प्रदेस म लोकसभा चुनाव के दूसरइया चरण के तहत काली छब्बीस अप्रैल के होय मतदान के अंतिम आंकड़ा आ गेहे। निर्वाचन आयोग डहार ले जारी आंकड़ा के अनुसार राज्य के तीन लोकसभा क्षेत्र राजनांदगांव, महासमुंद अउ कांकेर म काली छिहत्तर दसमलव दू चार प्रतिसत मतदान होय हे। एमा सबले जादा राजनांदगांव म करीब ससत्तर प्रतिसत, कांकेर म लगभग छिहत्तर प्रतिसत अउ महासमुंद म पचहत्तर प्रतिसत मतदान दर्ज करे गेहे।
बतादन कि छत्तीसगढ़ म बछर दू हजार उन्नीस म होय लोकसभा चुनाव के मुकाबला ए पइत के लोकसभा चुनाव के दूसरइया चरण म एक दसमलव तीन प्रतिसत जादा मतदान होय हे। पाछू लोकसभा चुनाव ले अगर तुलना करन, त कांकेर म करीब दू प्रतिसत जादा मतदान होय हे। उहें, राजनांदगांव म लगभग डेढ़ प्रतिसत अउ महासमुंद लोकसभा क्षेत्र म करीब आधा प्रतिसत जादा मतदान दर्ज करे गेहे।
ए सबो लोकसभा क्षेत्र के अंतर्गत विधानसभावार आंकड़ा उपर नजर डालन त, राजनांदगांव लोकसभा क्षेत्र के अंतर्गत आठ विधानसभा क्षेत्र आथे, जिहां डोंगरगांव विधानसभा क्षेत्र म सबले जादा बियासी प्रतिसत मतदान होय हे। फेर सबले कम मतदान पंडरिया विधानसभा क्षेत्र म करीब इकहत्तर प्रतिसत दर्ज करे गेहे। जिहां तक महासमुंद लोकसभा क्षेत्र के बात हे, त एखर अंतर्गत आठ विधानसभा क्षेत्र आथे, जेमा बिन्द्रानवागढ़ विधानसभा क्षेत्र म सबले जादा करीब इकयासी अउ सबले कम महासमुंद विधानसभा क्षेत्र म उनहत्तर प्रतिसत मतदान दर्ज करे गेहे। फेर कांकेर लोकसभा क्षेत्र के अंतर्गत आठ ठन विधानसभा क्षेत्र मन ले सिहावा म सबले जादा करीब अस्सी प्रतिसत अउ गुण्डरदेही म सबले कम चौहत्तर प्रतिसत मतदान दर्ज करे गेहे।
बिरनपुर हत्याकांड-सीबीआई जांच
बेमेतरा जिला के बिरनपुर गांव म करीब एक साल पहिली होय एक झन युवक के हत्या के मामला के जांच अब सीबीआई करही। ए संबंध म केंद्र सरकार ह काली अधिसूचना जारी कर दे गेहे। केंद्रीय जांच ब्यूरो-सीबीआई ह केंद्र सरकार के अधिसूचना के आधार म ए मामला ले संबंधित बारह झन आरोपी मनके खिलाफ फेर मामला दर्ज कर लेहे।
बतादन कि बिरनपुर गांव म पाछू बछर आठ अप्रैल के दू ठन समुदाय के बीच होय झड़प म एक झन युवक भुवनेश्वर साहू के मौत होगे रिहीस। ए मामला म पुलिस ह बारह झन आरोपी मन ल गिरफ्तार करे रिहीस। ए सबो आरोपी अभी हिरासत म हे। राज्य म भाजपा सरकार बने के बाद राज्य सरकार ह ए मामला के जांच सीबीआई ले कराय के घोसना करे रिहीन। राज्य सरकार के सहमति के बाद केंद्र सरकार ह ए मामला ल सीबीआई ल सौंप देहे।
सुप्रीम कोर्ट-ईवीएम/वीवीपैट
सर्वोच्च न्यायालय ह मतदान पुष्टि पर्ची-वीवीपैट अउ इलेक्ट्रानिक वोटिंग मसीन-ईवीएम के सतप्रतिसत मिलान वाले याचिका मन ल खारिज कर देहे। ए फैसला न्यायाधीश संजीव खन्ना अउ दीपांकर दत्ता के एक बेंच ह सुनाय हे।
ऐति, प्रदेस के उप मुख्यमंत्री अरूण साव ह सुप्रीम कोर्ट के ए फैसला के स्वागत करत हुए किहीन कि कांग्रेस करा हार के कोई बहाना नइ बांचे हे। श्री साव ह काली रायपुर स्थित भाजपा कार्यालय एकात्म परिसर म चर्चा करत हुए ए बात ल किहीन।
माओवादी-ग्रामीण हत्या
दंतेवाड़ा जिला म अज्ञात लोगन मन ह पूर्व जनपद पंचायत सदस्य जोगा पोड़ियाम के धारदार हथियार ले वार करके हत्या कर दे हे। मिले जानकारी के अनुसार ए घटना जिला के अरनपुर थाना क्षेत्र के पोटली गांव के मिर्चीपारा के आय। पुलिस ह मामला दर्ज कर जांच सुरू कर देहे।
दुर्घटना
जांजगीर-चांपा जिला म आज होय एक ठन सड़क दुर्घटना म एके परिवार के चार झन के मौत होगे। एमा एक झन नोनी अउ एक झन महिला सामिल हे।
मिले जानकारी के अनुसार ए सबो झन आज बिहनिया मोटर साइकिल म सवार होके शादी समारोह ले लहूटत रिहीन। इही दौरान जिला के मुलमुला थाना क्षेत्र के आरसमेटा गांव करा एक ठन ट्रक के चपेट म आय ले नोनी समेत तीन झन के मउका म ही मौत होगे। जबकि गंभीर रूप ले घायल एक झन महिला ल अस्पताल म भर्ती कराय गे रिहीस, जिहां ईलाज के दौरान ओखरो मौत होगे। पुलिस ह आरोपी ड्राइवर ल गिरफ्तार कर लेहे। ए हादसा के बाद गुस्साय परिजन अउ स्थानीय लोगन मन घटना स्थल म चक्का जाम करीन। बाद म पुलिस के समझाइस के बाद मामला सांत होइस।
लोकसभा चुनाव-प्रचार
लोकसभा चुनाव के तीसरइया चरण के तहत सबो पार्टी मन के स्टार प्रचारक मन डहार ले अपन प्रत्यासी मनके पक्ष म प्रचार करे के सिलसिला जारी हे। इही कड़ी म कांग्रेस के राष्ट्रीय अध्यक्ष मल्लिकार्जुन खड़गे तीस अप्रैल के जांजगीर-चांपा जिला के चांपा म कांग्रेस प्रत्यासी डॉक्टर शिव डहरिया के पक्ष म चुनावी सभा लिही। चांपा म श्री खड़गे के सभा ल लेके कांग्रेस पूरा तैयारी म जुट गेहे।
मतदाता जागरूकता
प्रदेस म लोकसभा चुनाव के तहत मतदान के प्रतिसत बढ़ाय बर जिला प्रशासन डहार ले लगातार मतदाता जागरूकता कारीकरम चलाय जात हे। इही कड़ी म राजधानी रायपुर म मतदाता मन ल जागरूक करे बर स्वीप संध्या के अयोजन करे गीस। तेलीबांधा स्थित मरीन ड्राइव म आयोजित ए कारीकरम म कलेक्टर डॉक्टर गौरव सिंह अउ मुख्य अतिथि न्यायाधीश जे. अब्दुल जाहिद सामिल होइन। ए मउका म न्यायाधीश श्री जाहिद ह किहीन कि मतदान हर मनखे के जरूरी अधिकार आय, अउ सबो मनखे मन ल मतदान जरूर करना चाही। कारीकरम म न्यायाधीश ह सबो नागरिक मन ल मतदाता जागरूकता के सपथ दिलाइन। उहें, कलेक्टर डॉक्टर गौरव सिंह ह किहीन कि मतदान हम सबो झन के जिम्मेदारी आय अउ हम सबो ल अपन जिम्मेदारी निभाना चाही। ए मउका म रैंप शो के घलो आयोजन करे गीस। जेमा पचहत्तर बछर ले जादा उमर के सियान समेत दिव्यांग अउ तृतीय लिंग के प्रतिभागी मन घलो हिस्सा लीन। रैंप शो म जाने-माने मॉडल अधीर अउ जया भगनानी ह घलो बिसेस रूप ले सामिल होके रैंप वॉक करीन। सबो मॉडल मन हाथ म तख्ती लेके रैंप वॉक के जरिया मतदान करे के संदेस दीन।
उहें, बलरामपुर जिला म सत-प्रतिसत मतदान करे के उद्देस्य ले लोगन मन ल मतदान के प्रति प्रेरित करे बर आने-आने कारीकरम के आयोजन करे गीस। जेमा खेल प्रतियोगिता, फुटबॉल अउ तैराकी के मैच कराय गीस। संगेसंग अंब्रेला रैली घलो निकाले गीस, जेमा महिला मन मानव श्रृंखला अउ स्वीप बैलून के माध्यम ले मतदाता जागरूकता के संदेस दीन। स्वीप कारीकरम के तहत आयोजित फुटबाल प्रतियोगिता, स्वीप बैलून अउ अंब्रेला रैली ल गोल्डन बुक ऑफ वर्ल्ड रिकॉर्ड म सामिल करे गेहे।
लोकसभा चुनाव-होम वोटिंग
लोकसभा चुनाव के तीसरइया चरण के तहत चुनाव काम म लगे अधिकारी अउ कर्मचारी मन बर डाकमत पत्र ले मतदान करे के प्रक्रिया काली अट्ठाईस अप्रैल ले सुरू होही। इही कड़ी म कोरिया जिला के बैकुंठपुर म अट्ठाईस अउ उनतीस अप्रैल के बिहनिया दस बजे ले संझा पांच बजे तक डाकमत पत्र के जरिया वोट डाले जाही।
उहें, बेमेतरा जिला के तीन ठन विधानसभा म तीसरइया चरण के सात मई के मतदान होही। एखर बर आज ले पच्यासी बछर ले जादा अउ दिव्यांग मतदाता मन बर घर ले मतदान करे बर मतदान दल ल रवाना करे गीस।