बेमेतरा जिला म पाछू रतिहा एक सड़क दुर्घटना म नौ लोगन के मउत होगे हे। फेर उन्नीस ले जादा लोगन घायल होगे हे। घायल मन ल बेमेतरा अउ सिमगा के शासकीय अस्पताल म भर्ती कराय गेहे।
हमर संवाददाता ले मिले जानबा के मुताबिक ग्राम तिरैया ले एक परिवारिक कारीकरम म सामिल होय के बाद एक पिकअप गाड़ी म करीब तीस लोगन अपन गांव पर्थरा लहूटत रिहीन। इही दौरान ग्राम कठिया तीर उंखर गाड़ी सड़क किनारे खड़े एक दूसर गाड़ी ले टकरा गीस। ए हादसा म आठ लोगन के मउका म ही मउत होगिस। उहें, एक माईलोगिन ह अस्पताल म दम तोड़ दीस। एमा छै माईलोगन अउ तीन लइका सामिल हे।
उहें, गंभीर रूप ले घायल चार लोगन ल एम्स रईपुर लाय गेहे। सूचना मिलत ही, जिला कलेक्टर अउ पुलिस अधीक्षक के संग आने अधिकारी मउका म पहुंचिन अउ घटना के जानकारी लीन। संगेसंग अधिकारी मन ल घटना के सुक्ष्मता ले जांच करे के निरदेस दीन।
इही बीच जिला प्रशासन ह मृतक मनके परिजन मन ल पचीस-पचीस हजार रूपिया अउ घायल मन ल दस-दस हजार रूपिया के तत्कालिक सहायता रासि देके घोसना करे हे।
मुख्यमंत्री विष्णुदेव साय ह नौ लोगन के मउत म सोक व्यक्त करे हे। ओमन ह जिला प्रशासन ल घायल मनके अच्छा इलाज करे के निरदेस दीन।
ओति, रायगढ़ जिला के रायगढ़-घरगोड़ा रद्दा म आज बिहनिया एक पिकअप गाड़ी के पलटे ले बारा मजदूर घायल होगे हे। घायल मन ल निजी अस्पताल म भर्ती कराय गेहे।
लोकसभा चुनाव प्रचार
प्रदेस म लोकसभा चुनई के तीसरइया चरण बर चुनाव प्रचार तेज होगे हे। कांग्रेस के पूर्व राष्ट्रीय अध्यक्ष राहुल गांधी आज बिलासपुर जिला के सकरी म सभा ल संबोधित करीन। ए मउका म श्री गांधी ह भाजपा उपर निसान साधत किहीन कि ओमन संविधान बदले के संग आरक्षण खतम करना चाहत हे। ओमन ह किहीन कि कांग्रेस के सरकार बने म किसान मनके कर्जा माफ करे जाही। श्री गांधी ह महंगाई अउ बेरोजगारी बर केंद्र के भाजपा सरकार ल जिम्मेदार ठहराइस।
उहें, कांग्रेस के राष्ट्रीय अध्यक्ष मल्लिकार्जुन खरगे काली तीस अप्रैल के जांजगीर-चांपा लोकसभा क्षेत्र के चांपा म सभा ल संबोधित करही।
इही बीच, भाजपा के वरिष्ठ नेता अउ मुख्यमंत्री विष्णुदेव साय काली तीस अप्रैल के भाजपा प्रत्यासी के पक्ष म जांजगीर-चांपा जिला के शिवरीनारायण म चुनावी सभा लिही।
भाजपा-प्रेसवार्ता
प्रदेस भाजपा अध्यक्ष किरण सिंह देव ह किहीन हे कि केन्द्र के मोदी सरकार ह पाछू दस बछर म अच्छा काम करे हे। एखरे सेति जनता के विस्वास प्रधानमंत्री नरेंद्र मोदी के संग हे, आज जांजगीर-चांपा म होवइया एक पत्रकारवार्ता म प्रदेस अध्यक्ष ह राज्य के पूर्ववर्ती कांग्रेस सरकार उपर निसाना साधत किहीन कि पाछू पांच बछर म कांग्रेस सरकार ह अपन घोसना पत्र के एक भी वादा ल पूरा नइ करीन।
होम वोटिंग
लोकसभा चुनई के तीसरइया चरण के तहत मतदान दल मन डहार ले पच्यासी बछर ले जादा उमर वर्ग के बुजुर्ग अउ दिव्यांग मतदाता मन ल घर-घर जाके मतदान कराय जावत हे। इही कड़ी म रईपुर कलेक्टर अउ जिला निर्वाचन अधिकारी डॉक्टर गौरव सिंह ह पोस्टल बैलेट मतदान बर ‘‘होम वोटिंग‘‘ मतदान रथ ल हरी झंडी दिखाके रवाना करीन। उहें राजधानी रईपुर म चुनाव ड्यूटी म लगे पुलिस अउ होम गार्ड के मतदाता मन ह पाछू सत्ताईस अउ अट्ठाईस अप्रैल के मतदान के बनाय गे बिसेस सुविधा केन्द्र म मतदान करीन। ए मतदान के सुविधा केन्द्र ल बिसेस साज-सज्जा करके ‘‘चुनई मड़वा‘‘ के रूप देगे रिहीस।
ओति, अंबिकापुर म तीस बछर के दिव्यांग अमर ठाकुर, लुण्ड्रा म बहत्तर बछर के दिव्यांग शंकरलाल अउ सीतापुर म नब्बे बछर के बुजुर्ग मतदाता बनसो टोप्पो ह होम वोटिंग के जरिया ले वोट डारिन।
अइसने गौरेला-पेण्ड्रा-मरवाही जिला म जिला निर्वाचन अधिकारी लीना कमलेश मंडावी ह तीरसठ होम वोटर्स मतदाता मन बर सात मतदान दल मन ल रवाना करीन। कलेक्टर ह खुदे दू होम वोटर्स के घर म जाके मतदान प्रक्रिया के अवलोकन करीन। इही दौरान ओमन ह नेवसा गांव के पैंतीस बछर के दिव्यांग मतदाता परस राम नागेश अउ टीकरकला के पंचानवे बछर के बुजुर्ग मतदाता सरदार अहमद के घर पहुंच के पोस्टल बैलेट ले वोट डरवाइन।
माओवादी मुठभेड़
सुकमा जिला म आज सुरक्षा बल के संग होय मुठभेड़ म एक माओवादी मारे गीस। मारेगे माओवादी के सव बरामद कर ले गेहे। जानबा के मुताबिक जिला के किस्टारम इलाका ले डिस्ट्रिक्ट रिजर्व गार्ड-डीआरजी, बस्तर फाइटर्स अउ सीआरपीएफ के कोरबा बटालियन के संयुक्त टीम तलासी अभियान म निकले रिहीन। इही दौरान पेसेलपाड़ के जंगल म पहिली ले घात लगाके बइठे माओवादी मन ह सुरक्षाबल उपर फायरिंग सुरू कर दीन। जवान मन ह घलो जवाबी कार्रवाई करीन। इही दौरान एक माओवादी मारे गीस। मउका ले सुरक्षा बल मन ह हथियार अउ आने माओवादी सामग्री बरामद करीन।
अनिल टुटेजा-रिमांड
कथित सराब घोटाला म गिरफ्तार पूर्व आईएएस अधिकारी अनिल टुटेजा ल आज रईपुर के विसेस अदालत ह चार मई तक ईडी के रिमांड म भेज दे हे। ईडी ह अदालत ले छै दिन के रिमांड मांगे रिहीन।
जानबा के मुताबिक अनिल टुटेजा पाछू पांच दिन ले ईडी के रिमांड म रिहीन। आज रिमांड खत्म होय म ओला बिसेस कोर्ट म पेस करे गीस।
मतदाता जागरूकता
प्रदेस म लोकसभा चुनई के तहत मतदान के प्रतिसत बढ़ाय बर जिला प्रशासन डहार ले लगातार मतदाता जागरूकता कारीकरम चलाय जावत हे। इही कड़ी म रईपुर म मुखबधिर नवा जोड़ी आलोक जायसवाल अउ रंजुला पटेल ह ‘‘कलेक्टर के पाती‘‘ माध्यम ले लोगन मन ल मतदान के संदेस दीन।
ऐति, दुर्ग म भिलाई इस्पात संयंत्र के तत्वाधान म साइकिल रैली निकाले गीस। ए रैली म संयंत्र के कार्यपालक निदेसक ह युवा मन संग साइकल चलाइन अउ सत-प्रतिसत मतदान के संदेस दीन। ए रैली सिविक सेंटर स्थित महात्मा गांधी कला मंदिर ले सुरू होइस, जेन देवबलौदा के पुरातात्विक शिवमंदिर प्रांगण ले होवत वापस कलामंदिर म खत्म होइस।
ओति, सक्ति जिला मुख्यालय म नगर पालिक निगम के अधिकारी-कर्मचारी अउ नागरिक मन ह फ्लैश मोबाइल रोसनी के जरिया ले सहर के आने-आने चौक-चौराहा अउ चौपाटी म मतदाता जागरूकता के संदेस दीन। संगेसंग बाजार चौक ले हॉस्पिटल चौक तक रैली घलो निकाले गीस। ए दौरान बैनर पोस्टर के जरिया ले नवा मतदाता मन ल जागरूक करे गीस।
बूट कैम्प-आयोजित
प्रदेस के पहिली पांच दिवसीय ‘‘इनोवेशन,डिजाईन अउ उद्यमिता बूट कैम्प‘‘ राजधानी रईपुर स्थित एमिटी यूनिवर्सिटी म सुरू होगे हे। अखिल भारतीय तकनीकी सिक्षा परिसर अउ शिक्षा मंत्रालय के इनोवेशन सेल के तत्वाधान म आयोजित बूट कैम्प के उद्घाटन अखिल भारतीय तकनीकीय शिक्षा परिसद के अध्यक्ष प्रोफेसर टी.जी. सीतारम अउ स्वामी विवेकानंद तकनीकी विश्वविद्यालय भिलाई के कुलपति प्रोफेसर एम. के. वर्मा ह करीन। ए मउका म श्री सीतारम ह देस के युवा मनके बीच नवाचार अउ उद्यमिता के संस्कृति ल बढ़ावा दे उपर जोर दीन। उहें, प्रोफेसर एम.के. वर्मा ह किहीन कि प्रतिभा जघा या परिस्थिति ले बाधित नइ होय, कतकोन प्रतिभासाली लोगन गांव डहार ले आथे। कारीकरम ल एमिटी यूनिवर्सिटी के कुलपति प्रोफेसर पीयूषकांत पांडेय अउ अखिल भारतीय तकनीकी शिक्षा परिसद के प्रबंध संपादक विकास वर्मा ह घलो संबोधित करीन।