुलिस रिमांड खतम होय म आज ईओडब्ल्यू ह बिसेस कोर्ट म पेस करीन। कोर्ट ह ढिल्लन के रिमांड ल घलो आठ मई तक बढ़ात ईओडब्ल्यू ल सौंप देहे।
इही बीच, अनवर ढेबर ह जमानत बर याचिका लगाय हे। न्यायालय ह एखर सुनवाई बर चार मई के निर्धारित करे हे।
मतदाता जागरूकता
प्रदेस के लोकसभा चुनाव के तहत मतदान के प्रतिसत बढ़ाय खातिर जिला प्रसासन डहार ले सरलग मतदाता जागरूकता कार्यक्रम चलाय जात हे। एखरे तहत रायपुर जिला निर्वाचन अधिकारी डॉक्टर गौरव सिंह ह आज ले ‘‘कलेक्टर के पाती‘‘ अभियान के सुरूवात करीन। कलेक्टर ह सबले पहिली अपन ही कॉलोनी म रहइया लोगन के घर पहुंच के मतदान के आग्रह करत ओमन ल निमंत्रण पत्र अउ पीला चावल दीन। एखर बाद कलेक्टर के निवास म आंगनबाड़ी कार्यकर्ता पहुंचीन अउ ओमन ल आमंत्रण पत्र के संग पीला चावल देके मतदान बर आग्रह करीन। ए आंगनबाड़ी कार्यकर्ता मतदाता जागरूकता ले संबंधित नारा लिखे तख्ती ल लेके उहां पहुंचे रिहीन। ‘‘कलेक्टर के पाती‘‘ अभियान के तहत आमंत्रण पत्र अउ पीला चावल लेके आंगनबाड़ी कार्यकर्ता के टोली लोगन के घर-घर पहुंच के ओमन ल मतदान करे बर प्रेरित करत हे। ए मउका म मुख्य निर्वाचन अधिकारी ह ए पहल ले मतदाता मन म जागरूकता बाढ़ही अउ घर ले निकल के ओमन मतदान करे बर पोलिंग बूथ जरूर पहुंचही।
उहें, बलरामपुर जिला म स्वीप कार्यक्रम के तहत माईलोगिन मन डहार ले लोगन के घर-घर जाके ओमन साल पत्र के माध्यम ले मतदान करे के नेवता दे जात हे। ए साल पत्र म मतदान तारीख अउ मतदान के बेरा लिखाय हे। गांव वाले मन घलो माईलोगिन डहार ले मिले नेवता ल स्वीकार करत मतदान के दिन पोलिंग बूथ जाके मतदान करे के बात काहत हे।
फूड प्वॉइजनिंग-बीमार
सक्ती जिला म डभरा विकासखंड के डोमनपुर गांव म आयोजित एक ठिन धार्मिक कार्यक्रम प्रसाद खाय के बाद करीबन दू सौ लोगन के तबीयत बिगड़ गे। डभरा बीएमओ डॉक्टर माधुरी चन्द्रा ह बतईन कि डोमनपुर गांव के संग तीर-तखार के गांव के लोगन मनके घलो फूड प्वॉइजनिंग ले तबीयत बिगड़े हे। ओमन बतईन कि सत्तर ले जादा लोगन ल डभरा अउ करीबन बीस लोगन ल चन्द्रपुर के सामुदायिक स्वास्थ्य केन्द्र म भर्ती कराय गेहे। उहें, गंभीर रूप ले बीमार लोगन ल रायगढ़ के जिला अस्पताल म रेफर करे गेहे।
व्यापम परीक्षा
छत्तीसगढ़ व्यावसायिक परीक्षा मंडल व्यापम ह लोकसभा चुनाव ल देखत प्रवेस अउ पात्रता परीक्षा के तिथि म संसोधन करे हे। एखर अनुसार पी.ए.टी., पी.व्ही.पी.टी., बीएसी.(कृषि), बीएससी (उद्यानिकी), पशुपालन म डिप्लोमा अउ मत्स्य कीय विज्ञान म डिप्लोमा संबंधी प्रवेस परीक्षा अब नौ जून के आयोजित करे जाही। उहें, पी.ई.टी., प्री. एम.सी.ए. अउ पी.पी.एच.टी. के परीक्षा तेरह जून के होही। पी.पी.टी. अउ टी.ई.टी. पात्रता परीक्षा तेईस जून के होही। उहें, प्री. बी.एड. अउ प्री. डीएलएड के परीक्षा तीस जून के होही। एखर संगेसंग बीएससी नर्सिंग, पोस्ट बेसिक नर्सिंग अउ एमएससी नर्सिंग के परीक्षा चौदह जुलाई के होही।
माओवादी आत्मसमर्पण
सुकमा जिला म एक लाख रूपिया के इनामी माईलोगिन माओवादी ह आत्मसमर्पण कर देहे। ए माओवादी ह उप पुलिस अधीक्षक मनीष रात्रे के आगू आत्मसमर्पण करीन। सुकमा पुलिस डहार ले चलाय जात ‘‘पूना नर्कोम अभियान‘‘ ले प्रभावित होके ए माईलोगिन माओवादी ह मुख्यधारा म लहुटे के निर्णय लेहे। समर्पण करइया ए माओवादी ल राज्य शासन के पुनर्वास नीति के तहत सहायता राशि दे जाही।
अउ अब पेस हे मौसम के हाल…
प्रदेस म भीषण गर्मी ले अवइया दू दिन तक कोनो राहत मिले के संभावना नइ हे। रईपुर म बुधवार के तापमान बियालिस डिग्री सेल्सियस दर्ज करे गीस। मौसम विभाग ले मिले जानकारी के मुताबिक प्रदेस म अधिकतम तापमान म अवइया दू दिन तक कोनो बिसेस बदलाव नइ होही। हवा म नमी के मात्रा म थोरकुन बढ़ोत्तरी होय के संभावना हे। जेखर सेति, कुछेक जिला म आकाश म बादल छाय रइही।