श्री शाह ह कांग्रेस उपर निसाना साधत किहीन कि कांग्रेस ल सिरिफ वोट बैंक के राजनीति करे बर आथे। ओमन किहीन कि केंद्र म भाजपा के सरकार आय म अनुसूचित जाति-जनजाति अउ अन्य पिछड़ा वर्ग के आरक्षण नइ हटाय जाही। कारीकरम म भाजपा नेता रेणुका सिंह, संजय श्रीवास्तव अउ कोरबा लोकसभा क्षेत्र के भाजपा प्रत्यासी सरोज पांडेय संग पार्टी के आने वरिष्ठ नेता अउ पदाधिकारी मौजूद रइही।
उहें, वरिष्ठ भाजपा नेता अउ मुख्यमंत्री विष्णुदेव साय ह आज सरगुजा लोकसभा क्षेत्र के अंतर्गत सीतापुर म भाजपा प्रत्यासी चिंतामणि महाराज ह समर्थन म चुनावी सभा ल संबोधित करीन। श्री साय काली बिलासपुर लोकसभा क्षेत्र के भाजपा प्रत्यासी तोखन साहू के पक्ष म मुंगेली म विजय संकल्प सम्मेलन ल संबोधित करही।
इही बीच, कांग्रेस के राष्ट्रीय महासचिव प्रियंका गांधी काली कोरबा लोकसभा क्षेत्र के अंतर्गत चिरमिरी म कांग्रेस प्रत्यासी ज्योत्सना महंत के समर्थन म चुनावी सभा ल संबोधित करही।
कांग्रेस/भाजपा-प्रेसवार्ता
अखिल भारतीय कांग्रेस कमेटी के संचार विभाग के प्रमुख पवन खेड़ा ह आज रईपुर म पत्रकारवार्ता म किहीन कि भाजपा मुद्दा विहीन पार्टी हरय। ओमन किहीन कि भाजपा संविधान बदलके आरक्षण खतम करना चाहथे। उहें, कांग्रेस जातिगत जनगणना के पक्ष म हे। छत्तीसगढ़ म कांग्रेस के सरकार ह आरक्षण देबर विधेयक लानिन। जेला भाजपा ह राजभवन म लंबित करवा देहे। ओमन किहीन कि केंद्र म कांग्रेस के सरकार बने म माईलोगिन मन बर महालक्ष्मी योजना सुरू करे जाही। उहें, भारतीय जनता पार्टी के लोकसभा चुनाव प्रभारी नितिन नबीन ह जांजगीर-चांपा के अकलतरा म आयोजित पत्रकारवार्ता म कांग्रेस उपर निसाना साधत किहीन कि पूर्ववर्ती कांग्रेस सरकार ह छत्तीसगढ़ म भ्रष्टाचार ल बढ़ावा देहे। उहें, पाछू दस बछर म प्रधानमंत्री नरेंद्र मोदी के नेतृत्व म केंद्र सरकार ह सबो वर्ग के हित बर काम करे हे।
फ्लैग मार्च
प्रदेस म लोकसभा चुनाव के तीसरा चरण के तहत सात संसदीय क्षेत्र मन म सात मई के होवइया मतदान ल लेके प्रशासनिक तैयारी तेज होगे हे। एखरे तहत कोरिया जिला के बैकुंठपुर अउ सोनहत म पुलिस ह फ्लैग मार्च निकालिन। ए दौरान पुलिस अधिकारी मन ह लोगन ले बिना डर अउ भय के निष्पक्ष अउ सांतिपूर्ण ढंग ले मतदान करे के अपील करीन।
महतारी वंदन योजना
प्रदेस म महतारी वंदन योजना के तीसरा किस्त जारी कर दे गेहे। ए जानकारी मुख्यमंत्री विष्णुदेव साय ह आज रईपुर म पत्रकार मन ले चर्चा करत दीन। ओमन किहीन कि ए योजना ले मिलने वाला रासि ले समाज म बहुत बदलाव आवत हे। एखर ले माईलोगिन मन ल बहुत सहयोग मिलत हे। खबर के मुताबिक महतारी वंदन योजना म प्रदेस के सत्तर लाख ले जादा माईलोगिन मन ल अब तक दू किस्त के रासि जारी होगे हे।
श्रमिक दिवस
आज अंतर्राष्ट्रीय श्रमिक दिवस हरय। ए मउका म प्रदेस म आने-आने कारीकरम करके श्रमिक मनके सम्मान करे जात हे। मुख्यमंत्री विष्णुदेव साय राजधानी रईपुर के गांधी मैदान म आयोजित कारीकरम म सामिल होइन अउ ओमन ह श्रमिक मनके सम्मान करीन। ए दौरान ओमन ह श्रमिक मनके संग बोरे बासी खाइन। ए अवसर म विधायक मोतीलाल साहू, अनुज शर्मा, पुरंदर मिश्रा अउ कवि सुरेंद्र दुबे संग आने नेता अउ श्रमिक सामिल होइन। उहें, प्रदेस कांग्रेस कमेटी ह श्रमिक दिवस ल बोरे बासी दिवस के रूप म मनाइन। ए मउका म प्रदेस कांग्रेस अध्यक्ष दीपक बैज ह बोरे बासी खाके लोगन ल श्रमिक दिवस के सुभकामना दीन। पूर्व मुख्यमंत्री भूपेश बघेल ह कांग्रेस नेता अउ कार्यकर्ता के संग पूर्व विधायक प्रकाश नायक के निवास म बोरे बासी खाइन।
मतदाता जागरूकता
प्रदेस म लोकसभा चुनाव के तहत मतदान के प्रतिसत बढ़ाय बर जिला के प्रशासन डहार ले सरलग मतदाता जागरूकता कारीकरम चलाय जात हे। एखर तहत रईपुर जिला के मुख्य चिकित्सा अउ स्वास्थ्य अधिकारी कार्यालय परिसर म तेइस ले उनतीस अप्रैल तक बैडमिंटन प्रतियोगिता के आयोजन करे गीस। ए प्रतियोगिता म अभनपुर, आरंग, धरसींवा, तिल्दा अउ सहरी क्षेत्र मन ले लगभग पैंतीस प्रतिभाग मन ह हिस्सा लीन। प्रतियोगिता के दौरान कार्यालय परिसर म मतदाता जागरूकता बर स्लोगन लिखे बैनर पोस्टर लगाय गे रिहीस। प्रतियोगिता म पहला, दूसरा अउ तीसरा स्थान प्राप्त करइया खिलाड़ी मन ल जिला निर्वाचन अधिकारी डॉक्टर गौरव कुमार सिंह ह स्मृति चिन्ह अउ प्रसस्ति पत्र देके सम्मानित करीन अउ सबो ल मतदाता जागरूकता के सपथ दिलाइन।
उहें, रईपुर के जिला निर्वाचन अधिकारी डॉक्टर गौरव सिंह ह सोसल मीडिया एन्फ्लुएंसर्स अउ यू-ट्यूबर्स ले भेंट करीन। ए दौरान ओमन ह सात मई के होवइया मतदान ल लेके अपन भागीदारी निभाय के बात किहीन। संगेसंग ओमन ह सबो लोगन ल मतदान बर प्रेरित करे के संकल्प लीन। ए मउका म कलेक्टर ह जिला के सबो मतदाता मनले सात मई के अनिवार्य रूप ले मतदान करे के अपील करीन। ओमन ह मतदाता मनले आग्रह करीन कि पांच मई के होवइया ‘‘अपने बूथ को जानो‘‘ कारीकरम के तहत मतदान केंद्र म उपलब्ध सुविधा के जानकारी लेवय अउ अपन परिचित मन ल घलो बतावय।
अइसने मुंगेली जिला म लोगन ल मतदान के प्रति जागरूक करे बर ग्राम लालाकांपा म प्रभातफेरी निकाले गीस। जेमा बड़का संख्या म गांव के माईलोगिन अउ बुजुर्ग सामिल होइन। ए दौरान मतदाता जागरूकता संबंधित गीत अउ नारा के माध्यम ले लोगन ल मतदान के संदेस दे गीस। संगेसंग ओमन ह निर्भीक होके अपन मताधिकार के परयोग करे के सपथ घलो दिलाय गीस। खबर के मुताबिक स्वीप कारीकरम के तहत मुंगेली जिला के आने-आने जघा मन म पाछू बीस दिन ले प्रभातरफेरी निकाले जात हे।
आकाशवाणी महानिदेशक
भारतीय सूचना सेवा के वरिष्ठ अधिकारी मौसमी चक्रवर्ती ह आज आकाशणवाणी समाचार के महानिदेसक के पदभार ग्रहण करीन। बछर उन्नीस सौ इंक्यानवे बैच के आईआईएस अधिकारी श्रीमती चक्रवर्ती के तीर प्रेस सूचना ब्यूरो अउ केंद्रीय संचार ब्यूरो संग सूचना अउ प्रसारण मंत्रालय के कतकोन मीडिया संगठन मन म काम करे के व्यापक अनुभव हे। तीन दसक ले जादा के अपन कैरियर म ओमन ह राष्ट्रीय मानवाधिकार आयोग म अउ कैबिनेट मंत्री के निजी सचिव के रूप म घलो काम करे हे।
मजदूर मौत-आरोपी गिरफ्तार
राजनांदगांव जिला के जमसरार गांव म पाछू दिन जिला पंचायत के पूर्व सभापति के फार्म हाउस म लगे बोर के तीर बारूद म विस्फोट होय ले एक झिन मजदूर क मौत होगे रिहीस। ए मामला म पुलिस ह गांव के ही एक झिन इलेक्ट्रिसियन ल गिरफ्तार करे हे। बताय जात हे कि पुराना रंजिस के चलत ए मनखे ह घरेलू तार अउ फटाखा के बारूद के इस्तेमाल कर घटना ल अंजाम दे रिहीन।