नारायणपुर-कांकेर जिला के सीमावर्ती इलाका म अबूझमाड़ के जंगल म सुरक्षा बल के संग आज होय मुठभेड़ म दस झिन माओवादी मारे गेहे। एमा तीन महिला माओवादी घलो सामिल हे। ए जम्मों झन के सव बरामद कर ले गेहे।
पुलिस के मुताबिक आज बिहनिया डिस्ट्रिक्ट रिजर्व गार्ड-डीआरजी अउ विशेष कार्य बल-एसटीएफ के सामलात टीम अबूझमाड़ क्षेत्र के अंतर्गत टेकमेटा अउ काकूर के बीच जंगल म तलाशी अभियान म निकले रिहीस। इही दउरान माआवेदी मनके संग सुरक्षा बल मनके मुठभेड़ होइस। ए मुठभेड़ म तीन माईलोगिन समेत दस झिन माओवादी मारे गीस। सुरक्षा बल के जवान मन ह घटनास्थल ले एक ठन एके-सैंतालीस बंदूक, इंसास रायफल अउ हथियार समेत भारी मात्रा म विस्फोटक अउ दूसर सामान बरामद करे हे।
ओति, बीजापुर जिला म सोलह झन माओवादी मन ह आत्मसमर्पण कर देहे। ए मउका म राज्य पुलिस के बड़का अधिकारी मनके संगेसंग सुरक्षा बल के अधिकारी मन घलो मौजूद रिहीन। पुलिस अधीक्षक डॉक्टर जितेन्द्र कुमार यादव ह बतईन कि समर्पण करइया कुछेक माओवादी मन उपर इनाम घोसित रिहीस। उहें, कुछेक माओवादी मनके खिलाफ िंहंसा अउ आगजनी समेत आने-आने मामला म सामिल रेहे के आरोप हे। पुलिस अधीक्षक ह बतईन कि जम्मों माओवादी मन ल राज्य सरकार के पुनर्वास नीति के तहत पच्चीस-पच्चीस हजार रूपिया के प्रोत्साहन राशि दे गीस।
माओवादी घटना
नारायणपुर जिला के छोटेडोंगर इलाका म माओवादी मन डहार ले लगाय गे विस्फोटक के चपेट म आय ले दू झिन मजदूर घायल होगे हे। एमा ले एक मजदूर के हालत गंभीर बताय जात हे, जउन ल नारायणपुर जिला अस्पताल म भर्ती कराय गेहे। उहें, माओवादी मन इही जिला के आमदई खदान क्षेत्र म पानी टेंकर म आगी लगा दीन।
लोकसभा चुनाव प्रचार
प्रदेस म लोकसभा चुनाव के तीसर चरण बर चुनाव प्रचार तेज होगे हे। जम्मों राजनीतिक दल के राष्ट्रीय नेता अउ स्टार प्रचारक सरलग प्रदेस के आने-आने क्षेत्र म दउरा करत हे। संगेसंग जनसभा के माध्यम ले मतदाता मनके समर्थन हासिल करे के परयास घलो करत हे।
इही कड़ी म कांग्रेस के राष्ट्रीय अध्यक्ष मल्लिकार्जुन खड़गे ह आज जांजगीर-चांपा जिला के चांपा म आमसभा ल संबोधित करीन। जांजगीर लोकसभा क्षेत्र ले पार्टी प्रत्याशी डॉक्टर शिव डहरिया के समर्थन म सभा ल संबोधित करत श्री खड़गे ह किहीन कि केन्द्र म कांग्रेस के सरकार बनही, त रोजगार गारंटी योजना म काम करत मजदूर मन के रोजी ल बढ़ाय जाही। ओमन भाजपा के आलोचना करत किहीन कि मोदी के गारंटी कहि के मतदाता मन ले झूठा वादा करे जावत हे। ओमन किहीन कि गारंटी कोनों मनखे के नइ, बल्कि पार्टी डहार ले दे जाना चाही।
कार्यक्रम म कांग्रेस के प्रदेस प्रभारी सचिन पायलट, नेता प्रतिपक्ष डॉक्टर चरणदास महंत, प्रदेस कांग्रेस अध्यक्ष दीपक बैज, पूर्व मुख्यमंत्री भूपेश बघेल अउ पूर्व गृहमंत्री ताम्रध्वज साहू समेत आने-आने नेता अउ पदाधिकारी घलो मौजूद रिहीन।
उहें, भाजपा के वरिष्ठ नेता अउ मुख्यमंत्री विष्णुदेव साय ह आज जांजगीर-चांपा जिला के शिवरीनारायण अउ रायगढ़ जिला के खरसिया म भाजपा प्रत्याशी के समर्थन म चुनावी सभा ल संबोधित करीन। ए मउका म श्री साय ह किहीन कि प्रधानमंत्री नरेन्द्र मोदी के अगुवई म केन्द्र सरकार ह पाछु दस बछर के दउरान जनता के हित म बड़े अउ ऐतिहासिक फइसला लेहे। श्री साय ह राज्य म कांग्रेस के पाछु सरकार उपर जनता के संग वादाखिलाफी करे अउ भ्रष्टाचार ल बढावा देके आरोप लगईन। मुख्यमंत्री के जनसभा म कांग्रेस अउ आने दल के कार्यकर्ता अउ पदाधिकारी मन ह भाजपा म प्रवेस करीन।
ईडी-मनोज सोनी
प्रदेस के खाद्य विभाग म कस्टम मिलिंग घोटाला म मार्कफेड के प्रबंध संचालक अउ खाद्य विभाग के पूर्व विशेष सचिव मनोज सोनी ल प्रवर्तन निदेशालय-ईडी ह हिरातस म ल लेहे। ओमन ल आर्थिक अपराध अन्वेषण ब्यूरो-ईओडब्ल्यू ह आज करीबन एक सौ पचहत्तर करोड़ रूपिया के कस्टम मिलिंग घोटाला के संबंध म पूछताछ बर अपन आफिस बुलाय रिहीस। इही दउरान प्रवर्तन निदेशालय-ईडी के अधिकारी मन ह मनोज सोनी ल हिरासत म ले लीन। अदालत ह मनोज सोनी ल पांच दिन के रिमांड म ईडी ल सौंप देहे।
जीपी सिंह-प्रकरण
केन्द्रीय प्रशासनिक न्यायाधिकरण-कैट ह छत्तीसगढ़ के आईपीएस अधिकारी जी.पी. सिंह ल चार हफ्ता म बहाल करके ओखर प्रकरण के निराकरण करे के निरदेस देहे। खबर के मुताबिक पाछु बछर इक्कीस जुलाई के राज्य सरकार के अनुसंसा म केन्द्रीय गृह मंत्रालय ह जी.पी. सिंह ल अनिवार्य सेवानिवृत्ति दे दे रिहीस। ए फइलसा के खिलाफ जी.पी. सिंह ह कैट म प्रकरण दर्ज कराय रिहीस। राज्य के एंटी करप्शन ब्यूरो ह जी.पी. सिंह के आने-आने ठिकाना म छापा मारे रिहीस अउ आय ले जादा संपत्ति अउ संवेदनशील दस्तावेज मिले के आधार म भ्रष्टाचार के मामला म एफआईआर दर्ज करे रिहीस। एखर बाद राज्य सरकार ह ओमन ल निलंबित कर दे रिहीस।
श्रम दिवस
काली श्रम दिवस हे। ए मउका म मुख्यमंत्री विष्णुदेव साय राजधानी रईपुर के गांधी चउक म होवइया बिसेस कारीकरम म प्रदेस के उत्कृष्ट श्रमिक मन ल सम्मानित करही। अपन संदेस म श्री साय ह किहीन कि प्रदेस के सहरी क्षेत्र म काम करइया मजदूर मन दूरदराज के गांव ले आथे। ओमन किहीन कि गांधी चौक मैदान ह रईपुर म असंगठित क्षेत्र के श्रमिक मन बर रोजगार खोजे के सबले पुराना जघा हरय, एखर सेती काली गांधी चउक मैदान म श्रमिक मनके सम्मान के कारीकरम तय करे गेहे।
जग्गी हत्याकांड-आरोपी समर्पण
जग्गी हत्याकांड के पांच आरोपी मन ह सर्वोच्च न्यायालय ले मोहलत मिले के बाद आज रईपुर के अदालत म समर्पण कर दीन। ए मामला म दू झिन आने आरोपी – चिमन सिंह अउ विनोद सिंह राठौर पहिली ही समर्पण कर चुके हे। उहें, आज रईपुर के महापौर एजाज ढेबर के भाई याह्ा ढेबर के समर्पण के बाद तत्कालीन सीएसपी अमृत सिंह गिल, तत्कालीन थाना प्रभारी वी.के. पांडे अउ तत्कालीन क्राइम ब्रांच के पुलिस अधिकारी आर.सी. त्रिवेदी के अलावा आरोपी सूर्यकांत तिवारी ह रईपुर के विशेष न्यायाधीश के अदालत म समर्पण कर दीन।
फर्जी नौकरी-आरोपी गिरफ्तार
दुरूग पुलिस ह भिलाई इस्पात संयंत्र म फर्जी अंकसूची के माध्यम ले पाछु तीस बछर ले नौकरी करइया एक आरोपी ल गिरफ्तार करे हे। ए संबंध म भिलाई के अतिरिक्त पुलिस अधीक्षक सुखनंदन राठौड़ ह बतईन कि आरोपी ह बछर उन्नीस सौ चौरानवे म दसवीं के अंकसूची तैयार कराय रिहीस अउ ए आधार म भिलाई इस्पात संयंत्र म ओ ह नौकरी घलो हासिल कर ले रिहीस। आरोपी के बड़े भाई ह जब ए मामला के सिकायत दर्ज करईस, त जांच के दउरान उंखर अंकसूची फर्जी होय के मामला आगू अईस। पुलिस ह आरोपी ल गिरफ्तार करके जेल भेज देहे। मामला के जांच चलत हे।
मतदाता जागरूकता
प्रदेस म लोकसभा चुनाव के तहत आने-आने मतदाता जागरूकता कार्यक्रम चलत हे। इही कड़ी म गौरेला-पेण्ड्रा-मरवाही जिला के डोंगरिया गांव म जिला निर्वाचन अधिकारी लीना कमलेश मंडावी ह लोगन मन ल मतदान के महत्व बतईन। उहें, जिला म स्वीप कार्यक्रम के नोडल अधिकारी कौशल प्रसाद तेंदुलकर ह मतदाता मन ल वोट डाले बर नेवता-पाती दीन। ए मउका म डोंगरिया गांव के माईलोगिन समूह के सदस्य मन ल सात मई के वोट डाले बर केहे गीस।
ओति, सारंगढ़-बिलाईगढ़ जिला म निर्वाचन अधिकारी अउ कलेक्टर धर्मेश कुमार साहू ह स्वीप अभियान के तहत कलेक्टारेट परिसर ले मसाल रैली ल रवाना करीन। नगर के प्रमुख रद्दा ले होवत ए रैली कलेक्ट्रेट परिसर म सिरईस। ए दउरान प्रतिभागी मन ह ‘‘सब्बो जाबो वोट दे बर‘‘ के नारा घलो लगईन। ए मउका म सामूहिक रूप ले मतदान करे के संकल्प घलो ले गीस।
दुर्घटना
राजनांदगांव जिला के तिलई गांव म एक ठिन ट्रक के चपेट म आय ले चार झिन लोगन के मउत होगे। एमा पति-पत्नी समेत एकेच परिवार के चार झिन सदस्य सामिल हवय। मिले जानकारी के मुताबिक ए चारों झिन लोगन मन गांव के मुख्य रद्दा म बस के इंतजार करत रिहीस, तभे राजनांदगांव कोति ले आवत एक ठिन ट्रक ह एमन ल अपन चपेट म ले लीस।