प्रदेस म लोकसभा चुनई के दूसरइया अउ तिसरइया चरण के प्रचार जोरसोर ले चलत हे। भाजपा अउ कांग्रेस के संगेसंग आने राजनीतिक दल के स्टार प्रचारक मन अपन पार्टी के समर्थन म रैली अउ सभा करत हें। इही कड़ी म भाजपा के बड़का नेता अउ उत्तर प्रदेस के मुख्यमंत्री योगी आदित्यनाथ ह आज राजनांदगांव के कुमरदा गांव म भाजपा प्रत्यासी संतोष पांडेय के समर्थन म जनसभा ल संबोधित करिन। ए मउका म श्री योगी ह किहीन कि भाजपा सरकार प्रदेस म पिछड़ा वर्ग, आदिवासी अउ दलित मनके हित बर आने-आने कारज करत हे। उहें, कांग्रेस उपर निसाना साधत ओमन किहीन कि कांग्रेस ह युवा मन ल आतंकवाद के नांव म उकसाय के कारज करत हे, जब घला मउका मिलिस कांग्रेस ह छत्तीसगढ़ ल लूटे के मउका नइ छोड़िस। कारीकरम म प्रदेस के उप मुख्यमंत्री विजय शर्मा समेत पार्टी के बड़का नेता अउ जन-प्रतिनिधि मौजूद रिहीन।
उहें, कांग्रेस के राष्ट्रीय महासचिव प्रियंका गांधी वाड्रा ह आज बालोद जिला के हथौद म कांकेर लोकसभा ले कांग्रेस प्रत्यासी बिरेस ठाकुर अउ राजनांदगांव के मोहद गांव म भूपेश बघेल के समर्थन म रैली ल संबोधित करिन। ए बेरा प्रियंका गांधी वाड्रा ह किहीन कि देस म मंहगाई अउ बेरोजगारी चरम म हे। केंद्र सरकार ह उद्योगपति मन बर लाखों करोड़ रूपिया के कर्जा माफी करे हे, फेर किसान मनके कर्जा माफ नइ करिस।
ओमन किहीन कि छत्तीसगढ़ म कांग्रेस सरकार ह पांच बछर म लोगन के समस्या ले दुरियाय रिहीस। जदि केंद्र म कांग्रेस के सरकार आही, त महालक्ष्मी योजना सुरू करे जाही। एखर तहत माईलोगिन मन ल हर बछर एक लाख रूपिया दे जाही। कारीकरम म कांग्रेस के प्रदेस प्रभारी सचिन पायलट, प्रदेस अध्यक्ष दीपक बैज समेत पार्टी के बड़का नेता अउ कार्यकर्ता मौजूद रिहीन।
मतदाता जागरूकता-01
प्रदेस म लोकसभा चुनई बर लोगन ल वोट डारे के सेति जागरूक करे बर आने-आने कारीकरम के आयोजन करे जावत हें। इही कड़ी म रईपुर के सुभाष स्टेडियम म अंतर विभागीय स्वीप क्रिकेट प्रतियोगिता के तहत काली फाइनल मैच स्मार्ट सिटी अउ पुलिस विभाग के बीच खेले गिस, जेमा पुलिस विभाग के टीम ह विजेता बनिस।
अइसने ढंग ले रइपुर जिला के अभनपुर म मतदाता पहचान पर्ची अउ मार्गदर्सिका बांटके लोगन ल खच्चित रूप ले वोट डारे बर केहे जात हे।
उहें, जांजगीर-चांपा जिला म स्वीप संध्या के आयोजन करे गिस। कारीकरम म जिला निर्वाचन अधिकारी आकाश छिकारा के संगे आने-आने स्कूल के लइका अउ दिव्यांगजन सामिल होइन।
अइसने, गौरेला-पेण्ड्रा-मरवाही जिला म घलो डाइट के अध्यापक अउ छात्र मन कठपुतली नाच के माध्यम ले मतदाता जागरूकता अभियान चलइन। ए मउका म कठपुतली के संवाद के जरिया ले लोगन ले मतदान म अपन भागीदारी निभाय के अपील करिन।
लोकसभा चुनाव-नामांकन
प्रदेस म लोकसभा चुनई के तिसरइया चरण के तहत रइपुर समेत सात संसदीय क्षेत्र म काली नांव वापसी के आखिरी दिन हे। उम्मीदवार मन काली मंझनिया तीन बजे तक अपन नांव वापस ले सकहीं।
एखर ले पहिली, काली नामांकन पत्र मन के जांच करे गिस। एमा ले एक सौ सत्यासी उम्मीदवार मन के नामांकन वैध पाय गिस। उहें, बाइस झन के नामांकन रद्द कर देय गिस।
बतादन कि प्रदेस सात लोकसभा क्षेत्र- रइपुर, दुरूग, बिलासपुर, सरगुजा, जांजगीर-चांपा, रायगढ़ अउ कोरबा म सात मई के दिन वोट डारे जाही।
अनिल टुटेजा-ईडी कार्रवाई
प्रवर्तन निदेसालय-ईडी ह कथित सराब घोटाला मामला म आईएएस अधिकारी अनिल टुटेजा ल गिरफ्तार कर लेहे। उहें, पूछताछ के बाद ओखर बेटा यश टुटेजा ल छोड़ दे गिस। ईडी के अधिकारी मन अनिल टुटेजा ल पुलिस रिमांड म लेके पूछताछ करहीं।
बताय जावत हे कि दूनों बाप-बेटा ल प्रदेस के एंटी करप्शन ब्यूरो के डाहर ले तीन घांव समन भेजे गे रिहीस, फेर ओमन एसीबी के मुख्यालय म हाजिर नइ होइन। एखर बाद ब्यूरो के अधिकारी मन ओमन ल दफ्तर बुलाके पूछताछ करीन। बतादन कि ईओडब्ल्यू ह अनिल टुटेजा उपर कथित सराब घोटाला मामला म केस दर्ज करे हे।
स्कूल-अवकाश
प्रदेस म भारी गर्मी के सेति स्कूल शिक्षा विभाग ह काली बाइस अप्रैल ले पंद्रह जून तक स्कूल मन ल बंद राखे के निर्णय लेहे। जारी आदेस ले स्कूल मन म काली ले पंद्रह जून तक गर्मी छुट्टी दे जाही, फेर छुट्टी ले शिक्षक मन ल अलग राखे गेहे।
माओवादी मुठभेड़
बीजापुर जिला म आज सुरक्षाबल के संग होय मुठभेड़ म एक झन माओवादी मारे गिस हे। जिला के भैरमगढ़ थाना इलाका म माओवादी मनके आय के खुफिया जानकारी ले डीआरजी जवान मन तलासी अभियान म गे रिहीन हे। इही बेरा आज बिहनिया केशकुतुल के जंगल म पुलिस अउ माओवादी मनके बीच मुठभेड़ होइस, जेमा एक झन माओवादी मारे गिस। मउका ले हथियार, विस्फोटक अउ आने-आने माओवादी जिनिस बरामद करे गेहे।
दुर्घटना-जवान घायल
बस्तर जिला के कोड़ेनार थाना क्षेत्र म जवान मनले भरे बस अंते-तंते होके पलटे ले बारह झन जवान घायल होगिन। एमा सात झन जवान ल थोरकिन लागे हे। उहें, पांच झन जवान मनके इलाज डिमरापाल मेडिकल कालेज अस्पताल म चलत हे, जिंखर हालत खतरा ले बाहिर हे।
बताय जावत हे कि मध्यप्रदेस सशस्त्र बल के जवान बस्तर म पहिली चरण के लोकसभा चुनई बर मतदान के बाद दंतेवाड़ा ले गरियाबंद जावत रिहीन। इही बेरा उंखर बस ह बस्तर के डिलमिली गांव के तिर पलट गिस।
ओति, रायगढ़ जिला के अमलीडीह गांव म एक ठन गाड़ी पलटे ले बीस झन माईलोगिन घायल होगिन, जेमा ले पंद्रह झन माईलोगिन के इलाज घरघोड़ा के सामुदायिक स्वास्थ्य केंद्र अउ पांच झन के इलाज मेडिकल कालेज अस्पताल म चलत हे।
ऐति, सक्ति जिला के चरौदी गांव म एक ठन गाड़ी ह दू ठन मोटरसाइकिल
ल टक्कर मार दिस। हादसा म एक झन युवक के मौत होगे। उहें, चार झन आने लोगन घायल होगें।
उहें, जांजगीर-चांपा म मोटरसाइकिल सवार दू झन युवक नहर म गिरके बोहा गिन। एमा ले एक झन युवक के लास मुनुंद गांव अउ दूसर के लास धुरकोट गांव ले बरामद करे गिस।
कांकेर-माओवादी पहचान
कांकेर जिला के छोटेबेठिया थाना इलाका म बीते सोलह अप्रैल के सुरक्षाबल के संग होय मुठभेड़ म मारे गेय माओवादी मनके चिन्हारी कर ले गेहे। एमा दस झन माओवादी मध्यप्रदेस-महाराष्ट्र अउ छत्तीसगढ़ जोनल कमेटी के बताय गिन हें। उहें, चौदह झन माओवादी पी.एल.जी.ए. के सदस्य बताय जावत हें।
जिला के पुलिस अधीक्षक आई. के. एलेसेला ह बतइन कि चिन्हारी के बाद ए माओवादी मनके खिलाफ पंजीबध्द अपराध, लंबित वारंट अउ घोसित इनाम के बारे म आने-आने जिला ले जानकारी ले जावत हे।
भाजपा-प्रवेश
जनता कांग्रेस छत्तीसगढ़ माने (जेसीसीजे) के पदाधिकारी अउ जनप्रतिनिधि समेत अब्बड़ झन कार्यकर्ता भारतीय जनता पार्टी म सामिल होगिन हे।
महावीर जयंती
चौबीसवां अउ आखिरी जैन तीर्थंकर भगवान महावीर के जयंती आज देसभर म भारी उछाह के संग मनाय जावत हे। ए मउका म छत्तीसगढ़ म घलो जैन समाज के डहार ले आने-आने कारीकरम के आयोजन करे जावत हे। महावीर जयंती के मउका म राष्ट्रपति, उप राष्ट्रपति अउ प्रधानमंत्री नरेंद्र मोदी ह घलो बधई अउ सुभकामना देइन हें।