प्रदेस म लोकसभा चुनाव के दूसरइया चरण के तहत राजनांदगांव, महासमुंद अउ कांकेर संसदीय क्षेत्र मन म काली छब्बीस अप्रैल के मतदान होही। ए तीनों लोकसभा क्षेत्र मन म तीन महिला समेत इकचालीस उम्मीदवार चुनाव मैदान म हे। राज्य के मुख्य निर्वाचन पदाधिकारी रीना बाबासाहेब कंगाले ह आज रायपुर म एक पत्रकारवार्ता म बतईन हे कि मतदान बर निर्वाचन आयोग ह जम्मों तैयारी कर लेहे। एखरे संग सबो संवेदनशील क्षेत्र मन म सुरक्षा के पुख्ता इंतजाम करे गेहे।
मुख्य निर्वाचन पदाधिकारी ह बतइन कि राजनांदगांव लोकसभा क्षेत्र के अंतर्गत पंडरिया, कवर्धा, खैरागढ़, डोंगरगढ़, राजनांदगांव, डोंगरगांव अउ खुज्जी विधानसभा क्षेत्र मन म बिहनिया सात बजे ले संझा छै बजे तक मतदान होही। उहें, मोहला-मानपुर विधानसभा क्षेत्र म बिहनिया सात बजे ले मंझनिया तीन बजे तक वोट डारे जाही। अइसने, महासमुंद लोकसभा क्षेत्र के सरायपाली, बसना, खल्लारी, महासमुंद, राजिम, कुरूद अउ धमतरी म बिहनिया सात बजे ले संझा छै बजे तक मतदान होही।
उहें, बिंद्रानवागढ़ विधानसभा क्षेत्र के नौ मतदान केंद्र मन ल छोड़के बांचे मतदान केंद्र म बिहनिया सात बजे ले मंझनिया तीन बजे तक मतदान होही। एखरे संग कांकेर लोकसभा क्षेत्र के अंतर्गत सिहावा, संजारी-बालोद, डौंडीलोहारा अउ गुण्डरदेही विधानसभा क्षेत्र मन म बिहनिया सात बजे ले संझा छै बजे तक रइही। उहें, अंतागढ़, भानुप्रतापपुर, कांकेर अउ केशकाल विधानसभा क्षेत्र मन म मतदान के बेरा बिहनिया सात बजे ले मंझनिया तीन बजे तक रहइी। मतदान के दिन तीनों लोकसभा क्षेत्र मन ले जुड़े जिला मन म काली सार्वजनिक अउ सामान्य अवकाश घोसित करे गेहे। उहें, श्रम विभाग ह मजदूर मन बर घलो सवैतनिक अवकाश के घोसना करे गेहे। ए तीनों लोकसभा सीट अउ आने-आने राज्य मनके पड़ोसी जिला मन म मतदान प्रक्रिया संपन्न होय तक सुष्क दिवस घोसित करे गेहे। ए दौरान सबो सराब दुकान बंद रइही।
दूसरा चरण-मतदान-02
मुख्य निर्वाचन पदाधिकारी ह बतइन हे कि दूसर चरण के तहत राजनांदगांव, महासमुंद अउ कांकेर निर्वाचन क्षेत्र मन म मतदाता मनके कुल संख्या बावन लाख चौरासी हजार नौ सौ अड़तीस हे। एमा छब्बीस लाख पांच हजार तीन सौ पचास पुरूष, छब्बीस लाख उनयासी हजार पांच सौ अट्ठाईस महिला अउ तृतीय लिंग के साठ मतदाता हे। दूसर चरण के मतदान बर छै हजार पांच सौ सड़सठ मतदान केंद्र बनाय गेहे। एमा तेईस मतदान केंद्र मन ल संवेदनसील अउ चार सौ अंठावन केंद्र मन ल अति-संवेदनसील घोसित करे गेहे। दूसर चरण म स्वतंत्र अउ निष्पक्ष चुनाव संपन्न कराय बर सुरक्षा बल मन के दू सौ बाईस कंपनी तैनात करे गेहे। उहें, तीन हजार दू सौ तिरालीस केंद्र मन म वेबकॉस्टिंग अउ वीडियोग्राफी के बेवस्था करे गेहे। एखर माध्यम ले निर्वाचन आयोग ए केंद्र मन उपर नजर राखही।
मुख्य निर्वाचन पदाधिकारी ह बतइन कि कांकेर लोकसभा क्षेत्र के दुर्गम अउ संवेदनसील क्षेत्र मन म बहत्तर मतदान कर्मी अउ महासमुंद लोकसभा क्षेत्र के ंअंतर्गत गरियाबंद जिला के दू केंद्र मन बर पंद्रह मतदान कर्मी मन ल हेलीकॉप्टर ले भेजे गेहे। बांचे छै हजार पांच सौ छप्पन मतदान दल मन ल आज बस ले उंखर केंद्र बर रवाना करे गीस। दूसर चरण म करीबन तैंतीस हजार मतदान कर्मी मन के ड्यूटी लगाय गेहे। मतदान के दिन सबो केंद्र उपर मतदान दल के अलावा सात सौ पंद्रह सेक्टर अधिकारी तैनात करे गेहे, जउन हर दू घंटा म मतदान के प्रतिसत के जानकारी अपन पीठासीन अधिकारी ल बताही। दूसर चरण के चुनाव बर तीनों संसदीय क्षेत्र मन म कुल तीन सौ तीस संगवारी मतदान केंद्र बनाय गेहे, जेखर प्रबंधन महिला चुनाव कर्मचारी अउ सुरक्षाकर्मी मन डहार ले करे जाही। उहें, एक सौ सत्रह मतदान केंद्र मन के संचालन युवा मन डहार ले करे जाही। अइसने तीनों लोकसभा क्षेत्र मन म एक सौ बीस आदर्स मतदान केंद्र अउ पच्चीस दिव्यांग मतदान केंद्र बनाय गेहे। हरेक केंद्र म मतदाता सहायता बूथ स्थापित करे गेहे, जिहां मौजूद बीएलओ मतदाता सूची म उंखर नाम अउ सरल क्रमांक ढूंढे म मदद करही।
अमित शाह-बेमेतरा
प्रदेस म लोकसभा चुनाव के तीसर चरण बर प्रचार अभियान तेज हो गेहे। एखर तहत आने-आने राजनीतिक दल मनके स्टार प्रचारक अउ प्रमुख नेता सरलग आने-आने जघा मन म जनसभाएं लेवत हे। इही कड़ी म भाजपा के बड़का नेता अउ कंद्रीय गृहमंत्री अमित शाह काली दुरूग लोकसभा क्षेत्र के प्रत्यासी विजय बघेल के पक्ष म एक जनसभा ल संबोधित करही। ए जनसभा बेमेतरा के बेसिक स्कूल मैदान म होही। ए आमसभा ल लेके प्रदेस भाजपा के पदाधिकारी मन के संग राज्य सरकार के मंत्री अउ भाजपा नेता दयालदास बघेल ह सभा स्थल के निरीक्षण करीन। उहें, पुलिस प्रशासन ह घलो सभा स्थल के सुरक्षा के संबंध म तैयारी ल आखिरी रूप देहे।
उहें, भाजपा के बड़का नेता अउ मुख्यमंत्री विष्णुदेव साय काली जांजगीर-चांपा जिला के पहरिया गांव म सभा लिही।
एखरे संग कांग्रेस के राष्ट्रीय अध्यक्ष मल्लिकार्जुन खड़गे अट्ठाईस अप्रैल के जांजगीर-चांपा जिला के शिवरीनारायण म पार्टी प्रत्यासी डॉक्टर शिव डहरिया के समर्थन म आमसभा ल संबोधित करही।
भाजपा/कांग्रेस-पत्रकारवार्ता
प्रदेस भाजपा के प्रवक्ता संदीप शर्मा ह आज राजधानी स्थित पार्टी कार्यालय म पत्रकार मन ले गोठबात करत किहीन हे कि प्रधानमंत्री नरेंद्र मोदी के अगुवई म केंद्र म तीसर बखत सरकार बनतेच ही प्रदेस के सत्तर बछर ले जादा उमर के करीबन साढ़े आठ लाख लोगन मन ल आयुष्मान योजना के माध्यम ले मुफत म इलाज के सुविधा दे जाही।
दूसर कोति, कांग्रेस के राष्ट्रीय सचिव अउ प्रदेस के प्रभारी सचिव डॉक्टर चंदन यादव ह आरोप लगाइन कि भाजपा पूर्ण बहुमत हासिल करके देस के संविधान बदलना चाहथे कि, ओमन किहीन कि कांग्रेस भाजपा के अइसन परयास के विरोध करही।
दंतेवाड़ा-जवान मौत/घायल
दंतेवाड़ा अउ नारायणपुर जिला के सीमावर्ती इलाका म ड्यूटी के दौरान एक जवान के बंदूक ले दुर्घटनावस गोली चले ले, उहां मौजूद डिस्ट्रिक्ट रिजर्व गार्ड-डीआरजी के एक जवान जोगराज कर्मा के मौत होगे। उहें, एक आने जवान परसूराम अलामी घायल होगे हे। पुलिस के मुताबिक दंतेवाड़ा जिला के बारसूर इलाका म माओवादी मनके मौजूद होय के सूचना मिलतेच डीआरजी अउ बस्तर फाइटर्स के समलाट टीम ल तलासी अभियान म भेजे गे रिहीस हे। इही दौरान एक जवान के बंदूक ले अचानके गोली चल गे। ए घटना म घायल जवान ल सुघ्घर इलाज बर हेलीकॉप्टर ले रायपुर लाने गेहे।
शराब घोटाला मामला-हाईकोर्ट
प्रदेस म कथित सराब घोटाला मामला म एंटी करप्शन ब्यूरो अउ आर्थिक अपराध अन्वेसन साखा के एफआईआर ल चुनौती देने वाली याचिका मन उपर छत्तीसगढ़ उच्च न्यायालय म आज सुनवाई होइस। ए याचिका मनके एक संग सुनवाई करत हुए मुख्य न्यायाधीश रमेश सिन्हा अउ न्यायाधीश रजनी दुबे के युगल पीठ ह अभियुक्त बनाय गे, पूर्व आईएएस अधिकारी अनिल टुटेजा अउ उंखर बेटा यश टुटेजा ल देगे राहत जारी राखे हे। अदालत ह ए दूनों बर नो कोर्सिव एक्सन यानी गिरफ्तार नइ करे जाय ले जुडे़ राहत ल कायम राखही।
गौरतलब के मुताबिक इही मामला म पूर्व आईएएस अधिकारी निरंजन दास अउ कारोबारी विभू गुप्ता के याचिका म राज्य सरकार ह अदालत ले खुद किहीन हे कि ए मामला म अवइया सुनवाई तक कोनो गिरफ्तारी नइ होवय। ए मामला म प्रवर्तन निदेशालय ह अपन जवाब दाखिल करे बर अदालत ले समय मांगे हे।
जगदलपुर-भूकंप
जगदलपुर म पाछू रतिहा भूकंप के हल्का झटका महसूस करे गीस। राष्ट्रीय भूकंप अध्ययन केंद्र के मुताबिक जगदलपुर ले दू किलोमीटर दूर उत्तर-पूर्व म दू दसमलव छै तीव्रता के भूकंप आइस। अध्ययन केंद्र के मुताबिक भूकंप के ए झटका जमीन ले पांच किलोमीटर के गहराई म दर्ज करे गेहे।
महादेव सट्टा ऐप-आरोपी गिरफ्तार
पुलिस महादेव सट्टा ऐप मामला म पुलिस ह दू झिन आरोपी मन ल गिरप्तार करे हे। एमा ले एक आरोपी राहुल वकटे ल दिल्ली म अउ एक आने आरोपी रितेश यादव ल गोवा म पकड़े गीस। पुलिस के मुताबिक राहुल वकटे के नाम म तीन फर्म संचालित हे, जेखर माध्यम ले बड़का मात्रा म नगद रूपिया के लेनदेन करे गे रिहीस। उहें, दूसर आरोपी रितेश यादव पैनल संचालन करे के संगेच हवाला के माध्यम ले पइसा लेके आने आरोपी के मदद करत रिहीन। ए दूनों आरोपी लंबा समय ले फरार चलत रिहीन।