भारतीय जनता पार्टी के बड़का नेता अउ प्रधानमंत्री नरेंद्र मोदी ह आज सरगुजा लोकसभा क्षेत्र के अंबिकापुर नगर म आमसभा म बोलत आरोप लगइन कि कांग्रेस के परयास रेहे हे कि आदिवासी अउ अनुसूचित जाति के आरक्षण कमती करके धर्म के आधार म आरक्षण दे जाय। श्री मोदी ह किहीन कि कांग्रेस संविधान बदल के अनुसूचित जाति, जनजाति अउ पिछ़डे़ वरग के अधिकार अपन वोट बैंक ल देना चाहत हे। ओमन किहीन कि आरक्षण के रक्षा सिरिफ भाजपा ह कर सकत हे। श्री मोदी ह किहीन कि अइसन लोगन जउन भारत ल सक्तिसाली अउ आत्मनिर्भर नइ देखना चाहत हे। ओमन देस म विपक्ष के गठबंधन वाले कमजोर सरकार चाहत हे। केंद्र के भाजपा सरकार आतंकवाद अउ नक्सलवाद के खिलाफ कड़ा कार्रवाई करत हे। ओमन ह आरोप लगइन कि कांग्रेस ह हिंसा फलइया लोगन के समर्थन करथे।
लोकसभा चुनाव-दूसरा चरण
प्रदेस म लोकसभा चुनाव के दूसर चरण म राजनांदगांव, महासमुंद अउ कांकेर संसदीय क्षेत्र म आज संझा चुनाव प्रचार थम गे। अब प्रत्यासी घर-घर जाके लोगन ले मिलही। ये तीनों लोकसभा क्षेत्र म छब्बीस अप्रैल के मतदान होही। राजनांदगांव लोकसभा क्षेत्र के पंडरिया, कवर्धा, खैरागढ़, डोंगरगढ़, राजनांदगांव , डोंगरगांव अउ खुज्जी विधानसभा क्षेत्र म बिहनिया सात बजे ले संझा छै बजे तक वोट डारे जाही। उहें, मोहला-मानपुर विधानसभा क्षेत्र म बिहनिया सात बजे ले मंझनिया तीन बजे तक मतदान होही।
उहें, महासमुंद लोकसभा क्षेत्र के सरायपाली, बसना, खल्लारी, महासमुंद,राजिम , कुरूद अउ धमतरी विधानसभा क्षेत्र म घलो बिहनिया सात बजे ले संझा छै बजे तक मतदान होही। सिरिफ बिन्द्रानवागढ़ विधानसभा क्षेत्र के नौ मतदान केंद्र म बिहनिया सात बजे ले मंझनिया तीन बजे तक लोगन अपन वोट डार सकही। अइसने कांकेर लोकसभा क्षेत्र के सिहावा, संजारी-बालोद, डौण्डी लोहारा, गुण्डरदेही विधानसभा क्षेत्र म बिहनिया सात बजे ले संझा छै बजे तक वोट डारे जाही। संगेसंग अंतागढ़, भानुप्रतापपुर, कांकेर अउ केसकाल विधानसभा क्षेत्र म वोट डारे के बेरा बिहनिया सात बजे ले मंझनिया तीन बजे तक तय हे। ए तीनों लोकसभा क्षेत्र म तीन महिला उम्मीदवार समेत इकचालीस झन चुनाव मैदान म हे। एमा मुख्य रूप ले पूर्व मुख्यमंत्री भूपेश बघेल, संतोष पांडेय, ताम्रध्वज साहू, रूपकुमारी चौधरी, भोजराज नाग अउ बिरेस ठाकुर सामिल हे।
खबर के मुताबिक दूसर चरण म राजनांदगांव, महासमुंद अउ कांकेर निर्वाचन क्षेत्र म मतदाता मनके संख्या करीबन बावन लाख चौरासी हजार नौ सौ अड़तीस हे। दूसर चरण के मतदान बर छै हजार पांच सौ सड़सठ मतदान केंद्र बनाय गेहे।
मतदान कर्मी रवाना
दूसर चरण म छब्बीस अप्रैल के होवइया लोकसभा चुनाव बर मतदान करमचारी मन ल भेजे जावत हे। आज कांकेर लोकसभा क्षेत्र के नौ मतदान केंद्र बर बहत्तर मतदान करमचारी हेलीकाप्टर ले मतदान केंद्र बर भेजे गीस। अइसने महासमुंद लोकसभा क्षेत्र के गरियाबंद जिला दू मतदान केंद्र बर पंद्रह झिन मतदान करमचारी मन ल हेलीकाप्टर ले भेजे गेहे। उप मुख्य निर्वाचन पदाधिकारी अपूर्व प्रियेश टोप्पो ह रईपुर म पत्रकार मन संग गोठबात म ए जानकारी दीन। ओमन बतइन कि दूसर चरण म तीन हजार दू सौ तिरालीस मतदान केंद्र म वेबकॉस्टिंग कराय जाही अउ एखर मॉनिटरिंग बर राज्यस्तर म कमांड एण्ड कंट्रोल रूम बनाय गेहे।
लोकसभा-चुनाव प्रचार
प्रदेस म दूसर चरण के चुनाव प्रचार सिराय के बाद अब राजनीतिक पार्टी तीसर चरण बर जोर अजमाईस करत हे। प्रमुख पार्टी भाजपा अउ कांग्रेस के बड़े नेता चुनाव प्रचार ल लेके सरलग छत्तीसगढ़ के दउरा करत हे। भाजपा के बड़का नेता अउ केंद्रीय गृहमंत्री अमित शाह छब्बीस अप्रैल के दुरूग लोकसभा क्षेत्र के बेमेतरा म एक जनसभा लिही, उंखर दउरा ल लेके भाजपा ह तियारी सुरू कर देहे। दुरूग लोकसभा क्षेत्र ले विजय बघेल भाजपा उम्मीदवार हरय।
दूसर कोति, कांग्रेस के राष्ट्रीय अध्यक्ष मल्लिकार्जुन खड़गे के अट्ठाईस अउ सांसद राहुल गांधी के उनतीस अप्रैल के छत्तीसगढ़ दउरा प्रस्तावित हे। श्री खड़गे अट्ठाईस अप्रैल के जांजगीर म जनसभा ले सकत हे। ए लोकसभा क्षेत्र ले डॉक्टर शिवकुमार डहरिया कांग्रेस उम्मीदवार हे। उहें, राहुल गांधी के उनतीस अप्रैल के बिलासपुर म जनसभा प्रस्तावित हे। बिलासपुर ले कांग्रेस ह देवेन्द्र यादव ल टिकिट दे हे।
चुनाव प्रशासनिक तैंयारियां
प्रदेस म दूसर अउ तीसर चरण के लोकसभा चुनाव बर प्रशासनिक तियारी जोरदरहा होवत हे। खैरागढ़-छुईखदान-गंडई जिला म सत-प्रतिसत मतदान कराय बर व्यापक अभियान चलाय जात हे। जिला म छब्बीस अप्रैल के वोट डारे जाही। इंहा बीएलओ मतदाता पर्ची लेके घर-घर पहुंचत हे। उहें, बूथ स्तर के अधिकारी ह कलेक्टर चंद्रकांत वर्मा ल चुनई तिहार के नेवता दीन अउ मतदाता पर्ची देके छब्बीस अप्रैल के अपन पोलिंग बूथ पहुंचके मतदान करे बर न्यौता दीन। कलेक्टर श्री वर्मा ह जिला वासी मन ले सबो काम छोड़के सबले पहिली वोट डारे के अपील करीन।
उहें, बिलासपुर जिला म सात मई के होवइया चुनाव ल लेके कलेक्टर अवनीश शरण ह सेक्टर अधिकारी मनके बइठका लीन अउ चुनाव के तियारी ल देखिन। बइठका म कलेक्टर ह स्वीप कारीकरम ल बने ढंग ले चलाय अउ मतदान केंद्र तक मतदाता मन ल लाय बर कतकोन सुझाव दिही। मतदान बर घर-घर दस्तक अउ पीयूरा चांउर देके नेवता देके संगेसंग मतदान केंद्र म मतदाता मन बर पिये के पानी अउ घाम ले बांचे के बने बेवस्था करे के निरदेस दीन।
कांग्रेस अध्यक्ष ट्रेन यात्री
प्रदेस कांग्रेस अध्यक्ष दीपक बैज ह आज रईपुर रेलवे स्टेसन पहुंच के यात्री मन ले गोठबात करीन। ए दउरान मीडिया ले चर्चा करत श्री बैज ह किहीन कि गर्मी के छुट्टी चलत हे, अउ बर-बिहाव घलो होवत हे। अइसन म ट्रेन के रद्द होय अउ अबेर ले चले के सेति, यात्री मन ल बड़ परेसानी होवत हे। अट्ठारा ठिन ट्रेन ल फेर रद्द कर दे गेहे। ओमन आरोप लगइन कि देस म आज एक्को ट्रेन अइसन नइ हे, जउन बेरा म पहुंचत होही। पाछू तीन बछर ले छत्तीसगढ़ ले होके जवइया करीबन साठ हजार ले जादा ट्रेन ल रद्द करे गेहे।
कांग्रेस-निष्कासन
छत्तीसगढ़ प्रदेस कांग्रेस अध्यक्ष दीपक बैज ह संयुक्त महासचिव राघवेंद्र सिंह ठाकुर ल पार्टी संगठन के खिलाफ काम करे जाय के आरोप म कांग्रेस के प्राथमिक सदस्यता ले छै बछर बर निष्कासित कर देहे। ए संबंध म आज प्रभारी महामंत्री मलकीत सिंह गेंदू ह आदेस जारी कर देहे।
माओवादी आत्म समर्पण
दंतेवाड़ा जिला म अट्ठारा माओवादी मन ह आज पुलिस के आगू आत्म समर्पण कर दीन। खबर के मुताबिक लोन वर्राटु अभियान म ए माओवादी मन ह पुलिस अधीक्षक गौरव राय के आगू आत्म समर्पण करीन हे। ए सबो माओवाद भैरमगढ़ अउ मलांगीर एरिया कमेटी के सदस्य रिहीन।
सिकंदराबाद रेल मंडल के काजीपेट जंक्सन- कोंडापल्ली सेक्सन अउ विजय वाड़ा रेल मंडल के विजय वाड़ा गोधरा जंक्सन के बीच तीसर रेल लाइन के काम करे जाही। एखर सेति कोरबा-कोचूबेली एक्सप्रेस एक, चार, आठ, ग्यारह, पंद्रह अउ बाईस मई के रद्द रइही। अइसने कोचूबेली ले चलइया ए ट्रेन उनतीस अप्रैल दू, छै, नौ, तेरा, सोला अउ बीस मई के रद्द रइही।
उहें, विशाखापट्टनम-गांधीधाम एक्सप्रेस, पुरी-ओखा एक्सप्रेस अउ विशाखापट्टनम-निजामुद्दीन एक्सप्रेस आने रद्दा ले चलही।
अउ अब जानन मौसम के हाल…
प्रदेस म काली पच्चीस अप्रैल के एक-दू जघा म छुटपूट बरसा होय अउ गरज-चमक संग छींटा बौछार हो सकत हे। मौसम विभाग के मुताबिक प्रदेस के कतकोन जघा म हवा गरेर संग गाज गिरे के संभावना हे। उहें, अधिकतम तापमान म कोनो कीसम के फेर बदल नइ होवय।
‘‘मेरी सहेली‘‘, ‘‘ऑपरेशन मातृशक्ति‘‘
रेल मंत्रालय ह माईलोगन मनके सुरक्षित यात्रा बर ‘‘मेरी सहेली‘‘, ऑपरेसन मातृशक्ति‘‘ जइसन पहल सुरू करे हे। अभी महिला आरपीएफ कर्मी के दू सौ तीस ले जादा समर्पित ‘‘मेरी सहेली ‘‘ टीम ल देसभर के आने-आने रेलवे स्टेसन म तैनात करे गेहे, जउन चार सौ ले जादा ट्रेन ल कवर करथे अउ हरेक दिन करीबन चौदह हजार ले जादा महिला यात्री मन ल मदद देथे।