बिलासपुर के गुरू घासीदास केंद्रीय विश्वविद्यालय ह ‘ए डबल प्लस‘ रैंकिंग पवइया प्रदेस के पहिली विश्वविद्यालय बन गेहे। ए विश्व विद्यालय ल राष्ट्रीय मूल्यांकन अउ प्रत्यायन परिषद-नैक ह ए रैंकिंग दे हवय। एखर पहिली ए विश्वविद्यालय ल नैक समीक्षा म ‘बी रैंक‘ दे गे रिहीस। हालेच म छै सदस्यीय नैक टीम ह विश्व विद्यालय के निरीक्षण करे रिहीन। जेखर बाद राखेगे मापदंड म ए विश्वविद्यालय ह खरा उतरिस।
जानबा के मुताबिक विश्व विद्यालय म सिक्षण अध्ययन अउ अनुसंधान के गुणवत्ता ल बढ़ावा देके संगेसंग पढ़ई-लिखई के मामला ल घलो बने ढंग ले करवाथे।
रेलवे-गति शक्ति कार्गो टर्मिनल
देस म अधोसंरचना ल बढ़ावा देबर रेलवे ह गति शक्ति कार्गो टर्मिनल के सुरूआत करे हे। रईपुर रेलमंडल के पहिली गति शक्ति कार्गो टर्मिनल के सुभारंभ मंडल रेल प्रबंधक संजीव कुमार ह करे हे। ए मउका म रईपुर रेल मंडल के पहिली कार्गो टर्मिनल ल खड़गपुर बर भेजे गीस। जेमा किलिंकर लोड करे गे रिहीस। ए कार्गो टर्मिनल के सुरू होय ले माल लदान अउ आय म बढ़ोत्तरी होही। एखरे संग रईपुर रेलमंडल ल लोडिंग अनलोडिंग बर एक ठिन नवा केंद्र मिल गेहे, जिहां ले आने ग्राहक मन घलो अपन जिनिस ल भेज सकहीं।
लोकसभा चुनाव-तीसरा चरण
प्रदेस म लोकसभा चुनई के तीसर चरण बर चुनाव प्रचार जोर पकड़ लेहे। भाजपा के वरिष्ठ नेता अउ मुख्यमंत्री विष्णुदेव साय ह आज जांजगीर-चांपा लोकसभा क्षेत्र ले अकलतरा म स्थित पहरिया गांव म भाजपा प्रत्यासी के पक्ष म विजय संकल्प रैली ल संबोधित करीन। उहें, कांग्रेस के पूर्व राष्ट्रीय अध्यक्ष राहुल गांधी ह काली बिलासपुर जिला के सकरी म सभा ल संबोधित करही। त, उहें, कांग्रेस के राष्ट्रीय अध्यक्ष मल्लिकार्जुन खरगे ह तीस अप्रैल के जांजगीर-चांपा लोकसभा क्षेत्र के चांपा म सभा ल संबोधित करही।
त ऐति, प्रदेस कांग्रेस अध्यक्ष दीपक बैज ह लोकसभा चुनई के प्रचार-प्रसार बर विधानसभावार जिम्मेवारी तय करत कांग्रेस पदाधिकारी मनके नियुक्ति करे हे।
भाजपा-प्रेसवार्ता
भारतीय जनता पार्टी के प्रदेस उपाध्यक्ष शिवरतन शर्मा ह आरोप लगाय हे कि कांग्रेस के घोसना पत्र धोखा, तुष्टिकरण अउ अपराधि मन ल सपोर्ट देने वाला हरय। रईपुर म राखे गे एक ठिन पत्रकारवार्ता म ओमन किहीन कि कांग्रेस ह अपन घोसना पत्र म सरकारी ठेका म अल्पसंख्यक मन ल प्राथमिकता देके बात केहे हे। ओमन किहिन कि कांग्रेस ह आदिवासी, पिछड़ा वर्ग अउ अनुसूचित जाति के संगेसंग सामान्य वर्ग के जम्मों हक ल झपटना चाहत हे। श्री शर्मा ह किहीन कि राहुल गांधी के सलाहकार सैम पित्रोदा ह संपत्ति म विरासत टैक्स लगाय के बात केहे हे, जेखर भाजपा ह विरोध करत हे। ओमन किहीन कि नरेंद्र मोदी के सरकार ह आर्थिक रूप ले पिछड़ा हर वर्ग के लोगन मन बर काम करे हे।
दुर्घटना
राजनांदगांव जिला म आज होय एक ठिन सड़क दुर्घटना म बाप-बेटी के मउत होगे। उहें, पांच झिन आने मनखे मन घायल होगे हे, जेमा ले एक झिन के हालत गंभीर बने हे। हमर संवाददाता ले मिले जानबा के मुताबिक टटेंगा-जेवरतला के रहइया मनखे ह अपन दू झिन लइका के संग बिहाव म सामिल होय के बाद वापिस अपन गांव लहुटत रिहीन। इही दौरान पिनकापार नरवा के तीर उंखर फटफटी ह आने फटफटी ले टकरागे ए घटना म दूनों फटफटी म बइठे सात झिन लोगन मन घायल होगे। जेमा ले टटेंगा के रहइया बाप-बेटी के मउत होगे। त उहें, घायल मनखे मन ल डोंगरगांव के सामुदायिक स्वास्थ्य केंद्र म भर्ती कराय गेहे।
साहिल खान-गिरफ्तार
महादेव सट्टा ऐप मामला म मुंबई पुलिस ह बॉलीवुड अभिनेता साहिल खान ल जगदलपुर ले गिरफ्तार करे हे। पुलिस के मुताबिक साहिल खान ह महाराष्ट्र ले छत्तीसगढ़ आके पाछू थोरिक दिन ले जगदलपुर म राहत रिहीस। साहिल खान ल हिरासत म लेके बाद पुलिस ह ओला शिंदेवाड़ी कोर्ट म पेस करीन। जिहां साहिल के जमानत अर्जी ल खारिज करत कोर्ट ह ओला चार दिन के पुलिस हिरासत म भेज देहे।
मतदाता जागरूकता-01
प्रदेस म लोकसभा चुनई के तहत मतदान के प्रतिसत बढ़ाय बर जिला प्रशासन डहार ले सरलग मतदाता जागरूकता कारीकरम चलाय जात हे। इही कड़ी म चैंबर ऑफ कामर्स ले जुड़े व्यापारिक संगठन मन ह अपन उत्पाद म लोगन मन ल वोट करे बर आगू आय एखर बर उत्पाद म छूट देके घोसना करे हे। चैंबर ऑफ कामर्स के प्रदेस अध्यक्ष अमर पारवानी के अगुवई म व्यापारी मन ह रईपुर के जिला निर्वाचन अधिकारी डॉक्टर गौरव कुमार सिंह ले मिलिन। ए दौरान ओमन किहीन कि जउन मतदाता मन ह वोट डारे के बाद वोट डारे के चिन्हा देखाही त, ओमन ल आने-आने जिनिस के खरीदी उपर छूट दे जाही। ए छूट ह सात मई ले बारह मई तक दे जाही। उहें, राजधानी रईपुर म कतकोन होटल अउ अस्पताल मन ह घलो ग्राहक मन ल वोट डारे के बाद स्याही के चिन्हा दिखाय उपर छूट के घोसना करे हे।
अइसने रईपुर के मरीनड्राइव के तीर एक ठन रेस्टारेंट ह मतदाता मन ल जागरूक करे बर पचीस प्रतिसत छूट देके घोसना करे हे त, उहें, लइका मनके मनोरंजन बर चलइया बस अउ ट्रेन के संवारी म तीस प्रतिसत छूट देके बात केहे हे। ए सुविधा मतदान दिवस के दिन सात मई के वोट डारे के बाद ले सुरू होही।
उहें, मतदाता जागरूकता कारीकरम के तहत नवा रईपुर म स्वीप संध्या के कारीकरम करे गीस, जेमा जिला निर्वाचन अधिकारी डॉक्टर गौरव सिंह ह सामिल होइन। ए मउका म ओमन किहीन कि लोकतंत्र के ए महापरब म नवा रईपुर के हर नागरिक मन ल वोट डार के अपन कर्तव्य ल निभाना हे। कारीकरम के बाद कलेक्टर ह जम्मों लोगन मन ल मतदाता जागरूकता के सपथ घलो देवाइन। स्वीप संध्या के मउका म रंगोली, नारा लेखन, नुक्कड़ नाटक, फुटबॉल अउ क्रिकेट प्रतियोगिता के माध्यम ले मतदाता जागरूकता के संदेस दे गीस। उहें, लइका मन बर खुर्सी दौड़ के आयोजन घलो करे गीस। प्रतियोगिता म जीतइया लोगन मन सम्मानित करे गीस।
रायगढ़-सटोरिया गिरफ्तार
रायगढ़ पुलिस ह आने-आने थाना क्षेत्र ले सट्टा-पट्टी के संग बारह झिन लोगन मन ल गिरफ्तार करे हे। ओखर तीर ले करीबन साढ़े तेरह लाख रूपिया नगदी बरामद करे गेहे। सहर के कतकोन जघा म सट्टा-पट्टी लिखे के सूचना मिले उपर रायगढ़ पुलिस ह टीम बनाके आने-आने जघा म छापा मारिन अउ बारह झिन लोगन मन ल सट्टा-पट्टी लिखत गिरफ्तार करीन। उंखर मनके तीर ले पंद्रह ठिन मोबाइल, एक ठन लेपटाप, एक ठिन टेबलेट घलो बरामद करे गेहे।
राजनांदगांव-बंदूक चोरी
राजनांदगांव के डोंगरगढ़ स्थित भारतीय स्टेट बैंक म अन्जान लोगन मन ह ताला तोड़के बैंक म रखे दू ठिन बारा बोर के बंदूक अउ बीस नग कारतूस ल चोरा लेहे। ए घटना के जानबा बिहनिया बैंक खुले के बाद अधिकारी मन ल होइस अउ जेखर बाद एखर सूचना बैंक प्रबंधक अउ पुलिस ल दे गीस। बैंक प्रबंधक सत्येन्द्र कुमार सिंह के सिकायत उपर पुलिस ह अज्ञात चोर के खिलाफ अपराध दरज करके जांच सुरू कर देहे।
अउ अब पेस हे मौसम के हाल…
अवइया चौबीस घंटा के दौरान प्रदेस के एक-दू जघा म गरज-चमक के संग हल्का बरसा होय के संभावना बताय गेहे। त, उहें, कोनो-कोनो जघा म गाज गिरे अउ जोरदरहा हवा गरेर चले के चेतावनी दे गेहे। प्रदेस के दक्षिण छत्तीसगढ़ ह एखर ले परभावित रइही। मौसम विभाग के मुताबिक एक ठिन द्रोणिका उत्तर पूर्व झारखंड ले दक्षिण छत्तीसगढ़ तक बने हे। जेखर सेति प्रदेस म ए बेरा बादल छाय हे।
अउ अब थोरकुन समाचार सार म
अउ
– सक्ति जिला के भेड़ीकोना गांव म स्थित बोराई नदिया म पाछू दिन एक ठिन गाड़ी गिरगे रिहीस। ए गाड़ी म फसे ड्राइवर के सव ल चालीस घंटा के बाद बरामद कर ले गेहे।