प्रधानमंत्री नरेंद्र मोदी ह काली ले छत्तीसगढ़ के दू दिन के दउरा म आही। ए दउरान ओमन काली जांजगीर-चांपा लोकसभा क्षेत्र के सक्ति अउ महासमुंद लोकसभा क्षेत्र के धमतरी म होवइया जनसभा ल संबोधित करही। जेखर बाद प्रधानमंत्री ह रईपुर स्थित राजभवन म रतिहा रूकही अउ दूसर दिन चौबीस अप्रैल के श्री मोदी ह सरगुजा लोकसभा क्षेत्र के अंबिकापुर म सभा लिही।
प्रधानमंत्री के दउरा ल लेके प्रशासनिक तियारी पूरा होवत हे। रईपुर जिला के वरिष्ठ पुलिस अधीक्षक संतोष सिंह ह बतइन कि प्रधानमंत्री के दउरा म पांच ले छै लेयर म सुरक्षा बेवस्था करे जाही। राजभवन के तीन किलोमीटर के रेडियस ल ड्रोन बर नो फ्लाइंग जोन घोसित करे गेहे। उहें, तीर-तखार के जघा ल सीसीटीवी कैमरा के निगरानी म राखे जात हे।
राज्यपाल विश्वभूषण हरिचंदन ह आज प्रधानमंत्री के राजभवन म रतिहा रूके के तियारी ल लेके निरीक्षण करे के संगेसंग बड़का अधिकारी मन के बइठका लीन अउ जरूरी दिसा निरदेस दीन।
अमित शाह-कांकेर
प्रदेस म लोकसभा चुनई के दूसर अउ तीसर चरण के चुनावी प्रचार जोर पकड़ लेहे। भाजपा अउ कांग्रेस के संगेसंग आने-आने राजनीतिक दल के प्रचारक मन ह अपन पार्टी प्रत्यासी मनके समर्थन म रैली अउ सभा लेवत हे। इही कड़ी म आज भारतीय जनता पार्टी के बड़का नेता अउ केंद्रीय गृहमंत्री अमित शाह ह कांकेर म एक ठिन चुनावी सभा ल संबोधित करत किहीन कि देस म नक्सल वाद अब खतम होय के कगार म हवय। ओमन किहीन कि केंद्र म एक घाव फेर भाजपा के सरकार बनही, त अवइया दू साल म छत्तीसगढ़ ले नक्सलवाद ल खतम कर दे जाही। ओमन किहीन कि प्रदेस म भाजपा सरकार बने के बाद पाछू चार महिना म नब्बे ले जादा नक्सली मारे गेहे। एक सौ तेइस नक्सली मन ल गिरफ्तार करे गेहे अउ करीबन दू सौ पचास नक्सली मन आत्मसमर्पण करे हे। केंद्रीय गृहमंत्री ह नक्सली मन ले आह्वान करे हे कि ओमन आत्मसमर्पण करके समाज के मुख्यधारा म सामिल हो जाय नइ ते ओमन ल खतम कर दे जाही। ओमन किहीन कि पाछू दस साल के दउरान केंद्र म मोदी के सरकार ह आदिवासी मनके कल्याण बर कतकोन कदम उठाय हे।
ऐति, भारतीय जनता पार्टी के राष्ट्रीय अध्यक्ष जे.पी.नड्डा ह आज बिलासपुर लोकसभा क्षेत्र के लोरमी दुर्ग लोकसभा क्षेत्र के भिलाई अउ रईपुर लोकसभा क्षेत्र के चंदखुरी म पार्टी प्रत्यासी मनके समर्थन म जनसभा ल संबोधित करीन। ए मउका म ओमन कांग्रेस उपर दोष लगावत किहीन कि कांग्रेस ह तुष्टिकरण के राजनीति करथे उहें, प्रधानमंत्री के अगुवई म छत्तीसगढ़ म बिकास के कतकोन काम होय हे। ए मउका म उप मुख्यमंत्री अरूण साव के संगेसंग पार्टी के बड़का नेता अउ कार्यकर्ता मन सामिल होइन।
कांग्रेस-पत्रकारवार्ता
राज्यसभा सांसद अउ कांग्रेस के बड़का नेता राजीव शुक्ला ह भारतीय जनता पार्टी उपर कांग्रेस के घोसना पत्र के बारे म गलत ढंग ले प्रचार करे के आरोप लगाय हे। आज रईपुर म होय एक ठिन पत्रकारवार्ता म ओमन किहीन कि भाजपा ह संविधान ल बदल के लोकतंत्र ल खतम करना चाहथे। ओमन ह आरोप लगइन कि छत्तीसगढ़ म नक्सलवाद ल भाजपा ह बढ़ावा देहे। अब भाजपा ल चाही कि प्रदेस ले नक्सलवाद ल उही मन खतम करय।
नामांकन-नाम वापसी
प्रदेस म लोकसभा चुनई के तीसर चरण म आज सात ठिन लोकसभा क्षेत्र म नाम वापसी के बाद एक सौ सड़सठ उम्मीदवार मन चुनावी मैदान म हवय, जेमा एक सौ बयालीस पुरूष अउ छब्बीस झिन माईलोगिन प्रत्यासी सामिल हे। नाम वापसी के बाद सरगुजा लोकसभा क्षेत्र ले दस झिन प्रत्यासी मैदान म हे, त उहें, रायगढ़ ले तेरा, जांजगीर-चांपा ले अट्ठारा, कोरबा ले सत्ताइस, बिलासपुर ले सैंतीस, दुर्ग ले पच्चीस अउ रईपुर लोकसभा क्षेत्र ले अड़तीस झिन प्रत्यासी चुनाव लड़ही।
आज नामांकन वापसी के आखिरी दिन सरगुजा, रायगढ़, जांजगीर-चांपा अउ कोरबा लोकसभा सीट ले दू-दू झन प्रत्यासी मन अपन नाव वापिस लीन। त, ऐति बिलासपुर लोकसभा सीट ले पांच अउ रईपुर लोकसभा सीट ले छै झिन प्रत्यासी मन अपन नामांकन पत्र वापिस लीन। दुरूग लोकसभा सीट ले कोनो प्रत्यासी नामांकन वापिस नइ लीन।
जानबा के मुताबिक तीसर चरण के तहत ए सात संसदीय क्षेत्र मन म सात मई के वोट डारे जाही।
भारतीय सेना-प्रवेश परीक्षा
भारतीय सेना म भर्ती बर ऑनलाइन संयुक्त प्रवेश परीक्षा आज ले सुरू होगे हे। ए प्रवेश परीक्षा तीन मई तक चलही। ए परीक्षा तीन पाली म ले जाही। परीक्षा म भारतीय सेना के वेबसाइट म पंजीयन करइया उम्मीदवार मन सामिल हो सकही। सेना भर्ती कार्यालय के मुताबिक ए बार अग्निवीर कार्यालय सहायक के पद बर अर्जी करइया उम्मीदवार मनके टायपिंग टेस्ट घलो ऑनलाइन परीक्षा केंद्र म ही ले जात हे। ए परीक्षा बर प्रवेश पत्र भारतीय सेना के वेबसाइट ले डाउन लोड करे जा सकथे। छत्तीसगढ़ म रईपुर के संगेसंग भिलाई, दुर्ग, बिलासपुर अउ जगदलपुर म परीक्षा केंद्र बनाय गेहे।
आईईडी विस्फोट-ग्रामीण मौत
बीजापुर जिला म माओवादी मन डहार ले लगाय गे आईईडी के चपेट म आय ले एक झिन गांव के लोगन के मौत होगे। पुलिस अधीक्षक जितेन्द्र यादव ह बतइन कि पाछू बीस अप्रैल के गंगालूर थाना क्षेत्र के मुतवेंडी के जंगल म एक झिन गांव के मनखे ह कोनो-कोनो जिनिस ल सकेले बर गे रिहीन। इही दौरान हुरहा आईईडी विस्फोट होगे, जेमा ए मनखे के मौत होगे। ओमन बतइन कि जिला म एक महिना के भीतर आईईडी विस्फोट के तीसर घटना हरय।
मतदाता जागरूकता
प्रदेस म लोकसभा चुनई ल देखत लोगन मन ह वोट डारे एला जागरूक करे बर कतकोन करीकरम चलत हे। इही कड़ी म आज बिलासपुर जिला के कोटा ब्लाक के गांव गनियारी म नवा मतदाता अउ सियनहा मनखे मन ल सम्मानित करे गीस। स्व-सहायता समूह के माईलोगिन मन डहार ले राखेगे कारीकरम म जिला पंचायत सीईओ ओ.पी.चौहान ह मतदाता मन ल शॉल अउ श्रीफल भेंट करके सम्मान करीन। ए मउका म ओमन लोगन मन ल लोकतंत्र के परब म अपन भागीदारी निभाय अउ लोकतंत्र ल मजबूत करे बर वोट डारे के सपथ देवाइन।
त ऐति, दुरूग म नगर-निगम के स्वच्छता दीदी मन ह मतदाता जागरूकता ल लेके कतकोन करीकरम करत हे। इही कड़ी म काली रैली निकालिन अउ लोगन मन ल वोट डारे बर जागरूक करीन। ए मउका म स्वच्छता दीदी मन ह ‘‘सबसे पहले मतदान, उसके बाद दूसरा काम‘‘ के नारा लगाइन। संगेसंग लोगन मन ल पींवरा चंउर के संग नेवता देके लोगन मन ल जादा ले जादा मतदान करे के अपील करीन।
यूजीसी-नेट परीक्षा
विश्वविद्यालय अनुदान आयोग-यूजीसी ह घोसना करे हे कि चार वर्षीय स्नातक डिग्री धारक मन अब सोज्झे नेट के परीक्षा म सामिल हो सकथे अउ कोनो बिसय म पीएचडी कर सकथे, जिहां भी ग्रेडिंग प्रणाली के पालन करे जात हे, उहां उम्मीदवार मनके तीर कुल मिलाके कम ले कम पछहत्तर प्रतिसत अंक होना चाही। अइसन उम्मीदवार मन ल परीक्षा म सामिल होय के अनुमति दे जाही।
पृथ्वी दिवस
आज विश्व पृथ्वी दिवस हरय। विश्व म पर्यावरण ल बचाय के परयास म समर्थन बर ए दिन ल मनाय जाथे। एसो के बिसय हे-प्लैनेट वर्सिज प्लास्टिक माने पृथ्वी के संरक्षण के दिसा म प्लास्टिक ले होवइया प्रदूषण के समस्या ले निपटे अउ एखर प्रकृति उपर पड़इया परभाव ल दूरिहा करना हे।
अउ अब थोरकुन समाचार सार म –
– राज्यशासन ह भारतीय प्रशासनिक सेवा के बछर उन्नीस सौ निनान्बे बैच के अधिकारी सोनमणि बोरा ल केंद्रीय प्रतिनियुक्ति ले वापिस लहुटे के बाद आदिमजाति, अनुसूचित जाति, पिछड़ा वर्ग अउ अल्पसंख्यक विकास विभाग के प्रमुख सचिव के पद म पदस्थ करे गेहे।
– रेलवे पुलिस ह आज रईपुर रेलवे स्टेसन म एर्नाकुलम एक्सप्रेस ले पहुंचे एक झिन यात्री ले जांच के दौरान सात लाख पचास हजार रूपिया के नगद रासि के जब्ती करे हे। यात्री भाटापारा के रहइया हरय।
अउ
– सारंगढ़-बिलाईगढ़ जिला म खनिज विभाग के टीम ह भटगांव क्षेत्र म छापामार कार्रवाई करके अवैध खनिज परिवहन म लगे तीन ठिन जेसीबी, एक ठिन पोकलेन अउ पांच ठिन ट्रेक्टर ल जब्त करे हे।