प्रदेस म लोकसभा चुनाव के दूसर अउ तीसर चरण म भाजपा अउ कांग्रेस संघरा आने-आने राजनीतिक दल मनके स्टार प्रचारक मनके सभा अउ रैली जारी हे। इही कड़ी म आज भारतीय जनता पार्टी के वरिष्ठ नेता अउ प्रधानमंत्री नरेन्द्र मोदी ह जांजगीर-चांपा लोकसभा क्षेत्र के सक्ती जिला के ग्राम जेठा म आमसभा ल संबोधित करीन। श्री मोदी ह किहीन कि कांग्रेस ह दुष्प्रचार करथे कि भाजपा ह संविधान ल बदल दीही या आरक्षण ल खतम कर दीहीं। ओमन ल लोगन ल विश्वास ल देवईन कि कोनों भी मनखे देस के संविधान ल नइ बदल सकय। श्री मोदी ह किहीन कि आजादी के बाद ले कांग्रेस ह तुष्टिकरण अउ वोट बैंक के राजीनीति करे हे, फेर भारतीय जनता पार्टी ह सबका साथ-सबका विकास के मंत्र म चलइया पार्टी हे। ओमन किहीन कि भाजपा के प्राथमिकता गरीब, युवा, महिला अउ किसान मनके कल्याण हे। श्री मोदी ह किहीन कि केन्द्र के भाजपा सरकार ह खेती-किसानी म माईलोगिन मनके भागीदारी बढ़ाय म जुटे हे। ड्रोन जइसन आधुनिक तकनीक ले खेती के लागत ले कम होही अउ ए ड्रोन क्रांति के अगुवई माईलोगिन मन करही। एखर बर ओमन ल ड्रोन पायलट के ट्रेनिंग दे जावत हे। भाजपा सरकार के लक्ष्य तीन करोड़ माईलोगिन मन ल लखपति दीदी बनाय के हवय। एखर ले स्व-सहायता ले जुड़े माईलोगिन मन ल फायदा होही।
ए मउका म मुख्यमंत्री विष्णुदेव साय, वित्त मंत्री ओ.पी. चौधरी, सांसद गुहाराम अजगले, पूर्व नेता प्रतिपक्ष नारायण चंदेल संघरा पार्टी के बड़े नेता अउ कार्यकर्ता मन संग बारह ठन विधानसभा क्षेत्र के लोगन बड़ संख्या म मौजूद रिहीन।
प्रधानमंत्री सभा-02
उहें, प्रधानमंत्री नरेन्द्र मोदी ह आज महासमुंद लोकसभा क्षेत्र के धमतरी म घलो आमसभा ल संबोधित करीन। ओमन किहीन कि छत्तीसगढ़ म भारतीय जनता पार्टी के सरकार बने के बाद भ्रष्टाचार के संगेच नक्सली हिंसा उपर काबू पाय गे हवय। श्री मोदी ह किहीन कि छत्तीसगढ़ म नक्सलवाद अब कम होवत हे। ओमन विश्वास देवईन कि नक्सलवाद ल जड़ ले खतम करके रइही। श्री मोदी ह किहीन कि केन्द्र सरकार डहार ले छत्तीसगढ़ के विकास बर कतकोन कदम उठाय गे हवय। राज्य म रेल, सिंचाई अउ इंटरनेट कनेक्टिविटी ल तेजी ले बढ़ाय जाही।
अपन दू दिन के छत्तीसगढ़ दउरा म श्री मोदी ह आज संझा रईपुर के राजभवन म रात्रि विश्राम करही। एखर बाद ओमन ह काली बिहनिया अंबिकापुर म आमसभा ल संबोधित करही।
उहें, भाजपा के वरिष्ठ नेता अउ मुख्यमंत्री विष्णुदेव साय छब्बीस अप्रैल के जांजगीर-चांपा जिला के ग्राम पहरिया म सभा लीहीं।
दूसर कोति, कांग्रेस के राष्ट्रीय अध्यक्ष मल्लिकार्जुन खड़गे अट्ठाईस अप्रैल के जांजगीर-चांपा जिला के शिवरीनारायण म पार्टी प्रत्याशी डॉक्टर शिव डहरिया के समर्थन म आमसभा ल संबोधित करही।
दूसरा चरण-मतदान
प्रदेस म लोकसभा चुनाव के दूसर चरण म राजनांदगांव, महासमुंद अउ कांकेर संसदीय क्षेत्र म काली संझा चुनाव प्रचार थम जही। एखर बाद प्रत्याशी मन घर-घर जाके जनसंपर्क कर सकही। ए तीनों लोकसभा क्षेत्र म तीन झन माईलोगिन संघरा इकचालीस झन उम्मीदवार मन चुनाव मैदान म हवय। एमा प्रमुख रूप ले राजनांदगांव लोकसभा संसदीय क्षेत्र ले कांग्रेस ह पूर्व मुख्यमंत्री भूपेश बघेल ल अउ भाजपा ह सांसद संतोष पांडेय ल चुनाव मैदान म उतारे हे। उहें, महासमुंद लोकसभा क्षेत्र ले कांग्रेस के ताम्रध्वज साहू अउ भाजपा ले रूपकुमारी चौधरी चुनाव लड़त हे। अइसने, कांकेर संसदीय क्षेत्र ले कांग्रेस ले बीरेश ठाकुर अउ भाजपा ले भोजराज नाग ह चुनाव मैदान म हवय।
दूसर चरण म राजनांदगांव, महासमुंद अउ कांकेर निर्वाचन क्षेत्र म मतदाता मनके कुल संख्या बावन लाख चौरासी हजार नौ सौ अड़तीस हे। एमा पुरूष मतदाता के संख्या छब्बीस लाख पांच हजार तीन सौ पचास अउ महिला मतदाता के संख्या छब्बीस लाख उनयासी हजार पांच सौ अट्ठाईस हवय। उहें, तृतीय लिंग के साठ झन मतदाता हवय। एखर अलावा दिव्यांग मतदाता मनके संख्या इंक्यावन हजार तीन सौ छह हवय। दूसर चरण के मतदान बर छह हजार पांच सौ सड़सठ मतदान केन्द्र बनाय गे हवय। एमा संवेदनशील मतदान केन्द्र के संख्या चार सौ अंठावन हे। उहें, पचपन ठन मतदान केन्द्र ल दूसर जघा ले जाय गे हवय। ए संसदीय क्षेत्र मन म छब्बीस अप्रैल के मतदान होही।
तीसरा चरण-मतदान
प्रदेस म लोकसभा चुनाव के तीसर चरण म रईपुर, दुरूग, बिलासपुर, जांजगीर-चांपा, रायगढ़, सरगुजा अउ कोरबा संसदीय क्षेत्र म सात मई के वोट डारे जाही।
इही बीच, रईपुर के जिला निर्वाचन अधिकारी डॉक्टर गौरव सिंह ह आज एक ठन पत्रकारवार्ता म बतईन कि ए संसदीय क्षेत्र म पैंतालीस झिन उम्मीदवार मन ह नामांकन दाखिल करे रिहीन। एमा ले तिलक सोनकर के नामांकन रद्द कर गीस। उहें, छह झिन उम्मीदवार मन ह नाम वापिस लीन। अइसने रईपुर लोकसभा क्षेत्र म अड़तीस झन उम्मीदवार मन चुनाव मैदान म हवय, जउन मन ल चुनाव चिन्ह दे दे गे हवय।
हनुमान जन्मोत्सव
हनुमान जन्मोत्सव आज छत्तीसगढ़ संघरा देसभर म श्रद्धा अउ उछाह के संग मनाय जावत हे। हनुमान जयंती चैत्र महीना के पूर्णिमा के दिन मनाय जाथे। ए मउका म देसभर के हनुमान मंदिर म आज बिहनियाच ले बिसेस पूजा-अर्चना के संग भंडारा कराय जावत हे।
हनुमान जन्मोत्सव के मउका म आज राजधानी रईपुर संघरा प्रदेस के सबो हनुमान मंदिर म श्रद्धालु मनके भीड़ देखे गीस। उहें, आने-आने जघा म सुंदरकांड अउ अखण्ड रामायण संघरा दूसर धार्मिक आयोजन करे जावत हे।
हेमचंद मांझी-पद्मश्री
राष्ट्रपति द्रौपदी मुर्मू ह काली राष्ट्रपति भवन म नारायणपुर जिला के छोटेडोंगर के प्रसिद्ध वैद्यराज हेमचंद मांझी ल पद्मश्री पुरस्कार ले सम्मानित करीन। पद्मश्री ले सम्मानित होय म मुख्यमंत्री विष्णुदेव साय ह श्री मांझी ल सुभकामना दीन हे। अपन संदेस म श्री साय ह किहीन कि करीब पांच दसक ले बस्तर संघरा पूरा छत्तीसगढ़ के ग्रामीण मन ल प्राकृतिक अउ किफायती स्वास्थ्य सेवा देवइया श्री मांझी के ग्रामीण स्वास्थ्य सेवा के क्षेत्र म निःस्वार्थ सेवा भाव हमर मन बर सीखे के लइक हे।
कांग्रेस-पत्रकारवार्ता
राज्यसभा सांसद रंजीत रंजन ह आज महासमुंद के कांग्रेस भवन म राखे गे एक ठन पत्रकारवार्ता म किहीन कि पाछु दस बछर म देस म बेरोजगारी ह चरम म पहुंच गे हवय। ओमन किहीन कि केन्द्र म कांग्रेस के सरकार बने म युवा मन ल रोजगार दे जाही। उहें, महालक्ष्मी योजना म माईलोगिन मन ल एक लाख रूपिया हर बछर दे जाही। श्रीमती रंजन ह किहीन कि कांग्रेस ह किसान मनके आमदनी ल दुगुना करे के संगेच मनरेगा के राशि बढ़ाही।
भाजपा-प्रवेश
सक्ती के पूर्व विधायक सरोजा राठौर अउ उंखर पति कांग्रेस के वरिष्ठ नेता मनहरण राठौर ह भारतीय जनता पार्टी म सामिल होगे हवय। सक्ती म आयोजित कार्यक्रम म प्रदेस भाजपा के चुनाव प्रभारी नितिन नबीन ह पार्टी प्रवेस करे म उंखर स्वागत करीन। ए मउका म वित्त मंत्री ओ.पी. चौधरी, भाजपा के लोकसभा प्रभारी गौरीशंकर अग्रवाल, पूर्व नेता प्रतिपक्ष नारायण चंदेल संघरा भाजपा के वरिष्ठ नेता मन मौजूद रिहीन।
समर स्पेशल ट्रेन
दक्षिण पूर्व मध्य रेलवे डहार ले गर्मी के मौसम म रेलगाड़ी म यात्री मनके जादा भीड़ ल देखत पुरी-उधना-पुरी के बीच सत्रह घांव अवई-जवई बर हफ्ता म दू घांव स्पेशल ट्रेन चलाय जाही। ए ट्रेन पुरी ले पच्चीस अप्रैल ले सत्ताईस जून तक हर सोमवार अउ गुरूवार के अउ उधना ले छब्बीस अप्रैल ले अट्ठाईस जून तक हर मंगलवार अउ सुक्रवार के चलही। ए गाड़ी मनके स्टॉपेज बिलासपुर, रईपुर, दुरूग अउ गोंदिया स्टेसन म दे गे हवय। ए गाड़ी म कुल सत्रह ठन कोच के सुविधा रइही।
अउ अब पेस हे मौसम के हाल…
मौसम विभाग ह अवइया चौबीस घंटा म प्रदेस म एक-दू जघा म हल्का बरसा होय के अउ गरज-चमक के संग छींटा पड़े के संभावना जताय हे। उहें, एक-दू जघा म अंधड़ चले के अउ आकाशीय बिजली गिरे के चेतावनी देहे। मौसम विभाग के अनुसार एक ठन द्रोणिक मराठवाड़ा ले दक्षिण केरल तक बने हे, जेखर असर ले प्रदेस के मौसम म बदलाव आय हे।
इही बीच, पाछु रतिहा राजधानी रईपुर संघरा प्रदेस के कुछेक जघा म अंधड़ संग हल्का बूंदाबांदी होइस।